Rozprowianie

[laband]

Cosik mi sam ostatnio mauo naszyj godki, bezto wysznupouch wom sam cosik od
jednego naszego karlusa we i-necu.

Każdo zima jak co roku, zbiyrały sie baby z Wielopla i dziołchy przi
szkubaniu piyrzo, przeważnie tam kaj była jako dziołcha na wydaniu i trza
było pierzina suć. Tak tyż było u Anki, tej freli od Francika, co już ku nij
dwa roki chodziył. Po Wielkanocy szykowało sie na wesele u Anki, a miała
dziepjyro jedna pierzina i dwa zegłówki. Mama od Anki dycki chowała gynsi i
piyrzo nazbiyrało sie mocka. Moja mamulka u z ciotkom tyż chodziły szkubać
piyrzi do Anki. Jo tam tyż czasym przichodzioł jak sie już ćmiyło i ny szło
już na nartach jeździć abo na sonkach. Tyj zimy to sie jakoś przijyno
jeżdżyni na sonkach na szosyji. Kole szkoły na wjyrchu w Wielopolu wionzali
my pora sonek do kupy, a potym my gzuli na dół ku krziżu wiela wykopać. Na
szosyji było gładko jak diosi, auta wtedy jeździły roz za świynty czas. Po
obu stronach szosyje rosły jasiony, a była ona wąsko na dwie fory i takom
kostkom gładziutkom była wysadzono. Jak my już sjechali na doł, to my czekali
aż pojedze jaki trachtor do cygelnie. Niy chciało nom sie pod górka congnonć
tych sonek i wciongnył nom je do góry. Formony to nas przezywali, bo jak
jechali pod górka z wynglym, to niy poradzili wyjechać, co tyk było gładko.
Roz jechoł taki stary Ignac ze synkym i tyż niy umjoł z tym wonglim wyjechać,
toż rzykoł do św. Antoniczka - "Antoniczku, zrob coś żebych wyjechoł, jak
wyjada to ci kupja tako świyczka jak tyn dyszel od mojigo woza." Tyn synek mu
godo "Co to tato godocie, dyć takich świyczek nima", a on mu na to: "Niy
godej tak głośno, bo jeszcze usłyszy i niy wyjadymy pod ta kympa". Jak żech
już pisoł, auta jeździły tak rzodko, że jak jechało jaki, to ludzie piykli
kołocze we Wielopolu. Doprowdy roz jedyn autok jechoł i kole dzisejszyj
tanksztele przed Golyjowym wjechoł do rantu. Był on załadowany Marmeladom i
ludzie obracali tam i nazod z kiblami i rychtig kołocze piykli.

Jak my już som przi Golyjowie, to musza pedzieć, że my tam jeździli na
natartach na tyj kalwaryji bez ta zima. Jeździli my tyż w "szczyrkowym dole",
na "bagnach", "zabuszkach", "machulcowyj" górce", "pynkalce" i w glinioku
kole szkoły. W glinioku to my z synkami zrobili tako wielko skocznia, aże
strach było na nia sjechać. Najdalij zawsze skoczoł Zefek i Tadek, to tyż
dziołchy za nimi lotały. Jo roz tyż chcioł tak daleko skoczyć jak łoni i jak
żech sie odbiył, to potym niy wiym jak było dali. Pamiyntom yno tela, że przi
szczewikach mi yno łokucia zostały. Narty były od moiji ciotki - starka mi
ich pożyczali jak ciotki niy było w doma - co było dali, to sie idze
domyśleć.

Wrocomy do tych szkubaczek: co te baby, kere tam u tyj Anki szkubały,
opowjadały. To sie w palicy niy mjeści, co jo sie tam nasłuchoł, Jo był
byjtlym dłógo żech nie wjedzioł co to je zowitka, potratek czy łonterlajb,
tako tym godka szła. Co tam kero słyszała, to opedziała i jeszcze coś od
siebje dodała.

Mje to sie najbardzi sie podobało jak godali o utopkach i klynkanicach, abo o
inkszych jaroszkach co rade po łożyrokach jscajom. Roz Trudka łosprawiała,
jak jom taki gryfny karlus na hanysowyj grobli zastawiyoł i pytoł sie o kogoś
co pod lasym miyszko. Wyglondoł jakby kaś ze zagranicy przijechoł. Trudka
była jeszcze frelom, a że i sie spodoboł, to go chciała do tyj chałupy
zakludzić. Dała sie śnim do godki, toż łon drabko jom pod parza chyciył, i
idom dali. Trocha mjała strachu Trudka, bo sie już ćmiyło, ale słyszała, że
keryś rzynie krowy z łonki i to było lepij. Wroz zejrzała na doł, bo i sie
zdało, że tyn karlus jakoś chromie. Włosy i na głowie stanyły jak ujrzała, że
tyn karlus zamiast nogi mioł kopyto koński. Najprzod sie chciała wrwać, ale
tyn karlus jom tak mocno trzimoł, że niy umiała nic zrobić. Potym sie ij
przipomniało, co starka powjedzeli i jak mu mazła bez pysk lewajtkom, to
utopek zaroski do przikopy wpod. Utopka sie zawsze bije majdykom, to słyszała
od swojij starki. Utopki sie umjom zamjyniać w bele co, to tyż Trudka
widziała jak sie śniego kaper zrobiył i pływoł bibko ku głybszyj wodzie.

Najbardzij tyj godki to miały te baby w łostatni dziyń, to były wyszkubki,
abo tyż godali na to "fyjderbal". Jo tam ekstra po mamulka prziszoł, ale tak
najbardzi skuli kołocza. Jak żech szoł ze szkoły, to żech widzioł jak mama od
Anki niosła dwie balachy do Studnika z piekarnie. Zdało mi sie, że mi sie
zachce, takigo pypcia, żech dostoł. Chocioż mamy było gańba, że i za keckom
lotom i za roz mie du dom wygoniła. Mama od Anki dała mi dwie sznity kołocza,
jedna z makym, a drugo ze syrym, takigo kolocza dzisioj niy ma na całym
świecie. Szkoda, że mie mamulka wygnała, bo tak tam było piyknie i byłoby
dzisioj o czym pisać, co te baby tam jeszcze godały. Pod łoknym żech jeszcze
na dworze słyszoł, jak sie chichrały.