Ło bergmonach, wonglu i grubach

[broneknotgeld]

Już żech kedyś wyciongoł ze rudzkego forum ździybko takich rymowanek na piwno
biesiada gorniczo. Terozki jednak dostoł żech ze kryngow zawodowych signal
coby zrychtować ekstra wontek, bo nikomu se niy chce grzebać za tym na forum.
Możno richtig lepi jak to bydzie zebrane w kupie.
Jakbyście cosik do takego wontku mieli, to tyż wciepcie.

[broneknotgeld]

Niych świynto Barborka tymu patronuje
forum.gazeta.pl/forum/72,2.html?f=28940&w=24395563&a=24395591
I rym se tu drapko jak ze taśmy suje.

[broneknotgeld]

Jo ło nasze gruby durś sie teroz boja
No bo we gornictwie jo robia i moja
Dyć w Rudzie tu bydom dopiyro problymy
Zamknom tukej gruby - na fecht se pódymy.

[broneknotgeld]

Piyńć kopalń

Piyńć kopalń we Rudzie nom jeszcze fedruje
Dyć jakoś terozki coś ze tym sie psuje
Jak zamknom choć jedna ze grubow tych naszych
Bezrobocie tukej pierońsko postraszy.
-
forum.gazeta.pl/forum/71,1.html?f=28940

[broneknotgeld]

Nasz wongel

Ruda wonglym stoji
Dyć teroz sie boji
Jedna gruba myni
Wiela tukej zmiyni

Bezrobocie w gora
Zbiydnieje ta dziura
A jak wiyncy nyndzy
W doł idzie sie pryndzy.

[broneknotgeld]

Ze Barborkom jako bydzie?
Juzaś latoś przeca przidzie!

[broneknotgeld]

Ech - już drapko - se niy zdowo
Aże w łoczach karczma stowo.

[broneknotgeld]

Ech ty grubo - durś fedrujesz
Ze Ponboczkym tyż kuplujesz
Pot zmiynić umisz w krew
Żol tych co łodeszli - ech.

[broneknotgeld]

No dyć trza wontek wyciongnońć wyży
Bo ta Barborka coroz to bliży.

[broneknotgeld]

Coby wszysko szło do przodka
forum.gazeta.pl/forum/72,2.html?f=28940&w=31702301&a=72018877
Trza promować - ło tym godka.

[broneknotgeld]

Ech - take czasy
Skarbnik nos straszy
Dyć czasym klupnie kilofym w berga
Człowiek przi niymu ciyngym gro cwerga.

[broneknotgeld]

No, dyć już dzisioj prawie Barborka
Toż aż furkocom na czakach piorka.

[broneknotgeld]

Choć niy Barborka
Dom to na gorka.

[broneknotgeld]

Szola w gora, szola w doł
Z rymym tako poł na poł.

[broneknotgeld]

I w tym cosik

www.wiadomosci24.pl/artykul/choc_styczniowo_barborkowo_123344.
html

Jako "grosik".

KWK "Wawel"

[broneknotgeld]

Gruby już niy ma - dyć coś łostało
Pamiyńć we Rudzie to tyż niymało.

[broneknotgeld]

Luftkolejka we Rudzie

Gornoślonske cudo - linowo kolejka
Taszczyła durś wongel - niy to co ta "Elka"
Szkoda że jom tukej zbulyli już downo
Teroz by to była atrakcjo szykowno.

[broneknotgeld]

Szyb "Franciszek"

"Francek" ze "Wawla" w Rudzie nom stoji
Zabytek z niego zrobiyli
-"Cechowni teroz już niy ma moji"
Tak se we nocy łon kwili.

[broneknotgeld]

Szyb "Minerwa"

Przi cmyntorzu w Rudzie
Stoła sie "Minerwa"
We bergmońskim trudzie
Miała wielko przerwa

Jeszcze przez lot wiela
Ludzie tam miyszkali
Dyć w końcu ta sztela
Trza było łobalić.

[broneknotgeld]

Szyb "Klara"

Piykne miano pełne słońca
Bestoż możno niy mo końca
Tyn szyb jeszcze stoji w Rudzie
Niych trwo jak nojdużyj pudzie

[broneknotgeld]

Nasze szyby

"Francek" "Jan" i tyn "Bartosz" - szyby "Walyncioka"
Kere piyrwyj szachtami "Brandenburga" były
Stoły rzyndym przi glajzach - blikały z wysoka
Na rudzianki co łokna w familokach myły.

[broneknotgeld]

Rudzki "Walenty"

Sto lot stoł "Walenty" piyrwyj "Wolfgang" zwany
Wyglondoł pokracznie - dyć był podziwiany
Jego tukej miano miała tyż koksownia
Teroz wrak jyj straszy ekologow co dnia.

[broneknotgeld]

Szyb "Leon"

Dyć "Leona" już niy ma choć stoł dugo tukej
I zostawioł po siebie durś wyraźne ślady
Jego wieży na prożno we tyj Rudzie szukej
Niy trza już go nom było - na to niy ma rady.

[broneknotgeld]

Karmaniol

Karl i Emanuel - dwa szyby w Rudzie
W historio naszo sie piszom
Kedyś w bergmońskim służyły trudzie
Dzisioj we nazwie je słyszom
Rudy kawołka tego jyj konska
Na kery Karmaniol jo godom
Bo tak godali ołpy ze Ślonska
Tak żech to słyszoł za młodu
Jednak łostatnio te stare miano
Polszczom mi tukej pierońsko
Bo je Karmańskim prosto nazwano
Traconc historio ta ślonsko.

[broneknotgeld]

"Brandenburg"

Rudzkich grub to była ołma
Rokow tymu ćwierć tysionca
Bergmon stond sie broł do doma
Tyn zaklynty konsek słońca

Wongel - Ślonska piykny skarb
Kery łogrzoł go we zima
Nikt niy godoł że to garb
Ale ludzi tych już niy ma.

[broneknotgeld]

"Mikołaj"

Ktoś jednak myśli ło tym we Rudzie
Czy "Mikołaja" zachwać pódzie
Po naszym "Wawlu" pamiontka tako
Szło by jom tukej retować jako

W nadszybiu zrobić galerio sztuki
Wciepnońć tam cosik tyż dlo nauki
No i rozrywki trzeba nom przeca
Wszysko ze tego rudzkego neca.

Szyb "Andrzej"

[broneknotgeld]

broneknotgeld 30.09.2003 22:22 + odpowiedz


To żech napisoł poł roku tymu
Choć niy po ślonsku to jest do rymu
Dyć polsko-ślonsko jest moja dusza
Beztoż sie wkleić tukej to skusza

Szyb Andrzej

Wirecki "Andrzej" z krymska się nosi
Jednak minęły dni jego chwały
O renowację dzisiaj się prosi
Bo już niedługo może stać cały

Dzisiaj iskierka nadziei błysła
By miasto zdobił w pełnej swej krasie
A zamiast węgla książka tam przyszła
Tak napisano w lokalnej prasie

Czarnym pokładem znów nas obdarzy
Liter z milionów książkowych stronic
Zróbmy to szybko co nam się marzy
Bo czas niemiłosiernie już goni.

Bibliotyka w szybie - piykno to ideja
Klackom tymu mocno - wcale sie niy śmieja.

[broneknotgeld]

Możno "Andrzej" nom łodżyje
Ździybko blysnoł - sie niy kryje.

[broneknotgeld]

Miesionc minie - zaś Barborka
Trza łodkurzyć z czaka piorka.

[broneknotgeld]

Zaś bergmonow piykne świynto
Ślonzek ło nich niych pamiynto.

[broneknotgeld]

"Szychta"

Ze stary lampki łona sie wziyła
"Die Schit" - toż "warstwa" łoleju była
-Tela na dniowka se wypolało
Tako i szychta bergmona cało.


"Sztajger"

"Steigen" - dyć złazić trza po drabinie
We ćmok ty gruby - poznać po minie
Że mu niy zowdy ze tym wesoło
Możno skiż tego sztajger na bioło.


"Górnik"

Za "skarbami" w gorze sznupoł
Ciyngym w środku tako klupoł
"Hornikym" po czeski stronie
"Berg" tyż gorom we "bergmonie".

Ornontowicke gruby

[broneknotgeld]

"Leopold" - 1798

Heydebrand gruba tu łotwar tako
Po niym se Winkler "chycioł" fedrować
Jakeś poł wieku było jednako
We końcu prziszło jom "zaryglować".

[broneknotgeld]

"Porembski Wunsch" - 1830

"Życzoł" sie Porembski tego
By loz wongel dlo istnego.

[broneknotgeld]

"Bremsky Wunsch" - 1845

Piyrwyj ta gruba łod Porembskiego
Miano zmiyniyła jak brakło jego.

[broneknotgeld]

Dekret krolewski 19.II.1756

Toż Fryderyk Wielki dekret taki wydoł
Co we ziymi jego - regaliow se przidoł
Ze tym teroz wongel bogactwym korony
Już bez wiedzy skarbu fedrunek wzbroniony.

[broneknotgeld]

Prawo Gornicze dlo Ślonska i Hrabstwa Kłodzkego
5.VI.1796

Urzond Gorniczy teroz wachowł
By wonglo możny tyż niy rabowoł
Bo chocioż panym na ziymi swoji
Skarbow dobywać som niych se boji.

[broneknotgeld]

Do 2,5 hektora

Tela mieć mogło jedne nadanie
Z czasym za mało dyć se to stanie
Toż trza już było konsolidować
By wonglo richtig wiela fedrować

Kopalnio "Knurow"

[broneknotgeld]

Kopalnia "Knurow"

Knurow żywiyła i okolice
Dyć nawet dzisioj to niy som wice.

[broneknotgeld]

15.VI.1903

Gustaw von Velsen kozoł budować
Gruba dlo skarbu pruskego
Trza geldu było na to wydować
Dyć w końcu profit był z tego.

[broneknotgeld]

I kolanijo (1904)

Choć gruba ciyngym jeszcze w budowie
Toż rośnie już kolanijo
Coby mog miyszkać po blisku czowiek
Tako i myńszo mecyjo.

[broneknotgeld]

XII.1905

Piyrszo szachta już zgłymbiono
Kosztowało możno słono
Dyć geld zwroci sie sto razy
Tako jak von Velsen marzy.

[broneknotgeld]

Piyrszy wongel (1906)

Ano - we tym roku piyrszy wongel dali
Potym coroz wiyncy ciyngym fedrowali.

[broneknotgeld]

VI.1908 - IV szachta

Choć czecio zasuli jednak szworto kopiom
Tako se do wonglo knurowskego dropiom
Przeca Pole Zachod niy śmi czekać dugo
Zdo sie do Velsena łone ciyngym mrugo.

[broneknotgeld]

Barborka 1908

Już we cechowni Barborka majom
Zowdy bergmony do Niyj rzykajom
Niym zjadom na doł coby fedrować
Toż świynto bydzie sie opiekować.

[broneknotgeld]

VII.1909

Na czi szychty teroz bergmon już fedruje
Łoziym godzin styknie - łon som tako czuje.

[broneknotgeld]

Już szkolom (1911)

Już przi ty grubie bergmonow szkolom
Coś muszom umieć by zjechać szolom
Fach jest we gowie tako i rynkach
Trza tyż porzykać - niym grubsko mynka.

[broneknotgeld]

III.1912

Już bergmony tu sztrajkujom
Mało geldu w kapsi czujom
Dyć Skarb Pruski twardo stoji
Nawet zwolniać se niy boji.

[broneknotgeld]

Bateryje koksownicze - 1913

Wongel tukej zdo sie na te bateryje
Toż ze gazym myńsze w tych stronach mecyje.

[broneknotgeld]

IV szachta fertig (1915)

Choć wojna w Europie fertig szachta szworto
Ze tym cołko gruba zdo sie wiyncy worto.

[broneknotgeld]

200 bab na grubie (1916)

Chopy na wojnie - baby sie zdadzom
Dyć czy fedrować łone poradzom?

[broneknotgeld]

Wrocajom z wojska (1917)

Na wschodzie tako mniyj trza wojoka
Toż z frontu wroco - tu musi "skokać"
Przeca "maszyna" wojny światowy
Bez wonglo stanie - kożdy to powiy.

[broneknotgeld]

W lagrze - 24.XII.1918

Z tym dniym już jyńce na doł niy zjadom
Toż lager przeca niy jest paradom
Tako z Godami wolność se wziyli
-Już jyj terozki niy popuściyli.

[broneknotgeld]

IV kolanijo 1919

Toż familokow ciyngym przibywo
Niych to nikogo tukej niy dziwo.

[broneknotgeld]

28.VI.1922 "Knurow" w "Skarbofermie"

Toż se granice poprzestowiały
"Skarboferm" profit mo w tym niymały
Polsko francuski tyn gyszeft przeca
Fest bergmońskego chycioł sie neca.

[broneknotgeld]

"Foch" -1922

Ferdynanda Focha - marszałka zocnego
Miano szachcie "Szworty" tyż dali do tego.

Kopalnia "Glywice"

[broneknotgeld]

Wiliam Sauermondt (1873-1900)

Ździybko to trwało
Zaniym se stało
Dyć przemysłowiec nadania zbiyro
Za koksujoncym wonglym zaziyro
Bo już we Niymcach go coś brakuje
Tu trza fedrować - tako rachuje.

[broneknotgeld]

Skonsolidowano kopalnia "Gliwice"
26.01.1901

Na szesnostu polach ażse rozłożyła
Toż obszarym tako richtig wielko była
Ano niy dziwota - we dwudziestym wieku
Co rosnie to epne - wiysz ło tym człowieku.

[broneknotgeld]

2400 hektorow z hokym

Toż pola gornicze cuzamyn rachujom
Choć wiyrchym niy widać kaj prawie fedrujom.

[broneknotgeld]

3047 hektorow (1921)

Chnet pola nowe dokuplowali
Ze Sobieszowic tyż tako brali
Toż gruba ciyngym se rozwijała
I zbyt na wongel we Niymcach miała.

[gryfna_frelka]

Ja lubię piwo imbirowe.
Po nim mi piknie szumi w głowie.

Pamiontkowo Ksiynga Kuchni

[broneknotgeld]

"Pamiontkowo Ksiynga Kuchni"
Toż zarozki jyj niy buchni
Z Parzyjagłom se zaczyno
Ty coś dopisz tukej yno.

[broneknotgeld]

Historyjo tako powiy
W ratownictwa setnym roku
Niych se kożdy ło tym dowiy
Kuchorz w zocy u borokow
Co przi cycku ślubny niy som
Yno tu na Okryngowy
Alarm czynsto tyż usłyszom
I se cisnom w woz bojowy

[broneknotgeld]

W akcjo im ze głodym jechać?
Toż łosłabliby na grubie!
Szczyńściym niy ma tego pecha
Kuchorz w nosie tu niy dłubie

Tygle, gary i brytfanki
Nudelkule i kwyrlołki
W ruch durś idom nawet kanki
Trza se mynczyć ze tym "stołkym"

[broneknotgeld]

Czy wieczerzo, czy śniodanie
Zowdy musi dyć smakować
Myńsze stotkow pomywanie
Jak brzuch pełny - wolno głowa
No i siyły w muskle idom
We ty służbie trza mieć para
Niy śmisz w kuchni być łobrzidom
Kunsztym blysnońć mosz przi garach!

[broneknotgeld]

Parzyjagła

Parzoł jagły coś za długo
Powiym tako - społ przi garach
Teroz aż ze strachu mrugo
Klupie po talyrzach wiara.

[broneknotgeld]

Istnego znocie?

Ryśka Parzyjagły znocie?
Niy godejcie że głod mocie
Bo jak wieprzki wos uposie
Na tym istny przeca zno sie.

[broneknotgeld]

Zastymp frelek

Kurdebele!
Zastymp frelek
Rysiek kedyś tyż ugościoł
Bo bez ślubny se napościoł.

[broneknotgeld]

Rysiek Parzyjagła - nominowany do nagrody Złoty Nudelkuli

Handszriftami potwierdzomy
Parzyjagły w zocy momy
Niy struł karlus z nos żodnego
A sposobność mioł do tego
Głod przi niymu nic niy tropioł
Much we zupie tyż niy topioł
Stoł przi garach wiela rokow
By futrować nos borokow.

[broneknotgeld]

Złoto Nudelkula jego!
Prawie piyrszo dyć do tego
przisiyngomy - jom dostanie
Jak tu juzaś z nami stanie.

[broneknotgeld]

22 roki Ryśka Parzyjagły

Dwadziścia dwa roki Rysiek tu kucharzoł
Szymocha w pichcynie go łostro wprowadzioł
Jeszcze za komuny dyć przeca to było
Niy kożdy pamiynto jako se nom żyło

Ech - roki leciały a łon ciyngym warzy
Ło inkszym kuchorzu "Sośnica" niy marzy
PRL upodo - RP "trzecio", "szworto"
Kuchnia jako piyrwyj ciyngym wiela worto

Zdo sie co to bydzie richtog tragedyjo
Jak do Parzyjagły klupnie ta -"Pyndzyjo"
Gary mu łodstawić zarozki tyż koże
Chocioż pogotowie głodne być niy może

Jako mu łosłodzić ta gorzko rozłonka?
Coby w swojich płaczkach gyrow niy chcioł tonkać
Toż trza nuedlkulom go złotom nagrodzić
By pyndzyjonista we chwale mog chodzić!

[broneknotgeld]

Omlety cipkowe a'la Parzyjagła

Ze dwa funty trza filetu
Z cipek - ano juz bez gnatow
Łolyj kery zamiost fetu
Możesz kupić przed wypłatom

Poł tuznia jajek - tako
-łyżek momni kartoflany
-majonezu tyż jednako
Żech przipomnioł se nad ranym

Łoj - cebule jeszcze sztyry
Sol, pieprz, inkszo tyż prziprawa
No, "Vegeta" - byda szczyry
Dyć trza zacznońć już zabawa

Wpiyrw pokrychom cipki w kostka
I jajcami je zaleja
Majonezu dodom troszka
Skiż cebuli se niy śmieja

Dom jom drobno posiekano
Płaczki mi do ślypiow ciśnie
Dyć cuzamyn wymieszano
Jako ze szpyronia wiśnie

W końcu wsypać trza prziprawy
Łolyj gorki toż smażymy
Ktosik głodny? Niy ma sprawy!
Te omlety ciepłe zjymy.

[broneknotgeld]

Te omlety

Jak se kończy pogotowie
Trza omletow upiyc tako
Ślubno zaroz mosz we głowie
Pszajesz aż ze szczyńścio płako.

[broneknotgeld]

Pierombol! dom to jeszcze roz bez felerow.

[broneknotgeld]

Omlety cipkowe a'la Parzyjagła

Ze dwa funty trza filetu
Z cipek - ano już bez gnatow
Łolyj kery zamiost fetu
Możesz kupić przed wypłatom

Poł tuzina jajek - tako
-łyżek monki kartoflany
-majonezu tyż jednako
Żech przipomnioł se nad ranym

Łoj - cebule jeszcze sztyry
Sol, pieprz, inkszo tyż prziprawa
No, "Vegeta" - byda szczyry
Dyć trza zacznońć już zabawa

Wpiyrw pokrychom cipki w kostka
I jajcami je zaleja
Majonezu dodom troszka
Skiż cebuli se niy śmieja

Dom jom drobno posiekano
Płaczki mi do ślypiow ciśnie
Dyć cuzamyn wymieszano
Jako ze szpyronia wiśnie

W końcu wsypać trza prziprawy
Łolyj gorki - toż smażymy
Ktosik głodny? Niy ma sprawy!
Te omlety ciepłe zjymy.

[broneknotgeld]

Kto?

Kto na stacji ważny człowiek?
Kto futruje pogotowie?
Kuchorz - przeca ło tym wiycie
Tyż mo w ryncach wasze życie!

[broneknotgeld]

Kawaler Zakonu Nudelkuli

Nudelkulom pasowany
Stowo piyrszy tu ze ranym
By zastympy pośniodały
Chyńci do roboty miały

Po wieczerzy w pryku tako
Łon łostatni - dyć niy płako
W głowie "menu" na śniodanie
Co zrychtuje jak zaś wstanie?

[broneknotgeld]

Taki "kuchorz"

Ano taki co jak warzy
Anoreksjo wom se marzy
Niy przijedzie z pogotowiym
Łod ćwierć wieku jo już to wiym.

[broneknotgeld]

Wieczerzo na gorko

Wieczerzo na gorko
Na łostro tyż tako
"Łoj ty moja Dorko"
-Zefliczek zapłakoł

Bo do szczyńścio potym
Jyj mu było trzeba
To niy som głupoty
-Trza frelki jak chleba!

[broneknotgeld]

"Makoszowske Pogotowie"

Makoszowske pogotowie
Ło kuchorzach prawi tako
-"Niychej gary majom w głowie
i futrujom durś jednako".

[broneknotgeld]

Jako se sprawiom?

Bronek ze Tadkym jako se sprowiom?
Łościami z fiszow ludzi niy dłowiom?
Se przekonocie na Okryngowy
Obyś pojechoł do dom tyż zdrowy!

[broneknotgeld]

Nic że akcjo na "Pokoju"
Nic że flizy som we planie
Przi wycince drzew durś brojom
Kuchorz zrobi te śniodanie
Zadbo ło kamratow brzuchy
Co uparszczy to wtranżolom
Niychej makoszowske zuchy
Tych przi garach tyż pochwolom.

[broneknotgeld]

Tako dzisioj potwierdzomy
Jejich kunszt we zocy momy
W kiblu siedzieć niy trza było
I na głodno tyż niy żyło.

[broneknotgeld]

"Kociki"

Tako we kuchni se "cukrowali"
Że aż "kocikow" miana dostali.

[broneknotgeld]

Papryka "kocikow"

Papryka trza kupić coby jom filować
Ryż i flajsz mielony do jyj środka dować
Jeszcze tyż cebula no i szamponioki
Co niy wyglondajom jako stare zoki

Taki filong kładom w papryki czerwone
Potm do brytfanki - dyć na tym niy koniec
Rosołym zalejom, gorkim, z cipki zdrowy
Poł godziny duszom - niych kożdy se dowiy

No i na tym fertig - "kocikow" papryka
Zdo sie jako danie ło kere trza rzykać
Bo ci pomoc może czasym i w utropie
Tyż afrodyzjakym - dej se pozor chłopie!

Kronika łobchodow 50-lecio OSRG-Zabrze

[broneknotgeld]

OSRG - Zabrze 1958-2008

Ech - wiela czasu już przeleciało
Tyż ratownikow sie przewinyło
Na akcje tako czynsto jechało
Trza cosik wspomnieć jako to było.

[broneknotgeld]

01.04.2008 Zabrze

Choć "prima-aprilis" i wiosna na dworze
Czas jubileuszu dyć sie zacznońć może
Piyńdziesiont lot tymu ta stacjo dźwigali
No i pokulało sie już drapko dali

Akcji roztomajtych było richtig wiela
Dyć zowdy czuwała ratowniczo sztela
W niyszczyńściu bergmonom niyść pomoc na dole
Za to niych sto rokow Okryngowo w chwole!

[broneknotgeld]

Kronika OSRG-Zabrze

Jako wom prawić ło Okryngowy?
Jako przekozać co sie tu dzioło?
Możno rym ślonski cosik łopowiy
Toż chocioż ciynżko, dyć tyż wesoło.

[broneknotgeld]

OSRG-Zabrze 1958

Sie ratownictwo rozbudowuje
W Zabrzu dźwignyli z tym Okryngowo
Niychej bergmona zowdy ratuje
Jak mu ta z kosom przed łokym stowo

Działka łod gruby wpiyrw "Makoszowy"
Drapko tu nowo sztela dźwignyli
Z Rymera konsek yno Jodłowy
To wom klaruja byscie trefiyli.

[broneknotgeld]

Jedynoście grubow (1958-1960)

Na dyżur jeździyło grubow jedynoście
Przez tydziyn na stacji dwa zastympy siedzom
Ano, w świontek-piontek ich pomocy proście
Zowdy ze niom ruszom - ło tym wszyscy wiedzom.

[broneknotgeld]

Piyrszo akcjo 20.08.1958

"Pstrowski" i "Zabrze" dyżurowały
Kożdo swoj zastymp na tyn czas dała
Toż se na akcjo tako wybrały
Historji stacji we tym już chwała.

[broneknotgeld]

OSRG-Zabrze IX.1958

Już ratownikow we Zabrzu szkolom
Piyrszy z tym leci kurs podstawowy
Być we ty słuzbie jest twojom wolom
Toż musisz zacznońć łod Okryngowy.

[broneknotgeld]

Na pogotowie!

"Pstrowski", "Rokitnica", "Zabrze", "Mikulczyce"
Tyż "Ludwik-Conkordia", no i "Bielszowice"
"Sośnica", "Glywice", zocne "Makoszowy"
Jeszcze "Miechowice" - ze tym spis gotowy.

[broneknotgeld]

Pogotowie 1958-1960

Dwie gruby naroz dyżur trzimajom
Ze kozdy zastymp tukej dowajom
Z jedny kerownik, mechanik z drugi
Tydziyń na stacji - czas niy za dugi.

[broneknotgeld]

Pogotowie IX.1960

Ze jedny gruby już pogotowie
Toz dwa zastympy jak jedyn czowiek
Kerownik tako, mechanik tyż
Z tego samego gniozda - już wiysz.

[broneknotgeld]

KWK "Szczygłowice" 01.08.1961

Nowo gruba we Knurowie
Toż czas jyj na pogotowie
Ze tym rokym zjyżdżo tukej
Dzisioj tyż we Zabrzu szukej.

[broneknotgeld]

KWK "Rokitnica" 01.01.1970

"Mikulczyce-Rokitnica" z drugom grubom skuplowali
Ze "Ludwikym-Conkordijom" prziszło im fedrować dali
Toż cuzamyn ratowniki w zabrzu pogotowie trzimiom
Skiż pożaru czy zawału czasym nawet niy podrzymiom.

[broneknotgeld]

KWK "Pstrowski" 01.01.1973

"Pstrowski" rośnie ze tym rokym
Z "Rokitnicom" razym przeca
Skuplowali je pod bokym
Już z jednego teroz neca.

[broneknotgeld]

Pogotowie KWK "Pstrowski"

Razym już na Okryngowy
Te zastympy dyżurujom
Ruszo drapko woz bojowy
Jak ich kajsik potrzebujom.

[broneknotgeld]

Kopalnia "Zabrze" - 1976

"Bielszowice" przi ty grubie
Na dwa ruchy "Zabrze" dubie
Po zastympie tu dowajom
Wcale ło tym wom niy bajom.

[broneknotgeld]

OSRG-Zabrze VII.1976

Trzi gruby ze Rudy do zabrza zjyżdżajom
Jejich ratowniki tukej już czuwajom
Zrachować trza "Wawel", "Pokój" i "Halymba"
Niy musicie wierzyć mi yno na gymba.

[broneknotgeld]

KWK "Dębieńsko" 01.01.1981

Z wodzisławski stacji "Dymbiyńsko" tu idzie
Gruba "Miechowice" do bytomski przidzie
Czy tako wymiana se richtig łopłaci?
OSRG-Zabrze nic na tym niy traci.

[broneknotgeld]

Kopalnia "Zabrze-Bielszowice" 1983

Czyńść bielszowicko gruby dźwigano
Szczyńściym se wroco choć tako miano
Jask historyjo dali poleci?
Ze kery strony tref cosik skleci?

[broneknotgeld]

OSRG-Zabrze 1987-1988

Kort tynisowy i planty małe
Toż stacjo ze tym richtig grynieje
Dlo rekreacji zocny kawałek
Już se wpisuje we szteli dzieje.

[broneknotgeld]

KWK "Budryk" 1992

W Ornontowicach gruba jst nowo
Z tym rokym zjyżdżo na Okryngowo
We Zabrzu pełni już pogotowie
Sie tu pokoże niyjedyn czowiek.

[broneknotgeld]

Ruch "Wawel" - 01.07.1995

"Wolfka" przipisali teroz "Pokojowi"
Choć se niy straciyła zarozki drużyna
Jeszcze mieli tukej wiela pogotowi
Niym cołkym zonikła ta zocno "dziedzina".

[broneknotgeld]

ZWSM "Jadwiga" 01.01.1997

Co ze "Pstrowskiego" yno łostało
Miano "Jadwigi" teroz dostało
Dyć pogotowie wcale niy świyntsze
Karlusy twarde - ciyngym niy miynksze.

[broneknotgeld]

KWK "Pokój" 01.01.1998

Z tom datom ruchu "Wawel" już niy ma
Czy jest biydniejszo we wongel ziymia?
Toż gruba "Pokój" wszysko już łykła
"Wolfka" przi tymu ani niy brykła.

[broneknotgeld]

KWK "Bielszowice" 1998

Kaj "średnicowka" zaplanowali
Tam już "Porymba" zlikwidowali
Toż Zabrzu brakło gruby wynglowy
Zaborzu tako - niyjedyn powiy.

[broneknotgeld]

KWK "Bolesław Śmiały" - IV.1999

Do Zabrza z tym rokym już prawie zjyżdżajom
Droga z Łazisk Gornych drapko dobrze znajom
Toż "Bolesław Śmiały" Okryngowo wzmocnio
Wswzyscy przeca wiedzom że gruba to zocno.

[broneknotgeld]

OSRG-Zabrze 1999

"Wałbrzych" i "Sosnowiec" już zlikwidowane
Okryngowy Zabrze ze tym cosik dane
Co na Dolnym Ślonsku tako nadzoruje
Sie magnezyt z "Wirów" przeca durś fedruje.

[broneknotgeld]

KWK "Glywice" 2000

Ech - "Glywice" pamiyntomy
Historyjo gruby znomy
Dyć z tym rokym sie straciyła
Szrajbna tukej yno - była.

[broneknotgeld]

Kopalnia "Dębieńsko" 2000

Gryba "Dymbiyńsko" tyż se straciyła
Wpiyrw dlo dziedziny swyj skarbym była
Sie niy dziwujcie że jest w utrpie
I Okryngowo tyż szramy dropie.

[broneknotgeld]

Ratownictwo Gornicze 1907-2007

Po wypadku we Francyji
Ratownictwo drapko rośnie
Czy trza wiyncy tragedyji?
Szczyńścio bergmońskego proście

Dyć niy yno przeca w Bogu
Gwarek mo nadzieja widzieć
Som kamraty co pomogom
Na ratunek kożdy idzie.

[broneknotgeld]

KWK "Knurów" 1907-2007

Sto lot ratownictwa "Knurów" tyż fajruje
Bezpieczni na grubie sie ze tym fedruje.

[broneknotgeld]

KWK "Budryk" 1992-2007

Toż gruba jako nowo dziedzina
Piytnoście rokow dyć mo drużyna
Kero bergmonom niesie ratunek
Jak niyszczyńśliwy czasym fedrunek.

[broneknotgeld]

OSRG-Zabrze 2008

Rok jubileuszu ze tym prawie dany
Dyć na Okryngowych niesie wielke zmiany
"Budryk" dadzom "Tychom" i "Bolesław Śmiały"
Gruby ze "Bytomia" tu bydom zjyżdżały.

[broneknotgeld]

KWK "Halemba-Wirek"
ruch I i II - 2008

Wpiyrw dwie gruby, teroz jedna
Jeżdżom już na pogotowie
Czy prawiyła przepowiednia?
Czy skuplowoł yno człowiek?

[broneknotgeld]

KWK "Bobrek-Centrum" I-II.2008

Dwa miesionce som ze nami
Ślad w pamiyńci łostawiyli
Toż te gruby - wiycie sami
Chnet pod "Bytom" przekludziyli.

[broneknotgeld]

ZG "Piekary" - II.2008

We sztolni "Dziedziczny" akco im trefiyła
Choć roz yno w Zabrzu pogotowie mieli
W marasie utropa prawie sie tam kryła
Wszysko utoplali choć przeca niy chcieli.

[broneknotgeld]

OSRG-Tychy 01.03.2008

Za jake grzychy
Ta stacjo "Tychy"
Zlikwidowali?
Przeca jyj pszali!

[broneknotgeld]

OSRG-Zabrze III.2008

Dwie gruby kere przi "Tychach" były
Po dwóch miesioncach w "Zabrze" wrociyły
Karlusy z "Bolka" i ze "Budryka"
W ty intyncyji łaziyli rzykać?

[broneknotgeld]

"Sośnica-Makoszowy", "Bielszowice", "Knurów"

Na Okryngowy ciyngym stowajom
Piyńdziesiont rokow tu w pogotowiu
Chocioż nom czasy drapko mijajom
Dyć te trzi gruby ciyngym we zdrowiu.

[broneknotgeld]

Wystawa
"Ratownictwo Górnicze w falerystyce"
Zabrze 01.04.2008

OSRG-Zabrze jubileuszowo
Prawie ze wystawom we tym czasie stowo
Pogotowie pełni już "Bolesław Śmiały"
Toż se te odznaki istnym spodobały.

[broneknotgeld]

3-7.IV.2008 Łaziska Górne

"Bolesław Śmiały" gości wystawa
Drużyna se jyj dziwuje
Falerystyka dyć zocno sprawa
Niy yno to forszteluje.

[broneknotgeld]

7.IV.2008 Zabrze

Zaś w Okryngowy wystawa stoji
"Pokój" mo tu pogotowie
Znakym maltańskim zastympy stroji
Toz se raduje jyj czowiek.

[broneknotgeld]

Krziż Maltański

Ano - znakym ratownika
Pomoc niesie niym trza rzykać.

[broneknotgeld]

Ktoś se dziwoł

Sie ktoś tymu richtig dziwoł
Krziż maltański zowdy bioły
Ano - jo niy byda kiwoł
Kożdy łazioł z nos do szkoły

Dyć zakonu kroj mo przeca
Tam kaj łogyń ktoś z niym idzie
Ze zocnego łon jest neca
Niesie pomoc w wielki biydzie.

[broneknotgeld]

Zasłużony Ratownik KWK "Budryk"
2007

Na piytnastolecie kopaniany stacji
Zasłużonym ździybko potrza tyż owacji
Rychtujom odznaka - juz im przipinajom
Ano - przeca richtig we zocy ich majom.

[broneknotgeld]

"Ratownictwo Górnicze w Falerystyce"
18.IV-14.V.2008
KWK "Halemba-Wirek" ruch "Halemba"

Kopalniano Stacjo gości juz wystawa
Sie jyj ratowniki wiela tam dziwujom
We "znaku maltańskim" dyć tyż jejich sprawa
Tako tukej przeca richtig forsztelujom

"Halymba" pechowo - żniwo swoje zbiyro
Durś gorko rzykajom do świynty Barbary
Na krziż co czerwony tu kożdy zaziyro
Retunek w niym widzi i mody i stary

Trza tyn rok pamiyntać - szosty w tysioncleciu
Wtedy pot był zocnom zapłatom za życie
Oby łojcow zowdy wrocać w zdrowiu dzieciom
Za to tyż odznaka ze ty gruby - wiycie.

[broneknotgeld]

Jako to sie stało? (II.2006)

Jako to sie stało? -Zawał go łoszczyńdzioł
Retunek niy darmo pot z ludzi wyciskoł
Pora dni w niyszczyńściu bergmon tako spyńdzioł
Zły tref go łominoł by z nami durś miyszkoł.

[broneknotgeld]

17.V.2008 Zabrzańsko Noc Muzeów
Zabrzańsko Kopalnia Zabytkowo "Guido"

Noc Muzeów jest ta "Guido"
Sie wystawa prawie przido
Kozdy jyj tu fest dziwuje
Wszyskich tako tyż raduje

Ratowniki swoj znak majom
Już łod downa jymu pszajom
W Noc Muzeów trza se asić
Jako łodznoczani nasi

Jubileusz zocny momy
Odznakami tyż dźwigomy
Historyjo w nich dyć przeca
Z bergmońskego richtig neca.

[broneknotgeld]

Na "Guido"

Wycieczek na doł zjyżdżo tu wiela
Toż na wystawa blikajom - tela.

[broneknotgeld]

Tyż se dziwowoł

Skarbnik ze "Guido" tyż se dziwowoł
Wele wystawy niyroz przistowoł.

[broneknotgeld]

Festiwal Łorkestrow Dyntych im. E. Czernego
ZKWK "Guido" - Zabrze 7.VI.2008

Sie odznaki przisłuchały
Jako łorkestranty grały
Aże trzynsom fest galoty
Z tom muzykom siodme poty
Ratowniczy krziż przeżywo
Chce tańcować - to niy dziwo.

[broneknotgeld]

Piyrszy mandrysz przi batucie
Z niym we Zabrzu wiela uciech
Makoszowske łorkestranty
To niy yno jakeś franty.

[broneknotgeld]

Trombki zagrajom z ucha do ucha
Drugi z batutom Paweł Pastucha
Dlo policajow muzyka w zocy
Przi niyj i w pale wiyncy jest mocy.

[broneknotgeld]

Pod batutom Mazuroka
Chnet zagrajom kazaczoka
Chce sie bawić Ukraina
Z niom zabrzańsko tyż dziedzina.

[broneknotgeld]

Sztandar OSRG-Zabrze 1986

Już Okryngowo sztandar rozwijo
Tym Szadurskiego raduje
Poczet w mundurach to niy mecyjo
Ratownik w zocy se czuje

W świytlicy dugo był wystowiany
Toż pogotowiom tyż służy
Na muster inkszym tako jest dany
Czy lepszo prziszłość łon wroży?

[broneknotgeld]

Pod sztandarym

Pod sztandarym Okryngowo
Przi Barborce zowdy stowo
Pogotowie tako w zocy
Widzi kto łotwiyro łoczy.

[broneknotgeld]

Sztandar OSRG-Zabrze
1958-1998

Przi sztyrdziestoleciu farorz sztandar kropi
Gyburstag z tym zocny - szło to nawet łopić
Toż se tako stało po mszy we kościele
Piwa niy zabrakło by pić zdrowie sztele.

[broneknotgeld]

Pamiontkowy kamiyń - V.1989

Kurs mechanikow na Okryngowy
Prawie w tym czasie sie tu łodbywo
To co tym istnym wlazło do gowy
Aże do dzisioj wszyskich fest dziwo

Leżoł ze kamiyń tu po wykopie
Terynu wtedy niy krasioł wcale
Niy to co dzisioj - przeca wiysz chopie
Zdowo sie blyszczeć jako we chwale

Ano - fundnyli przeca tabula
Stacji minyło trzidziestolecie
Chwała sponsorom - niy byda fulać
Durś jejich koncept krasi nos przecie.

[broneknotgeld]

"Obelisk" OSRG-Zabrze - 1958-1988

Ło trzidziestoleciu naszy stacji głosi
Wspomnieć historyjo sie przi niymu prosi.

[broneknotgeld]

Pamiontka

Kursu mechanikow pamiontka na dugo
Piyńciu fundatorow ze tabulki mrugo.

[broneknotgeld]

Kamyń Okryngowy

łostoł na stacji se po wykopach
I dziwoł prawie wszyskymu
Dyć tym niy wnerwioł żodnego chopa
Za to go chwola do rymu.

[broneknotgeld]

Kamyń Okryngowy 1988

łostoł na stacji se po wykopach
I dziwoł prawie wszyskymu
Dyć tym niy wnerwioł żodnego chopa
Za to go chwola do rymu.

[broneknotgeld]

Dwadziścia rokow (1988-2008)

Dwadziścia rokow już kamyń stoji
Tabula cosik nom prawi
Toż Okryngowo richtig fest stroji
Czy historyje wyjawi?

Ano - se dziejom w naszy dziedzinie
Akcje i krzty ratownicze
Drapko na stacji czas ze tym minie
To przeca sami tyż wiycie.

[broneknotgeld]

"Obelisk" OSRG-Zabrze
1989! 1999! 2009?

Roz na dziesiyńć rokow dziejom sie tu dziwy
Rzykoł przi kamiyniu ktosik niyszczyńśliwy?
A możno w niym dusza grzysznika ukryto
Bestoż tukej prawie djosek tko kopyto

Roz na dziesiyńć rokow skry lecom we nocy
Jak połnoc wybijo gaftajom tam łocy
Wiater w uszach szumi, szymro ktos ze dali
Zdo sie jakby czowiek chcioł richtig użalić

Roz na dziesiyńć rokow - toz chnetko zaś bydzie
Możno prawie farorz ze pokropkym przidzie
Coby niy straszyło juz krzi niymu wiyncy
Bo to ratownikow przeca ździybko mynczy.

[broneknotgeld]

Tabula z marmuru

Tabula z marmuru mo znak ratowniczy
Na tyn krziż ze tarczom bergmon czasym liczy.

[broneknotgeld]

Na 50-lecie OSRG- Zabrze

Skiż "Abrahama"
Rymy we ramach.

[broneknotgeld]

Zasłużony Ratownik KWK "Budryk" 2007

Na piytnostolecie kopalniany stacji
Zasłuzonym ździybko potrza tyż owacji
Rychtujom odznaka - już im przipinajom
Ano - przeca zowdy we zocy ich majom.

[broneknotgeld]

Wystawa "Ratownictwo Górnicze w falerystyce"
Roczek ZKWK "Guido" - 15.VI.2008

Toż sie niydziela jawi ciekawie
Wiela radochy tu ze tym prawie
Vipy tabula tyż łodsłoniajom
Jakby na dowod że "Giudo" pszajom

Dyć i wystawie przeca dziwujom
Reszpekt przed "krziżym maltańskim" czujom
Falerystyka istnym sie jawi
Niy yno jako hobby co bawi.

[broneknotgeld]

Co widziały?

Co odznaki tu widziały
Pewno by łopowiedziały
Dyć we nocy - jak jest cisza
Co szymrajom jo usłysza.

[broneknotgeld]

Przi roczku na "Guido"

Se dziwujom tyż odznakom
Tym ze krziżym jako zakon.

[broneknotgeld]

Sześćdziesiyńciolecio ty Stacji dożyja?
Dzisioj w ty intyncji prawie coś wypija.

[broneknotgeld]

Choć już OSRG niy ma
Dyć we Zobrzu tyż niy cima
Tradycyjom
Teroz żyjom
We muzeum niy trza kimać.

[broneknotgeld]

Skarbnik sie raduje


www.wiadomosci24.pl/artykul/za_skarbniki_do_skarbnika_124334.html

Dyć to mu sztimuje.

[broneknotgeld]

"Kopalnia Wiedzy"

Co wom pedzieć ło "Krystynie"?
Zły czas dlo niyj mono minie
www.nettg.pl/Aktualnosci/Szukaj/Kraj/Nowa-kopalnia-powstanie-na...-pokopalnianych-terenach-Bytomia,15814,1500,1
Z szachty do edukacyji
Przyńdzie teroz bez mecyji?

[broneknotgeld]

Niyszczyńście boło - czy juzaś bydzie?
katowice.gazeta.pl/katowice/1,35019,11598394,Uwaga__Niezabezpieczony_szyb_prowadzi_na_podziemny.html
Oby niy - przeca ło to nom idzie.

[broneknotgeld]

Pech, gupota?
Ech - robota.
zabrze.naszemiasto.pl/artykul/1824674,wypadek-w-glownej-kluczowej-sztolni-dziedzicznej-w-zabrzu,id,t.html

[broneknotgeld]

Kej Barborka momy
Wontek wiyrchym domy.