Ludzie Ślonska

[broneknotgeld]

"Wybitni katowiczanie"

Ło ludziach z Katowic ciekawo szła godka
Co wiela tu wniyśli i je rozsławiyli
Łobgodali trocha niymiecko czelodka
Bo ło tych Polokach wiela już prawiyli

Myśla se terozki - dobry to poczontek
By już we tym mieście wszyscy w zocy byli
Ze narodowościom niy robić wyjontek
Durś pamiyntać takich co sie zasłużyli.

[broneknotgeld]

Waleska Winckler

Frelka to była werto miliony
Z majontku i mondry głowy
Kożdy by dzisioj chcioł taki żony
Richtig tyj lepszy połowy.

[broneknotgeld]

August Borsig

W samym Berlinie ciuchcie budowoł
Przijechoł do nos po glajzach
Ślonskego wonglo łon potrzebowoł
Werciyła mu sie ta rajza

Znoloz go przeca we Biskupicach
Już mioł co w ciuchcie folować
Choć życio zgasła mu potym świyca
Syn zaczoł łostro fedrować

Słynyła w Zabrzu przeca "Jadwiga"
Kedyś tyż "Pstrowskim" nazwano
A zaczło sie to skuli Borsiga
Trza nom pamiyntać to miano.

[broneknotgeld]

Jerzy Gische

Galman we Bobrku mu dobywali
Do Gdańska go wywoziyli
Ze kukfrym potym razym stopiali
I mesing z tego robiyli

Na tym majontek swoj wybudowoł
Szlachecki tyż dostoł tytuł
Choć i we Wrocku suknym handlowoł
Swojo historio tu wykuł.

[broneknotgeld]

Fryderyk Wilhelm Gische

Za jego żywota zmiyniyła sie władza
Dyć pedzioł - "Z Prusokym tyż sie tu poradza"

Bo pruske fabryki tyn galman durś brały
I ciynżke talary sie dali sypały

Potomka łon niy mioł i bestoż po śmierci
To wszysko capnyli jego "spadkobiercy".

[broneknotgeld]

Karl Grosser

Architekt to był wrocławski
Sławny i docyniony
Powiym że ze piyrszy ławki
Dyć Brynek durś podziwiomy

Joch tam przejyżdżoł łostatnio
W Technikum Leśne żech blikoł
Miyszkoł Donnersmarck dostatnio
Z wrażynio ślina żech łykoł.

[broneknotgeld]

Otto Fritsch

Był ratownikym śleprow ze gruby
Niy doł sie w kasza nadmuchać
Na "Ferdynandzie" retnoł łod zguby
Bergmony zaczli go suchać

Dugo im potym dyrektorowoł
W kopalni we Mysłowicach
Podsadzka z piosku piyrszy rychtowoł
I za to świyczka mu świyca.

[broneknotgeld]

Józef Lompa

Tukej Zefel robioł dlo tyj Polski wiela
Bo dusza mioł jakby rogato
Rektorowoł w Lubszy i pisoł durś tela
Że w końcu uciyrpioł tyż za to

Bez niego by mynij jakoś Polski było
My wiymy że mocka w tym racji
Łobudzioł w Ślonzoku co sie yno śniyło
Słowiańskij łon pszoł przeca nacji.

[broneknotgeld]

Generał Paul von Werner

Pon na Bujakowie i somsiednich włościach
Frycowi Wielkymu doł łostro po kościach
Bioł sie za cysorza w piyrszy ślonski wojnie
Kaj łon był - Prusoki niy mieli spokojnie
Na krola szarżowol pod Zombkowicami
Fryc pitoł w przebraniu polnymi drogami
Choć wojna Austrioki ta jednak przegrali
Dyć sława Wernera ciongnyła z nim dali.

[broneknotgeld]

Karliczek Godula

W Makoszowach sie urodzoł
W przyszowicko szkoła chodzioł
A łokrzciyli go w kościele
Co i dzisioj znaczy wiele
Tyn zabytek z drzewa cały
W Borowyj Wsi cieszy gały.

[broneknotgeld]

Ksiondz Norbert Bonczyk

"Homerym Ślonska" dzisioj tyż zwany
Łon tukej polskość nom budzioł
By Ślonzok niy był durś poniżany
Nad tym sie ciyngiym tyż trudzioł

Ta "gora chełmsko" "kościoł miechowski"
Blyszczom w poezji sie jego
A przeca inksze mioł jeszcze troski
Ulgi niy było dlo niego

Tako mi w gowie myśl chodzi tera
Ło piyknym naszym regionie
Dyć jak mu dali miano Homera
Trza łodkryć Ślonzek - niych płonie

Łogniym co grzeje i świyci jasno
Kery nom wszyskim pomoże
Niych w naszych gowach niy ma za ciasno
Bonczyk by pedzioł - Śzczyńść Boże.

[broneknotgeld]

Andreas Hindenberg

Mapa Hindenberga już nom niy zaginie
Dyć wyskanowali jom piyknie we Pszczynie
Trza nom tukej wspomnieć tego kartografa
Bo inaczyj przeca była by zaś gafa

Piyknie wyrysowoł łon to tym Primnitzom
Całe gospodarstwo - ichnie plesske państwo
Inkszy taki mapy szukej tu ze świycom
Ratować jom trzaba - bo bydzie zaś draństwo.

[broneknotgeld]

Janosch

Z jego Cholonka słynie Zaborze
Choć kajś żech słyszoł że coś niy może
Szczimać tyj prowdy ze ksionżki kartek
Godali że to niywiela warte

Widać jest tako już polityka
Prowda przez palce ludziom umyka
Niy zawsze blikać sie chcom na siebie
Szkryflo sie piyknie yno ło niebie

A ziymia przeca mo swoje prawa
Nojpiyrw ślintanie potym zabawa
Zawsze sie idzie ździybko zchacharzyć
Czasym tyż za tym trocha pomarzyć

Z tego marzynio bajki Janoscha
Ło nie jo ciyngym dlo dzieci prosza
A zy mnom przeca cołko Europa
Gafto na kartki ze Zabrza chopa

Jak mały bajtel łobrozki widzi
I nad czytaniym chce mu sie biydzić
We tym tyż sztuka wielgo karlusa
W jego łobrozkach ślonsko jest dusza

Bestoż go lubiom dzieci Europy
Z kerych wyrosnom porzondne chopy
I nasze wszyske pszone durś frelki
Powiym że Janosch Ślonzok jest Wielki.

[broneknotgeld]

Janosch "w doma"

Możno na rynkach trza nom go nosić
Na Ślonsk co roku z wizytom prosić
Czy nom "Cholonek" jego wystyknie?
"Ślonsk ze Janoschym" - byłoby piyknie.

[broneknotgeld]

Dyć go momy w plebiscycie
forum.gazeta.pl/forum/72,2.html?f=28940&w=70887552&a=70922362
Ło tym już pewnikym wiycie

[broneknotgeld]

Józef Wieczorek

Katowicko gruba mo durś jego miano
Bo łon na tym "Gischu" fedrowoł co rano
Mynczoł tu kapitał biydnego bergmona
Jak szukoł rycepty - to pedzioł - komuna
Dyć inkszym robolom dość dobrze tu służoł
Tyn karlus na miano swyj gruby zasłużoł.

[broneknotgeld]

Borsig w Biskupicach

Przikuloł sie cugym aże ze Berlina
Spodobała mu sie Biskupic dziedzina
Po prowdzie to jednak wongel go tu ciongnoł
Kery do roboty w swojich ciuchciach wprzongnoł

Szachty jego grubow pryndko tu stanyły
Niy yno "Jadwigi" tyż "Ludwika" były
Świtoł mu we gowie plan pieronym wielki
I tukej postawioł inksze swoje werki

Wielke piece kuźnia stalownia walcownia
Pryndko tyż dołożoł do tego gazownia
Piykny pałac tukej dlo siebie postawioł
Bo we Biskupicach wiyncyj czasy bawioł

Zaś dlo robotnikow stowioł familoki
By blisko tych werkow miyszkali boroki
Z czasym wszysko razym "Borsigwerkym" zwano
Przilgło do Biskupic na amyn to miano.

[broneknotgeld]

Fater Józef Nieborowski

Łon sie urodzioł we Bogucicach
Choć zapomniała go ta dzielnica
Placyk malutki mo niby tukej
Ale w pamiyńci ludzi niy szukej

Wiela podziałoł łon na tych misjach
Tam jego gwiozdka richtig zablysła
We Ekwadorze i Hondurasie
Mocka dokonoł na życio trasie

Nikaragua - tam durś mu pszajom
Jego zasługi tyż pamiyntajom
Z Boaco zrobioł prowdziwe miasto
Ze niego tyż było ślonske ciasto.

[broneknotgeld]

Zefel Kłyk

Ślonske westerny w Bojszowie
Robi łod downa tyn czowiek
Wciongnyło to cołko wioska
Na fest - niy yno na troszka

Amator z niego naprowdy
Ale my wiymy tyż zowdy
Że serce w to swoje wkłodo
Bo filmym do nos durś godo

Łostatnio Bojszowy nakryńcioł
Bo tymat tyn mocno go nyńcioł
Jak braty z Wehrmachtu pitali
I w Auschwitz im żywot przerwali

Dyć ślonsko to jest historyjo
Pamiynto durś ich familijo
Ich kamrat ze wojska to kapnoł
By Niymiec we lasach ich drapnoł.

[broneknotgeld]

Kej rajtować sie niy bojisz
pszczyna.naszemiasto.pl/artykul/599164,kupa-dymu-i-wrzasku-slaski-western-sie-kreci-wideo,id,t.html
We Bojszowach pokowbojisz.

[broneknotgeld]

Michael Willmann

Michael Willmann - malyrz baroku
Chcioł Rymbrantowi doczimać kroku
W Holandii talynt swoj wyszlifowoł
I z niego wiela Ślonskowi dowoł

Bo choć w Krolewcu łon sie urodzioł
Osiodł w Libionżu w klosztorze
Po naszyj ziymi przeca durś chodzioł
Wiedzioł że sztukom wspomoże

Wrocław i Nysa Milicz Legnica
Raciborz Strzegom piykno Świdnica
Znajom go wszyńdzie - i we Głogowie
No i chociożby we Otmuchowie

Byś łobroz jednak łoboczoł jego
Radza ci wlyźć do kościoła
Bo świyntych mocka jest pyndzla tego
Z ołtorzy tyż mogom wołać

Łostawioł nom tu piykno swo sztuka
A i nastympcow leko poszukać
Byłby ubogi region bez tego
Łon jest karlusym Ślonska naszego

[broneknotgeld]

Willmann

Zasłużoł sie na miano Ślonskego Rembrandta
W opactwie krzeszowskim wiela łon malowoł
I tyż dziynki niymu słynie ziymia sam ta
Bo tela talyntu Ślonskowi łoddowoł.

[broneknotgeld]

Ech, Willmannie, Duchu Ślōnska!
Polska copła cie we kōnskach!

www.facebook.com/groups/332939560673928/posts/1147210109246865/

[broneknotgeld]

Szpas Willmana

Opat szukoł go łod rana
W knajpie - tam znoloz Willmanna
Coroz czyńści tak z nim było
Kiepsko jednak sie skończyło
Bo na klucz go zamykali
By co zaczoł kończył dali
No i fajrant - freski piykne
Trza to łobloć - mynki styknie
A tu opat zaś pieroni
Michaela z kijym goni
Na karczmarza piyrwyj blikoł
Co rodzinie świyntyj fikoł
Że ich niy chcioł przenocować
W stajni sie musieli schować
Stond tyn raban. Wrzeszczy - grzych!
A tu wszyscy inksi w śmiych
Karczmarz - Willmann jako żywy
To szpas jego jest prawdziwy.

[broneknotgeld]

Piotr Brandl

Ze Czech łon pochodzioł - w Krzeszowie malowoł
Dyć wiela z Willmanna we duszy swyj chowoł
Jak jego poprzednik tyż lubioł popijać
By potym se pyndzlym na płotnie uwijać

Za długi łon piyrwyj we Hradcu se siedzioł
Aż opat cystersow sie ło nim dowiedzioł
Wyciongnoł go z pierdla bo kaucjo zapłacioł
I jego robota w Krzeszowie łopłacioł

Mioł wrocić do Hradca jak fajrant był tukej
Dyć pitnoł i potym na prożno go szukej
To jednak tyż wiymy że pomarł w przitułku
Jo dowom mu miejsce w "Ludzi Ślonska" kółku.

[broneknotgeld]

Daisy

Gyńsipympek z Anglii rodym
Niy przimiyroł u nos głodym
Pamiyńć jednak nom została
I wspomniynie jeji ciała
We tyj naszy ślonski Pszczynie
Jak i w Ksionżu - jyj dziedzinie.

[broneknotgeld]

Daisy off Pless

Stokrotkom jom zwała we Anglii rodzina
Gyńsipympka witała radośnie zaś Pszczyna
Choć ślubno Hochberga - modo frelka przeca
Jak jom przigruchali do ślonskego neca

Wszyskich łona tukej sobom zochwyciyła
Godali co Daisy nojgryfniejszo była
Wiela sie we Niymcach na nia dziwowali
Dyć jeji uroda słynyła tyż dali

Sercym litościwym wspiyrała Ślonzokow
Znała ciynżki żywot przeca tych borokow
Co we grubach werkach musieli harować
A łona im łod sia chciała coś darować

Po prowdzie niy cołkym tyż była szczyńśliwo
Na pruske zwyczaje blikała coś krziwo
Niyszczyńścia rodzinne w nia mocno piznyły
Bo w dwudziestym wieku ciynżke czasy były

Jak we drugi wojnie eksmisjo dostała
Z Ksionża do Wałbrzycha przeniyść sie musiała
Pryndko tam pomarła - grob jeji ukryty
Pamiyńć trza zachować tyj zocny kobiyty.

[broneknotgeld]

Arcybiskup Arnost

Syn kasztelana na kłodzkim zamku
Wele Pardubic rodzony
Fater mu pedzioł - Ty mody panku
Dobrze mosz być wykształcony

U joannitow w tutejszy szkole
Leciała nojpiyrw nauka
Dyć przeca jeszcze jako pachole
Do Boga chcioł drogi szukać

Bo jak roz rzykoł w kłodzkim kościele
Wejrzoł na Marii figura
To medytować dała mu wiele
Łoczy wlepiyła do mura

Studiowoł prawo w Padwie Bolonii
Zostoł biskupym we Pradze
Myśl ło Maryji kajsik go goni
Jom zowdy mo na uwadze

Przez cołke życie Kłodzko mioł w zocy
Tu augustianow sprowadzioł
Arcybiskupym - z całyj swyj mocy
Co dobre w ziymia ta wsadzioł

Dyć prawie już go Watykan wołoł
By siednoł na jego tronie
Do sia go jednak som Bog prziwołoł
Życio wyznaczoł mu koniec

Łostatnio wola spełniyli jego
W Kłodzku go pochowoli
Zaś tu Maryja paczy na niego
Czy zocny żywot pochwoli?

Som Arnost wiedzioł jak ze tym bydzie
Że za swo pycha zapłaci
Figura jego skruszonom bydzie
A gymba rysy zatraci

To co jest boske i co czowieka
Chyba sie tu powadziyło
A jednak zgoda wlazła w ta eka
Bo dali już lepiyj było

Jak ze okładym sto lot minyło
Z grobu Arnosta naszego
Cudnym balsamym mocno gichnyło
Koniec pokuty był jego

Dzisioj już szło by do świyntych grona
Arcybiskupa postawić
Maryja - możno sprawi to Łona
My sie mogymy tyż wstawić.

[broneknotgeld]

Na społa

Z Aniołym Ślonzokym Willmann fest sie pszoł
Jak kolejny gonsior wina w gardło loł
Jedyn wybroł pioro za boske narzyńdzie
Drugi swojim pyndzlym Pon Boczka kłod wszyńdzie.

[broneknotgeld]

Filadelfia

Pensylwanii stolica jak i downych Stanow
Założono przez kwakrow - ducha swego panow
Niy siedzioł im w gowie znak złotego cielca
Ale Jakub Boehme z naszego Zgorzelca.

[broneknotgeld]

Pamiyńci Boehmego

Kim byłby Mickiewicz bez miszcza swojego?
A czym świat nasz byłby jakby brakło Jego?

[broneknotgeld]

Ze Hindynburga

Ze Hindynburga wspomnioł żech chopa
Z kerym i Polska miała utropa
Niy groł na nosie mu żodyn Laszek
Łon sie nazywoł Hanys Lukaschek

Dyć był to Ślonzok i Niymiec wielki
Co dlo ideji ściyrpioł trud wszelki
Szczimoł Gestapo Sowietow szczimoł
Adenauera tyż teka czimoł

A burgemajstrym był w Zobrzu przeca
Jak go wygnali z polskego neca
Niy trza już dzisioj ciepać nań berga
Jak łon kamratym był Stauffenberga.

[broneknotgeld]

Profesor Wiesław Lesiuk

We Wszyskich Swiyntych pomarł nom latoś
I teroz smutno na duszy jakoś
Łon na notgeldy łotwar mi łoczy
Do dzisioj śniom mi sie czasym w nocy

Historio Ślonska - tego Gornego
To była richtig pasjo łod niego
Opole Marburg no i Opawa
Razym zabrały sie za ta sprawa

Co ze tym bydzie? Brak już Lesiuka
Kaj historyka takego szukać?
Kery by ślonsko historio pisoł
No i za wiela przi tym niy miyszoł

Powiycie - z niego gorol był przeca
Dlo mie zaś perła ślonskego neca
Bo mioł ta ziymia ciyngym we duszy
Z tego tyż idzie sie teroz wzruszyć.

[broneknotgeld]

Wincynty Pstrowski

Dyć łon do dzisioj we Zabrzu stoji
Czy ktoś historii sie jego boji?
Pryndki w robocie - we śmierci tyż
Krebs go wykończoł - pewnie to wiysz.

[broneknotgeld]

Św. Jadwiga Ślonsko

Wiym że ze niyj była naprowdy dewotka
Dyć Ślonsk miała w zocy - bestoż moja godka.

[broneknotgeld]

Franciszek II Ballestrem

Graf politycznom był tyż figurom
Parlamynt Rzeszy wzioł za krabikel
Ruda niy była przi niymu dziurom
Trza nom pamiyntać tyn "tortyntikel".

[broneknotgeld]

Fryderyk Wilhelm Grundmann

Dwiesta lot tymu w Saksonii sie rodzioł
Tukej Katowicom wiela tyż dogodzioł
W końcu możno bydzie mioł teroz ulica
Winno mu to przeca naszo okolica.

[broneknotgeld]

Polityk ze Siymianowic

We Siymianowicach rodzioł sie Korfanty
Bestoż tyż go majom tukej mocno w zocy
Czy znojdziesz tu kogoś kto by mog być anty?
A możno sie bojom powiedzieć to w łoczy.

[broneknotgeld]

Paweł Cyganek

Karlus ze Nowy Wsi - ja w ty naszy Rudzie
Rok przed piyrszom wojnom tukej sie urodzioł
Zawołać go yno - Paulek kopać pódzie
Na tryning do "Wawla" nojlepi by chodzioł

Już we miyndzywojniu robi se kariera
Bez bala łon przeca nawet żyć niy może
Dyć "Wawel" go sprzedoł - ło jasno cholera
Poszoł do Chrzanowa ze słowym: "Szczyńść Boże"

Tuż przed drugom wojnom gwiozda jego blysła
W meczu Polska - Wyngry fuzbaler był piyrszy
Ale zło godzina na to wszysko prziszła
No bo taki jedyn chcioł być ciyngym wyrszy

Nojpiyrw "Wawel"-Wirek, "Fablok"-Chrzanów potym
Z tych klubow go dzisioj możno pamiyntajom
Przeszło łoziymdziesiont lot nosioł galoty
Pomarł w Rudzie Ślonski. Czy w zocy go majom?

[broneknotgeld]

Joseph von Eichendorff

Znom go ze notgeldow gornoślonski szteli
Kere w Raciborzu Sejmik nom wydowoł
Kaj mogiła jego? "W Nysie" - łodpedzieli
Możno Ślonsk tam kedyś bydzie pielgrzimowoł.

[broneknotgeld]

Hugo Lazarek

W pamiyńci go cołke Miechowice miały
Bo przeca łon tukej był "piyrszym po Bogu"
Niy yno swoj palec prziłożoł tu cały
Niym stanoł se wele pyjtrowego progu.

[broneknotgeld]

Wawrzyniec Hajda

"Ślonski Wernyhora" te miano mu dali
Chop z niego był prosty - na grubie fedrowoł
Łod szkołow łon zowdy był jakby nojdali
No a ze czytaniym som sie rada dowoł

Zasłynoł w Piekarach z wierszy i pieśniczek
W kerych zowdy Polska przepiyknie blyszczała
- Hasłym "Sobieskiymu sypiymy kopiczek"
Za co sie dziedzina raźnie tyż zabrała

Doczkoł Polski tukej choć ślepy i stary
Witoł Szeptyckiego na Ślonsku radośnie
W uszach mu furczały pułkowe sztandary
Dyć za rok już pomarł - jakosik przi wiośnie.

[broneknotgeld]

Daniel Paschasius Osterberger von Osterberg

Bogaty kupiec rodym z Ostrawy
Kerego cysorz nobilitowoł
Ratno se kupioł tak dlo oprawy
I pałac prawie łod nowa stowioł

Dyć tego jeszcze mało mu było
Wzioł wele Ratna te Wambierzyce
A że sie cudow tukej zdarzyło
Kościoł zbudowoł niym skończył życie

Kalwario - jego tyż przeca sprowka
Tym Wambierzyce bardzi som zocne
Wiara to przeca niy jest zabowka
Yno dlo życio podstawy mocne.

[broneknotgeld]

Jozef Limburg

Werci sie wspomnieć go w "Ludziach Ślonska"
Bo sie z regionym zwionzoł przez frela
Henrietta Sierstropf niy była gonska
I Zefel rzeźb tu łostawioł wiela.

[broneknotgeld]

Adolf Menzel

We Prusach łon wiela szychow portretowoł
Dyć w Krolewski Hucie walcownia malowoł
Dziwuja sie jeji na notgeldzie GOP-u
I miejsce tyż tukej dom jo tymu chopu.

[broneknotgeld]

Piotr Latoska

Niy doczkoł Wielkanocy
Pomarł nom we środa
Bog go mo w swyj mocy
Rudzie jednak szkoda

Kształcioł se w Krakowie
Rzeźba upodoboł
Dyć u nos tyn czowiek
Na grubie fedrowoł

A przeca mioł termin u Dunikowskiego
Jak robioł tyn dynkmal Czynu Powstańczego
Świynty Ance łod sia cosik doł Latoska
A i naszy szteli naprowdy niy troszka

We wtorek po świyntach - łod Józefa w Rudzie
Kondukt z niym na cmyntorz pewno wielki pódzie
Wongel był dlo niego richtig darym Boga
Bergmon no i rzeźbiorz stanoł już u proga.

[broneknotgeld]

rudaslaska.com.pl/index.php?s=200112&o=forum_drzewo_tematow&id_postu=206242

[broneknotgeld]

"Pan na Łubowicach"

Trza w Eichendorffa strofy sie wsuchać
Bo w nich tyn region ciyngym nom śpiywo
Muzyka z wierszym włazi do ucha
I siyngo duszy - to niych niy dziwo

Dyć nasze lasy przeca w niyj szumiom
Woda se plusko tyż we strumykach
Ślonzek - terozki to wyrozumiom
Toć kokot ło tym pioł ze kurnika.

[broneknotgeld]

Georg Bruning

Oberburgemajster Bytomia zocnego
Łańcuch swoji władzy zowdy szumnie nosioł
We tym niy pobije już żodyn istnego
No choćby tyn Wójcik - ło muster sie prosioł.

[broneknotgeld]

Ks. Jerzy Kempa

Za farorza yno prziszoł
Dyć zarozki fest "namiyszoł"
Łogrod botaniczny zrobioł
Niym pyndzyji se dorobioł

Sanktuarium Matki Boski
Tyż ze jego przeca "troski"
Łon jest kimś we Bujakowie
Chocioż yno "boży czowiek".

[broneknotgeld]

Matka Ewa z Miechowic

Wiela dlo siyrot łona zrobiyła
Możno by za to świyntom już była
Dyć wangeliczkom prziszło być łony
Ważne że ciyngym jom pamiyntomy.