Ze Rudy i ło Rudzie

[broneknotgeld]

Ponoć magistrat stoji łotworym
Nowych etatow tam pełne wory.

[broneknotgeld]

Nasz "piyrszy po Bogu" pedzioł take zdanie
"Rodzina jest ważno w życiu niysłychanie"
-Choby łona była tako trocha "nostra"
Bydzie jom tu wspiyrać tym inkszym na postrach.

[broneknotgeld]

Rozum w Rudzie mo deficyt
Mankym ciongnie łod Fryncity
Tam kaj Urzond stoji miasta
Ździebko brak go - no i basta.

[broneknotgeld]

Rachunki

Rachowali w miastach koszty ich rzondzynio
Ruda we tym tyż mo coś do powiedzynio
Wyszło że beamtry kosztujom za wiela
We naszym urzyndzie majom dobro sztela.

[broneknotgeld]

Oczyszczalnio

Oczyszczalnio "Barbara" lepi w Rudzie hulo
Ponoć już terozki dobrze to sie kulo
Farorz po bożymu wszyściutko pokropioł
A jo w tyj intyncji tyz porzondnie popioł.

[broneknotgeld]

Rudzki cud nad urnom

Przi wyborach radnych w Rudzie
Szłoby godać coś ło cudzie
Głosy tukej sie traciyły
Jakeś gymby je przepiyły?!

[broneknotgeld]

Rudzke radio majom w planie
Bych sie nawet cieszoł na nie
Yno że jo tak to widza
-Władzy mo sie radio przidać
Sami siebie bydom kadzić
Bestoż radiu tymu radzi
Ichnie przeca "Ślonske Media"
Tako rudzko to komedia.

[broneknotgeld]

I zaś podwyżka

Ło dwanoście procynt czynsze nom dzwigajom
Chocioż lokatory nic z tego niy majom
Gminne downo droższe jest łod społdzielczego
Ta nowo podwyżka nazwia - "Wesołego"

Widać to jest taki richtig rudzki trynd
Urzond nasz mo dobry do piniondza pynd
No bo przeca inksze we tym mocno bije
Że łod łba pierońsko z potmaneja pije

No i niy ma - zlituj. Niy pomogom radni
Bo w tym jednym przeca tyż łoni zaradni
Diety muszom dostać yno - MAKSYMALNIE
Jak urzond se wiyncyj tych piniyndzy garnie.

[broneknotgeld]

Anioł

Anioła Limburga chcom chronić - jak słysza
Tyj rudzki kulturze za sukces to pisza

Możno i notgeldy zacznom być tu w zocy
Som siebie to życza ze caluśki mocy.

[broneknotgeld]

Dolina Kłodnicy

"Szczelnica" już piykno - miastu za to chwała
"Dolina Kłodnicy" durś jest we ruinie
Jakoś rybka złoto by sie nom przidała
Spełniyła życzynie ło piykny "Dolinie".

[broneknotgeld]

Pympek w Chebziu

Chebzie pympkym GOPu - to ci pomysł wielki
Na razie to jednak yno duperelki.

[broneknotgeld]

"Mikołaj"

Ktoś jednak myśli ło tym we Rudzie
Czy "Mikołaja" zachwać pódzie
Po naszym "Wawlu" pamiontka tako
Szło by jom tukej retować jako

W nadszybiu zrobić galerio sztuki
Wciepnońć tam cosik tyż dlo nauki
No i rozrywki trzeba nom przeca
Wszysko ze tego rudzkego neca.

[broneknotgeld]

Rudzke "Izby"

Muzyka we "Izbie" pijokom serwujom
I łoni sie przi niyj richtig relaksujom
Pomysł już Magistrat łod niych pryndko chycioł
Tyż swojim petyntom taki numer wycioł

Bo przeca w Urzyńdzie czowiek cały w nerwach
I jakoś ukojić trza jego zło werwa
Wyciszyć i poddać urzyndnika woli
Choć nic niy załatwi to mniyj go zaboli.

[broneknotgeld]

Nasz wongel

Ruda wonglym stoji
Dyć teroz sie boji
Jedna gruba myni
Wiela tukej zmiyni

Bezrobocie w gora
Zbiydnieje ta dziura
A jak wiyncy nyndzy
W doł idzie sie pryndzy.

[broneknotgeld]

Łodpust! Dyć niebo ślinto nom fest
Cosik niydobrze ze nami jest
Pewnie za wiela my nagrzeszyli
Że Bozia chmurska nad nami chyli
A jo sie ciesza bo w strugach dyszcza
Łodpust swych grzychow terozki zyszcza!

[broneknotgeld]

Sztafeta

Naszo sztafeta już w drodze jest
Leci na krzidłach anioła
Ruda im doping dowo tyż fest
W drodze do gowy Kościoła.

[broneknotgeld]

Minerały na płotnie

We rudzkim muzeum jest tako wystawa
Ponoć jyj autorka czeko wielko sława
Jo tego winszuja ze całyj swyj duszy
By sie nawet kamiyń przi łobrozku wzruszył.

[broneknotgeld]

Na byzuchu

Na Halymbie przi cmyntorzu
"Gasthaus" piykny ktoś łotworzoł
Gości ciyngym zaproszajom
Bo ich ponoć mało majom

Po somsiedzku zaś kwatera
Niy pasuje mi - cholera!
Geld w "Gasthausie" lepi straca
I Halymba ubogaca.

[broneknotgeld]

ISO tyż chce Urzond Miasta
Trza to szczimać no i basta.

[broneknotgeld]

Z Urzyndu Miasta

Certyfikowanie to jakoś zaraza
Urzond Miasta teroz tyż ło to sie bije
MPGM ścigo - jo ło tym niy marza
Bo wiym jak lokator w komunalce żyje.

[broneknotgeld]

Wystawa szmaterlokow w Plazie

Szmaterloki w Plazie wyglondajom piyknie
Kolorow we tynczy pewnie im niy styknie
Dyć szkoda że życio już downo niy czujom
Bo je entomolog na szpyndlik se ujon.

[broneknotgeld]

We Bielszowicach tyż momy strusie
Jajca durś robiom ze tego tu sie.

[broneknotgeld]

Urzond to sługa miasta
Miasto - tyż jo i basta.

[broneknotgeld]

Inkubator czeko - teroz jajec czeba
Możno łod fyniksa bo łon bliży nieba.

[broneknotgeld]

Czegoś brakuje we Rudzie - pra?
No richtig - przeca dzielnicy "dwa"
Ale sie Szwarcwald poleku budzi
Możno sie udo na mapa wkludzić.

[broneknotgeld]

Halymbsko szopka

Na stary Halymbie już szopka łotwarto
Przidźcie se łoglondnońć bo to przeca warto
Yno tukej w Rudzie chodzom se figury
Do tego śpiywajom tyż anielske chóry

Ruszo po połedniu w soboty niydziele
Wlyź - boczno kaplica w halymbskim kościele
Bez tydziyń tyż puszczom jak żeś w wiynkszy grupie
Ale ło to jednak na fara zaklupej.