broneknotgeld
21.02.06, 00:00
"Czi dymby"
Piyrwyj czi dymby stoły we lesie
Pilchowiczany je znały
W strona Smolnicy kerego niesie
Toż tam wytrzyszczoł durś gały
Co tu sie dzioło dość wiekow tymu
W niyszczynsny ziymi glywicki
Coby łopisać niy styknie rymu
Dyć powspominać trza wdycki
Coś poł Europy już wojnom żyło
Ponboczka kożdy mioł w gymbie
A przeca życie wiela straciyło
Wojoki to niy gołymbie
Wojska Mansfelda tyndy wrocały
Wiela po drodze łupiyły
Na wiynksze miasta tyż porywały
-Glywice se łobroniyły
Fest okolica z tym uciyrpiała
Choć protestancko tyż była
Wojna nikomu niy folgowała
A łostro kosa durś tnyła
Na pilchowickich włościach pułk stoji
Skarbczyk przi niymu jest zocny
Ciongnońć go dali cosik sie boji
Wodz jejich niy był już mocny
Jak "czi korony" te dymby w lesie
Znak to dlo Szwedow szczyńśliwy
Z tym swoja kasa wojok tam niesie
A przeca jyj był pragliwy
Że tu se wroci kożdy rachowoł
Ze wiynkszom siyłom najedzie
Zabiere wszysko co piyrwyj schowoł
Z bogactwym bydzie na przedzie
Dyć tref niy zwoloł już wiyncy na to
Drzewa skarb wielki czimały
W zły czas ta sztela zdo sie sagato
-Łone dać tego niy chciały
Podobnoś nawet wiela szukało
Jednak niczego niy znodli
Przeklynte miejsce sie wydowało
Krew kożde złoto upodli
Coś na Rzyketce lyniwie pływo
Dymbow już nawet niy szukej
Przeca to godoł jakiś "podziwok"
Bestoż po gowie se klupej.