Gość: kiyks
IP: *.crowley.pl
06.08.03, 17:42
BALLADA O SAMOCHLASTANIU
(na melodia czterdziestoletniyj dziywicy)
Teroz wom powiym tako historio jak jedna łajza przi dworcu
razym z szoferym i ze chirurgiym zrobiyli gupków z wyborców
Dugo myśleli bo gowy puste, jak by tu wygrac wybory
aże wymyślił, trza zrobic sznyta, tyn kiery był tam dochtorym.
Potym we knajpie, tyj po ratuszym najpiyrw zniyczulił miyjscowo
potym skalpelym dźgnył pod łobojczyk, zrobiył to dosyc fachowo.
Mróz był niyzgorszy, zima jak zima a łon ino w samyj koszuli
lecioł do auta po handtelefon za kiery sporo wybulił.
Wyloz na schody łobejrzoł w koło, stwierdziył co nima nikogo
rozpion koszula i zaczon wreszczeć, aż prziszła ołma ubogo.
Patrzy na schody a ktosik leży, pysk lekko mo usmiychniynty
i jom cygani, co przed momyntym zostoł tu przez kogoś dźgniynty.
Krew mu niy leci, dziwi sie ołma tyn pieron chyba łożarty,
w samyj koszuli, dre sie jak gupi, łograli go chyba w karty.
Ale jak wcześni to ustalili chirurg sie z szynku wykludziył
wezwoł policjo i pogotowie kaj ustawionych mioł ludzi.
Policjant wejrzoł, koszula cało a pod niom blank mało rana
w pysk im sie zaśmioł, łoj towarzysze, wy mocie mie za barana.
Ale policjant ło tym niy wiedzioł, że sprawa jest ustawiono
i pysk mo trzimać i niy łosprawiać bo sie inaczyj przekono.
Erkom go wiyźli durś na synale, teroz już klamka zapadła
nic mu niy było ino udowoł, krwi ani kropla niy spadła.
wprost na chirurgia łajza powiyźli, na oddział zaroz przijyli
ale na rana zamiast dać plaster aże trzy szwy mu zmieściyli.
We wiadomościach zaroz podali, że juzaś we Mysłowicach
cuda sie dziejom a komunisty ze strachu siedzom w piwnicach.
Czerwono prasa tak roztrombiła tyn szwidel na Polska cało
że jedynoście tysiyncy ludzi w balona zrobić sie dało.
Poszli głosować na tako łajza bezto tyż wygroł wybory
stan mioł stabilny, pysk wystraszony a rzondzi aż do tyj pory.
I tukej morał trzeba postawić, teroz na prziszłość pamiyntej
jak sie pochlastosz wołej policja i zrobiom cie prezydyntem.
Kiyks
