1wallenrod
12.05.14, 08:44
Nie ma różnicy,wszak ci to jest to samo:
Felieton Marka Szołtyska pisanego śląską gwarą.
Zagwozdka na kerchowie
Na kerchowie we Rudach wele Rybnika je grob fest zocnego niymieckigo lykorza Juliusza Rogera (1819-1865). Łon niy yno lyczoł za darmo biydnych Ślonzokow, niy yno doprowadzioł do powstowanio trzech lazarytow we Rybniku, Rudach i Pilchowicach. Łon tyż jak mioł czas, to dlo szpasu zbiyroł chroboki i szmaterloki, a nojbardzioj to łazioł po wsiach i zbiyroł downe ślonskie pieśniczki.
A jak ich mioł wiyncyj jak piynset, to we 1863 roku wydoł je wszyjske po polsku we ksionżcek, kero zamianował "Pieśni Ludu Polskiego na Górnym Szląsku"(!). I tam tyn Niymiec naszkryfloł ofyn we wstympie, że: "lud wiejski gornoślonski praje wszyndzie we przewożajoncyj czynści je polski".
I te szkryflanie o polskości Ślonska fest sie niy zdało Niymcom, a nojbardzij hercogowi we Rudach. A jak lykorz Roger umrził we rudzkich lasach, to jedni padali, że dostoł hercszlagu a inksi, że keryś go zaszczeloł ze flinty. Yno jedyn kuczer niyskorzij po latach mioł sie wygodać, że hercog posłoł go wtedy szpecjalnie po szwestery do Rybnika, kere miały oporzondzić Rogera do truły – bo chcieli we tajemnicy mieć to, jak jego ciało wyglondało przed śmierciom. Yno ta zagwozdka umrzinio lykorza Rogera została jeszcze tajymniczo naszkryflano na jego pomniku na rudzkim kerchowie, kaj je niymiecki szrajbunek: "Rod je tyn, kery mo staranie o biydoczku /…/" i pod spodkiem je "Psalm 11,2". Jak se jednak wejrzycie do Biblijki to psalm tyn godo inakszyj: "Dyć grzyszniki łuk naciongajom, wrażajom szczała na sznora, coby po ćmoki uszczelić zocne syrca".
A dyć karnijcie sie na kerchow do Rud i dejcie se pozor na tyn grob Rogera i tyn szrajbunek, a obejrzycie, że ze umrziniym tego zocnego lykorza to je naprowdy zagwozdka.
