Godki chorzowske

[broneknotgeld]

Za Bolka Chrobrego

Wele Bytomia gon powiod Chrobry
Zwiyrza tu przeca niy brakowało
Tako i profit z tego był dobry
Wojom se nawet zapodobało

Dyć bestoż warszlos kasztelan stowio
Możno na bezrok zaś Bolko bydzie
Gowiydź ubito radość mu sprowio
I jodła wiyncy - grod niy we biydzie.

[broneknotgeld]

"Zversov" (1136)

Przi Bytomiu wioska tako
Kaj już znojdziesz dwie gospody
Gwarkom srybra dyć jednako
-Niy chcom chytać se tam wody

Biyra im zocnego dejcie
Fach swoj przeca dobrze znajom
Zversov - Chorzow? -To godejcie!
Styknie co tu srybru pszajom.

[broneknotgeld]

"Zversov" ("Zwierzów")

Kaj bor był gynsty i wiela zwierza
Stanoł tyn Zversov - w to prawie wierza
Dyć kasztelański grod był po blisku
A woj wnerwiony ło pustym pysku.

[broneknotgeld]

Princ Władysław (1257)

Princ Władysław - pon Opola
Bożogrobcow uposażoł
Ano tako jego wola
Co tyn zakon tukej wrazioł

Chorzow doł i Białobrzezie
Mieli biydnych dyć kurować
A i wzmocniać w Krysta wierze
Mustrym we zocności stować.

[broneknotgeld]

Lazaryt

Bożogrobcy lazaryt już tu zrychtowali
Choć pod Bytom w końcu go przeca przeniyśli
Lepi bliży princa - to forsztelowali
I zdo sie co richtig dobrze na tym wyszli.

[broneknotgeld]

We Czeladzi

Ano we Czeladzi princ opolski stoji
Tukej Bożogrobcom dokumynt wystawio
Z kerym historyjo już tyn Chorzow kroji
Tako niy godejcie co mi sie to zdowo.

[broneknotgeld]

Łoketek w Chorzowie

Uciyk Łoketek - gorko w Krakowie
Toż przenocowoł aże w Chorzowie
Bo bytomiany bramy zamknyli
I wojow z princym w prog niy wpuściyli

Dyć z niymi opat rajtowoł przeca
Co z miechowitow zocnego neca
Tako se niy trza tymu fest dziwać
Nojszczyrszo prowda - na nic wom kiwać.

[broneknotgeld]

Bożogrobcy w Chorzowie

Kaplica piyrwyj tu yno była
No i lazaryt - w niym prykow pora
Dyć miechowitow ze tego siyła
I w Duchu Świyntym zesłanym wczora.

[broneknotgeld]

"Coccham" 1198

W Jerozolimie tako szkryfnyli
Co bozogrobce "Cochcam" chyciyli
Przi "Belobreze" richtig ta wioska
Toż przipomino mi cosik troszka.

[broneknotgeld]

Przekludzka lazarytu 1299

Ano za wolom princa Bytomia
Lazaryt blisko stolicy jego
Niy trza mu teroz wsiodać na konia
Przeca kaj kościoł Ducha Świyntego.

[broneknotgeld]

Łod "chorego"?

Chorzow łod "chorego" nosi swoje miano?
Toż tu bożogrobcy żykali co rano
I piyrszy lazaryt tako wystawiyli
Niym se do Bytomia z chorymi wkludziyli

Dyć przeca i potym profity z ty wioski
Szły na kurowanie z kerym myni troski
Ponboczek braciszkom łaskami tyż darzoł
A czowiek ło zdrowiu niy yno zamarzoł.

[broneknotgeld]

"Charowali"

Charowali we Chorzowie gwarki srybra mocno
Czy łod tego miano wziyła se ta sztela zocno?

[broneknotgeld]

Z "hory"

Na gorce przeca tyn Chorzow Stary
Toż możno miano taki jest "miary"?

[broneknotgeld]

Strachliwy Chorzow?

Możno wywoło to wiela burzow
Boch roz usłyszoł co to skiż "tChórzów"
Kerych w Chorzowie było za wiela
Toż co powiycie na tako sztela?

[broneknotgeld]

Tchorzew - Chorzew?

Ano - jak przeszli tyndy Tatary
Kożdy se schowoł - mody i stary
Dugo we borze potym siedzieli
Wyleźli - tako chorobska mieli.

[broneknotgeld]

Horzow - Gorzow?

Brzetysława woje przez Ślonzek ciongnyły
Toż grodki piastowske po drodze polyły
Tako zgoroł ponoć i "Waldszlos Chrobrego"
Gore abo hore - kto dońdzie do tego?

[broneknotgeld]

Z chorości Łoketka?

Czy chory Łoketek tukej se kurowoł?
Mogło być i tako choć możno se zdowo
Jakoś go kuplujom z dziejami Chorzowa
Bestoż pomyślała ło tym czyjaś gowa.

[broneknotgeld]

Z "tchórzówki"

Chorzowiany w myckach łażom
Ze skory łod tchórza
Możno stond i miano szteli
Dyć jo niy powroża.

[broneknotgeld]

Łod Charza?

Ano tako se zamarza
By niy było to łod Charza.

[broneknotgeld]

Herb Krolewski Huty (18.X.1869)

Poł orła majom na niym czornego
Tyż szlajfkom srybrnom przeposanego
Inicjał krola - koronowany
Młotek z pyrlikym zekuplowany.

[broneknotgeld]

Herb Chorzowa (14.III.1938)

Poł orła gornoślonskego
Co na modrym tle se złoci
Tyż poł krziża czerwonego
Z czerni wyloz ku dobroci
Dwa ramiona mo poziome
Łon łod bożogrobcow przeca
Choć zakonu tukej koniec
W historyji tego neca.

[broneknotgeld]

Krziż Bożogrobcow

Zdublowany krziż rycerski
Ze rownymi ramionami
Inkszy zdo sie tu niyherski
Zoglondnijcie na to sami

Zowdy szyrsze końce jego
Yno take być w niym mogom
Se czerwiyni nom do tego
Czorny ćmok te krziże zmogom.

[broneknotgeld]

Ze Chorzowa

Na Chorzowie i Dombie bożogrobce stojom
Dlo tych co kurujom łostatniom łostojom
Przi bytomski bramie dyć lazaryt majom
Mogom bliźnim służyć bo grosz stond ściongajom.

[broneknotgeld]

Przi Krakowski Bramie

Klupoł Łoketek w bytomsko brama
Dyć niy łotwarła se łona sama
A bytomiany go niy wpuściyli
Możno po inkszy stronie już byli

Tako skerowoł se do Chorzowa
Bo śnik nachodzioł już jego gowa
Chy tam chorobsko jakoweś chycioł?
Toż roztomajcie ktoś ło tym klycioł

[broneknotgeld]

Chorzow 1632

Farorz bożogrobcow do Chorzowa wroco
Czasy teroz ciynżke - jakby ciymnom nocom
Toż lepi se czimać łod Bytomia dali
Coby protestanty siyłom niy zabrali
Tego co poczeba ciyngym zakonowi
Miłości bliźniego - tako yno powiym.

[broneknotgeld]

7.X.1643

Bytom w Szwedow rynkach
Ciyrpi umynczony
Tako wielko mynka
Pisano tu łonym

Utropiony ratusz
Rabujom kościoły
Za wiela tu katusz
Dyć zdo sie - "krol goły"

Na Chorzow se wojsko
Jednak niy keruje
Bardzi tukej swojsko
Spokoj jakby czuje.

[broneknotgeld]

Farorz Stanisław Szagalski

W ciynżki czas wojny czidziestoletni
Z Bytomia wrocioł w ta sztela
Chorzow z tym zyszczy - ło to se wetni
Choć możno zaroz niy wiela.

[broneknotgeld]

Chorzowsko zwada

Jak już Donnersmarcki panami tu byli
Ło to co chorzowske po sondach łaziyli
Dyć se bożogrobcy przeca im niy dali
Aże do kasaty co jejich czimali.

[broneknotgeld]

Farorz Hilary Przibylski

Łostatni gospodorz bożogrobcow fary
Tyż i po kasacie we Chorzowie łostoł
Tu go z parafiji wyniesom na mary
Służoł swojym wiernym aż go Pon Bog dostoł.

[broneknotgeld]

We trułach spali?

Toż ło bożogrobcach godka chorzowiana
Że we trułach spali durś na chwała Pana.

[broneknotgeld]

Tatary w Chorzowie

Toż Chorzow i Białobrzezie przez nich wyniszczone
Podbytomske zocne sztele czeko cołkym koniec?
Piyrszo wroco do downego - na powrot se dźwigo
"Belobreze" w historyji już jednak niy migo.

[broneknotgeld]

Z woli princa Władysława

Po Tatarach tu niywiela se ludzi łostało
Toż panisko miechowitom ziymie darowało
By je zakon skiz profitow sprobowoł ratować
Ze Chorzowym se udało - plon zaczoł im dować

Domb tyż tako po somsiedzku złoci swoje łany
Białobrzezie - tu tref gorszy zdo sie był pisany
Dyć mi jedyn ołpa prawioł - możno ło tym wiycie
Że choć miano se straciyło to som Miechowice.

[broneknotgeld]

Piyrszy kościoł chorzowski

Prawiom co spolyli tyn kościoł Tatary
Toż czeba nom dować tymu richtig wiary
Bo wielkom utropom tyn najazd dlo Ślonska
Jako tyż naszego bytomskego konska.

[broneknotgeld]

Skiż Tatarow

Ludzie se przed niymi ponoć pochowali
We tym ciymnym borze co wele dziedziny
Dyć cołko osada chnetko sie łobali
Szczyńściym bożogrobce tukej przidom driny.

[broneknotgeld]

Chorzow gore 1430

Z tym rokym husyty tukej zoglondnyli
Czy juzaś se ludzie przed niymi pokryli?
Wiymy yno tela co Chorzow zegoroł
Mikołaj z Żyglina tako ich pokoroł.

[broneknotgeld]

Taboryty

Se taboryty srożom na Ślonsku
Tako i w naszym bytomskim konsku
I bożogrobcom niy przepuściyli
Chorzowsko sztela cołko spolyli.

[broneknotgeld]

Rycerze świynty Jadwigi

Śpiom rycerze Istny tako we Chorzowie
Coby se ło wiara niy boł tukej czowiek
Przeca u Ponboczka tela wybłogała
Hufy ze zabitych pod Niymczom zebrała

Toż teroz czuwajom w rożnych miejscach Ślonska
By w zły chwili bronić tyż naszego konska
Oby nom niy prziszła ta "czorno godzina"
Szczyńście ze pokojym mo zocno dziedzina.

[broneknotgeld]

Na Drajoku

Na Drajoku pod Paniynkom
W wielki grocie śpiom rycerze
Niy jest dlo nich to udrynkom
Ślonska majom bronić w wierze

Toż to spod Legnicy woje
Huf Jadwigi Ślonski zocny
Jedyn styknie z nich za troje
Krześcijanin z niymi mocny.

[broneknotgeld]

Jejich dzwon

Dzwon rycerzy dyć niy słychać
Ślonzek ciyngym w wierze stoji
Zły tu niy śmi wiela dychać
Bo skiż istnych fest se boji.

[broneknotgeld]

Jejich dzwon (II)

Kedyś zbudzi tych uśpionych
Se zaśpiywo - "W imie Boga"
Z tym poznomy w boju łonych
Że niywiernym niesom trwoga.

[broneknotgeld]

Rycerze naszy patronki

Dyć niy na darmo Legnica była
Orda Tatarow przeca skryńciyła
I na połednie poszła w Madziary
Tako łobrona godziwy miary.

[broneknotgeld]

Chorzowsko Paniynka

Na kolumnie ciyngym stoji
Widzioł jom wiek dziewiytnosty
Ło tyn Chorzow se niy boji
Przi niyszczyńściu koncept prosty

Styknie co sie dzwon rozdzwoni
I pobudzi wojow zocnych
Toż po blisku śpiom tu łoni
Choć śnik majom cosik mocny.

[broneknotgeld]

Niy ma dzwonow?

W dwudziestym wieku niyszczyńścia były
Dyć se te woje niy rozbudziyły
Ponoć pokradli ze grot im dzwony
Toż jako wstować terozki łonym?

[broneknotgeld]

Chorzowsko ciga

Ciga w Chorzowie gospodorz chowoł
Podobnoś mało futru jyj dowoł
A wypasiono pierona była
No i dojyli mlyka tyż siyła

Toż som se richtig dziwowoł tymu
Spać niy dowało ponoć to jymu
Jaksik sie ciyngym istno traciyła
A jak wrocała nażarto była

Cerze nakozoł - Pilnuj ta ciga
Możno futruje jom jakoś szcziga
I jeszcze z tego niyszczyńście bydzie
Co złe z gowiedziom do dom nom przidzie

Tako za kozom dziołcha drałuje
Tam kaj Paniynka szteli wachuje
A pod kolumnom traci se zwiyrze
Dyć w ziymi widać łotwarte dźwiyrze

Wlazła drin frelka - wielko kaplica
Zrobiyły blade se jeji lica
Bo tam rycerze sroge drzymali
Jako w Chorzowie tu se pospali?

Na boku konie łowies i siano
Ciga tatulka! Jeronie - ano!
Dziołcha se głośno aż zawołała
Przi tym zarozki jednak struchlała

Jedyn ze wojow łotwiyro łoczy
-Czy już czas prziszoł? Trza naszy mocy?
Niy - w strachu istno mu łodpedziała
Jakby na krzidłach z tym wyleciała

Chocioż rodziciel niyjedno przeżoł
Dyć swoji cerze coś niy uwierzoł
Gowiydź se jednak już niy traciyła
Ze tym chałupa zasobno była

Ludzie czasami dźwiyrzy szukajom
I choć Paniynce z Drajoka pszajom
Do dzisioj ciyngym wejścio niy znodli
Potrza im cigi? -Na to niy wpodli.

[broneknotgeld]

Szafrańce w Chorzowie

Czym te Szafrańce niy handlowali?
Czego to łoni niy rozwoziyli?
Po cołkym Ślonsku wozy ciongali
Do Wrocka tako tyż zoglondnyli
We tyn czas moru jak śmierć mo żniwo
Stolica Ślonska wtedy w żałobie
Tref roztomajty - tako już bywo
Zdało sie istnym - bydom we grobie

Przeca zaraza wielko szczimali
W końcu wrocajom - som we Chorzowie
Dyć jako ze tym bydzie tu dali?
Strach mo terozki niyjedyn czowiek

Trza sie Paniynce łoddać w opieka
Zocno figura już na kolumnie
Sztela łobroni - po co uciekać?
Toż Matko Bosko zwroć łoczy ku mnie.

[broneknotgeld]

Kolumna Maryjno 1860

Chorzow Stary za niom leży
Broni szteli - chciyjcie wierzyć
Przed tym morym ze Wrocławia
Jyj opieka - zocno sprawa.

[broneknotgeld]

Kedy se zbudzom rycerze?

Ponoć za komuny śnik ich niyspokojny
Dyć se niy zbudziyli do "krziżowy wojny"
Teroz przi Paniynce słychać aż chrapanie
Tako mi sie zdowo co wojsko niy wstanie.

[broneknotgeld]

Na Szwajcarski Dolinie

Na Szwajcarski Dolinie kajś "wrota" do groty
Huf drugi chrzowski - to niy som gupoty
Wele Planetarium tyż drzymiom rycerze
Zbudzom sie jak Chorzow zapomni ło wierze.

[broneknotgeld]

W Chorzowie

Ponoć tu łod downa kaplica se stoła
Coby bozogrobce mogli do niyj wołać
Tych kierzy robiyli na jejich lazaryt
A przeca trza było pilnować ich wiary.

[broneknotgeld]

Z poczontkym XIV wieku

Ano we tych czasach koscioł piyrszy stanoł
Świontynka to była dyć jeszcze drewniano
Toż i niy dziwota że sie wypolyła
-Juzaś nowo chnetko w tym miejscu stanyła.

[broneknotgeld]

Świyntopietrze 1326

Farorz Adam ze Chorzowa świyntopietrze złożoł
Bracik Henko z lazarytu tyż doł grosz co wożoł.

[broneknotgeld]

Chorzow 1379

Gore kościoł we Chorzowie
Toz w utropie teroz czowiek
By tref taki niy był dany
Stanie nowy - murowany?

[broneknotgeld]

Kościoł 1379-1590

Wiela razy łodnowiony
We tych richtig czasach ciynżkich
Przez husytow poraniony
Jakoś szczimoł rożne klynski

Dyć niy łopar sie wiekowi
Trza nowego - kożdy powiy.

[broneknotgeld]

Z końcym XVI wieku

Za farorza Bronowskiego stanoł nowy kościoł
Coby tyn nasz chorzowianin już wiyncy niy pościoł
Bo se fest rozrosła ta zocno osada
We starym i ciasnym kto gruby mioł zwada.

[broneknotgeld]

Chorzow 1625

Toż ksiondz Jan Bratkowski wystowioł kaplica
Prawie przi kościele - gryfne jeji lica
Łona pod wezwaniym jest Jana Krzciciela
Pokozać jom dzisioj jo sie niy łośmiela.

[broneknotgeld]

Łodnowiynie kościoła 1632

Kościoł po remońcie zdo sie jako nowy
Dyć juzaś siedzibom jest bytomski gowy
W Chorzowie spokojni we czas wojny srogi
Tukej se kerujom Szagalskiego nogi

[broneknotgeld]

Farorz Stanisław Stempkowski (1711-1727)

Stanisław Stempowski nowy kościoł stowio
Na muster baroku parafianom sprowio
Świontynia ło kery do dzisioj bajajom
Dyć dziw co drewniano ciyngym wspominajom.

[broneknotgeld]

Kościoł Maryji Magdalyny 1590-1710

Kery to już kościoł?
Niy byda rachować
Dyć wiela łon znaczoł
Dlo tego Chorzowa.

[broneknotgeld]

Za Stanisława Stempowskiego (1711-1727)

Ano staraniym farorza tego
Kościoł zaś nowy dźwigajom
Asioł se Chorzow barokym jego
Toż richtig gryfnym go majom.

[broneknotgeld]

Roztomajcie

Roztomajcie chorzowiany
Ło kościele prawiom
Toż dlo jednych durś drewniany
Inksi mur w niym jawiom.

[broneknotgeld]

Chorzow gore! (27.VII.1782)

Cołko wieś sie wypolyła
Ano łogyń mo dyć siyła
Tako strowioł i świontynia
Idzie yno jom wspominać.

[broneknotgeld]

Czarownik w chorzowskim kościele

We downych czasach dyć to sie dzioło
Niy było wtedy wcale wesoło
Parafjo biydno kościoł ubogi
Toż mag zawitoł we fary progi

Prawioł ksiynżoszkom co cud zrychtuje
Świynto Paniynka łon prziwołuje
A jak zagości tu we kościele
Pontnik zoglondnie do taki sztele

Farorz pomyśloł - Toż trza sprobować
Fest geld dyć potym zacznom wciepować
Toż bydzie możno richtig bogato
A niy jak teroz - zdo sie sagato

Dyć kapelonek coś wystrachany
Czy to sie godzi? Na Boże rany!
Możno czort cosik we tym namiyszo
A za pokusom i farorz zgrzyszom

Już mag ze ksiyndzym som przed ołtorzym
Już Matka Bosko ściongać se woży
Widać w kościele Paniynka tako
Dyć ktoś z ambony głośno zapłakoł

Toż kapelonek - w rynkach Hostyjo!
Pódź! Macej Ciało Syna Maryjo!
I co? Grom blysnoł z jasnego nieba!
Kościoł z pożogi ratować czeba!

Cołko świontynia se wypolyła
Znak że w tym yno djobelsko siyła
Niyłoparzony wyloz wikary
Mag cołkym hajsnoł - z niym farorz stary.

[broneknotgeld]

Juzaś stoji 1785

Marji Magdalyny kościoł juzaś stoji
Bo jako w Chorzowie bez kościoła szczimać?
Toż farorz Bojarski se ło niego boji
Ponoć skuli tego niy chce nawet drzymać.

[broneknotgeld]

Kościoł Marji Magdalyny 1785-1885

Sto lot do rowności parafianom służoł
Prawiyli co z niymi już za wiela użoł
A że we tym czasie sztela se rozrosła
Tako i świontynia swoji "śmierci" doszła
Toż jom wybulyli by nowo postawić
Radość parafianom tyż i tako sprawić.

[broneknotgeld]

Chorzow 1885-1892

Neogotycki kościoł stowiajom
Bo Ponboczkowi tukej fest pszajom.

[broneknotgeld]

"Marjo Magdalyna" 1895

Toż arcybiskup jom konsekrowoł
Parafji tako na droga dowoł
Co wiyść duszyczki miała do Nieba
Kopp przeca wiedzioł czego tu czeba.

[broneknotgeld]

Stanoł se na sztrasie!

Kożdymu sie zdowo co łon dziwnie stoji
Toż se poczytocie ło tym godki moji
Kero tukej leci za chorzowianami
Bo łoni nojlepi ło tym wiedzom sami

Prawiyli co piyrwyj była gryfno fara
Ło kero ksiondz richtig musioł se tu starać
Bo w niyj Jan Sobieski tako zanocowoł
I wyśnioł co Turkom lyjty wielke dowoł

A huf wiod chorzowski - wiycie ło niym cosik
Historyji szteli ciekawy to "grosik"
Toż chałpa brzimowo jak piyrwyj stoć mioła
Trza było wyciongnońć fundamynt kościoła

Na "sztrasie" świontynia tako se stanyła
Fary tref niy szczyńdzioł bo se wypolyła
Dzisioj to wyglondo możno trocha dziwnie
Dyć czowiek niy może jak Ponboczek kiwnie.

[broneknotgeld]

Na sztrasie?!

Nojświyntszy Sakramynt mioł blyszczeć na sztrasie
Toż być to niy może! -Poradzić z tym trza sie!
Ołtorz z drugi strony świontyni stowiajom
I tako utropy już ze tym niy majom.

[broneknotgeld]

Nałopy stoji

Ołtorz niy łod wschodu - tako se dziwujom
Zdo sie - cosik złego we tym jakby czujom
Prawiyli co farorz za to pokutowoł
Swoje widzimisie przed Ponboczkym stowioł.

[broneknotgeld]

Po powojynnych remontach

Ustrojyli kościoł wedle nowy mody
Tako narobiyli yno jymu szkody
Kaj polichromije? Neogotyk w środku?
Co gryfne se traci - czy yno z przipodku?

[broneknotgeld]

Kopia łobrozu "Matki Boski Czynstochowski"

Na muster ikony piyrwyj zrychtowano
Zdo sie dlo Chorzowa jako świynte wiano
Kto iśc już niy może na pont czynstochowski
Tukej se porzyko do Ty Matki Boski.

[broneknotgeld]

Chorzowski krucyfiks

Niyroz sie świontynia chorzowsko polyła
Jakoś dobro siyła dyć krziża broniyła
Krucyfiks we zocy majom chorzowiany
Toż łod bożogrobcow podobnoś im dany
Prawiom co ty szteli łon szczyńście przinosi
Niyjedyn tu rzyko i ło łaski prosi.

[broneknotgeld]

We "babińcu"

We "babińcu" piyrwyj wisioł krziż chorzowski
Włazioł żeś tamtyndy - jakby myni troski
Na duszy ci lekci i to troszku dziwi
Że zdo sie co życie już leci szczyńśliwi.

[broneknotgeld]

Przi budowie kościoła Marji Magdalyny

Przi starym cmyntorzu tyn kościoł stowiali
Toż se już mulorze duchom dziwowali
Kere i do dzisioj we tych murach kryncom
Czymsik łone dusze pewnikym durś nyncom.

[broneknotgeld]

Duchy bajtli

Jak we Chorzowie kościoł stowiali
Tako i ło tym tu łosprowiali
Co bladych bajtlow w nocy widzieli
Yno łodgonić istnych niy śmieli
Bo jedyn na nich dość mocno ryknoł
Tako ze murow aż na doł fiknoł.

[palec1]

Tfojom megaprodukcjom mi imponujesz,
mein Gott - co Ty futrujesz ??!!

Bo mosz genjalno kondycja,
pjylyngnujonc ta naszo tradycja !

I fest >>DZIYNKI<< Ci za to. :)

[broneknotgeld]

Styknie napić se tyskego
I rym leci som ze tego
Dyć po kerymś już tam piwie
Gowom mi za mocno kiwie.

[broneknotgeld]

Dama Bożogrobcow

Maria Nowak - toż posłanka
PiSu chorzowskego wianka
Bożogrobcow dama tukej
W niyj pomocy teroz szukej.

[broneknotgeld]

Wiceszefowo Sejmowy Komisji Edukacyji

Pewno w patrjotyźmie richtig Chorzow dźwignie
I Giertych w ty szteli nikomu niy zbrzidnie.

[broneknotgeld]

Tako wleciało
forum.gazeta.pl/forum/72,2.html?f=324&w=44145717
Rymnońć se chciało.

[broneknotgeld]

Uradujom środom prawie we Chorzowie
Mie "Godki Chorzowske" wspomniały we gowie
Dwa roki żech tymu kłod we magistracie
Pewno w kont je wciepli - mom ślimtać we lacie?
www.dziennikzachodni.pl/artykul/3483223,godomy-po-slonsku-w-srode-rozdanie-nagrod-w-chorzowskim-centrum-kultury,id,t.html
"Godki Chorzowske"
forum.gazeta.pl/forum/w,324,43085160,,Godki_chorzowske.html?v=2