Kwiotki i inksze ziyla

[broneknotgeld]

Angelske ziyle

Kolumb je we "Indiach" znoloz
Rośnie tam do dzisioj
W Hameryce - bo tam poloz
Choć za to niy wisioł

Niy ma już Aztekow państwa
Co mieli je w zocy
Wszysko skiż Hiszpanii draństwa
- Zabrakło im mocy

We tym ziylu jyj szukali
Miało siyły mnożyć
W szokolada je sypali
By starości dożyć

Anglijokom we Europie
Przipadło do gustu
A za niymi wszyskim - chopie
Rzońdzi kuchniom już tu

Wywar z niego ponoć dobry
Na zszarpane nerwy
Dyć w tym polskim środku "kobry"
Trza by pić bez przerwy

Z bebechami mosz problymy
Tyż ziyle pomoże
Zagro po niym fest "łorkestra"
Na tym "wielkim dworze".

[broneknotgeld]

Lubczyk

Lubczyk do maggi nom dodowajom
Pewno dlotego ludzie se pszajom.

[broneknotgeld]

Ło lubczyku

Skiż pszonio go niy bierymy
Chocioż wiara cuda działo
Dyć te ziele chyntnie jymy
Jak sie nyrkom cosik stało

Trzewia nasze mo w łopiece
Na wontroba tyż pomoże
Czasym zgaga w gordle piecze
Lubczyk ulżyć we tym może.

[broneknotgeld]

To ci ziyla

Wiymy już że se godajom
Tom aromom kero majom
Łod źdźbła do źdźbła klachy lecom
Dyć jo sie tym niy podniecom
Niych mi ściynto trowa "pachnie"
Ździybko dali tyż siyrp ciachnie.

[broneknotgeld]

"Lebiodka"

Wszyńdzie jest jyj tela
Przeca "pospoloto"
Szkryfnońć sie łośmiela
Dyć werci sie i to

Ziyle przeca zocne
Z olejku durś słynie
W mitologii mocne
Szczyńściym we rodzinie

Z Afrodytom "kroczy"
Wszysko przez aroma
Parkom brakło nocy
Jak woniała w doma.

[broneknotgeld]

Ło lebiodzie

Tyż na cmyntorzu spotkosz lebioda
Spokoju duszy mo łona dodać
Jak widać siyła te ziyle mo
Na tym i tamtym świecie - sie zdo.

[broneknotgeld]

Zioła prowansalske z kuchni przeca znomy
We nich tyż lebiodka pospolito momy.

[broneknotgeld]

Na trawiynie

W "zioła prowansalskie" sypiom ta lebioda
Coby ludziom chyńci do jedzynio dodać
Zowdy przi niyj lepsze czowiek mo trowiynie
No i tyż pomoże ci na wyprożniynie.

[broneknotgeld]

Olejki lebiody

Dobre som do inhalacji
Retnom twoje płuca
Zaroz prziznosz ździybko racji
Jak przestaniesz kucać.

[broneknotgeld]

Gardynia

Aleksander Garden doł miano kwiotkowi
Żył łon w Hameryce - kożdy ci to powiy
Tam ze Chin te krzoki downo sprowadziyli
Z pomocom Gardena pryndko rozmnożyli.

[broneknotgeld]

Lawynda

Jyj suszone kwiotki żołondkowi służom
Z lawyndom zarozki lepsze jest trowiynie
Bier jom jak festelnie cie cosik tyż wkurzo
To pewne że potym nerwow ukojynie

Nyrki trza przeczyścić - łona ci pomoże
Smak na dobre żarcie pryndziutko tyż przidzie
Ziyle to jest dobre - dziynki Panie Boże
Bo wspiyro czowieka przi niyjedny biydzie.

[broneknotgeld]

Aroma lawyndy ci chopa przigoni
Szczyńściym mol to niy jest bo te przeca goni.

[broneknotgeld]

"Lavo" - kompać

Dyc sie już Rzymiany w tym ziylu kompali
I bestoż lawyndom pryndko je nazwali.

[broneknotgeld]

Lawyndowe smarowidła

Olejki lawyndy do maści durś tkajom
Bo ty naszy skorze przeca pomogajom
Swyndzynie ustanie z grzibami se radzi
I rany zagoji - niczym niy zawadzi.

[broneknotgeld]

Inhalacje

Dobre na oskrzela no i tyż te płuca
Ze lawyndom pewno przestaniesz nom kucać
Trza byś jednak robioł czynsto inhalacjo
Pryndko sie przekonosz że we tym jest racjo.

[broneknotgeld]

Waleriana

Kozłek na ziyle tyż czynsto godajom
Dyć niy yno skiż tego tyj roślince pszajom
Bo przeca "valere" to znaczy - być zdrowym
Tela wszyskim tukej po swojymu powiym.

[broneknotgeld]

Lukrecjo

Znojdziesz jom w bombonach
We gumie, herbacie
I w camfpaście łona
Nawet w piwie bracie.

[broneknotgeld]

Na co dobro?

Pomoże ci przeca przi wrzodach żołondka
W rymie, łosłabiyniu (jak przekopiesz grzondka)
Że na popynd dobro nikierzy godajom
Choć inksi łodwrotne zdanie ło tym majom.

[broneknotgeld]

Dziywanna

Z Itaki Odysa - ponoć to godajom
Przed czarami Kirke dziywanna chroniyła
Bestoż jyj i dzisioj wiela ludzie pszajom
Wierzom że w niyj siedzi jakoś wielko siyła.

[broneknotgeld]

Ło dziywannie

Dziywanna pomoże jak cie gardło mynczy
A i przi żołondku jakby myni jynczysz
Pryndzyj przi niyj nawet zagoji sie rana
I we nerwobolach zaśpiywosz "Łoj dana".

[broneknotgeld]

Por

Mosz ryjmatyka to wcinej pora
Myni łodwiydzać bydziesz dochtora
Nyrkom tyż czasym łon by sie przidoł
A i karmioncym matkom goch by doł.

[broneknotgeld]

Kawa

Ponoć piyrsze były cigi
Żarły kawa na wyścigi
Potym chycioł sie jyj czowiek
Czuł że przi niyj wroco zdrowie.

[broneknotgeld]

Krasikoń

Krasikoń czi listki mo
Jak Świynto Trojca. Czy mi sie zdo?
Dyć taki tyż jest tyn znak Patryka
Z niym we Irlandii durś gro muzyka.

[broneknotgeld]

Ponboczku za ta
dziynki tomata

Tomata na chandra pomoże
Z niom szczimiesz tyż kosza łod frelki
Dyć dziynki Ci za to moj Boże
Żeś stworzoł tomata - boś wielki.

[broneknotgeld]

Jak jest czowiek fest bachraty
Wcinać musi durś tomaty
Niymi nikt sie niy zapasie
A bas myńszy jest po czasie

Bo tomata na trowiynie
Na łodtrucie i czyszczynie
Sama mo kalorii mało
By z niyj sadło sie zebrało.

[broneknotgeld]

Dlo zdrowio

We tomacie witaminy
I te sole mineralne
Som dlo zdrowio twyj rodziny
Z niymi zowdy mondre szwarne.

[broneknotgeld]

I krebsa postraszy tomata
Na stare wspomoże tyż lata
Toć serce i nyrki łochroni
Niyjedna choroba przegoni.

[broneknotgeld]

Róża kłodzko

Pełnik europejski różom kłodzkom zwany
Zowdy był na Ślonsku przeca podziwiany.

[broneknotgeld]

Flider

Z flidrym cołkym wiosna momy
Dyć to wszyscy wiymy
Woniom jego se dziwomy
Koniec to tyż rymy.

[broneknotgeld]

Kasztanowiec

No dyć jak zowdy kwitnom kasztany
Znak maturzystom takowy dany
Trza sie im bydzie napocić trocha
Niym szkoła richtig powiy - wynocha!

[broneknotgeld]

Azalie

Azalie sie aszom
wielokolorowo
Gryfne swojom krasom
tako im sie zdowo.

[broneknotgeld]

Kwiycie akacji

Wonio akacjo słodko we nocy
Ponoć to ludziom dodowo mocy
Na "Noc Kupały" szykujom forma
Trza psoć sie wtedy wiyncy niż norma

Lipsta z liplingym kwiycie woniajom
Zaroz sie do sia coś bardzi majom
Już świyntojański niy trza im nocy
Styknie se bliknońć prosto we łoczy.

[broneknotgeld]

Grejpfrut

Dar Barbadosu jakby dlo świata
Łon może wrocić ci młode lata.

[broneknotgeld]

To ci kiście

Grejpfruty rosnom jak winogrona
Chcesz to sie możesz ło tym przekonać
Ale w Europie drzewek niy szukej
W Azji, USA za niymi klupej.

[broneknotgeld]

Przi krebsie miażdżycy grejpfrut ci pomoże
Łodmłodzi cie nawet - za to dziynki Boże.

[broneknotgeld]

Kasztany

Niyjedna frelka kasztany pieści
Jedyn we rynce sie zowdy zmieści.

[broneknotgeld]

Cześnie

Na astach cześnie już żdżejom
Łoczy mi do nich sie śmiejom.

[broneknotgeld]

Strelicjo krolewsko - "rajski ptok"

Dziko rośnie we Afryce
Pewno ło tym wszyscy wiycie
Krewni ziyla - toż banany
Łony kwiot ciekawy dany

Ksiynżno of Meclenberg-Strelitz
Miano dała take jeji
Ślubnom krola Anglji była
Stond "krolewsko" se zrobiyła.

[broneknotgeld]

Jydz grejpfruty

Grejpfruty jydz czynsto - rubaśny czowieku
Woga z niymi spadnie choć możno poleku
Łon gorzki i bestoż naprowdy jest zdrowy
Niychej niy wyleci już ci to ze gowy.

[broneknotgeld]

Szparag

Niy dziwota że Chińczyki afrodyzjak w niym widzieli
Jak na niego sie bliknyli zaroz potym frelki chcieli
Jeszcze bardzi dyć na Chinki te warzywko durś działało
Wziyła yno je do rynki - coś se w myślach kajsik tkało

Prowda jednak cołko tako - Wszysko skuli wyobraźni
Co zmysłami se rożnymi chuć wyciongo nom ze jaźni.

[broneknotgeld]

Niyciyrpek

Niy ciyrpi wiatru - słonca łostrego
No i jak sucho w korzyniu jego.

[broneknotgeld]

Begonia

Łod Begona miano se tyn kwiotek wzioł
Łon gubernatorym na Antylach boł
W Brazylii go piyrszy francuski mnich znod
Plumier sie nazywoł - z begonii był rod.