Jak chlyb codziynny

[broneknotgeld]

Heft piyrszy

[broneknotgeld]

Motto:

Godko, tyś była, żeś jest i bydziesz
Boś dlo Ślonzoka jak chlyb codziynny
Łon z tobom w życie łod bajtla idzie
I prawie bezto dlo cudzych inny.

Wele chleba

[broneknotgeld]

Wele chleba
-Tako trzeba.

[broneknotgeld]

Muzeum Chleba we Radzionkowie

Choć w Bytomiu to być miało
Sie Radzionkow dyć wybrało
Kaj wpiyrw hale, magazyny
Cuda wlazły teroz driny
Toż staraniym Mankiewicza
Sztela mo ciekawe lica.

[broneknotgeld]

Muzeum Chleba 26.VI.2000

Poświyncone, już łotwarte
Ano - richtig wiela warte
Co wpiyrw było tu pokożom
Cukernikom i piekorzom
Dyć po prowdzie - tyż skiż dzieci
Kunszt z naukom zocnie leci.

[broneknotgeld]

Radzionkow-Rojca

Czym Radzionkow-Rojca słynie?
Czego tukej niy łominiesz?
A dyć jest Muzeum Chleba
Toż tam kuknońć choć roz trzeba
I nacieszyć tako lica
Tym co skuli Mankiewicza.

[broneknotgeld]

26.VI.2000 - 2013

Trzinoście rokow - tako ciekawi
Niych wiela szczyńścio muzeum sprawi
Niychej prziciongo durś nowych gości
Co zdo sie krziwe przeca wyprości.

[broneknotgeld]

Dlo dziecek

Dlo dziecek cuda
Żymły wypiekom
Tukej niy nuda
Darmo niy czekom
Jest historyjo u Mankiewicza
I ciyngym bydzie - jako kyns życia.

[broneknotgeld]

Pecynek chleba

Pecynka chleba niych niy brakuje
Czym dlo czowieka - tukej poczujesz
Muzeum Chleba we Polsce słynie
Znojdziesz kaj Rojca w ślonski dziedzinie
Tu niym sie asi niyjedyn czowiek
Muzeum Chleba we Radzionkowie.

[broneknotgeld]

Ślonskość smakować

Chlyb - to jedne ciyngym ino
Dom ci zowdy przipomino
W kerym matka sznity kroła
I łokruszka depnońć boła
Chlyb - sie piyrwyj dyć zdowało
Co z niym ślonskość smakowało.

[broneknotgeld]

A kej braknie?

Kej ci braknie w doma chleba
Kej twyj duszy czegoś trzeba
Źle z tym bydzie
Czowiek w biydzie
Djosek capnie cie do Nieba?!

[broneknotgeld]

Polski chlyb

Polski chlyb jako i ślonski
Kuszom ciyngym jego konski
Kuszom ciyngym jego sznitki
Chlyb powszedni, a niy zbytki.

[broneknotgeld]

Czego to niy ma?

Czego to niy ma u Mankiewicza
Kaj yno blikniesz mosz gorke lica
Jako kroć żymły, jako piyc chleby
I ciostym miyszać wedle potrzeby
Coś ze piekarni, z cukerni cosik
Tako ze sklepu kaj stracisz grosik
Ano - co było, jest i durś bydzie
Wiy kto we Rojcy w muzeum przidzie.

[broneknotgeld]

Piniondz chlebowy

Chlebowy piniondz na ciynżke czasy
Kejś mioł tyn notgeld, tyż chlyb we taszy
Ech, skuli wojny tako sie dzioło
Ano - niy było ze tym wesoło

Dyć piniondz taki we wercie chleba
Przi inflacyji tyż wspomnieć trzeba
Kej i miljardy psinco we wercie
Chlebowy piniondz - piekorzu - biercie.

[broneknotgeld]

Chlyb jaki momy

Chlyb jaki znomy
Ze downa momy
Dyć przeca wiycie
Chlyb jako życie

Z czasow kej Greki
Przed Krystym wieki
Kej Fenicjany
I kej Rzymiany

Ciasto już gniytli
Ze monki pytli
Coby urosło
Do pieca poszło

Trefi plebsowi
Patrycjuszowi
Chlyb dlo kożdego
W tym siyła jego.

[broneknotgeld]

„Brif szpaskowy ” (2011)
Brif szpaskowy
-Pewno wiycie
Kōnkursowy!
Co na sznicie?
Latoś sie w Jastrzymbiu dzioło
portal.tvkanon.pl/program/ogladaj/2560/nasze-sznity-i-kraiczki-relacje-z-festiwalu-kultury-slaskiej.tv
Sznitōm było fest wesoło.
Moji roztomili
Pewnikym to wiycie
Jako choć bez bryli
Poznać co na sznicie
Dyć szkryfna wōm prawie cosik ło bajladze
Szpaskōm co na Ślōnsku latoś we paradzie
Czy wōm sie to zdowo?
Czy jakosik wadzi?
Czy niykōnkursowo?
Ze kuchni mi czadzi?
Jo sie tym niy tropia, żech niy jest jurorym
Skiż regulaminu niy czyja tyż chorym.
Ze hauskyjzōm sznita
Kminkym zawōniała
Chop to niy kobiyta
Kogoś ora brała?
Dyć radości wiela kej zagości w dōma
I po stole łazi prawie tako krōma.

[broneknotgeld]

Z tustym sznita
I cebulōm
Niy trza pytać
Dyć niy fulōm
Zjydz a zowdy zdrowy bydziesz
Kej smakuje żeś niy w biydzie.

Na sznita z tustym
Połōż cebula
Żołōndek pusty?
Zjydz - przestōń fulać
Wartko przepōmnisz ze tym ło głodzie
Ze swojim zdrowiym tyż bydziesz w zgodzie.

Sznita sznitlokym
Już łobsypano
Żeś niy borokym
Kej zjysz jōm rano
Zdo ci sie cudym po łostry zimie
Z wiosnōm sie witosz w ty zielyninie.

Chcesz sie witać
z Babōm Jagōm?
Z tustym sznita
pokrop magōm
I poczynstuj na sabacie
Dyć niy narōb przi tym w gacie.

[broneknotgeld]

Ze leberwōsztym
Francek zjod sznita
-”Niy był za tusty?”
Pyto kobiyta
Dyć zdo sie czasym biere jōm febra
Kej leberwōsztym futruje lebra.

Sznita z jajkym
Pokrychanym
To niy bajki
-Zjym dyć ranym
Sie popieprza i posola
Fest śniodanie take chwila.

Bez bajlagi
Chlyb dostała
„Krōl jest sagi”!
-Zawołała
Nic co masłym szmarowano
„Bez bajlagi - retuj mamo!”

Tako roztomili
Kōńcza brif szpaskowy
Żeście sie stropiyli?
Kaj kunszt ślōnski gowy?
Drapko wyklaruja, kej tego niy wiycie
Sie zamiost bajlagi legnōł na ty sznicie.

A

[broneknotgeld]

Abliger

Na abligry se dziwuja
No a potym je flancuja
Bestoż flanca idzie pedzieć
Musisz zowdy ło tym wiedzieć.

Ancug

Szaket westa i galoty
Z tym niywiela jest roboty.

Antryj

Niy wiysz? - przeca to boroku
We miyszkaniu jest "przedpokój".

Aszynbecher

Tam se kepniesz cygareta
No i tyż łostawisz peta.

Ańcla

Niy miyj tego za miyszkanie
Bo sie życie mynkom stanie

Mieć na ańcli szwigermuter
To już jest darymny futer.

Ańfach

Ańfach to przeca jest bele co
Wiela za ańfach tyż forum mo.

[broneknotgeld]

Ańfart

We familokach i kamiynicach
Ańfarty były jak tajymnica
Dzisioj coś z tego jeszcze łostało
Ale ańfartow momy już mało.

Ańbryna

Ktoś łyżkom po gowie mie klupie
- Niy ciyrpia ańbryny we zupie!

Ańlałf (rudzki)

Ańlałfu narobiołch jo tela
Że głośno sie stowo ta sztela
A wszysko skiż jajec to przeca
Wysypołch ich wiela ze neca.

Anong

Lepi go niy mieć niż mieć
Niy trza nom nawet go chcieć.

Abfal

Czowiek czasym tyż abfalym
Szkryflom tukej to ze żalym.

Apruzina

Szif ze Kuby w apruzinach
Dyć tak było - do pierzina!

[broneknotgeld]

Arbajancug

Łon jest zowdy do roboty
Kitla we niym i galoty.

As

Wszysko we niym "jest na plus"
Ponoć taki z niego tuz.

Aska

Gowa w gora - cycki sztram
Łona piyrszo jest ze "dam".

Asić sie

Niy trza asić sie za wiela
Bo niy zowdy jest niydziela.

Ausgus

Ze kokotkym łon jest w porze
W doma w siyni i na dworze.

Absztyfikant

Na zolyty prziszoł łon
A frela mu godo - won!

Abzaga

Tyn abzagi durś dostowoł
Co w raji di Efu stowoł.

Abcybilder

Hefty abcybildrom pszajom
Wiedzom jake miano majom.

[broneknotgeld]

Ajerkoniak

To jest gorzołeczka
Gryfnego dziubeczka.

Abnyjer

Nojpiyrw abnyjery miała
Potym wszyske popuszczała.

Ańlauf

Ańlaufu nom wszyskim dała
Dyć jajca trzepać umiała.

Ajerkuchy

Zjedli wszyske ajerkuchy
Pełne majom teroz brzuchy.

Ańfach

Styknie szkryfnońć belejak
Niby cosik dyć kaj smak?

Abo

Abo do kusiola
Abo coś "pod zola".

Abzac

Abzac choby szpyndlik ciynki
Na starość z gyrami mynki.

Abraham

Czy pamiynto to hebama
Że jo chnet mom abrahama?

[broneknotgeld]

Aby

Aby yno mi sie chciało
Aby cosik zrymowało.

Achtlik

Styknom mi achtliki sztyry
By durś tańcowały gyry
Gorzołeczki bestoż dejcie
I na cyji coś zagrejcie.

Afa

Afa frelka mi zrobiyła
Zdo sie - cołko afom była.


Ajchle

Kuknołch we gora - ajchle dymbowe
Łoj! -Już terozki mom je na gowie.


Ampla

Ampla blysła mu we gowie
Łoświycony teroz czowiek.

Ausdruk

Ausdrukow we godce tela
Niy spamiyntosz tego wiela.

Ajchnońć

Ajchnyła se pod niym jakby asta życio
A wszysko skiż tego że za wiela picio.

[broneknotgeld]

Auslynder

Zać przignało auslyndera
Ciongnie go tu jak cholera.

Ańfach

Co jest ańfach a co niy?
Zowdy ktosik ło tym wiy
Tyż utropa ze tym jest
Idzie se dyć szajsnońć fest.

Ablyjger

To niy franca
Yno flanca.

Ajzynkrojc

Zdo sie ślonski to tyż krziż
Łon ze Wrocka - przeca wiysz
Pruski krol go ustanowioł
By Francyjok już niy dłowioł.

Szpana

Szpany wiela narobiyła
Dyć to burza w szolce była.


Arband

Na rynka frelki
Ring ze tych wielkich.

[broneknotgeld]

Aksle

Aksle pynkły Fridzie z bontka
Mom go teroz na pamiontka.

Amajza

Ech - roz wyloz żech na glajza
Szafner ryknoł - "Toż amajza!"

Ałgustka

Jak ałgustka mo chroboka
To niy musisz za niom skokać.

Ańtopf

Do antopfu bysztek mom
Co wom teroz z niego dom?

Ajerkuchy

Ajerkuchy z kyjzom
A mono z gymyjzom?

Asta

Skworc na aście siod
Cześnie wszyske zjod.

Ata

Mo baba coś z aty
Zowdy w dziyń wypłaty.

Abfal

Ktoś za abfal godka mioł
Djosek kocioł bydzie grzoł.

B

[broneknotgeld]

Bakać

Idzie bakać cygarety
I harować tyż - niystety.

Bana
Cug na glajzach z wagonami
Pewnie ło tym wiycie sami.

Banhof

Cugi czynsto tam stowajom
Ludzie ze nich wysidajom.

Banka

Ta na glajzach glingo fest
W wiynkszych miastach łona jest.

Blumkul

Śmierdzi fest jak sie go warzy
Dyć ło smaku idzie marzyć.

Bombon

Czynsto go do gymby tkosz
Niebo we niyj wtedy mosz.

Bonclok

Łon jest dobry do tustego
Żur kiszony tyż ze niego.

Bajlaga

Przeca wszyscy ło tym wiycie
Wylyguje sie na sznicie.

[broneknotgeld]

Bratruła

Kołocz w bratrule ołma nom piykła
Wyloz zokalec - heksa urzykła.

Bratkartofle

Nojpiyrw warzone potym pieczone
Wcinali my je jak łoparzone.

Brałza

Bergmon czorny w badyhałzie
Dugo moczoł rzić przi brałzie

Jeszcze inkszo brałza znom
Smak do dzisioj w gymbie mom.

Bigel

Na biglu wiyszom se jupka
A czasym bawia we gupka.

Bigylfalta

Na nogawicy jest łona
Niy chytej nigdy rynkoma
Bo przeca urznońć sie idzie
Niy trza ci zaś być we biydzie.

Bergmon

Bergmon to tyn co na grubie
Durś pod ziymiom cosik dubie.

[broneknotgeld]

Błecha

Niy chcioł byś jom mieć u siebie
Jak sie dropiesz toś niy w niebie

Blynda

Blynda w taszynlampie mom
Ździybko światła zaroz dom
I daleko niym zablyndza
Bo jo przeca w Ślonzek pyndza.


Bigylbret

Tako decha
Co mo pecha
Choć materiał na niyj jest
Przipiykajom jom durś fest.

Bebechy

Niy za wiela mom uciechy
Jak mi burczom te bebechy.

Baje

Rechtorka waje
-Ciyngym te baje.

Baba

Staro panna, ślubno, wdowa
Trza na baba pozor dować.

[broneknotgeld]

Babka

Zista na nia idzie pedzieć
Ło tym tyż wom czeba wiedzieć.

Binder

Ze Kroacji łon pochodzi
Karkowi mojymu szkodzi.

Bryle

Na kicholu trza je nosić
Słaby ślyp sie ło nie prosi.

Byfyj

Byfyj zowdy w kuchni stoji
Ło noczynie łon sie boji
Garce szolki i talyrze
Kere byś niy łotwar dzwiyrze.

Bumelka

Jo już robia te ćwierć wieku
Bez bumelki - wiydz czowieku.


Blank

Richtig cołkym - tela szkryfna
Blank żech czyźwy - dyć se gichna.

Bebok

Łon na Ślonsku straszoł zowdy
We tym richtig wiela prowdy.

[broneknotgeld]

Berga

Bergom w łeb tyż dostać idzie
Dyć niywiela z tego przidzie.

Babske scochy

Babske scochy żech zbiyroł na łonce
Tyż som kwaśne a przeca w niych słońce.

Bajzel

Bajzel w doma naszym jest
Jak sie przontać niy chce fest.

Babowka

W gymbie mom słodko
Boch jom tam potkoł.

Beblać

"Beblać" tyż klawiyrom idzie
Na forum to wszysko przidzie.

Bakpulwer

Kedyś drożdże były w zocy
Dzisioj łon mo wiyncyj mocy.

Bal

Ciepać kopać i kepkować
- Niy chciyj na niym zatańcować.

Bamońcić

We wybory biydny czowiek
Durś bamoncom mu we gowie.

[broneknotgeld]

Baniorz

Łon przi glajzach robi zowdy
We tym rymie wiela prowdy.

Bas

Zowdy mi sie przipomino
Jak zaś kopla dali spinom.

Bachraty

Jak puloka już niy widzi
To sie basym ździybko wstydzi.

Bajukać

Stary chop a tyż bajuko
Jak szpyroniym gardło płuko.

Babrać

Czy sie zbabrać idzie słowym?
Idzie! -Tela jo wom powiym.

Babrok

Niy ma dnia by sie niy zbabroł
We tym wprawy wielki nabroł.

Badki

Naturysty żech uprosioł
By na plaży badki nosioł
Dyć sie ślubno tym wnerwiyła
Zawiedziono jakoś była.

[broneknotgeld]

Badnońć

Jak żech badnońć chcioł na frela
Ślubno zaroz - W pysk ci szczela!

Bauplac

Bauplac kupioł na cmyntorzu
Dyć budowy już niy dożoł.

Barzoły

Utopek w barzoły wpod
Z czego był pierońsko rod.

Belontać

Jak wysłepia seta pionto
Już mi w gowie sie belonto.

Berać

Umiała berać Szecherezada
Jo tyż - choć frelka tymu niy rada.

Bery

Niy byda jyj berow prawić
Lepi z dziołchom sie zabawić.

Bezkurcyjo

Bych go ździeloł pryndko w ryjok
Jak widza ta bezkurcyjo.

Betlyjka

Przi betlyjce we Wilijo
Śpiywo cołko familijo.

[broneknotgeld]

Bez

Niy. To niy jest wcale flider
Bez kery gnat złomoł szwiger.

Bezmała

Bezmała my som w Europie
Dyć co dali z tym chopie?

Bezto

Bezto że wongel tu momy
Bezmała biydy doznomy.

Beztydziyń

Na beztydziyń i łod świynta
Trza ło pszoniu durś pamiyntać.

Biksa

Ślonsko biksa łotwiyrajom
I ze tego sie chichrajom.

Biydaszyb

Zaś fedrujom w biydaszybach
Momy kryzys w Polsce chyba.

Binda

Łobindować trzeba gowa
Co durś rzońdzić chce łod nowa
I sie ciśnie na tyn wiyrch
A kurować trza jom wpiyrw.

[broneknotgeld]

Blindar

Jak mosz blindar - pod noż przidziesz
Wtedy przeca zdrowym bydziesz.

Biza

Jak se galant szwongu wziył
Na bizach mu wiater wył.

Blaszok

Fest sie boł ło ta landara
Aż blaszany kupioł garaż.

Blacha

Blacha z kołoczym
Cieszy nom łoczy.

Blank

Kupiyli nastympny szrank
Już go pełny majom blank.

Blukać

Cołki dziyń jyj blukoł w ucho
Szczyńściym frela była gucho.

Błozny

Błoznować idzie we rymach
Nado sie tu kożdy tymat.

Blumwaza

Bez łogrodek wom to powiym
Tam jest kwiotek. A kaj korzyń?

[broneknotgeld]

Boczoń

Do Afryki sie przekludzioł
Jak se yno dziyń łostudzioł.

Bodnońć

Bodnońć idzie nawet słowym
Tela jo tu yno powiym.

Bojtel

Bojtel piniyndzy by sie mu przidoł
Pewnie by wszysko na frelki wydoł.

Boki

Nawet w doma u borokow
Niy ma łokyn bez tych bokow.

Bolawo

Chodza teroz dość niymrawo
No bo szłapa mom bolawo.

Boliłoczko

Tyn kwiotek na łonce
Jest jak małe słońce.

Bolok

Ze niego niyborok
Na boloku bolok.

[broneknotgeld]

Bonkawa

Dyć my sie zbestwiyli
Żodyn jom niy miyli
Kedyś młynkym sie kryńciyło
Do aromy jyj nyńciyło.

Bonty

To co bonte puszczo tyż
Ło tym chyba dobrze wiysz.

Borajstwo

Rykniesz nań - już serce ścisko
Bo tam litość przeca miyszko.

Borok

Ślintać czynsto przi niym możesz
Czasym chichrać - moj ty Boże.

Brytfanka

W niyj rolady już se piekom
Jo ciyrpliwie na nie czekom.

Bryja

Bryja gynsto
Tusto czynsto.

Brynol

Choć łon kolor nosi modry
We procyntach przeca szczodry.

[broneknotgeld]

Brzim

Brzim na zima cołki goły
Choinki już go wyśmioły.

Bubikopf

Frelki lubiom tako friza
Lepszy kok niż kudły lizać.

Buda

Fuzbaler ta buda zno
Szkolorz z niyj pożytek mo
Na targu tyż wiela tego
Buda z piwym - coś mojego.

Buks

Idzie drogom - w gymbie cipa
Z niego przeca niy jest klipa.

Bulić

Bulić forsa grubo idzie
I ruderze tyż to przidzie.

Bulkać

Zaciyr bulkać już mi zaczoł
Potym byda go łonaczoł.

Bożo krowka

Czerwono we czornych kropkach
Niy dojono tyż przez chopka.

[broneknotgeld]

Bratering

Łopieczony w łoccie pływo
Take ze ty ryby dziwo.

Brecha

Chachor zowdy mo uciecha
Jak we rynkach czimie brecha.

Breweryje

Larmo wielke - breweryjo
Sie spotkała familijo
Kaj łostuda ciyngym jest
Haja możno bydzie fest.

Brusić

Ślubny noż nabrusić - strach
W nocy moze zrobić - ciach!

Bymbyn

Walić w niego wiela idzie
Ale co nom z tego przidzie?
Choć zrobiymy wielke larmo
W środku pusty - niy na darmo.

Byrna

Poszła byrna - wielki ćmok
Jak terozki zrobić krok?

[broneknotgeld]

Byszta

Do kudłow dobro i do żelazła
Nawet do gymby byszta tyż wlazła.

Bysztek

Noże łyżki i widelki
Bywo mały i tyż wielki.

Bonclok

Boncloki we Prusach zdo sie cołkich były
Recht w tym - łone Bunzlau naprowdy sławiyły.

Bysztek

Trzi byszteki istnym dali
Jak se w końcu pobiyrali.

Bajtle

Bajtle przeca to dziecioki
Rodziciele niy boroki.

Bratering

Robi richtig kwaśno mina
Dyć to dlo nos niy nowina
Jakiś taki pozmorszczany
Pewno istny łopiykany.

Buły

Buły brać czasami idzie
Wiela ojlow ze tym bydzie?

[broneknotgeld]

Baje

Pyndzyjonista co życiu pszaje
Chciołby se jeszcze wybrać na baje.

Bonkawa

Bonkawa z mlykym tyż czynsto pija
Bez niyj ze rana jakby mniyj żyja.

Bytom - Świetlik

[broneknotgeld]

Świetlik

Stanoł se Świetlik na ty Dworcowy
Zdo sie w Bytomiu łon cołkym nowy
Dyć przeca żeście go prziwitali
Co ze niym bydzie terozki dali?

Możno wom frelki tu zbałamuci
Bajtli narobi, pitnie, niy wroci
Ciyngym mo banhof łon za plecami
To może pedzieć - Łostońcie sami.

Bytomski zbereźnik

Zepsuł ponoć Świetlik jedna bytomianka
Deliberowali nad tym już łod ranka
Jako to napochoł? Przeca dziod już stary?
Toż wy nic niy wiycie? -Zrobioł to cygarym!

Gyszynk

Toż na gyburstag gyszynk "Plejady"
Fajnisty - ło to niy bydzie zwady.

[broneknotgeld]

Ło Świetliku nikt niy szkryfnie
choć karlus se prosi
Toż zaś Bronek teroz gichnie
Wciepnie inkszy "grosik"


Downymi czasy

Było to richtig downymi czasy
Jeszcze niy znali Dworcowy sztrasy
Stond żeś łoglondoł Bytomia mury
W ziymi zaś yno głymbokie dziury

We jedny Świetlik se pomiyszkiwoł
Dniym krył zaś w nocy na miasto dziwoł
Dyć jak se keryś po ćmoku błonkoł
Do bram go powiod - w wodzie niy tonkoł

Dostowoł za to czasym tyż grosik
I uszporowoł se tego cosik
Z czasym bajali ło skarbie jego
Jak roz szukali wciyło istnego

Dyć zaś łostatnio Bytom go mo
Czy jego dzieje naprowdy zno?
A jo żech dzisioj wejrzoł mu w łoczy
Już wiym - wachuje we dnie i w nocy.

[broneknotgeld]

Jagna i Świetlik

Godała tako z Bytomia Jagna
Że Świetlik wywiod jom roz na bagna
Jednak niy było skiż tego zwady
Przeca se łona dała z niym rady
A że w barzołach nikt im niy wadzioł
Nawet cygarym wiela niy kadzioł

Wziyło roz Jagna z tym na wspominki
Ale kamratki zrobiyły minki
Zaroz wylazły tyż na Dworcowo
I podszczypujom Świetlika zdrowo
Dyć łon durś kwardy jako tyn "spiż"
Teroz już ło niym to wszysko wiysz.


Świetlik i Łożyrok

Szoł łożyrok Dworcowom - niy minoł Świetlika
Toż dzisioj z daleka chce łod niego zmykać
Po prowdzie to nawet niy wiym co sie stało
Styknie że istnymu pić se łodechciało
Już terozki ponoć gorzoły niy chyci
I jakby nabożnie sie życie mu klyci.

[broneknotgeld]

Feler

Mo feler Świetlik - toż niy ma rady
Droga prziświyco durś do "Plejady".

Cygaro Świetlika

We gymbie czimie cygaro z Kuby
Niyjedna frelka myśli se - Luby
Choć żeś jest mały i richtig stary
Dyć wiela zdziałosz ze tym cygarym.

Przesond

Karlus Świetlika w pysk mocno trzaśnie
-Niychciane pszonie gibko wygaśnie

Jedyn już ponoć tego probowoł
Wiym yno tela - rynka w gips dowoł.

Struty Świetlik

Napioł gorzołki se z formalinom
Stanoł jak wryty ze gupiom minom
Możno trza bydzie sie już kurować
Dyć zaś welunek - wszysko łod nowa.

[broneknotgeld]

Pistulka i Świetlik

Bliknoł se Pistulka na jego cygaro
Jakby tu karlusa zrobić tyż na szaro?
W końcu Bytomiowi łostawioł boroka
Trza było kaj ińdzi na robota skokać.

Świetlik wandrus

Wyloz ze banhofu prosto na Dworcowo
Przi Placu Kościuszki jak ze muru stowo
Niy umi poskopić - cołki kwartał wciyło
Dyć richtig tu gryfnie piyrwyj przeca było.

Bytomske władze

Łoświycone władze cygarym Świetlika
Podobnoś niy bydom kaj ćmok wiyncy blikać.

Kedy świyci

Cygaro blyszczy se na czerwono
Jak naprzeciwko niytkniynte łono.

[broneknotgeld]

Samotny

Świetlikowi zdo sie
Że tu dobrze mo sie
A jo godom wom
Durś tyn karlus som.

Podobnoś

Podobnoś Świetlik prziszoł ze wschodu
Bebok skiż niego aże se wkurzoł
Łoj - coś niy bydzie mioł tukej miodu
Dyć tela jego co yno użoł.

Nowo era

Majom w Bytomiu już nowo era
Inaczy ponoć rachujom teraz
Jo ło tym tukej se zaczoł klikać
We piyrszym roku Ery Świetlika.

Durś bajom

Toż ło Świetliku tukej durś bajom
Przeca na niego jednak niy wajom
Że jest z Bytomiym se tyż raduja
I bestoż rymy te ślonske suja.

[broneknotgeld]

Wróżba

Krolowa Saaba to ponoć wróży
Że jak cygaro Świetlik wykurzy
To sie zapadnie ze miastym w ziymia
Toż go wachujcie bo jo niy szczimia.

U Gorywodow

U Gorywodow roz zabalowoł
Przeca czasami czadu tyż dowoł
Dyć na Dworcowo zygzakym wroco
Nigdy w dziyń jednak a yno nocom.

Niy ze gruby

Łon niy ze gruby - to kożdy wiy
Czy tam by kurzoł? Jeronie - niy!

Na grubie

Ponoc na grubie do szoli wloz
Piyrszy i richtig łostatni roz
Bo ciyngym czimoł cygaro w zymbach
Toż mu bergmony skuli ta gymba.

[broneknotgeld]

Bytomski sztynks

Jak gryfno frelka - cygaro żarzy
Zdo sie że Świetlik ło niyj se marzy
Dyć niych mu w łoczy wlezie szantrapa
Sztynks se roznosi - czy to fuzlapa
Karlus uszami pierońsko dymi
-Tako utropa bytomski ziymi.

Se łostoł

Na fajer se prziszoł ździybko tu podziwać
Dyć przi gyburstagu niy chcieli polywać
Toł łostoł w Bytomiu - ponoć skiż welunku
Wtedy niy rachujom darmowego trunku
Myśli co w gorzole se chnetko łokompie
Z uciechy już teroz radośnoe aż tompie.

Śmiyrgus-dyngus

Frelki we pyńdziałek pewno bydzie sikoł
Kurde - bych se na to jo richtig poblikoł
Dyć mie we Bytomiu w tym czasie niy bydzie
Dejcie znać coś ło tym - wspomożcie we biydzie
Bych wiedzioł co richtig tyn Świetlik nabroji
I mog se poszkryflać cosik rymym mojim.

[broneknotgeld]

Pisanka

Dała mu frelka piykno pisanka
By Świetlik niy mioł z jojkami manka.

Wiosnom

Uwidzi bociek go na Dworcowy
Lepszo ta żaba z Katowic - powiy
I zaroz kludzi se na Stawowo
Tam tyż gyburstag? -Pokiwoł gowom.

[broneknotgeld]

Bytomsko "Agora"

Kuko Świetlik na "Agora"
Dyć go w środku niy widzieli
Sie mu zdowo jako zmora?
Niy - za jasno we ty szteli.