Fraszki włoskie

[broneknotgeld]

Rzym

Tam kaj siedym gorek stanyła ta Roma
Europejczyk godo - Jo jest tukej w doma
Bo przeca my wiela erbli łod tych Rzymian
Choć legjonow jejich już łod downa niy ma.

[broneknotgeld]

Jezioro Garda

Jezioro Garda se w Alpach leży
Jakby zatoka - idzie w to wierzyć
Co sie we gory wysoke wcino
Fiord ze Norwegii tyż przipomino.

[broneknotgeld]

Ferrari

Italyjoka w tym aucie dusza
Piykno - to szkryfnońć przeca tu musza.

[broneknotgeld]

Połnoc - połednie

Na połnocy mosz rowniny
we alpejskich ramach
Gory tako na połedniu
po Sycyljo sama.

[broneknotgeld]

"Kultura Villanova"
W czecim tysioncleciu na połwyspie rosła
Przeca do znaczynio jakosik niy doszła
Nic że bronz i nawet ajza już tu znali
Etruski i Greki Italyjo dali.

[broneknotgeld]

Greki

Toż utropy z niymi niy ma
Spodobała im se ziymia
Kero miała wiyncy niw
Grek w Italji - żodyn dziw.

[broneknotgeld]

Wele Neapolu

Ano - ty sztele jeszcze niy było
Dyć Grekow wiela tu prziciongnyło
Tako Cumae wspomnioł bych tukej
Se nad zatokom je teroz szukej.

[broneknotgeld]

Nauczyli

Greki Italikow wojować uczyli
Toż se na tym drapko i sami natnyli.

[broneknotgeld]

Toskania i Lacjum

Toskania i Lacjum - Etruskow dziedziny?
Dyć łoni tu prziszli a niy - byli driny
Toż se zakryńciyło historyji koło
Z czego Italikom mogło być wesoło.

[broneknotgeld]

12 miast-państw

Etruski razym cołkym niy żyli
We miastach-państwach dyć se sklupnyli
Kerych dwanoście richtig aż było
Toż wele tego sie to kryńciyło.

[broneknotgeld]

W Lacjum

Na Etruskow szlaku co wiod ich do Grekow
Wioszczyna se stoła - wiydz ło tym czowieku
W niyj żyli Latyny stond i Lacjum miano
Historyjo szteli wielko bydzie dano.

[broneknotgeld]

Czy założyli?

Remus i Romulus
Czy Rzym założyli?
Czy w mały wioszczynie
Wpiyrw Etruski byli?

[broneknotgeld]

Tarkwiniusz Pyszny

Rzońdzioł krol etruski Romom richtig twardo
Chocioż już Latyny paczom nań fest hardo
Toż utropa jego z chuci sie zrodziyła
Za gwołt na Lukrecji poczuł jejich siyła.

[broneknotgeld]

Lucjusz Juniusz Brutus

Łojca republiki widzi we niym Roma
Łon tyż to zrychtowoł co wolni som w doma
Toż se mynżym prawym i dzisioj nom jawi
-Śmierć dlo synow zdrajcow - serce yno krwawi

Tako republika wysoko postawioł
Chocioż i niyszczyńście familiji sprawioł.

[broneknotgeld]

509 r.p.n.e.

Już Etruskow w Romie niy ma
Czy spokojno teroz ziymia?
Wpiyrw podbici - zdobywajom
Toż Latyny szwong w tym majom.

[broneknotgeld]

Korsyka

Toż po Sycylji drapko Korsyka
Zaczła do bogow ze Romy rzykać.

[broneknotgeld]

II wojna punicko

Ano - Hannibal wielke mioł plany
Dyć ze ty wojny wyloz przegrany
Nic że przez Alpy przelazły słonie
Toż skory Rzymian przeca niy tonie
Niy dość że armio mu potraciyli
W końcu u niego ze wojskym byli.

[broneknotgeld]

Prowincjo Afryka

Po ty łostatni wojnie punicki
Kartagińczyki poszli w niywola
Prowicjo rzymsko już tu na wdycki?
Rzym rosnie w siyła - choć go niy chwola.

[broneknotgeld]

Tyberiusz Grakchus (133 r.p.n.e.)

Wybrany trybunym dlo naprawy państwa
Chcioł ukrocić wiela ze rzymskego draństwa
Jedna kadyncyjo Synat se mu łopar
Przed drugom śmierć znoloz - ano szkoda chopa.

[broneknotgeld]

Lucjusz Korneliusz Sulla

Choć możni - tako prześladowani
Ło pomoc Sulli terozki proszom
Toż zocny wodz tyn tyż łocygani
-Na razie zbawcom go Rzymu głoszom

Mariusz już w grobie - zymsta trwo dali
Bojom sie Sulli fest prowincyje
Wodz wodza tako do cna łobali
Dyć dlo Synatu nowe mecyje

Łobrońcy tako władzy tyż czeba
Jak coś swojego przeca jom chyto
Dyktator nowy ze łaski "nieba"?
A kogo w Romie łon by sie pytoł?

[broneknotgeld]

Pompejusz Wielki

Synat przi niymu podźwignoł gowa
Zdomu sie - rzońdzi tako łod nowa
Stond Pompejusza mianujom Wielkim?
Mioł karlus kajsik te duperelki?

[broneknotgeld]

Rubikon 49 r.p.n.e.

Galijskimi tryjumfami Cezar umocniony
Przez Rubikon tako przeloz chocioż Synat bronioł
Toż we cołki Italyji już jego legiony
I Pompejusz we utropie bo bydzie go gonioł.

[broneknotgeld]

Ave Cezar!

Rzym zdo sie tako u gyrow jego
Wola Cezara znaczy tu wiela
Wszysko we rynkach terozki jego
Dyć cosik mynczy latyńsko sztela.

[broneknotgeld]

Tref taki dany

Marek Antoniusz ze Oktawianym
Pomszczom Cezara - tref taki dany
Spiskowcy swoje potracom gowy
A potym przidzie triumwirat nowy.

[broneknotgeld]

Oktawian August

Niy ma Pompejusza - Oktawian Augustym
"Wzniosły" już terozki mianym niy jest pustym
Rzym "republikański" w niym cysorza widzi
A istny brać władza wcale sie niy wstydzi.

[broneknotgeld]

Tyberiusz

Pasiyrb Augusta mioł dobre chyńci
Dyć drapko łone minyły
Rzym sie przi niymu wiela umynczy
Toż "złote czasy" już były.

[broneknotgeld]

I po Kaliguli

Jak żył tak skończoł
-Drapko to prziszło
Zdo sie na dobre
Rzymowi wyszło.

[broneknotgeld]

Klaudiusz Zdobywca

Ano - Brytanio już jest przi Rzymie
Chocioż "Zdobywca" podobnoś drzymie.

[broneknotgeld]

Śmierć Brytanika

Neron kozoł łotruć brata przirodniego
Mioł w niym konkurynta do zesla swojego?
Tako sie straciyła w Rzymie krew Klaudiusza
Ze tym Agrypina mo czorniejszo dusza.

[broneknotgeld]

68 r.n.e.

Bunt we Galicji Iberji Afryce
Tako łostuda wielko we Rzymie
Niczym władza Nerona - toż wiycie
Śmiertka nad niym tyż kosa już czimie

Musioł pomoc se machnońć kostuchnie
Swojom rynkom tyn koniec przibliżyć
Czy co gorsze tu ze tym wybuchnie?
Kogo wojsko wydźwignie nojwyży?

[broneknotgeld]

Z Wespazjanym

Z Wespazjanym spokoj prziszoł
Toż Rzym dobrze na tym wyszoł.

[broneknotgeld]

"Piyńciu dobrych cysorzy" 96-180

Toż czasy Nerwy Trajana tako
I za Hadriana ciyngym jednako
Antoniusz Pius cysorzym szwortym
Marek Aureliusz tyż cosik worty.

[broneknotgeld]

Niy baranki

Ze wschodu Persy - z zachodu Franki
Niy som dlo Rzymu jako baranki
Toż wojska ciyngym wiyncy tu trza
A to kosztuje pierońsko - ja!

[broneknotgeld]

"Pod tym znakym zwyciynżysz"

Krziż Konstantyna we boj prowadzioł
W jedność cysorstwo sklecić poradzioł
Toż Wschod i Zachod we jego rynkach
Dyć jak uczimać? -Ciyngym to mynka.

[broneknotgeld]

Konstantynopol 330

Downe Bizancjum - nowo stolica
Tukej Konstantyn keruje lica.

[broneknotgeld]

Sztyry wieki

Sztyry wieki co sie dzioło?
Dyć niy było tu wesoło!
Rożne Goty Longobardy
Niy ciyrpiały już pogardy
Cysorz w Konstantynopolu
-Italyjo jejich wolom!

[broneknotgeld]

"Duce"

Wodz co wojskym rzońdzioł i swojom dziedzinom
Longobardzke mustry drapko tu niy minom.

[broneknotgeld]

Rzym papieski

Choć władza cysorsko w Konstantynopolu
Rzym som chce sie rzońdzić ze papiyża wolom

Basileus myni teroz tukej znaczy
Ano se skiż tego pierońsko łonaczy.

[broneknotgeld]

Pepin Mały 754

Pepin Mały w Italyji
Longobardom łostro wloł
Mieli wiela z niym mecyji
Toż papiyża wspiyrać chcioł

Co Bizancjum kedyś brało
Już terozki czimie Rzym
A że wiyncy by sie chciało
Nowo wojna - tela wiym.

[broneknotgeld]

Sycylijo 827

Zdo sie na rokow aż ćwierć tysionca
Już Saracynom niy skompi słońca.

[broneknotgeld]

Cysorz Hynryk IV 1072

Arcybiskupa juz doł Milanu
Cysorz pokozoł siyła kapłanom
Dyć go czekała ekskomunika
Jako do Boga terozki rzykać?

[broneknotgeld]

Normanowie XI w.

Toż italijske ziymie juz znajom
A że wojynce naprowdy pszajom
Chnetko krolestwo jejich tu bydzie
I Saracynow koniec tyż przidzie.

[broneknotgeld]

"Normańsko dziedzina"

"Normansko dziedzina" potomnym łostawioł
Wnuk erbnoł po synu korona Rogera
Dyć zły tref krolestwu utropa tyż sprawioł
Jak nastympcy braknie - tron pódzie w cholera.

[broneknotgeld]

Gwelfy

Gwelfy przi papiyżu stojom
Grzegorz błogosławi
Choć cysorza tyż se bojom
Ponboczek co sprawi?

[broneknotgeld]

Cysorz Fryderyk II (1197-1250)

Chcioł Italjo czimać choć papiyż był przeciw
Toz wojna domowo przez te ziymie leci
Z jego śmierciom koniec - juz przegrano sprawa
Dyć i gibelinom kończy sie "zabawa".

[broneknotgeld]

Cysorz Hynryk VII (1308)

Łostatni roz cysorz siyngo Italyji
Niywiela to dało - ciyngym rosnom miasta
Lepi by se czimoł niymieckich mecyji
Toż nic niy wypiecze z tutejszego ciasta.

[broneknotgeld]

"Czorno Śmierć" 1347

Czy chcioł w ty dziedzinie
mor wszyskich wykosić?
Dyć zły czas przeminie
Trza Ponboczka prosić

Choć ludzi połowa
Po tym w piochu leży
Dzwigo sie łod nowa
Możecie mi wierzyć.

[broneknotgeld]

Despotie

Kaj republika tam zowdy zwada
Dyć drapko znojdzie se na to rada
-Rzondy we miescie trza dać rodowi
Kożdy despota tako łodpowiy.

[broneknotgeld]

Floryncjo 1434

Kosma Medyceusz tu terozki panym
Floryncjo se budzi szczyńśliwszo ze ranym.

[broneknotgeld]

Rod Viscontich

Rod Viscontich w Mediolanie
Drapko se u władzy stanie
Dyc za twarde graby majom
Toż mieszczany im niy pszajom.

[broneknotgeld]

Miasto bankerow

Za dużo piniondza do Floryncji wpływo
Inkszym pożyczajom - to chyba niy dziwo.

---

Bankowo stolica Europy

Miasto to terozki bankerow europy
Bogactwym fest blyszczy - niy widać utropy
Tu cechy kupieckie na kunszcie sie znajom
Łozdobiom grod zocnie bo przeca mu pszajom.

[broneknotgeld]

Katedralno dzwonnica

Giotto projektowoł - jego miano nosi
Do dzisioj tu dzwoni - wiernych na mszo prosi.
--

[broneknotgeld]

Zocne życie

Floryncyjo zocnie przi pokoju żyje
Rzemiosło rozkwito - czynsto tu świyntujom
Kunszt blyszczy niyszczyńscie se po kontach kryje
Prziszły "złote roki" - tako teroz czujom.

[broneknotgeld]

Bibljotyka floryncko

Kupioł po Niccolim Medyceusz ksionżki
I świyntego Marka doł je zakonowi
Bibljotyki koncept był we tym niywonski
Toż Medicich dzieło - kożdy tako powi.

[broneknotgeld]

Kondotierka

Miasta sie bogacom i prowadzom wojny
Dyć kupiec to przeca karlus jest spokojny
Wystyknie co siyngnie łon po geld na wojsko
A dlo najymnika wojynka już swojsko.

[broneknotgeld]

Tyn Mediolan

Toż teściu Visconti we końcu umiyro
Z tym na republika Mediolan zaziyro
Sworza niy popiyro - idzie na wygnanie
Ciyngym jednak bliko co sie teroz stanie

Zaś kupce se kiepsko zaczyli tu rzońdzić
Po republikańsku prziszło im pobłondzić
-Kto miasto łoblygo i biere je głodym?
Kondotiera znocie - już ksiyńciym do zgody.

[broneknotgeld]

Italyjski pokoj

Chnetko lot sztyrdziści
Miasta w siyła rosły
"Złoty wiek" to ziści
Kaj we końcu doszły?

[broneknotgeld]

Fornovo 6.VII.1495

Naprzeciw Francuzow już Gonzaga stoji
Wojska mi liczniejsze tako sie niy boji
Dyć możno skiż tego Italjo przegrano
Ze tym na niyszczyńście już cołkym wydano.

[broneknotgeld]

Napoleon 1796

Toż po austryjocki nocy
Z niym ta sztela biere mocy
Republiki durś sie mnożom
Czas pokoże wiela wożom.

[broneknotgeld]

Karbonariusze

Zdo sie co łoni duchym wolności
Tako mi ło tym szkryfnońć nojprości.

[broneknotgeld]

"Risorgimento"?

Po Kongresie Wiedyńskim cołkym stare wroco
Dyć Italyjoki niy godzom sie z "nocom"
Jednym republika wielgachno se marzy
Inkszym zaś krolestwo. -Co tref tu przidarzy?

[broneknotgeld]

Wenecjo 1848/1849

Niy chcom Austryjokow - Wenecjo sie broni
Dyć w końcu i łona atakow niy szczimie
Nic że cołkom duszom za wolnościom goni
Niy czas jeszcze na to - toz juzaś ktoś drzymie

[broneknotgeld]

Giuseppe Mazzini

Toż "Młode Włochy" istny zrychtowoł
Za zjednoczyniym kraju durś stowoł
Rzymsko przegrano we Wiośnie Ludu
Go niy złomała - doczekoł cudu.

[broneknotgeld]

Na wojna z Austryjom

Na wojna z Austryjom Piemont tyż pociongnoł
Napoleon III Cavoura w to wprzongnoł
Dyć jak w końcu prziszoł po tym czas pokoju
Wyszło co Francyjok Włocha jakby zgnojoł

Modena z Toskaniom princow dostać miały
Choć "droga piemoncko" same wybiyrały
Co mioł Cavour robić? Jako protestować?
Uno urzond ciepnońć - przestać prymierować!

[broneknotgeld]

Garibaldi na Sycyliji

Iskrom łod kery wolność wybuchła
Ze niom na wyspie wielke powstanie
Toż wieść radosno tyż drapko gruchła
Palermo nasze! Ci chnet sie stanie?!

[broneknotgeld]

Krolestwo Włoch

Ciyngym bez Rzymu jest papiyskiego
Kery pilnujom durś Francyjoki
Dyć se doczkajom we końcu tego
I bydom razym Italyjoki.

[broneknotgeld]

Wioło chłodym

Ze Francyji chłodym wioło
Było tako niywesoło
Łodmiyniyło sie z Niymcami
No i tyż Austrio-Wyngrami.

Rzym

[broneknotgeld]

137

W końcu doszli z tym do zgody
Co richtig Hiszpańske Schody
Nojgryfniejsze som w Europie
Dyć tam gyrow niy złom chopie!

[broneknotgeld]

Z Villi Borghese

Z Villi Borghese wylecisz w gora
Dziwuj sie Romie choć żeś we chmurach
Toż zowdy yno w dobro pogoda
I uwionzany - tako przigoda.

Wenecja

[broneknotgeld]

Znakym tego miasta gondola być może
Bo przeca już teroz niy spotkomy doże.

[broneknotgeld]

Św. Marek Ewangelista

Piyrszy tu kościoł mioł jego miano
Pryndko wzioł cołke wenecke "wiano".

Werona

[broneknotgeld]

Werona

Dom Julki z balkonym ponoć tukej stoji
Pod kerym Romeo pioł do freli swoji
Źle sie to skończyło - przeca wiysz pieronie
Lepi pszoć sie w łożku - dyć niy we Weronie.

Bolonia

[broneknotgeld]

Piyrszy sztudynt richtig po Bolonii chodzioł
Tu sie uniwerek Europy narodzioł.

Piza

[broneknotgeld]

Krziwo wieża

Krziwo wieża tu stanyła
Możno ździybko se popiyła
A terozki fest sie boji
I tako dziwacznie stoji.

Asyż

[broneknotgeld]

Asyż

Świynty Frańcik tyn Asyż we świecie rozsławioł
Niyjedyn skiż niego sie wiela poprawioł
Pszoć tymu co żyje łon zowdy nauczoł
We tym recht choć przeca niyjedyn tyż buczoł.

Genua

[broneknotgeld]

Poznoł świat genueńczyka
Jak łodkrył ta Hameryka.

Cortina d'Ampezzo

[broneknotgeld]

Cortina d'Ampezzo

Zimom Dolomity kuszom
Tu ło śniyg sie boć niy muszom
Włoch stolica to zimowo
To niy yno mie sie zdowo.

Sycylia

[broneknotgeld]

Sycyljo

Czym Sycyljo richtig we tym świecie słynie?
Ano tym że tukej lepi być w "rodzinie"
Choć niy yno do sia żeś jest "Cosa Nostra"
Dyć zaroz przed tobom "inkszy" tukej mo strach.

[broneknotgeld]

Ło Etnie

Kuźnia Wulkana to zowdy była
Przeca i dzisioj znomy ta siyła
Czi lata tymu jak gruchnoł lawom
Richtig wystraszoł tych co tu bawiom.

Palermo

[broneknotgeld]

Palermo

Przez czi tysionclecia ludzie tukej żyli
Podobnoś i piyrwyj tyż szczyńśliwi byli.


Panoramos

Tako Hellyny te miasto zwali
Dyć niy za wiela ło nie tu dbali
W ciyniu Syrakuz i Selinuntu
Choć możno lepi - to szkryfna wom tu.


Palermo 831

Saracyny miasto terozki zdobyli
Toż miano Balharmu niychej wos niy zmyli
Bo przeca stolicom jest tu emiratu
Łoziymset meczetow zdo sie tom zapłatom.


"Medyna Zachodu"

Rowny Kordobie se Balharm zdowo
I przi Kairze wyglondo zdrowo.

Friuli - Wenecjo Julijsko

[broneknotgeld]

Środziymnomorze tu sie łonczyło
Jakby ze środkym Europy
Ze jedny strony se im szczyńściyło
Ze drugi były utropy.

Capri

[broneknotgeld]

Capri

Godajom że łona Giewont przipomino
Co z wody chce wylyźć i se durś wypino.

Adriatycko Riwiera

[broneknotgeld]

Adriatycko Riwiera

Cesenatico Rimini Riccione
We lato nigdy niy som uśpione
Wiela sie dzieje wtedy na plaży
Przijedź bo po co mosz yno marzyć.

San Mauro Mare

[broneknotgeld]

Ferragosto w San Mauro Mare

Piytnosty siyrpnia - toż Wniebowziyńcie
Tu wielki fajer - mocie pojyńcie?
Wino za darmo sie wtedy leje
I pełnom gymbom czowiek se śmieje
We mieście ludzi teroz nojwiyncy
Dyć to zodnego w świynto niy mynczy.

Borghi

[broneknotgeld]

Borghi

We Borghi farorz na festyn woło
Zowdy przi tymu tukej wesoło
Koncert zabawy i loteryjo
Z gowy wyleci kożdo mecyjo.

San Leo

[broneknotgeld]

W San Leo

Podobnoś tukej w twierdzy był Dante
Cagliostro tako znoł mury sam te.

Lognano

[broneknotgeld]

W Lognano

Ciongnie Lognano mie ludzie złoci
Bo kaj ciekawsze targi staroci?

Toskania

[broneknotgeld]

Toskania

Krainom zobytkow Toskania jest zwano
Dyć sie som przkonej czy dobre to miano.

Piombino

[broneknotgeld]

Z Piombino

Z Piombino na wyspy se szifym popłyna
Taki atrakcyji jo przeca niy mina.

Elba

[broneknotgeld]

Na Elbie

Co z tego ze biołe plaża?
Durś we ciźbie po niyj łaża!

Florencja

[broneknotgeld]

Most Złotnikow

Stoji we Floryncji z sztyrnostego wieku
Nojstarszy we mieście - przeca wiysz czowieku
Do dzisioj tu kupisz droge świycidełka
Mie łone niy nyncom - niych leżom w pudełkach.

[broneknotgeld]

Bankowo stolica Europy

Miasto to terozki bankerow europy
Bogactwym fest blyszczy - niy widać utropy
Tu cechy kupieckie na kunszcie sie znajom
Łozdobiom grod zocnie bo przeca mu pszajom.

[broneknotgeld]

Partio gwelficko

Partio gwelficko miastym rzodziyła
Siyłom piniondza wspiyrano
Przi niyj Floryncjo dyć rozkwitnyła
Jakby gryfniejszo co rano.

[broneknotgeld]

Wawrzyniec Wspaniały

W jego ryncach Floryncyjo zdo sie plastelinom
Rada Miejsko tyż se jakby medycejskom stała
Dyć co bydzie jak Wawrzyńca ziymske czasy minom?
Czy we rodzie władza ciyngym tako jak ta skała?

Liguria

[broneknotgeld]

Liguria

Czy łona caluśko Riwierom jest yno?
Z Morzym Liguryjskim tako sie fest spino.

[broneknotgeld]

"Cinque Terre"

Piyńć wiosek zdo sie wisi na skale
Z morza dopłyniesz - z londu chnet wcale
Dyć se zoglondnońć tu richtg werci
W gowie łostanie do samy śmierci.

Portofino

[broneknotgeld]

Ło Portofino

Ło Portofino tyż szlager momy
Sławy Przibylski miasteczko znomy.

[broneknotgeld]

Ano recht

Ano recht we tym - te Portofino
Jakoś se potym niy zapomino.

[broneknotgeld]

Po zatoczce

Po zatoczce se popływom
Na miasteczko tako dziwom
Richtig widza że jest małe
Dyć jak bonbon zdo sie całe.

Genua

[broneknotgeld]

Genua

Genua piyrwyj potyngom była
Połowom morza jakby rzońdziyła
W tym mieście-państwie flota armijom
Dyć dzisioj tako już tu niy żyjom

San Remo

[broneknotgeld]

Festiwal w San Remo

Cosik dlo ucha dlo łoka tyż
Festiwal przeca - dobrze to wiysz.

[broneknotgeld]

"Riwiera Kwiotkow"

Wele San Remo jest tako sztela
Kwiotkow hodujom tu richtig wiela
Geld dobry z tego dyć wyciongajom
Bestoż i we tym uciecha majom.

[marghe_72]

ja bym to widziała na forum włoskim :)

[broneknotgeld]

A tu niy "Włochy"?

[marghe_72]

Turystyka
zatem nieco inne zainteresowania..

[broneknotgeld]

Hmm, richtig turysty cołkym niy interesuje historio kraju kery zwiydzo?

[marghe_72]

odpowiedzi udziel sobie sam
co nie zmienia faktu,ze i na forum włoskim warto by to było wrzucić

[broneknotgeld]

Spokopiołch - Ciebie to niy interesuje.
Co niy zmiynio faktu, że werci sie tukej to wciepnońć.

[marghe_72]

a skad wniosek,ze mnie nie interesuje?
jak na razie tylko ja sie dopisałam :))

[broneknotgeld]

forum.gazeta.pl/forum/72,2.html?f=206&w=38575144&a=38716220
Jakby niy paczeć to Twoj post i Twoje zdanie, tym bardzi, że inksi sie niy
wypowiadajom.

[marghe_72]

zgadza sie
inni sie nie wypowiadają :)
a myśle,ze na forum włoskim odzew by był..

[broneknotgeld]

Tu przeca tyż jest odzew - wystyknie.