GYSZICHTA

[anton_28]

kajs na Sloonsku, na psziuogu wele lasa miyszkaua se jedna oumka.
Boua uona kulawo i puklato wiync nikaj roboty niy poradzioua znejsc.
Uazioua ino po tych uoonkach z miechym na puklu i zbiyraua
uostomaite zielska, grziby abo uostranrzyny. Ludzie padali ize jak
ta oma trefisz to dowej pozoor, bo moze byc ona bardzo zuo, ale i
bardzo dobro.
Legynda pado, ze kedys bajtle targali se kwiotka na tym psziuogu, no
i pszi tymu pouaziyli po zbozu i je pouomali. Ouma co tych polow
wachoowaua chycioua tych dzieckow, rein do miecha i pod ziymia ich
wcioongua. Bestosz sie wszystek bajtle jyj boli, a jak jusz musieli
is na pole to niy rojbroowali.
Downi piyrwy boua se tam tysz jedna mauo dziouszka kero pasua cigi
na uonce, i bes tyn czas sztrykowaua zoki do siebie i mutter.
Oumka wele ni wdycko siadaua bo widziaua ize boua dobro, i dowaua
pozor na te kozy, coby ta dzioucha poradzioua bes sztyrungu te
fuzekle sztrykoowac. Jak jo i podziynkuja za to, dumaua se ta mauo,
ale w koncu usztrykowaua jeszcze jedna pora fuzekloow i daua je ty
oumce. Ta sie fest uradowaua i ze ziymie dzwigua pora suchych
liscioow. Wroziooua je ty dziousze do zopaski.
Kej na wieczor szua s kozoma do dom, padaua se: "ach, co mie po tych
zgnioouych lisciach, zaro je wyciepna". Ale zrobiouo i sie zol ty
omy i uostawioua te liscie w zopasce. Droogom ale robioouy sie te
liscie coros ciynrzejsze, ize sie dziouszka z biydom do chaupy
dowlykua.
A w izbie - zamias lisci - wysuuy sie na dyloowka same koncki zuota!!
Uot tamtygo dnia niy mieli jusz biydy...
Ty oumki ale tysz jusz zodyn wele lasa ani na uonce niy widziou...

[szwager_z_laband]

jo take umy jeszcze pamiyntom:)

psziznej sie; Ciebie tak jak mie ktosik na wieczor przed spaniym
take geszichty tysz rozprowiou(?)

[ballest]

Kazdy miou takou ouma, co nom bery i bojki rozprwiaua, ale cieszam se ze je
Anton pamientou!

[anton_28]

szwager_z_laband napisał:

> jo take umy jeszcze pamiyntom:)
>
> psziznej sie; Ciebie tak jak mie ktosik na wieczor przed spaniym
> take geszichty tysz rozprowiou(?)
>

JA, meistyns Mama! uona do dzisiej poradzi tak uosprawiac ze s
uotwartym maulym suchosz, taki talynt einfach mo.

[szwager_z_laband]

co by my byli bez tych naszych mamow i oumow abo tantow(?)

znosz jakos geszichta o kamiyniach? - tako jak np ta o diobelskim
kamiyniu ze lasa kole Laband

piykne som tysz geszichty o Utopkach!

[anton_28]

o kamiyniu w Labander Wald znom, ale tysz zech ja niydowno na
Glywicke Sloonzoki czytou. A o utopkach jako zech sie w Laband
chowou, ganba by bouo niy znac. niyskorzi sam pora wciepna...

a, Szwager, Frage: niy mosz kajs zaspeichrowany Stadtkarty z Laband
coby niymiecke Straßennamen bouy?? Gleiwitz mom, ale gynau na Laband
sie konczy.

[szwager_z_laband]

obejza i dom ci zanc

[bratjakuba]

Na dobranoc dlo szwagra.

Od piyrszego wejrzynio.

Jozef Waldymar Mrochyn,wielgi chop a potulny choby baranek wielkanocny.Bez cołki czas robioł w lesie za siongorza.
Łońskigo roku,niespodzianie jeszcze przed Świyntym Jonym go to dopadło.
Nie wiedzioł ani jak to sie richtig mianuje.We mieście nikiej godajom o przoniu.Że to niby taki sagaty szkut komuś ze kabłonka we pleca abo rzić strzeli.Jozefowi to ni tam jakoś szpilka sie wbiyła.Poczuł sie tak choby chruby Bercik,jego kamrat od songow go bez krziż siekiyrom przimaścioł.A poczuł ta siekiyra jak szoł wczas rano ku lesie.Ze mostka uwidzioł różowe lica i nie yny lica od Tkoczynej Katrinki.Klynczała na swoich chrubawych, okronglutkich kolanach na kamiyniu przi rzyce.Kiecka miała podwiniynto aż pod paże.
Pochylała sie ku wodzie,że aż pora lukatych stronczkow jeji czerwonawych włosow spadowało ji na oczy.Mocnymi ,kulatymi rynkami mochała pranie we rzyce.Taki to obrozek Jozef Mrochyn ujrzoł z tego mostka a ani sie nie spostrzyg jak mu sie ta dziura od te siekiyry we plecach zrobiyła.

Tak poraniony ani już nie szoł ku lesie,yno tak przed piontom rano był już kole fary.
Zaklupoł swojom siongorskom piyńściom,że aż faroż Hejda wyskoczyli w koszuli.
Kiej uwidzieli Jozefa spytali sie zarozki ,kto umrzoł?
Mie sie zdo Farożyczku,godo Jozef,że prziszoł moj czas na żyniaczka.Bez to bych Ich piyknie prosioł co by mi wypisali taufszajn.
Faroż obudzony gwołtym ze słodkigo śniku ,obejrzoł se Jozefa Mrochyna od wiyrchu aż ku dołowi a potym padoł mu tak: jak ci to przanie
tak we gowie pogziyło,że ni mogesz spać to miyj chocioż uważani
na inkszych,kierym take faksy nie w gowie.

Przidz sam nazot nieskorzi,po śniodaniu.Jakbyś tak ale mioł kwilka czasu,to nie musisz tak mitrynżyć ale mogesz troszka w zegrodce poryć. Ryl znońdiesz tam we chlywiku.
Jozef kuknoł na chlywik i w ta godka"A jak przeryja cało zegrodka to byda mog zaś sie spytać o tyn taufszajn?
Bydzie tak jak to je dycki we zwyku odpowiedzieli mu faroż.A Jozef rod z obiecanki przerył cało zegrodka.Zaś pogodoł z farożym.Przeciongnoł bykowi piestrzonek bez nos,wydojoł dwie krowy,oberwoł jagodki na świyntojankach,poromboł hołda drzewa a kiej sie zabiyroł za łotanie dziury we dachu od chlywika,zawołali go faroż Hejda i podali mu piyknie wypisany taufszajn.Jeszcze yno go pouczyli co i jak ,padali
z Bogym ,Jozefie Mrochyn. Jozef wyciongnol z kapsy we jakli wielgo kartka ze Schlesischer Kalender,piyknie zawinoł w nia swoj taufszajn odwionzoł bund przi koszuli i skowoł taufszajn na piersiach.
Podziynkowoł piyknie jak boł wychowany i drabym puścioł sie nazot ku rzyce.

Jak bydziesz grzeczny to Ci jutro byda bojoł dali.

[szwager_z_laband]

:)

wiysz jak mojauroumy ze doma boua?

Mrochyn:)

fajne Dziynki!

:)

[bratjakuba]

2
Katrinka dali klynczała przi wodzie,szastała,krynciyła i ugniotała te prani do
kalfaska.Od czasu do czasu robiyła krotko pauza a wteda we wodzie odbijała sie
jeji okrongło,zdrowo,różowo gymbusia.
Jozef Mrochyn oglondoł bez chwila te wodne obrozki.dychoł choby go mora
przisiadła,połknoł slina kiero mu zatkała colki chyrtoń.Jak już sie nałykoł,śloz
na doł ku kłodce.We gowie rozważowoł gibko jakim to słowym mo zagodać.Kiej już
stanoł kole tej Katrinki prziglondol sie jeszcze trocha a poty padoł :-"cof
sie". Zrozumiała,choc ani na nigo nie wejrzała.Rukła sie trocha na kłodce i
zrobiyła mu plac.
Onsiednoł wele nij i siedzieli tak bez słowa
.Jak długo? Możne poł,możne trzisztwierci godziny tak sie syciyli tym nic nie
godaniym.
Dziwali sie na woda w rzyce,na las za drugim brzegym,oglondali jak male Ruziki
ryjom w rzycznym piosku i jak sie z tego wybijajom i opadajom małe chmurki ze
szlamu.
Sztudyrowałi jak sie płowiom kaczki a oglondali to tak choby to widzieli piyrszy
rouz.
Nogle Mrochyn zagodoł swoim chopskim głosym:"Chnet bydom zdrzeleć pozimki,a ani
nie spominac o borowkaćh,-już som tak daleko"
Dziołszka ani sie spodzioła,zadyrgotala wystraszono i pedziała: "Jaa"
No a terozki dziepro siedzieli,cicho choby kury na żerdce.Rous sie dziwali aż za
łonki,to zaś zaglondli ku lasowi,obejrzeli se też śłoneczko,ona podropała sie
pod kolanym a wteda zaś wydarzyło sie cośik nadzwyczjnego: Jozef Mrochen
siongnoł do kapsy wyciong zawiniontko i pedzioł: Katrina Tkocz: chciała byś,godo
lakrica abo wolisz kalmus.*
Pokiwała yno gowom.Jozef wybrol dwie sztangle lakricy,doł ji jedna
i zaglondoł jak jom pogryzo i cycko.
Widac było,co ji szmakuje bo zrobiyła sie wyzgerno,nie na tela aby co pedzieć
ale zaczyna huśtać nogi we wodzie,zaglondali oba na kołka, kiere kanś
odpływały.Za chwila nie przestajync huśtać nogami podziwała sie na nigo
rouż,potym drugi.On ,nie seblykoł szczewikow i jak dotond wszystko szło obyczajnie.
Nogle,ale doł sie słyszeć wrzask stare Tkoczki:"Katrinka,no coż tam z tym praniym"!
Dziółszka stanyła na rowne nogi,chyciyła kalfasek ze praniym i bez słowa,choby
ta lakrica nic nie znaczyła,zebrała sie ku chałupie.
Na szczynście Josef Mrochyn już zdonżoł przekopać przepastny miech miyndzy
koszulom a włośnom piersiom.Wyciongnoł zawiniontko.kiwnol na dziołszka co by sie
jeszcze wrociyła.
Po maluśku rozwinoł papiorek i sie spytoł:"Umisz czytać"Pokiwała głowom,że aż
sie zlynknoł,ze ji odpadnie.
Pokozoł ji taufszajn,potym ji go podoł .Nie spuszczoł oczy z jeji gymby kiej
czytała.Dyrgotoł cały choby stoł na mrożie.
Katrinkaa!! zaś wołała staro Tkoczka.Możno ci wasermony pranie porwały?
Czytej do końca pedzioł siongorz ostro.
Oh,i już ji zagrodzioł cołki świat,ni yno droga du dom.
Katrina Tkocz zagłymbiała sie we dokument choby czytała wanielijo. Zapomniała o
świecie,praniu. Stoła choby zaspano,choby cieliczka stoła tukej nad rzykom.
Co tam je richtich z tym praniym!skrzeczała staro Tkoczka rouz za razym.
Czytej do końca zaś grozioł Jozef Mrochyn a tak sie znerwowoł,co ani nie
zważowoł na swoje gadulstwo.
Nogle miendzy krzokami hebzu wyskoczyła staro Tkoczka.Staro ale grajfno była
baba. Prziszła blank blisko ku Katrinie,podziwała sie na nia i zaś we
wrzask:"Praniy,-no praniy,Katrinka!"
Podziwała sie na siongorza choby szandara:Tu je dzisio mochanie a nie co
inszego,farona!

Oh,jake cuda sie przidorzajom z tym przociym.Na Ślonsku tym bardzi.
Dziołszka,- ta choby śpionco,różowo cieliczka,uniosła swoja ryszawo
głowka,pokozała Tkoczce taufszajn i rzekła hernie:-"Wszycko je
obgodane,uzgodnione i podsztymplowane.
Podziwejcie sie,godo:Jaki piykny taufszajn.... Byda sie wydować!"
Staro Tkoczka stoła i poczuła cosik takigo choby jom kto hercowom bez łeb piznoł.
Ale już za chwila sie głośno roześmioła i padała:No,nono.
Jezderkusie, co też przi takim mochaniu moge sie wszycko przidarzić.

"Jak my zamoczali ni miały my ani anungu. Terozki jeszcze my nie som przi
biglowaniu a to już je tak daleko."
Jak tak rozprowiała,Jozef Mrochyn zaś wyciongnoł zawiniontko i sie spytoł Katrinki:

"Chcesz lakrice, abo możne kalmus bydzie lepszy?"


*
Taufszajn - świadectwo chrztu.
Lakrica-Lukrecja ,rodzaj dawnych popularnych słodyczy.
Kalmus -Kandyzowane kłącza tataraku o charakterystycznym smaku.
Hebz - dziki bez
Świyntojanki - tu porzeczki.

[szwager_z_laband]

elegsncko to je szkryfniynte - mogesz zdradzic kto to szkryfnou?

take teksty czyac to robi szpas.

mie to tak na Urbana sie czyto, ale niywia szczerze godajonc od kogo
to je tekst.

[bratjakuba]

Niejaki Ezaw,wyklynty brat.

[szwager_z_laband]

niy kojaza - podpowiydz cos wiyncyj mozno.

[bratjakuba]

szwager_z_laband napisał:

> niy kojaza - podpowiydz cos wiyncyj mozno.

Zajrzi do Wikipedii,dowiysz sie kto to Ezaw abo Esau

[szwager_z_laband]

rozumia, ale niywiym czi tak jak powiniynech

ok, niy pytom wiyncyj ...

[bratjakuba]

szwager_z_laband napisał:

> rozumia, ale niywiym czi tak jak powiniynech
>
> ok, niy pytom wiyncyj ...
To i nie kombinuj wiyncy.Take zbiegi okoliczności sie nie zdorzajom
abo wystympujom bardzo rzodko.
Ta bera je dedykowano Tobie z Twoimi widokami i została napisano
aby pokozać Ricie jak sie myśli obrozkami bo jom to dziwiyło.
Jak sie uważnie przijżysz to chnet z kożde zdania szło by zrobić komiksowy
obrozek a z nikiere i w piyknych farbach.

[szwager_z_laband]

Musza sie psziznac ze mie durch zaskakujesz trocha:)

jak bych ale na to niy paczou podobauo mi sie fest!

ps

jake som moje widoki??

[bratjakuba]

Stoń se na mostku a po tym siedni na kamiyniu przi rzyce i podziwej sie do wody
czy tam rużiki pływajom.
Potym sie zaglondni na daleki las za rzykom ,kieryś juz oglondoł setki razy.
Jak tam bydziesz siedzioł z frelkom,to Ci sie bydzie zdować,że to
je blank coś nowego,jakiś Spreewald abo patrzync w drugo strona jakisik Dunajec.

[szwager_z_laband]

a myslisz izech jeszcze tak niy robiou:))


wiym ze idzie paczec i nic niy widziec, ale wiym tysz ize niy cza
paczec coby widziec inksze rzeczy jak widzom druge ludzie.

[bratjakuba]

szwager_z_laband napisał:

> a myslisz izech jeszcze tak niy robiou:))
>
>
> wiym ze idzie paczec i nic niy widziec, ale wiym tysz ize niy cza
> paczec coby widziec inksze rzeczy jak widzom druge ludzie.

No przecaś sie mie pytoł jake som Twoje widoki? Dzisiej trz by już powiedzieć
jake były? Toch Ci je opisoł.Toż jak mog ech pomyśleć,żeś tak jeszcze nie robioł?

[szwager_z_laband]

pörzegodous mie:)

[rita100]

No i popatrzcie w jaki prosty, a zarazem bardzo sympatyczny sposób Jozef się
oświadczył Katrince. W bardzo wdzięczny i delikatny sposób. A zaczeło się od
podejścia do falorza po cytelek, a potem od obserwacji i słodkiego, spokojnego
podejścia do pracowitej praczki. Oj, tak i nic jej nie pomagając, nic się nie
napracował jak tylko częstował:
"Chcesz lakrice, abo możne kalmus bydzie lepszy?"
A przytym bacznie dawał pozor na symbioze dzieweczki z wodą, lasem....

Działa na wyobraźnie...... faktycznie. Dlatego wole czytać niż pisać.
Nie pamietam jaka to książka była, ze tak jej autor działał na wyobraźnię , że
niestety nie byłam w stanie jest skończyć.

[rita100]

Gyszychta Antóna, przypomina mi opowiastki dawnych óm, rychtycznie - a ómy w ten
sposób przestrzegały dzieci by nie deptały zboża, bo to jest chleb. Na Warmii to
te omeczki zwały sie wiedźminy. Zawsze straszono nimi dzieci.
Ale ta gyszychta jest bardzo przyjemna.

[cirano]

Nom tysz omy godaly co nom wolno a czego niy.
"niy jydzcie zoltego sniega chopcy", pamiyntom...

[szwager_z_laband]

u nos bouo nojwiyncyj czornego sniyga, tyn zouty to bou ino kole
supkow:)))

[szwager_z_laband]

niymom jakos natchniynio ostanio, bezto dom cos starego:)

Opowia wom dzisiej bajka gynau o tym jak kot kurzou fajka:)

A bouo to tak! Tam kaj dondziecie jak miniecie siedym lasow, siedym
gor i
siedym rzekow, tam miyszkou se jedyn kot co poradziou kurzyc fajfka.
Tyn kot
miou tako srogo fajfka, co jak jom kurzou to miou jom aze kole
szczewikow - ja
bo to bou kot co miou niy ino fajfka ale i szczewiki! Dym szou ze
fajfki a kot
rozprawiou wszyskim take roztomaite bojki i bery, jo zapamiyntou
jedna kero wom
tera opowia.
Downo, blank dono tymu, boua se jedna wies we keryj miyszkali same
dobre
ludzie. Zodyn zodymu nic zuego niy padou ani niy zrobiou, wszyske se
pszoli i
wszyske byli richtik pozondne ludzie, zodyn niy bou sporny i zodyn
drugymu na
zuosc niy robiou. Ale roz urodziou sie we jednyj famili syneczek co
miou pukel.
Ta familia kochaua go tak jak wszyske ludzie kochajom swoich bajtli,
ale tyn
syneczek bou niyszczynsliwy bo ino on miou tyn pukel i zodyn inkszy
we tyj
coukyj wsi. Tak sie tropiou tyn syneczek tym puklym ze niy poradziou
sie smioc
jak inksze sie smioli, niy poradziou sie radowac jak inksze sie
radowali i niy
poradziou zrozumiec czamu on je inkszy od inkszych.
Tak szou dziyn za dniym, tydziyn za tydniym i rok za rokym a tyn
syneczek bou
coroski to wincyj inkszy od inkszych i nic mu na to niy poradziou
zodyn pomoc.
Az roz stauo sie cos co by se zodyn niy pomyslou! Do tyj wsi kaj
miyszkali ino
dobre ludzie prziszou jedyn zebrok co miou jeszcze wiynkszy pukel
jak tyn
syneczek.
Nasz syneczek go uwidziou i piyrszy roz w zyciu sie usmiychnou, i od
tego czasu
poradziou sie juz smioc tak jak wszyske ludzie we tyj wsi we keryj
miyszkali
same dobre ludzie.
Koniec bojki skonczouo sie i dwie dziurki w nosie:)

[cirano]

Niy lubia bajkow Andersyna bo za smutne. A to jes tako.
Dziynki trotzdym, szwager

[rita100]

cirano napisał:

> Niy lubia bajkow Andersyna bo za smutne. A to jes tako.
> Dziynki trotzdym, szwager

I braci Grimów też nie lubie. Ale nie wszystko co smutne jest nie dobre.
Najpiękniejsza bajeczja jest dla mnie Mały Książe - alem się przy niej
napłakała. Kiedy się odrywałam od czytania jej w pracy, wszyscy się pytali - co
się stało, taka pani zapłakana. Nie chcieli wierzyć, ze to przez książkę.

[rita100]

Pamiętam, wioska z samymi dobrymi ludźmi, tylko ten jeden był inny, ale jak
potkał też takiego samego to mu było lżej. Tak to jest, że samemu jest ciężko, a
raźniej w grupie.