Ło Niymcach

[broneknotgeld]

Witom.
No toż jak majom tu być tyż Niymcy to niych se bydom.

[broneknotgeld]

Golonka i piwo to Niymcy som całe
Dyć niy myśl terozki że łone fest małe
Golonka niymiecke przeca richtig sroge
Piwo ciynżko wypić - chocioż niy za droge.

[broneknotgeld]

"Oktoberfest"

Z wrześniym jednak go fajrujom
Dyć chmiel wtedy fest żniwujom
Ze dwa tydnie piwo żłopiom
Ponoc niy som nic "pod kropom".

[broneknotgeld]

Ło Niymcu

Prawo porzondek robota
Niymiec ponoć mo we krwi
Prowda to jest czy gupota?
Spytej go - pewnikym wiy.

[broneknotgeld]

Saksończyk

Godajom że mo coś z lisa
Choć mu zdorzo sie namiyszać
Zowdy jakoś sie wywinie
I niy poznsz nic po minie.

[broneknotgeld]

Bawarczyk

Mo we zocy tradycyjo
Czasym jednak go łomijosz
W droga lepi mu niy włazić
Bo sie idzie fest narazić.

[broneknotgeld]

Szwab

Kto we Szwabii jest rodzony
Ciongnie ponoć do mamony.

[broneknotgeld]

Nadryńczyk

Możno Ren mo taki wpływ
Niy wiy ponoć co to gniyw
Nawet jak we doma rumor
Zowdy dobry mo łon humor.

[broneknotgeld]

Na Niymca

Niymiec mercedesa w sobota pucuje
Jak somsiod zoglondo to sie tym raduje.

[broneknotgeld]

"Osis i Wesis"

Osis i Wesis se wiymiyszali
Prawy na lewo - lewy na prawo
Możno coś bydzie ze tego dali
Dyć trocha psioczom że jest "niyklawo".

[broneknotgeld]

Badyńczyk

Ponoc łon bardzi sknyrzy łod Szkota
Choć sie wydowo że to gupota.

[broneknotgeld]

"Parada Miłości"

Dyć piyrszo skiż pszonio parada zrobiyli
Niym jeszcze w Berlinie tyn mur łobalyli
Wolnościom i sexym wiela sie radujom
Ołpy tyż se tymu coś chyntnie dziwujom.

[broneknotgeld]

Roland w Bremie

Rycerz Roland na rynku we tym mieście stoji
"Muzykantow z Bremy" łon sie nic niy boji
We "Freimarkt" mo przeca serce ze piernika
Luftbalony czimie - gro mu durś muzyka.

[broneknotgeld]

"Freimarkt" - 1035

Dyć skiż tego łon jest "frei"
Że dlo wszyskich przeca naj
Cieszy biydnych i bogatych
Tych w pelcmantlach i "sagatych"
Chnetko cołke tysionc lot
Ze jarmarku kożdy rod.

[broneknotgeld]

Frankfurt

Zaroz we gowie mi franfuterki
Burczy coś cicho ze brzucha
Skiż nich tyn Franfurt tyż przeca wielki
Bo dbo ło ciało i ducha.

[broneknotgeld]

Torgi Ksionżki

Nojwiynksze na świecie tu jest ksionżki świynto
Zowdy we "Oktober" - piwosz zapamiynto
Choć do chmielu ksionżka cosik niy pasuje
Bo pryndko sie wtedy ćmok we łoczy "suje".

[broneknotgeld]

Brackenheim

W połedniowych Niymcach te miasto jest zocne
Kaj wino czerwone robiom nawet mocne
Winorośl "Lamberger" tukej sie udowo
Godajom co łona jest jak ta krolowo

Z czinostego wieku już znomy ta sztela
Rudolf Habsburg miastu przisłużoł sie wiela
Możno tyż lubowoł sie w tutejszym winie
Kere ciyngym majom w niymiecki dziedzinie.

[broneknotgeld]

Muzeum Heussa

Heuss Theodor tukej przeca sie urodzioł
Swojym piorym łostro we Hitlera godzioł
Dyc skrył sie na Ślonsku w małym Gościszowie
Historio nom godo że wielki był czowiek

We tym NRFie zostoł prezydyntym
Dziesiyńć lot kraj czimoł co już niy był "dynty"
Niy dziwota tymu że muzeum tu mo
Europa pamiynto i nad niym tyż dumo.

[broneknotgeld]

"Oktoberfest"

Dwiesta lot prawie biyr słepiom piyknie
W Monachium zowdy go przeca styknie
A wszysko zaczło sie skiż wesela
Ludwik Bawarski niy skompioł chmiela
Tako sie teroz co roku dzieje
I "rzeka" piwa w tyn "fest" tu leje.

[broneknotgeld]

Wyży Monachium żech se niy szkryfnoł
Kurde - dyć pora piw jo już gichnoł.

Bronek, jeeeeeeeeeee:)

[zalogowana]

Na Silesiana żech natrafiła
Bronkanotgelda żech zobaczyła
I poczytałach se gryfne fraszki
Co som wyjęte ze Ślunskiej czaszki:)

[broneknotgeld]

Poleku tu se tego nazbiyro
Mom we tym przeca intyncjo szczyro.

[broneknotgeld]

"Mydelniczka"

Stond ta "mydelniczka" znomy
Jakby pomnik NRD
Przed łoczami we tym momy
Wrocić czas tyn - czy ktoś chce?

[broneknotgeld]

"Krolewski zamek"

Nałoglondoł se bajek łod Walta Disneya?
Myśloł - Mom piniyndzy podobnoś za wiela
-Toż sie piykny zamek tukej wybudowoł
Choć godali ło niym że richtig zwarjowoł

Dyć dzisioj Bawarjo asi sie tym cudym
Skiż krola Ludwika myni jakby nudy
I chocioż przi tymu prawie zbankrutowoł
Łon to przeca cołki historyji dowoł.

[broneknotgeld]

Goslar

Po prowdzie dzisioj mieścina mało
Nojlepsze lata minyły
Stolicom Niymiec sie być zdowało
Ło tym tyż przeca my wiymy

Pałac cysorza łostoł do dzisioj
Gotyku piykno pamiontka
Ło "Rzymskich" Niymcach świat wtedy słyszoł
Trza Goslarowi dać - piontka.

[broneknotgeld]

Wernigerode

To tyż ze Harzu piykno perełka
Choć NRD-owsko płyta tu widać
Dyć już minyły czasy "diobełka"
Te miasto zowdy pamiyntać byda

Zamek co stoł już downymi czasy
Dzisioj we barok jest łobleczony
Chałpy na rynku w połni swy krasy
Z "pruskego muru" to przeca domy.

Z Ilsenburga k/Wernigerode pochodzł Ruberg

[Gość: andy]

www.bractwo.pless.pl

[broneknotgeld]

Te gory jakby kolybka Niymiec
Richtig łobrosły zamkami
Downiyj fest w kruszce bogate ziymie
Aszom sie durś zabytkami.