Ludzie Ślonska

[broneknotgeld]

Do kogo rzykać - do Ślonska Ludzi
To nom Pon Boczka w duszy łobudzi.

[broneknotgeld]

Jakub Boehme

Na misa cynowo z szewca ławy blikoł
Po cichu do Boga możno przi tym rzykoł
Miska z jedny strony nojpiyrw mu blyszczała
A potym ze inkszy światło łodbijała

Już wiy! - Już łobudzioł sie we niym Bog-czowiek
W kerym zło i dobro jakby po połowie
Może w tym przebiyrać - zoglondać we siebie
Łod niego zależy - w piekle jest czy w niebie

Wyloz ze swyj izbi - stanoł se na progu
I poczuł że jakby sie topioł we Bogu
Łogyń w niym buzuje a woda go gasi
Dusza sie do świata tym sposobym łasi

Świat Bogym jest przeca - a łon z tego świata
Łod sia trza Mu za to dać dobro zapłata
Być durś blisko Niego pociongnońć tyż inkszych
By Duch Świynty we niym stoł sie jeszcze wiynkszy

Dyć łostawioł szydło - piora prziszła pora
Natchniony napisoł ta bosko "Aurora"
Kero luterany pryndko potympiyli
Choć inksi do serca naprowdy sie wziyli

Już prawie przeklynty - z wyroku niymowa
We niebie swyj duszy wypszone kłod słowa
Na wieki nastympne sie łone wyryły
Wszachwieczny mu we tym dodowoł tyż siyły

Choć szewc pomarł w końcu - prochym jego ciało
Żyło i żyć bydzie co po niym łostało
Przez wieki już siedzi to we naszych duszach
Te słowo czowieka zowdy bydzie wzruszać

Za Jakubym Boehme ku światłu idymy
Choć ło niym niy wszyscy możno cosik wiymy
Bestoż joch sie szkryflać te rymy łodważoł
Ło ślonskim mistyku trocha tyż pomarzoł.

[broneknotgeld]

Giovanni Angelus Ballestrem

Przodek rodu ślonskego z pomnika zaś patrzy
Na tyn piykny pałac swojego prawnuka
I dlo jego ducha wiela tyż to znaczy
Że sie tukej łonczy religio i sztuka.

[broneknotgeld]

Karol Franciszek von Ballestrem

Majontek erbnoł po tych von Stechov
O jakim wcześni niy marzoł
I w nim niy zrobioł za wiela grzechow
Godula mu gospodarzoł.

[broneknotgeld]

Karol Franciszek von Ballestrem

Majontek Stechowa przipod siostrzyńcowi
Sie mu poszczyńściyło - kożdy tako powiy.

[broneknotgeld]

Karol Franciszek von Ballestrem (1750-1822)

Ruda Biskupice no i Pławniowice
Zocne majoratu richtig okolice
Toż rod Ballestremow blysnoł teroz jasno
Oby mu na Ślonsku niy było za ciasno.

[broneknotgeld]

Franciszek Karol von Ballestrem

Zaczoł w armiji kariera
Loł Austryjoka Francuza
Koń jednak - tako cholera
Porzondny zrobioł mu uraz

Cugle chcioł czimać we rynkach
Habeta podmiynioł pryndko
Reichstag mioł ze nim udrynka
Bo łon przed nikim niy pynkoł.

[broneknotgeld]

Karol Ludwik von Ballestrem (1755-1829)

Starszy brat pomarł - czas na młodszego
Dyć niy za dugo czimie sie tego
Po siedmiu rokach śmiertka prziłazi
Kaj chce tam umi kosisko wrazić.

[broneknotgeld]

Walynty Wolfgang von Ballestrem

Rzońdzioł majontkym przez dziesiyńć lot
Potym ze świata tego nom spod
Jednak je z nami tukej do dzisioj
W świyntym Józefie żech ło tym słyszoł.

[broneknotgeld]

Filmik tyn we zocy mom
Toż link prawie tukej dom.

www.youtube.com/watch?v=rDOr2ztG9zs

[broneknotgeld]

Mikołaj Wolfgang von Ballestrem

Pan majoratu łostatni
Z drezdyński niy wyloz matni
Grad bomb pożary i gruzy
Widzioł u końca podróży.

[broneknotgeld]

+Valentin von Ballestrem+

Toż se pomarło Valentinowi
forum.gazeta.pl/forum/72,2.html?f=34281&w=35598524
Latoś - rym tako tyż ło tym powiy.

[broneknotgeld]

Dyć Korfanty...

Dyć Korfanty na nos z nieba
Patrzy coroz bardzi chmurny
Złoić skora by nom trzeba
Bo straciyli my Ślonsk Gorny.

[broneknotgeld]

Jak Korfanty z Piłsudskim

Przed tym Sejmym Ślonskim na parkingu stoji
Bliko na marszałka i trocha sie boji
Bo łon z ty habety srogo nań tam łypie
Myśli chyba ło tym jak Wojtkowi sypie.

Wojciech Korfanty

[broneknotgeld]

Drap welunek nowy przidzie
Toż Korfantym "zagrać" idzie
www.dziennikzachodni.pl/artykul/792406,wielki-boj-o-korfantego-dzis-kochaja-go-wszyscy-od-pis-az,id,t.html
Jako piyrwyj niym "zagrali"
Głosy bydom rachowali
Kto zaś u nos z tym w proficie?
Polityker - przeca wiycie!

[broneknotgeld]

"Pożyteczny idiota"???

Niy dziwo "spiyrka" skiż Korfantego
Zdanie Szołtyska wciepna do tego
Przewrot Majowy i sanacyjo
"Wojtek bez portek" - ło kryjolyjo

Do ślonski duszy z polskościom klupoł
"Autonomistow skrajnych" poszukoł
Toż sie chyciyli i za gywery
Był "pożyteczny" - czy wontpi kery?

A czy "idiota"? -Z punktu Warszawy
Zdoł sie "figurom" co do "zabawy"
Ty gorzki prowdy trza zowdy trzimać
Tukej na Ślonsku lepi niy drzymać

Lepi nom niy kpić ze historyji
Mioł za żywota w Polsce mecyji
Niych sie spokojnie leży we grobie
Niy durś przewroco i w gnaty szkrobie.
www.dziennikzachodni.pl/artykul/792406,wielki-boj-o-korfantego-dzis-kochaja-go-wszyscy-od-pis-az,id,t.html

[broneknotgeld]

Na "Parada..." sie wybiera
Prawie tyn link wkleja teraz
www.facebook.com/events/499618370073530/

[broneknotgeld]

Skiż Korfantego
link dom do tego
www.dziennikzachodni.pl/artykul/872485,wojciech-korfanty-i-jego-odezwa-do-ludu-slaskiego-odcinek-1,id,t.html

[broneknotgeld]

Jo sie zamelduja
-tymu podziwuja
www.dziennikzachodni.pl/artykul/872309,parada-korfantego-kutz-idzie-gorzelik-sceptyczny-a-ty,id,t.html

[broneknotgeld]

Parada Korfantego

Ze parady relacyjo
Piyrszy roz - toż niy mecyjo
www.dziennikzachodni.pl/artykul/873861,parada-korfantego-w-slaskich-strojach-w-katowicach-sukces,4,8,id,t,sm,sg.html#galeria-material

[broneknotgeld]

Dobrze naszkryflali
Toż link podom dali.
katowice.gazeta.pl/katowice/1,35055,13776732,Wojciech_Korfanty__buntownik_i_meczennik_ze_Slaska.html

[broneknotgeld]

Hmm, tyn link tyż mi sie pewnikym przido
www.dziennikzachodni.pl/artykul/874843,wojciech-korfanty-i-jego-odezwa-do-ludu-odcinek-2,id,t.html

[broneknotgeld]

Ciong dalszy do kompletu
www.dziennikzachodni.pl/artykul/874881,wojciech-korfanty-i-jego-odezwa-do-ludu-odcinek-3,id,t.html

[broneknotgeld]

Wielgim boł Ślonzokym - bestoż wrogow mioł
W historyjo szkryfnoł niy cołkym jak chcioł
Dyć ideje jego ciyngym przi nos som
Sejm Ślonski we łoczach jako łon tyż mom

Sejm Ślonski - niym aszom Katowice przeca
RAŚ marsz tyż rychtuje z Korfantego neca
I choć insurgyntow niy nońdziesz w tym czasie
W duszy autonomjo, niy kajś we marasie.

www.facebook.com/wycinankidudaly/photos/a.682296321914019/1916987655111540/?type=3&theater

[broneknotgeld]

Marszałek na Ślonsku

We Katowicach marszałek stoji
Koniym chce wjechać do Sejmu
Łon sie nikogo tukej niy boji
Co dobre to wszysko dej mu.

[broneknotgeld]

Laurka

Ballestrem Francek mo tu laurka
Bo łon bergmonom płacioł "barborka".

[broneknotgeld]

ks. Ludwik Tunkel

Farorz z Kochlowic ze kelniom w rynce
Znoloz se miejsce w tyj ślonski mynce
To co zbudowoł dzisioj nos cieszy
A kto go wygnoł pierońsko zgrzeszył
Na Dolnym Ślonsku jego mogiła
Choć do Gornego dusza mu wyła
Biskupym prawie byłby tu przeca
Dyć niy pasowoł do Polski neca.

[broneknotgeld]

Donnersmarckowie

Na "czwortkowym targu" kariera zrobiyli
We Spiszu kajś wele Lewoczy
Jak grosz cysorzowi kedyś pożyczyli
To Henckel na Bytom nom wskoczył

A potym do tego Bogumin dodali
Na Ślonsku już mieli dwie nogi
Fortuna sie piyknie toczyła im dali
Aż urosł majontek tyn srogi.

[broneknotgeld]

Markiza de Paiva

Sławno to była kokota
Żodyn niy skompioł jyj złota
A jak sie z wiekym roztyła
W Świerklańcu końca dożyła.

[broneknotgeld]

Fryderyk II

Na Austryjokach łon tyn Ślonsk zdobył
Jednak co niyco tyż tukej zrobiył
Kozoł budować gruby i werki
Niy darmo Niymcy godajom - Wielki.

[broneknotgeld]

We Świerklańcu

Pałac kerymu Wersal mogby coś zazdrościć
Zrodzioł sie ze wielki francuski miłości
Duch markizy de Paiva błonkoł sie w komnatach
Niy dała mu rady łod Slepcowa Katia.

[broneknotgeld]

Franciszek Winckler

W Goduli szoł ślady
Wyraźnie to widać
Lepiyj sie doł rady
Niy wżynioł sie w biyda

Majontek ucapioł
Dziynki pewnyj wdowie
"Po mie jom obłapioł"
Aresin nom powie.

[broneknotgeld]

Karlik G i Francik W

Karlik nosz samotnie
Umar we Wrocławiu
A Francik łodwrotnie
Niywiasta łostawioł

Majontek ich wielki
Wszysko co zostało
Erbły mode frelki
Bo Niebo to chciało.

[broneknotgeld]

Niy byda

Dyć niy byda wiela fulać
Skiż Goduli tyż Godula.

[broneknotgeld]

Pszoł geldowi

Toż niyjedyn tako powiy
"Rudzki djosek" pszoł geldowi
Co zarobioł dyć łostawioł
Dobrodziejym w tym se jawioł
Dlo siyroty wiela pociech
Tako go po śmierci mocie.

[broneknotgeld]

"Ujek" Godula

"Ujek" jak ujek - lepsze talary
Joanka ze tym zocniejszy miary.

[broneknotgeld]

Cuda prawiyli tyż ło Goduli
Wiyncy bojali niż prowdy suli.

[broneknotgeld]

Fryderyk Wilhelm Grundmann

Stoła nom po wojnie jeszcze jego chałpa
Kozała jom kipnońć jakoś naszo małpa
Wiater we tym miejscu szumi durś po cichu
By pamiyntać ło tym katowickim grzychu

Dyć łostatnio ło nim głośniyj tukej słychać
Do jego pomnika zaczynomy wzdychać
Na rynku nojlepi trza go nom postawić
Coby roz na zawsze pamiyńć sie poprawić.

[broneknotgeld]

Biskup Jan Kropidło

Rojber był z tego Jana Kropidło
Chacharske życie mu niy łobrzidło
Bo aż do końca chcioł forsy władzy
I z kurewkami dowoł se rady.

[broneknotgeld]

Morcinek

Pod Stalinogrod "wyromboł chodnik"
Choby tyn Łysek wozyk ciong
Dyć we tym lesie wyrosł już młodnik
A jego pryndko ktoś wyprzong.

[broneknotgeld]

Z "pokładu Idy"
wloz do ty biydy
www.dziennikzachodni.pl/artykul/788460,gustaw-morcinek-i-jozef-stalin-to-stalinogrod-co-katowice,id,t.html

[broneknotgeld]

Gustav Freitag

Freitaga po polsku niy mog żech przeczytać
Bestoż tu za wiela niy ma ło to pytać
Inszo rzecz że teroz szłoby go tłumaczyć
Dyć jego szkryflanie coś dlo Ślonska znaczy.

[broneknotgeld]

Maria Goppert-Mayer

Katowicko frelka w atomie grzebała
Dyć nawet do bombki sie w Stanach zabrała
Bo wdycki nojbardzi jom ciongło te jondro
I Nobel jyj przipod za cołko ta mondrość

[broneknotgeld]

Richard Holtze

Przewodzioł łon Radzie we tych Katowicach
I łaźniom skiż niego szło sie tu zachwycać
Łodcisnoł tyż tukej swoj sztympel dość fest
Czas by to docynić - stoć nos na tyn gest.

[broneknotgeld]

Karol Godula

Niy przijoł szlachectwa łod krola pruskego
Stykło że robota godała za niego
Niy chcioł grać jakegoś wielmożnego pana
Harować łon prziwyk łod samego rana.

[broneknotgeld]

Ło Goduli coś zaś dali
Tako tyż uradowali
www.dziennikzachodni.pl/artykul/877408,karol-godula-bohaterem-publikacji-dla-nauczycieli,id,t.html#komentarze