hanys_hans 30.11.08, 13:18 Advent, Advent, die erste Kerze brennt Odpowiedz Link Obserwuj wątek Podgląd Opublikuj
bokertov1947 Re: Advent, Advent, die erste Kerze brennt 30.11.08, 15:31 Rychtujymy Adwyntowy sztand. Dzisiej na Wielkym, ciepnol nasz farosz Matysik z kozalnicy, co dobrze by bolo, jakby i u nos przy Adwyncie, wyrychtowac jakijs maly jarmarkt. Bo – padol lon – kozdo gymajnda robi cojsik w tym richtongu – to czamu my momy byc gorsi. No i trefjyli my sie po Wjelkym u farorza w salce parafjalny, coby tyn wazny tymat lobgodac. - Jo mysla – pedziala na som poczontek Hyjdla, kero zawsze musi wciepnonc swoje czi grosze – co muszymy tukej cojsik zrobic. - Fto mo jakejs pomysly, mo sie zglosic – pedziala. W salce zrobiolo sie jakos cicho. Kozdy paczol do sfojij kufy ze zimnym. W lufcie czulo sie napjyncie – skuli tego intynzywnego myslenio. Francik postawiol sfoja kufa na stol i pedziol: - Po mojymu mogli by my postawic pora sztandow, na kerych szlo by posprzedowac te graczki, kere nasze babki zrobioly zeszlego roku na tyn wielki kristbaum, kery stol kole kozalnicy. – Lone som jusz tak czy tak leko skurzone, bestusz cza by zrobic nowe – a te ze zeszlego roku posprzedowomy. - Wjysz Francik – ajntlich to ty mosz recht – pedziala na to Cila. Moja Maryjka jusz mi tysz sie pytala kedy bydymy z innymi dzieckami robjyli nowe graczki na parafjalny kristbaum. - Ale to styknie ino na jedyn sztand – lodezwol sie na to Anton. A my chcymy, coby nasz jarmark na cojs wyglondol – coby my sie nie musieli wstydzic. - Co prowda, to prowda – pedziol na to – dolywajonc sie do swojij kufy trocha zimnego – chop lot Hyjdli – Erwin. - A cobyscie tak pedzieli, jakby my tysz postawjyli jedna budka, w keryj jo bych mog sprzedowac grzone wino ! 2 - Ty a grzone wino – ciepla sie zaroski Hyjdla. To jo bych jusz lepij postawiola sztand z mjodym i dala go pilnowac jakymus niedzwiedziowi, nisz postawiola Ciebie przy gorku z grzonym winym ! - Cicho, cicho – wtronciol sie na to nasz kapelonek. Tyn pomys nie je zajs taki zly. - Jak bydzie zimno, to napewno przidzie moc zmorzlokow, coby sie troszycka lod wewnontrz logrzoc. A ty Hyjdla – jak tak twojymu chopeczkowi njy wierzysz – mozesz stoc przi njym. Naros atmosfera „narady“ zrobiola sie bardzij cieplo. Pyjter – tyn co mo sklep z napojami wele kosciola – lozywiol sie bardzo, bo napewno sie pomyslol, co jest to lokazja pozbyc sie poranostu flaszek tonigo wina, kere jusz tak dugo stojom na regale w jego sklepie. - Pyjter – kapelonek ciepnol pytanie – mozno bys skoczol do sklepu, i przinios pora flaszek. To mogli by my zaros troszka pocwiczyc – coby my sie potym nie blamowali ? Nie cza bolo dugo czekac – a Pyjter przitargol niy ino pora flaszek czerwonego wina, ale i flaszecka rumu i pora tytek z gywyrcami. Christa prziniosla z farorzowy kuchnie kastrolik, i postawiola zaroski na elekrycznym piecyku, kery bez cufal stol w koncie salki. - Jo mysla, co nasze babeczki mogom jusz isc do dom warzic lobiod. My sie tu jusz sami domy rady – zarzondziol – z nadziejom w glosie – Achim. Wszyjstkie chopy csiogli njydzielne szakety, farosz wyciong z kapsy korkyncijer – I zaroski wziynli my sie do roboty. Przijymnie bolo paczec, jak gornek bol polny, a i pjykny zapach zaczon sie roznosic po salce. Erwin pozbjyrol kufy I za minuta bol jusz z pomytymi nazot. 3 - Tosz muszymy teroski poprobowac, eli nom sie nasz eksperymynt udol – pedziol farosz, czimajonc w jedny rynce kielnia a w drugij kufa. Zaroski wziyli my sie do smakowanio. Richard dosul jeszcze trocha cukru – bo jak pedziol, grzone wino musi byc richtig slodke. Kapelonek gichnol jeszcze rajn reszta ty drugij flaszki rumu, coby te grzone wino szybcij grzolo – jak pedziol – no I prawie wszyjscy byli mi zgodne, co eksparymynt nom sie udol. Ino, co w kastrolu mozno bolo jusz lobejrzec dno. Bardzo sie tym nasz farorz zmartwiol, ze az sie siod w koncie na ziymi. - ………Moozzno by Pyjter jeszcze prziniooos trocha materjalu do eksperymyntow – bajukol s drugigo konta Erwin. Ale bjydny Pyjter siedziol loparty lo stol, i wyglondalo na to – co sie chyba kimnol. To my sie zaczli poleku – w rozowych humorach - zbjyrac do dom. Farosz ciepnol ino krotko z konta, co lobgodanie wynikow naszego eksperymyntu bydymy musieli przelozyc na przyszlo njydziela. I usnol. Dezember 2002. Pyrsk przi pjyrszym Adwyncie! bokertov1947 - Odpowiedz Link
bratjakuba Re: Advent, Advent, die erste Kerze brennt 30.11.08, 18:42 Adwynt,Adwynt.Szykujcie sie po mału na kolyndowanie. Świynto historyjo narodzynio Pana I - Zwiastowanie Kiej Paniynka Nojświyntszo na citrze grała tony Prziszoł janioł i pedzioł: "Niech bydzie pochwolony! Niech bydzie pochwolony, a tako mom nowina, Że z Ducha Niebieskigo, Bożego zrodzisz Syna Na krzcie mu dej Pon Jezus a jeszcze to ci powiym Że za te rajske jabko ukryncisz łeb gadowi" Maryja rzekła: "Niech sie tym słowom zadość stanie" I tak to sie łodbyło Nojświyntsze Zwiastowanie Świynto historyjo narodzynio Pana II - Narodzynie i Adoracyjo A prawie w same świynta Bożego Narodzynio Zachciało sie krolowi narodu policzynio Toż poszoł do Betlejym z Maryjom Józef stary I prziszli do stajynki kaj z osłym woł do pary Łoj biyda moj Józefku - narzyko Bożo Matka Łoj coz to za wilijo bez moczki, bez opłatka? W zgryzocie i zmartwiyniu narodzioł sie Jezusek Chcioł świat pobłogosławić rozkopoł sie z pieluszek. Janieli na trzi głosy kolyndy Mu śpiywali A potym pastuszkowie prziniyśli koszyk malin Na końcu trze krolowie dali Mu swoje miynie I tak to sie łodbyło Jezusa narodzynie. Świynto historyjo narodzenio Pana III - Ucieczka do Egiptu Już podros Pon Jezusek, już umioł pedzieć "mama" Kiej zawołoł szandarow, krol Herod, za kans chama Tak godo: "Mocie wyrżnuć syneczkow z Betlejymu. Bez folgi bez litości, prziwolcie fest kożdymu!" Jak Józef sie dowiedzioł, co sie to bydzie działo Wladowoł na łosiołka Familio Świynto cało A łosioł choć boł zgniyłi podreptoł dryptu,dryptu I tak sie łodbywała ucieczka do Egiptu. To świynto historyja, Pon Jezus i Maryja Od Boga ten sakramynt, na wieki wieków amynt! wg Kazimierza Grzeskowiaka. Odpowiedz Link
rita100 Re: Advent, Advent, die erste Kerze brennt 03.12.08, 21:20 Advent, Advent, die erste Kerze brennt. Die Weihnachtszeit beginnt. Advent, Advent, die erste Kerze brennt. Der Nikolaus kommt bestimmt. Odpowiedz Link
rita100 Re: Advent, Advent, die zweite Kerze brennt ! 07.12.08, 20:02 O, to już dwie świeczuszki się palą, jak ten czas leci Odpowiedz Link
