Ślonske Zoo

[broneknotgeld]

Kukowka

Jojka w inksze gniozda ciepie
Bo na swoje dzieci hepie
Dyć skiż tego - mie sie zdo
Łona durś te kuku mo.

[broneknotgeld]

Rekin

Rekin we wodzie sie topi
Musi durś pływać - to skopi
We tym podobny do ludzie
Ździybko to możno go studzi.

[broneknotgeld]

Jymiołuszka

Jymiołuszka skiż jymioły swoje miano nosi
Ło jagody tyj rośliny niy yno sie prosi
Że nasionek zaś niy trowi - wszyńdzie niymi sro
Z tego ptoka i jymioła pożytek swoj mo.

[broneknotgeld]

Wycie wilkow

W lutym wilki koncyrt dajom
Wataha już wiosna czuje
W tym miesioncu fest sie pszajom
Wycie sie po lesie "suje".

[broneknotgeld]

Ło kopruchu

Choć kopruch krwiopijcom jest
Niy trza wnerwiać sie niym fest.

[broneknotgeld]

Masara

Masara we kuchnia wleciała
Do żuru se zanurkowała
Dyć na wiyrch już niy wypłynyła
Tref chcioł że tyn żur pożyniyła.

[broneknotgeld]

Sikorka

Choć my we Polsce sympow niy momy
To tego ptoszka wszyscy tu znomy
A łon jak w lesie nastanie zima
Zowdy sie ciepnie tyż na padlina.

[broneknotgeld]

Dalmatyńczyk

To jest taki pies na kropie
Wiela prowdy we tym chopie
Jak łoszczyni ci sie suka
Kropow jeszcze niy trza szukać.

[broneknotgeld]

Hercyńske kanarki

Hercyńske kanarki nojpiykni śpiywajom
Jednak jak samiczki przi siebie niy majom
Dyć tako u ludzi - przi ślubny chop cicho
Głośny jest we knajpie jak te piwsko gicho.

[broneknotgeld]

Kanarkowe szczyńście

Jak kanarek śpiywoł dziubek mioł zamkniynty
Ślubny zaroz przi tym aż polyły piynty
Bo dziuba swojego niy mogła łotworzyć
I czowiek se szczyńściym troszeczka mog pożyć.

[broneknotgeld]

Kanarek z bergmonym

Kanarek z bergmonym som razym na wieki
Łoba skiż matowy zamknyli powieki
A możno wykończoł ich łobu tyn tlynek
Tako ło tym myśloł jak urosnoł synek.

[broneknotgeld]

Ślonski hazok

Już go u nos prawie niy ma
Bestoż smutny to jest tymat
Dyć przikludzać je zaczyli
Krojcokow se wymyślyli.

[broneknotgeld]

Kruk

Kruk we familiji wierny
Na cudze łon niypazerny
Modymi sie opiekuje
I krukowo mu sztimuje.

[broneknotgeld]

Ło żubrze

Ponoć chcom żubry puścić w Bieszczady
Pomysł to zocny - niy łod parady
Potym w Słowacjo i Ukraina
Wielko zaś bydzie jego dziedzina.

[broneknotgeld]

Pryndke szpoki

Szpoki wiosny niy czekały
Coś za pryndko przileciały
Teroz przidzie im głodować
Ciynżko przeca tu zimować.

[broneknotgeld]

Czorno żaba

Czorno żaba w Indiach łostatnio łodkryli
Dyć ducha Skarbnika ponoć w niyj zaklyli.

[broneknotgeld]

Czajka

Pon czajka wiyncyj frelek tyż miywo
Wszyskim dogodzi - przeca tak bywo
Loto ze gniozda potym do gniozda
Bo łojciec modym tyż musi coś dać.

[broneknotgeld]

Bociek

Bociek fest pszoł grinerowi
Kombinowoł - Jak mu powiy?
Wyńście take z tego znod
Że skiż pszonio żaba zjod.

[broneknotgeld]

Cietrzewie

Na Ślonsku znojdziesz je w Karkonoszach
Pewno tokujom terozki
Dyć dej im pokoj - ło to cie prosza
Kokoty majom dość troski

"Frelki" siwawe i niypozorne
Wybrać se muszom "karlusa"
Zolyty niy śmiom tu iść na morne
Do pszonio czas już se ruszać.

[broneknotgeld]

Bociek

Z żabom na zolyty chodzioł
Dyć jyj nigdy niy dogodzioł
W końcu wnerwioł sie tym fest
Klapnoł dziobym - dobro jest!

[broneknotgeld]

Polski bociek

Na świecie dzisioj co szworty bociek
Mo polski dowod - ta prowda znocie.

[broneknotgeld]

Bonk

Dziwiom sie ludzie - czamu yun bonk loto
Krzidła mo malutke i wielgachne toto
Krasikoń nojbardzi raduje se z bonka
Bo by tyż bez niego inkszo była łonka.

[broneknotgeld]

Pasikonik

Pasikonik w trowie brzynczy
Chciołby głosno - dyć sie mynczy
Kaj do ciyrczka zielonego?
Może jodłym być łod niego.

[broneknotgeld]

Woł

Chop mo dwie nogi a woł te sztyry
Dyć wszysko razym to przeca gyry
Choć woł łod chopa wiyncy jich mo
Coś mu brakuje - tako sie zdo.

[broneknotgeld]

Forum Zwierzęta

Możno sie przido komuś link taki
forum.gazeta.pl/forum/71,1.html?f=128
Dyć jo niy wklejom tego dlo "draki".

[broneknotgeld]

To ci kot

Miast gonić myszy zoglondoł w zdrzadło
Dyć se przidało ze kota sadło.

[broneknotgeld]

"Szmaterloki w brzuchu"

"Szmaterloki w brzuchu" tego jeszcze niy mom
Dyć bebech mi rośnie - schowia je przed zimom.

[broneknotgeld]

Modraszek

Czyście już poznali tego szmaterloka?
Bez mrowek niy byłoby cołkym boroka
Łone jego larwa do mrowiska taszczom
Kurde - swe potomstwo "kładom" przed tom paszczom.