Ślonsko dusza

[broneknotgeld]

Ślonsk w UE

Słyszołch co posły PO w Warszawie
Chcom żeby Ślonzek był teroz w prawie
Wybrać do UE posłow we kupie
Zaroz mi serce do tego klupie

A jaki pomysł w SLD majom?
Opole z Wrockym tam prziłonczajom
Dyć to kolejny jest krok do zadku
Niy chciołbych wcale tego przipadku.

[broneknotgeld]

Kto to jest Gorol?

Jakby dogrzebać sie cołki prowdy
Gorol na Ślonsku był chyba zowdy
Niyjedyn zresztom pod naszym łokym
Stoł sie nom tukej richtig Ślonzokym.

[broneknotgeld]

"Perła w koronie"

Dlo nos ta perła jest richtig szworno
Dlo inkszych jednak yno jest czorno
Bioło czy czorno? Cynniejszo kero?
Wszyskich sie pytom tukej jo teroz.

[broneknotgeld]

Dlo mnie wongel jest jak perła
Wprawioł bych go jo do berła.

[broneknotgeld]

Marudom

Marudzynie nic nom niy do
Psu na buda to sie przido
Ślonzok po to mo galoty
By sie chytoł durś roboty
A tyj przeca durś ubywo
Take momy polske dziwo

Jak tu paczeć na Warszawa?
Dyć to czynsto jeji sprawa
Polski burdel tyż na Ślonsku
Zaszczypiyli go w tym konsku
I wyrosła piyknie flanca
Mynczy teroz nos ta franca

[broneknotgeld]

Trza by...

Trza by coś blysło nom przez ciaplyta
Silesia - gryfno to jest kobiyta
Nych bydzie teroz idejom naszom
I na pohybel tym co to gaszom

Drugom idejom jest naszo wiara
Siyły z niyj czeba - to pełno czara
Z kery codziynnie wiela spijomy
A ciyngiym pełno w niyj przeca momy

Tego wystyknie - to nom pomoże
Jo ło to rzykom do Ciebie Boże
I do Twyj iskry we ślonskim ludzie
Brać trza "hercowy" a wszysko pódzie.

[broneknotgeld]

Miodkowi

Kamrat mi tyż jedyn pedzioł
Jak jo czegoś żech niy wiedzioł
Na pierona ci ta godka
Jak mosz problym idź do Miodka.

[broneknotgeld]

Godka pisano

Jedny literki brak we klawiyrze
Łona by lepi łotwarła dzwiyrze.

[broneknotgeld]

Zygor ze Szwarcwaldu na ścianie mi łazi
A Szwarcwald to tyż jest przeca Ruda Ślonska
Chyba na tym forum nikt sie niy łobrazi
Jak jo go pozdrowia ze Europy konska.

[broneknotgeld]

Za bajtla

Za bajtla godka wy mie tympiyli
Ło mało z gowy by jom wybiyli
Dyć naszo gwara durś jo rozumia
A tukej pisza tela co umia.

[broneknotgeld]

Szczyńściym terozki je w szkołach lepi
Za ślonski rechtor pały niy wrzepi
Czasym sie asić idzie tom godkom
Konkursy gwary kwitnom czelodkom.

[broneknotgeld]

Ważne że forum pryndzy sie kryńci
No i do rymow mom jo durś chyńci
Czuja wyraźnie że ślonsko dusza
Pisać te fraszki niy musi zmuszać
Bo przeca niy jest to jakiś garb
Jak tu zaglondom macom nasz skarb.

[broneknotgeld]

Dyć sie tukej ciesza z tego
Pomyślunku fajnistego
Że my momy tako sztela
Dlo mie jest to richtig wiela

Bestoż suja tu co umia
Bo wiym jedno - to rozumia
Że to ślonski jest kaganek
Łon rozświytli nowy ranek

Niebo bydzie już jaśniejsze
Wszysko ździybko choć piykniejsze
To bych ciyngiym jo chcioł wspiyrać
Jak już moga se wybiyrać.

[broneknotgeld]

Spolszczony Ślonzok czy ślonski Polok
Dlo jednych wrzod jest dlo inszych bolok
Ale na swoje konto tu grzesza
I z tego tyż sie pieronym ciesza.

[broneknotgeld]

Jo wiym że jednak jaśni tu bydzie
Jak sami szarpnymy do przodka
Ślonzok Ślonskowi pomoże w biydzie
Ło tym mo tu być tyż godka

[broneknotgeld]

Jakoś tu wiotry wszystke wywioło
Cicho sie tukej na trocha stoło
A joch pomyśloł sie - Do pierucha
Przidałaby sie nom zawierucha.

[broneknotgeld]

Wioło nom ciyngym we jedna strona
Był z tego ostflug że do pierona
Kery Ślonzokow wywioł stond mocka
Jo zostoł coby tu na nich poczkać.

[broneknotgeld]

Trza by sie teroz mocno nom głowić
Jako te wiotry łobrocić
Jak tych z zachodu na Ślonsk zaś złowić
Kery z nich bydzie chcioł wrocić.

[broneknotgeld]

Ciepło wspominom podstawowka
Wtedy to żech mioł życie
Pamiyntom jedny rechtorki głowka
Cudo - Czy mi wierzycie?
Pamiyntom inszy rechtorki nogi
We mini kecce w kratka
Wpodoł żech bez nie w nastroj błogi
Tako żech z tym mioł gratka
Cycuszki łod ni do dzisioj widza
Bez haltra choć we cwitrze
Tych wspomniyń wcale sie niy wstydza
To z mózgu sie niy wytrze.

[broneknotgeld]

I zaś we Rudzie

Na Rozamundzie we familoku
Dopod żech gryfno dziołcha na boku
Chycioł żech pewnie za te drażniontka
I mi została po ni pamiontka
Bo jak mi machła prawym siyrpowym
Znak mi sie łostoł na łuku brwiowym.

[broneknotgeld]

To dlo Ślonska robia
Że fraszkom go szkrobia.

[broneknotgeld]

Warszawiokom odpor dowom
Niy kijokym yno gowom.

[broneknotgeld]

Jednak...

Jednak Ślonska niy capnyli
Łon durś przeca nom tu kwili
Z ziymi z duszy ciyngym woło
Wiym że niy jest za wesoło
Dyć to ważne że słyszymy
Yno mało z tym robiymy.

[broneknotgeld]

Te moje szkryflanie

Z ortografiom jo problymy łod lot szkolnych richtig mom
Durś rechtorka mi godała - Bronek ty mosz w polskim krom
Dyć wiedziała dobrze ło tym - niy wytympi cołkym godki
Choćby zamkła jom głymboko łona zowdy wyńdzie z klotki.

[broneknotgeld]

Po ślonsku

To jest jynzyk żywy
Bestoż tyż prawdziwy.

[broneknotgeld]

Na tym forum siedzieć lubia
Piorka ślonski gyńsi szkubia.

[broneknotgeld]

A dyć godka z serca płynie
Na Podhalu i na Ślonsku
Łona nigdy niy zaginie
Bo jest w kożdym naszym konsku

Jak żes duldoł matki mlyko
Bajtlym bawioł se na placu
W tyj intyncji ktoś fest rzykoł
Byś już nigdy jom niy stracioł.