broneknotgeld
23.08.11, 10:49
Ślonsko Polska?!
Roztomili moji - jako z nami bydzie?
Zdo sie co we Polsce ta ślonskość fest w biydzie
A przeca w niyj wiela ideji, kultury
Kto kuknie na forum - wiy - leci do gory!
Leci forum wiyrchym, cosik tu tworzymy
Z naszom ślonskom duszom wiela poradzymy
Tyż obywatelske durś widać ideje
Kierzy tu szkryflajom, som echt-dobrodzieje
Dyć sie tymu trzeba richtig podziwować
Możno cołki Polsce jako muster dować
Niy ło forum yno po prowdzie w tym idzie
Możno "Ślonsko Polska" zocnom bardzi przidzie
Ano, już ferajna "Polski Ślonzek" momy
Jakby z miyndzywojnia we dziedzinie znomy
Zdo sie co w tym widać ducha Grażyńskiego
Kery niszczoł prawie co łod Korfantego
Ech, Rzeczpospolito już niy sanacyjnom
Choć probujom straszyć jakby łod lwa myjnom
Choć cosik fandzolom, że "opcjo niymiecko"
"Separatystami" czynstujom zdradziecko
Djoseckim łogonym czy na mszo kajś dzwoniom?
Ślonzokym postraszom? Łod Polski łodgoniom?
Kuknom na nos wszyskich jako na bebokow?
Łodrom z etniczności? Wygoniom bez zokow?
Dyć idzie sie wrocić do łodległy pory
Kej Piast boł Wygnańcym, choć piyrwyj syniorym
Kej droga Tatarom grodziyła Legnica
Kej Ślonzek w Europie jak szmaragdu lica
Czy "Światłym ze Ślonska" Polska poprowiymy?
Czy jom tako bardzi dźwignońć poradzymy?
Jako na pytania łodpowiedzi dować?
A dyć trza by było piyrwyj choć sprobować
Zdo sie co ku tymu przidatno fest godka
Trza ze niom zablyńdzić - Polsce tako potkać
Trza by modno stała, by jom mieli w zocy
Dziynki niyj echt-Polok przeglondnie na łoczy
Kuknie i uwidzi cuda wele siebie
Ło piekle przepomni, choć jeszcze niy w Niebie
Kunszt kery durś grzeje zocno ślonsko dusza
Ze godki - toż trza z niom w "podboj" Polski ruszać
Ślonzok to poradzi? Dyć sie przekonomy
Ważne co chyńć tako we sercu durś momy
Ważne coby chyńciom piekła niy brukować
Yno ze niom tworzyć, ze niom durś budować.
