broneknotgeld

[Gość: Gerard Z.]

Bronek!Ciebie jest tu tak dużo, że aż robi się niedobrze.Zajmij się czymś
pożytecznym.

[broneknotgeld]

No toś nadepnoł na ucho słonia
Czy jo tu pisać komuś zabronia?!

Genialne

[Gość: Radex]

Piękna odpowiedź:-))
Luźna i zabawna

[broneknotgeld]

Pisz chopie tukej pisz richtig wiela
A bydzie rosła ta rudzko sztela.

[broneknotgeld]

Taki zy mie jest pożytek
Że sie kulo tyn przibytek
Leci ze tym tyż do przodka
Naszo ślonsko piykno godka.

[broneknotgeld]

No dobra - póda jo se na fecht
Choć możno niy jest to cołkym echt.

[broneknotgeld]

Szkoda

Myślołch że mie tu pokrytykujom
Ale coś chyńci na to żech ujon.

[broneknotgeld]

Z siebie tyż trocha pośmioć sie lubia
Bestoż tyj iskry w duszy niy "gubia".

[broneknotgeld]

Myśli same lecom przeca
Ponoc ze komorek neca
Jo je yno w rym łoblykom
Bych to umioł - ło to rzykom.

[broneknotgeld]

Za bajtla lubioł żech take siynie
Kaj były gelyndry jak marzynie
I choć żech na nich galoty drachoł
Taki był wtedy zy mie już pachoł
Dostowołch za to łod omy hiby
I siech pilnowoł potym - na niby.

[broneknotgeld]

No ale u mie we doma
Twardo dzieckami rzondziyła ołma
Na grubie downo zginyli ołpa
A bajtli w izbach lotała kupa
Na kerych matka durś harowała
I to już familijo cała
Bo fater błonkoł sie kajś po świecie
Niy zwionzoł z sobom żodne swe dziecie.

[broneknotgeld]

Jo tysz sie tu chwola łod ołmy te szmary
Bo wiym to już dzisioj jak żech trocha stary
Że ciynżko przipadła i rola
Musiała nom czasym
Po dupie dać pasym
Choć przeca nom wszyskim tyż pszoła.

[broneknotgeld]

Dziywanna

Zbiyroł żech dziywanna przi ścieżce i łonce
Zbiyroł żech do bojtla te kwiotki jak słońce
Bo syrop na cukrze robiyła z nich ołma
Ze grypska lyczyła nim wszystkich nos w doma
Kucanio i rymy nic my sie niy boli
I tako kuracjo tyż dzisioj trza chwolić.

[broneknotgeld]

We familokach

We familokach zowdy w soboty
Z kompaniym było wiela roboty
Na piecach stoły kastrole z wodom
Grzoli jyj dużo - jo wom to godom
Potym jom loli do wanny wielki
W niyj sie kompali bajtle i frelki
W niyj sie kompała muter i ołma
Jak chopow wcale niy było w doma
Łoni szli przeca do badyhauzu
By sie na grubie kompać pod brauzom.

[broneknotgeld]

Dyć jo pamiyntom jak moja ołma
Prała we kuchni jeszcze rynkoma
Wesoło furczoł ważbret ze glasu
Znikoły na nim resztki marasu
Cało impreza to była w doma
A dzisioj wszysko robi automat.

[broneknotgeld]

Szpaner

Gardiny gardinki i insze serwyty
Po praniu we szkrobku moczały kobiyty
Zaś potym trza było to wszysko szpanować
To szpaner mioł przi nich durś ciynżko harować
By piykne i sztajfne swoj fason czimały
We łoknach - na stole - tyż nom szpanowały.

[broneknotgeld]

Laurastrasa

U Brynera żech piyrsze pioł piwo
Niych nikogo to tukej niy dziwo
Chocioż teroz som insze już czasy
Dyć jo karlus je ze Laurastrasy

Jak tam ida ślypiami se kukom
Jakoś ciyngym ty muszli jo szukom
Drzewek pora to jeszcze tam stoji
Ale niy ma już ty knajpy moji.

[broneknotgeld]

Moj flek

No to Wom powiym tukej poleku
Że mom na dupie flek po kromfleku.

[broneknotgeld]

Fleki

Skondś to znom
Bo fleki mom
Tyż czowieku
Byłch na fleku
Fleki godom
Ida do dom.

[broneknotgeld]

Jo durś tu pisza ło swojim życiu
Czasym koloru dodom w ukryciu
Zaś inszym razym ździebko popieprza
Myśla że fraszka jest wtedy lepsza.

[broneknotgeld]

Za mondry toch niy jest - do tego sie prziznom
Zaglondom kajniykaj aż rymy mie piznom
Jakoś po swojymu co czytom przetrowia
I fraszka wychodzi skiż ślonskego zdrowia
Poezjom sie tego nazwać niy łośmiela
Szkryflom co mie cieszy - radości w tym tela
Że rymami idzie historio łopisać
No i w Internecie trocha tyż namiyszać .

[broneknotgeld]

Ciepło wspominom podstawowka
Wtedy to żech mioł życie
Pamiyntom jedny rechtorki głowka
Cudo - Czy mi wierzycie?
Pamiyntom inszy rechtorki nogi
We mini kecce w kratka
Wpodoł żech bez nie w nastroj błogi
Tako żech z tym mioł gratka
Cycuszki łod ni do dzisioj widza
Bez haltra choć we cwitrze
Tych wspomniyń wcale sie niy wstydza
To z mózgu sie niy wytrze.

[broneknotgeld]

Jak po łobiedzie myja noczynie
Wdycki przichodzi na mie natchniynie
Do łeba cisnom sie rymy same
Dyć jo już lubia te pomywanie
Mycie tych garow teroz igraszka
Bo zawsze przi tym rodzi sie fraszka
Teroz zmywarka sprawa to marno
Już bych jom niy chcioł nawet za darmo
W rymach by było u mie ubogo
A ta ideja dzisioj mi drogo.

[broneknotgeld]

Plaża

Już mi sie plaża złocisto marzy
Klara co grzeje chocia niy parzy
Ło lecie myśla - tym nad Bałtykym
Kaj sie co roku jeżdża ze smykym
Taszcza ze sobom tyż familijo
Urlop tam przeca szczyńśliwie mijo
Bajtle ze ołmom wakacje majom
Przed rokym szkolnym łodpoczywajom.
Potym je koniec jak ucioł nożym
W zima zaś myśli mom nad tym morzym.

[broneknotgeld]

Werci sie myśleć ło lecie w zimie
Czowiek sie wtedy niy dowo rymie
Jak piykno klara we gowie nosi
Ryma z kichola sie mu wynosi.

[broneknotgeld]

Czamu jo tukej te fraszki ciepia?
Dyć tym sie trocha tak jakby krzepia
Jo w to sie chowom czymu som pszaja
A na dodatek robia tyż jaja
I chocioż w koło coś groźnie warczy
Myśla żech jeszcze niy jest na tarczy.