Ze Rudy i ło Rudzie

[broneknotgeld]

VII Pokojowo Sztafeta Biegowo

Ze Rudy do Levic sztafeta ruszyła
Jakubik jom wiedzie - ciyngym chop mo siyła
Dzisioj już tam bydom i se pofajrujom
Świynto we Levicach - to tyż forsztelujom.

[broneknotgeld]

Halymbski festyn parafialny

Festyn przi kościele farorz wyrychtowoł
Spoźniony i bez to pogoda trefiyła
Niy na Nepomuka - tako se wydowo
Dyć radocha wielko jednak przeca była

Ciyngym jeszcze grajom chocioż już sie ćmi
Jeszcze ździybko pódzie sie zabawić tam
W Halymbie uciecha - kożdy ło tym wiy
Chocioż chnetko zwinom już tyn cołki kram.

[broneknotgeld]

"Ścigani"

Na Dniach Rudy Ślonski
Zagro nom kapela
Miżno uraduje
Tyż richtig nos wiela.

[broneknotgeld]

Recht w tym tyż taki - Ruda to "gówno"
Z kerym sie inksze dlo mie niy zrowno
Boch tu rodzony - moje tu śmieci
I fraszka ślonsko w Rudzie se kleci.

[broneknotgeld]

Rynek w Halymbie?

Z tom Halymbom szpas jest taki
Jednak problym we tym jest
Co by pedzieć niy dlo draki?
Rynek wsadzić kajś na fest.

[broneknotgeld]

Co bych tu przinios?

Czysto woda do tyj Kłodki
Taki pomysł jo mom słodki
Wyndka bych se tam pomoczoł
I na Ruda już niy droczoł.

[broneknotgeld]

Basyny "Oti"

Basyny "Oti" - gowa w tym Stani
Yno czy stowiać coś idzie na ni?
Możno na bezrok zesel utraci
Ruda zbiydnieje czy se wzbogaci?

[broneknotgeld]

Łoziymnoście kościołow

Łoziymnoście kościołow
-Dzielnic dziesiyńć yno
Szłoby drobni pokrojić
Te rudzke "domino".

[broneknotgeld]

"Viyr-eck" ło mało za nisko śleci
Dyć możno ktosik coś tu nakleci.

[broneknotgeld]

Widokowki stare znom
stare.pocztowki.w.interia.pl/default.htm
Taki link se tukej dom.

"Ścigani"

[broneknotgeld]

"Nigdy więcej bluesa"
Ano dźwignońć musza
Płyta piyrszo majom
Niych wiyncy nom grajom

[broneknotgeld]

Szyb "Andrzej" - "trwało ruina"

Wiyrecko szachta dach bydzie miała
Z niym mozno cołkym sie niy łobali
"Trwało ruina" by sie nom zdała?
Do tego bydom jom podświytlali?

[broneknotgeld]

W galeryji "Fryna"

Do ty galeryji Bembenista prosi
"Pejzarz Gornoślonski" swojym pyndzlym głosi
Ańfart i familok we łokiynnych romach
Zoglondnij do "Fryny" - poczuj sie jak w doma

[broneknotgeld]

Kochłowicki mietlorz

Kto ze Kochłowic - zamiato wszysko
Łoj- toż ciekawe to widowisko!

[broneknotgeld]

Sie "Hanys" dostoł pododobnoś Stani
forum.gazeta.pl/forum/72,2.html?f=261&w=30805922
Biało pewnikym nos niy cygani.

[broneknotgeld]

Na Halymbie

Na Halymbie goik świyci
Nojwiynkszy we Rudzie
Tako pszonie w sercach niyci
Dyć czy dugo pódzie?

[broneknotgeld]

Welunkowy maszt wiyrecki?

PiS podkupi czy Platforma?
Komu rośnie na to forma?
By gymbusie kandydatow
Tam wywiesić za opłatom!

[broneknotgeld]

Możno i niy bydzie trza
Wiela stracić na to - pra?

[broneknotgeld]

W "przejrzysty gminie"

Piyrszy policmajster w Rudzie
Już w łodstawka tako pódzie
Ano - we "przejrzysty gminie"
Kogo jeszcze to niy minie?

[broneknotgeld]

Pympek aglomeracyji
forum.gazeta.pl/forum/72,2.html?f=28940&w=26535019
Maszt wyznoczo jeji pympek
Tako rudzki w tym postympek.

[broneknotgeld]

Halymbsko betlyjka

Przidzie drugi luty
i betlyjka stanie
Cołkym se z tym skończy
nasze świyntowanie?

[broneknotgeld]

Se bydymy tako dziwać
forum.gazeta.pl/forum/72,2.html?f=261&w=35282297
Jak poleci tyn festiwal?

[broneknotgeld]

Nasi gołymbiorze

Zdo sie rudzianie niy poginyli
Poszkodowani dyć tako byli
Patronka śmierci - świynto Barbara
Niy połozyła istnych na marach.

[broneknotgeld]

Szwarcwald

Toż se Szwarcwald dźwignoł w końcu
Teroz już dzielnica miasta
Liść łobrocioł z tym ku słońcu?
Momy kołocz z tego ciasta.

[broneknotgeld]

Cud szwarcwaldzki

Dyć to już wiymy ło naszym cudzie
Nojlepszy teroz Szwarcwald we Rudzie.

Ruda

[broneknotgeld]

We Rejestrze Ujazdowskim

We Rejestrze Ujazdowskim coś ło Rudzie prawiom
Toż na kartach historyji tako nom tyż jawiom
Wioska na piyńdziesiont łanow - siedym łod sołtysa
Reszta biskup mo wrocławski - jak scygania - zgrzysza
Młyn tyż tukej z downych rokow sołtys czimoł mocno
Tako jego gospodarka richtig w Rudzie zocno.

[broneknotgeld]

Kuźnica 1401

Kolanijom biskupickom Ruda jakby była
Toż se mozno tukej drapko i kuźnica wziyła
Princ opolski biskupowi ruda kopać zwoloł
Łon bogactwym swoji ziymi tyż se tako chwoloł.

-
forum.gazeta.pl/forum/71,1.html?f=28940

[broneknotgeld]

Rudzko Kuźnica

Se rozrosto okolica
Dyć jak tukej jest kuźnica
Trza zarozki tyż osady
Na to przeca niy ma rady.

[broneknotgeld]

Ruda 1396

Ruda majom w rynkach bratki
Przeca Rudzcy niy gagatki
Andrzej Krzysztof no i Stanik
-Historyjo niy cygani.

[broneknotgeld]

Kuźnica 1407

Toż gwarki bytomske ruda dobywajom
Za kontmanow tukej bratkow Rudzkich majom.

[broneknotgeld]

Rudzcy

Wiela familijo miała tukej włości
Ktoś ze niyj starostom bytomskim dyć był
Tako we proficie jest łona zocności
No i durś nabiyro jakby wiyncy siył.

[broneknotgeld]

Po wojnach husyckich

Klucz ujazdowski cołkym sprzedany
Tożse biskupi słabsi już czujom
Dyć tukej Rudzcy już downo pany
Tako na swojym dobrze durś czujom.

[broneknotgeld]

Staniki

Po Staniku łojcu syn mo take miano
Familiji Rudzkich dziedzina poddano
Ano - junior jednak mo już yno cera
Toż se cosik zmiyni możno ze tym teraz.

[broneknotgeld]

Dorota

Dziedziczkom po łojcu Dorota jest - ja
Wzioł se jom za ślubno Jan Hynryk von Wrbna
Syn jejich nojstarszy Bernard nosioł miano
Rodziciele zmarli - jymu sztela dano.

[broneknotgeld]

Ruda 1529

Toż Bernard umiyro a dzieci mo małe
Prziszło gospodorzyć tukej ich ujkowi
Chnetko w inksze rynce wszysko przyńdzie całe
Rudzko fraszka tako ło tym cosik powiy.

[broneknotgeld]

Jan Gierałtowski 1540

Jan Gierałtowski Ruda kupuje
Pewno go znocie z Chudowa
Toż tu terozki gospodaruje
Knif zno i przeca mo gowa.

[broneknotgeld]

70 dusz

Prawie siedymdziesiont dusz ta Ruda miała
Jak w Gierałtowskiego dziedzinie zagrała.

[broneknotgeld]

Wacław Starszy Gierałtowski

Ruda erbnoł syn po fatrze
Ślady łojca łon niy zatrze
Familijo mo pamiyntać
Zapomniynie - ludzko piynta.

[broneknotgeld]

Jan Młodszy Gierałtowski

Rod Gierałtowskich Ruda durś czimie
Tu gospodorzy - tako niy drzymie.

[broneknotgeld]

Wacław Młodszy Gierałtowski 1611

Ano - ze tym rokym Ruda już istnego
Dyć i chnetko końca doczko łon swojego.

[broneknotgeld]

Ruda 1622

Wacław Młodszy pomarł - dzieci niy łostawioł
Dugo na tym ziymskim padole niy bawioł
Toż terozki Ruda w ryncach wdowa czimie
Przi kery von Praschma dość drapko se drzymie.

[broneknotgeld]

Konieccy

Czy Koniecki kupioł Ruda?
Dyć jom czimoł - tako póda
Razym z Pyjtrym Starszym tukej
Potym syna jego szukej
Co po łojcu nosioł miano
Sztela jymu przeca dano.

[broneknotgeld]

Ruda 1642

Podeszły wojska z Glywic pod Ruda
Czidziestoletnio ciyngym łostuda
Dziedzina naszo fest uciyrpiała
Straty nojwiynksze Kuźnica miała.

[broneknotgeld]

Marianna Koniecka 1643

Toż teroz Marianna dziedziczkom jest tukej
Biołego-Bielskiego mo istno za chopa
A czas durś wojynny - uciechy niy szukej
Czidziści lot ciyngym pierońsko utropa.

[broneknotgeld]

Sztyry cery

Marianna ze Olkym sztyry cery miała
Za dobrych karlusow je powydowała
Dyć żodno z nich przeca niy łostała w Rudzie
Tako familijo z ty szteli se pódzie.

[broneknotgeld]

Aleksander Biały-Bielski 1656

Toż z tym rokym pomarł dziedzic w Rudzie naszy
Rocznica ciekawo dyć nos niy postraszy
Ponoc we dziyń śmierci tego pożałowoł
Co niy bydzie cerow na zamku wydowoł.

[broneknotgeld]

Marianna 1665

Cerom weseliska w Rudzie wyprowiyła
Niym ze swojym ślubnym se w końcu złonczyła
Tako ze tym rokym tam kaj rudzki zamek
Może sie pojawić cołkym inkszy panek.

[broneknotgeld]

Jerzy Welczek 1675

Ponoć spadkobiercy dugo sie sońdziyli
Niym cołki majontek jakoś podzielyli
Graf Welczek z Dymbiyńska Ruda se kupuje
Łon terozki tukej wszyskim reskiyruje.

[broneknotgeld]

Baron Welczek - fater

Znoł Welczka Wiedyń tako Warszawa
Słuzba cysorsko to niy zabawa
Rod ze Dubenska wywiod czeskego
Syna doł Rudzie jeszcze do tego.

[broneknotgeld]

71 000 talarow

Richtig wiela kosztowało
Dyć se Rudy mu zachciało
Tako i klucz biskupicki
Chcioł z tym Welczek mieć na wdycki.

[broneknotgeld]

Jerzy Welczek 1687

Czimoł ta Ruda dwanoście lot
Podobnoś ze niyj wiela był rod
Dyć w końcu kryska prziszła na niego
A spadkobiercy niy mioł do tego.

[broneknotgeld]

Ruda 1687

Pomarł grof Welczek - niy mioł potomka
Siostrze przipadło se w tym utonkać
Kero za chopa Rauthena miała
Aż z Koszyncina tukej blikała.

[broneknotgeld]

Filip von Rauthen 1693

Pon na Koszyncinie pomarł we tym roku
Tako już i w Rudzie niy postompioł kroku.

[broneknotgeld]

Anna Zuzanna von Rauthen 1704

Toż Anna Zuzanna już do chopa leci
A co sie we Rudzie skiż tego ukleci?

[broneknotgeld]

Erbnoł ziyńć

Teście majontek dali ziyńciowi
Tako testamynt przeca tyż powiy
Wzioł se za ślubno nojstarszo cera
Toż i wzbogacioł naprowdy teraz.

[broneknotgeld]

Graf Mikołoj von Sobeck z Kornic

Prawiom co sie niy nacieszoł za wiela dobrami
Dyć mu drapko prziszło pomrzić - ło tym wiycie sami.

[broneknotgeld]

Grafini Anna Zuzanna Rynata von Sobeck

Toż młodom wdowkom istno łostała
Sama spać w łożku jednak niy chciała.

[broneknotgeld]

Jan Bernard III von Praschma

Sto rokow piyrwyj tu Praschma był
Teroz zaś istny probuje siył
Grafini rudzko we kwiecie wieku
Toż se niy dziwej tymu czowieku.

[broneknotgeld]

Ruda 1731

Dziedziczka Rudy nowy grob "kopie"
Juzaś jest wdowom - po drugim chopie.

[broneknotgeld]

"Do czech razy sztuka" 1738

Mo już Rynata chopa czeciego
Dunina wziyła do łoża tego
Tako łon po niyj erbnoł dziedzina
Choć niy łostawioł dlo swego syna.

[broneknotgeld]

Jan Dunin

Łod Pyjtra Własta rod swoj wiod istny
Palatyn ślonski - ktos był zowistny
Tako herb "łabyńdź" zdobioł Dunina
I biskupicko-rudzko dziedzina.

[broneknotgeld]

Ruda 1744

Grafini rudzko wtedy umiyro
Tako w Glywicach już pochowano
Dunin na inkszo frela zaziyro
Przi Annie Waxmann budzi co rano

Syna mu dała no i tyż cera
Dyć pon z piniondzym zdo sie źle stoji
Trza mu dziedzina już sprzedać teraz
Nowy właściciel Rudzie se kroji.

[broneknotgeld]

13.08.1748

Na to postawia jo moja gowa
Z tym dniym już Ruda łod von Stechowa
Kupioł jom razym z Biskupicami
Choć piyrwyj blysnoł Pławniowicami.

[broneknotgeld]

33 000 guldynow

Biskupice razym z Rudom
Za tyn geld we rynce pódom
Przeca wiycie - von Stechowa
Łon tu teroz piyrszo gowa.

[broneknotgeld]

Franciszek Wolfgang Freiherr von Stechow

Wpiyrw Pławniowice kupioł na Ślonsku
Potym pomyśloł ło nowym konsku
Toż biskupicko-rudzko dziedzina
Już von Stechowa czimie rodzina.

[broneknotgeld]

Wielki piec w Rudzie

Przeniesiony z Pławniowic
Rudzie ajza dowo
Kuźnicy surowka
Do świyżynio sprowio.

[broneknotgeld]

Co terozki?

Kaj był piec Stechowa co richtig terozki?
Ano przeca znocie "Grota Matki Boski".

[broneknotgeld]

"Familienfidekommiss" 1751

Zrobioł se majorat ze swoji dziedziny
Toż erbnie w całości jedyn ze rodziny.

[broneknotgeld]

Ruda 1758

Czimoł Stechow Ruda rokow aż sztyrnoście
Dyć mu se pomarło - do truły go wroźcie
Szczyńściym mo dziedzica istnego dziedzina
Majorat przełazi terozki na syna.

[broneknotgeld]

Karol Franciszek von Stechow (1728-1798)

Po łojcu majorat mioł sztyrdziści lot
Toż pewnikym richtig był ze tego rod
Dyć z żolym we wrota do Pyjtra szoł klupać
Bo choć mioł dwie ślubne - syna darmo szukać.

[broneknotgeld]

Karol Franciszek von Ballestrem

Majontek Stechowa przipod siostrzyńcowi
Sie mu poszczyńściyło - kożdy tako powiy.

[broneknotgeld]

Karol Franciszek von Ballestrem (1750-1822)

Ruda Biskupice no i Pławniowice
Zocne majoratu richtig okolice
Toż rod Ballestremow blysnoł teroz jasno
Oby mu na Ślonsku niy było za ciasno.

[broneknotgeld]

Karol Ludwik von Ballestrem (1755-1829)

Starszy brat pomarł - czas na młodszego
Dyć niy za dugo czimie sie tego
Po siedmiu rokach śmiertka prziłazi
Kaj chce tam umi kosisko wrazić.

[broneknotgeld]

Joanna Nepomucena von Zulow (1768-1840)

Toż se Karol Ludwik wzioł istno za ślubno
Z niom mioł dziewiyńć dzieci - familijo chlubno.

[broneknotgeld]

27.VII.1827

Majorat wloz w rynce syna nojstarszego
Karola Wolfganga - karlusa zocnego
Ze kerym urosnom tukej gruby werki
Już szłoby tyż szkryfnońć - przemysłowiec wielki.

[broneknotgeld]

Berta von Leithold (1803-1874)

Toż w niyj mocie slubno Karola Wolfganga
Familijo rośnie jak "dwojka do tanga"
Tako naszo Berta skuli tego "tańca"
Dwie cery zrodziyła no i syna Franca.

[broneknotgeld]

Franciszek von Ballestrem (5.IX.1834)

Dnia piontego września gyburtag fajrowoł
Grof kery niy yno Rudzie wiela dowoł
Choć możno niywiela nos dzisioj to cieszy
Był tyż prezydyntym Parlamyntu Rzeszy.

[broneknotgeld]

Piyrszo gruba 1751

Von Stechow Sasow tukej sprowadzioł
Szachta do rudy mu kopać mieli
Dyć znodli wongel - tyn tyż niy wadzioł
Blasku dołożoł chnet rudzki szteli.

[broneknotgeld]

23.01.1752

Prawa majoratu krol Prus dyć podpisoł
Tam szachta wspomniano - nikt niy bydzie miyszoł.

[broneknotgeld]

60 talarow rocznie

60 talarow grafowi dowali
Za wongel co tukej teroz fedrowali
Dyć po Sasach chopy kryncom tym gyszeftym
Widać niy łaziyli skiż tego na fechty.

[broneknotgeld]

Rudzko gruba 1769

Komisyjo bergmońsko na gruba zjechała
Sztolniom aże w przodek do gwarkow se ciśli
-Ło prawie gorniczym cosik łosprowiała
Poszli do Stechowa jak we końcu wyszli

Ano bo już chnetko krol to reskiyrywoł
Toż pola gornicze mo państwo nadować
Ze zwolom urzyndu - tako forsztelowoł
Majom już na zowdy bergmony fedrować.

[broneknotgeld]

"Brandenburg" 1770

Toż ze nowym prawym już gruba we zgodzie
Mo pole nadane i przezocne miano
Tako i von Stechow niy bydzie po szkodzie
Bo cołko dziedzina tu jymu poddano.

[broneknotgeld]

"Brandenburg" 1790

Johan Wolfgang Goethe zwiydzioł se ta gruba
Bo w pruski dziedzinie głośno ło niyj było
Upadowy, szachty - aże zaczoł mrugać
Zdo sie co i trocha go to wystraszyło.

[broneknotgeld]

"Aleksandrine" 1788

Drugo gruba von Stechowa
Dyć niy stowioł jom łod nowa
Yno kupioł na Porymbie
Choć niy rudzko - mom jom w gymbie.

[broneknotgeld]

Gruba "Maksymiliane"

Miano porymbski gruby zmiynione
Ślubno Stechowa już sławi łone
Bestoż w pamiyńci tako łostanie
A jako dzisioj uczcić nom panie?

[broneknotgeld]

Gruby Ballestrema

Jak Karol Franciszek erbnoł tyn majontek
To w łobydwu grubach jeszcze fedrowali
Dyć trza było zamknońć chnet porymbski kontek
Z "Brandenburga" ciyngym wongel dobywali.

[broneknotgeld]

Skonsolidowano "Brandenburg"

Gruba ciyngym rosła ło pola gornicze
Szachtow miała wiyncy - maszyna parowo
Robota w niyj była - przeca ło tym wiycie
"Czorne złoto" tako Ślonskowi wydowo.

[broneknotgeld]

"Branibor" - 1924

Z "Brandynburga" w Polsce "Branibor" zrobiyli
Możno se we mianie za czynsto mylyli.

[broneknotgeld]

"Wawel"

Coś tyn "Branibor" niy upasowoł
"Wawel" nojlepszym drapko sie zdowo.

[broneknotgeld]

"Brandyga"

Durś w miyndzywojniu na nia godali
Ci co na dole tu fedrowoli
Wongel z "Brandygi" dowoł im życie
Czasym zabiyroł chopa kobiycie.

[broneknotgeld]

"Wolfgang - Wawel"

Dwie gruby w jedny teroz cuzamyn
Niy yno miano łonczy je przeca
Dyć ciyngym rośnie - daleko "amyn"
Bestoż se jeszcze ło tym coś skleca.

[broneknotgeld]

"Walenty-Wawel" 1936

Lepszy "Walenty..." tako pasuje
Pewno tyn "Wolfgang..." cos niy sztimuje
Dyć łoba miana "Ballestermowe"
Ważne co gorom jednak jest czowiek.

[broneknotgeld]

"Wolfgang" 1939-1945

Toż se niy dziwcie - wroco co piyrwyj
Przi wielkich zmianach durś hasłym - "Wyrwij".

[broneknotgeld]

Juzaś "Walenty-Wawel" - 1945

Polska se wroco - Niymce fest dali
A tukej wongel durś fedrowali
Downo "Brandyga" dowo robota
I skarb jyj czorny - to niy gupota.

[broneknotgeld]

KWK "Wawel" -1971

Ano - sie w tym "Wawlu" "Paweł" nom zatracioł
Łod Chebzio tym Ruda tako ubogacioł
Ze miana wylecioł przi tymu "Walynty..."
Dyć bergmon fedrowoł - wongel zdoł sie świynty.

[broneknotgeld]

KWK "Pokój" 20.05.1997

Łostatni wozyk z wonglym wyciongli
"Wawel" we "Pokój" wtopiony
Jeszcze niy cołkym wszysko wyprzongli
Już "amyn" godo ktoś łonym.

[broneknotgeld]

"Gruba "Gutte Schiffahart" 1817-1818

Krotko we niyj fedrowali
Trocha wonglo jednak dali
Niych w pamiyńci nom łostanie
Gruba kero już niy wstanie.

[broneknotgeld]

"Catharine" 1821-1891

Toż ta gruba piyknie rosła
Rozne pola połonczyła
Do znaczynio tako doszła
Dyć mioł "Wolfgang" wiynkszo siyłą

Z tym sie miano zatraciyło
Choć je znali tela lot
Ze "Wolfgangym" w "Wawel" wbiyło
Czy ktoś był ze tego rod?

[broneknotgeld]

"Fabrique" 1823-1847

Chocioż łod sia gruba była
We "Brandenburg" se wtopiyła
Pola skonsolidowane
Ty zocniejszy przeca dane.

[broneknotgeld]

"Oskar" 1841-1873

Dwie zocne szachty ta gruba miała
Toż niymi wongel wydobywała
Dyć niy zonikła cołkym zamkniono
Yno z "Wolfgangym" tako złonczono.

[broneknotgeld]

"Carl Emanuel" 1847-1885

Downo ty gruby we Rudzie niy ma
Miano nom jednak łostało
Choć tyn "Karmański" inkszy już tymat
Se piyrwyj tu fedrowało.

[broneknotgeld]

Gruba "Wolfgang" 1862-1930

Rożne pola połonczyła
Z downych grub mo wiynkszo siyła
Przi "Brandydze" dyć cuzamyn
Jakby niy chce godać - amyn
Ze Niymcami wojnom wroco
Trza se potym pytać - po co?

[broneknotgeld]

"Wolfka"

Toż i po wojnie tako godali
"Walynty-Wawel" fedrowoł dali.

[broneknotgeld]

"Graf Franz" 1913-1923

Na polach "Wolfganga" rośnie gruba nowo
Dziesiyńć lot fedruje i juzaś sie chowo.

[broneknotgeld]

"Absalonka"

Jest "Absalonka" po Absalonie
Chocioż noclegi tam niy som tonie.

[broneknotgeld]

Bielszowicke cisy

Kaj Dom Kultury siedym ich rośnie
Tako wom szkryflom tukej radośnie
Dwa z nich już richtig chronić nom trza
Toż u nos wiynkszych niy znojdziesz - pra?

[broneknotgeld]

Rudzko sztafeta biegowo

Ponoć juzaś nom poleci
forum.gazeta.pl/forum/72,2.html?f=28940&w=23395906
Kaj? -Pedziały mi coś dzieci.

[broneknotgeld]

Toż niy jakoś komedyjo
forum.gazeta.pl/forum/72,2.html?f=261&w=48290588
Możno wyńdzie "galeryjo".

[broneknotgeld]

"Wolfce" dynkmal już stowiajom
forum.gazeta.pl/forum/72,2.html?f=261&w=48236372&a=48500156
Co łostało w zocy majom?