Rudzki gyburstag

[broneknotgeld]

"A imie jego 44"
Wiycie co znaczy to do cholery
Chnet piyńć sztyrdziści przeca tyż pódzie
Mie i co ważne - tyj Ślonski Rudzie.

[broneknotgeld]

Bestoż terozki niy śpia po nocach
I przi komputrze czynsto sie poca
Bo na gyburstag gyszynk - te forum
Chca by tu wiela było humoru
Coby szło pedzieć w nastympny rok
Do szczyńścio bliży my som zaś krok.

[broneknotgeld]

Możno te rymy zebrać nom pódzie
I na gyburstag wydać we Rudzie.

[broneknotgeld]

Pomysłow tukej naciepać szło by
Co w tyj intyncji we Rudzie robić.

[broneknotgeld]

Niy mo pomysłow richtig ta Ruda?
Piyknie tu bydzie jak jo sie póda?!

[broneknotgeld]

Dropia sie teroz we swoja pała
Dyć rola błozna mi sie dostała!

[broneknotgeld]

A tu ciyngym yno cisza
Jo sie z tego nic niy ciysza.

[broneknotgeld]

Na gyburstag

Przeca Ruda naszo Ślonska
Piyrsze zrobić tu "Dni Ślonska".

[broneknotgeld]

Ideja

Dni Ślonska teroz siedzom mi w gowie
Chyba na czasie je to ideja
Pomog by we tym mi dobry czowiek
Bestoż w Internet pomysł tyn sieja.

[broneknotgeld]

Nadzieja

Mom ta nadzieja mocno chca wierzyć
Że miasto chyci ta sprawa
Bydymy mogli te dni sam przeżyć
I udo sie nom zabawa.

[broneknotgeld]

Termin

Termin mi taki prziszoł do gowy
Bydzie dość dobry - nic we nim złego
Wybroł żech drugi weekend majowy
No a nojlepi tak łod siodmego.

[broneknotgeld]

Hasło

Hasłym zaś bydzie "Ślonsk i Europa"
Terozki chycić to musi
Może sie skończy naszo utropa
Yno trza euro tu kusić.

[broneknotgeld]

I tak dali

We Rudzie piyrszy roz by to było
Potym leciałoby dali
Za rok kajś indzi by sie krynciyło
My by sie tam radowali.

[broneknotgeld]

W końcu

W końcu z kożdego regionu konska
Z Grinberga po Katowice
Miasta by chciały robić Dni Ślonska
Marzonc ło takim zaszczycie.

[broneknotgeld]

Pomysł

Jo bych notgeldy przi tym wystowioł
Na kerych Ślonsk je nasz cały
Jednych bych uczoł a inszych bowioł
Taki moj pomysł je mały.

[broneknotgeld]

Propozycjo

Dyć z tego forum tyż wybrać szło by
Zwrotki nojlepsze zofcite
I tomik fraszek z tego by zrobić
By go promować we dni te.

[broneknotgeld]

Kiermasz ksionżki

Kiermasz sie marzy piykny niymały
Z ksionżkom ło naszym regionie
To już łobchodow punkt byłby stały
Trza nom to zrobić - jeronie!

[broneknotgeld]

Rajzy i ferie

A może by tak torg turystyki
Naszy tutejszy tyż ślonski
Po co wyjyżdżać nad Adratyki?
Znosz piykne ziymi tyj konski.

[broneknotgeld]

Film

Trza przeglond filmow tyż zrobić przi tym
Tymatym ślonskim sie chwolić
Niy boć sie jakiś niymondrych krytyk
Kryńcić a mamlasow smolić.

[broneknotgeld]

Apel

Ze tego forum wszyskich chca prosić
Wciepcie tu swoje pomysły
Pomożcie mi ta ideja głosić
By te Dni Ślonska nom wyszły.

[broneknotgeld]

Brifmarki

Myśl je to chyba tyż łoczywisto
Wciepnońć tyn tymat filatelistom
Ślonsk na brifmarkach by pokozali
Piyknie ideja poleci dali.

[broneknotgeld]

Artysty

Jakby łodkurzyć ślonskich malyrzy
Kierzy we sztuce naszy miyszali
Za ich kunszt teroz trza by nom przirzyc
Że już bydymy ich pamiyntali.

[broneknotgeld]

Cajtongi

Cajtongow ślonskich momy tu tela
Że ich zrachować sie niy łośmiela
Jakby je wszyske zebrać cuzamyn
Mioły by dni te wiela reklamy.

[broneknotgeld]

Ze fary

Taki mom pomysł tyż niybanalny
Konkurs gazetek - tych parafialnych
Na naszych farach łone sie siedzom
A za szyroko ło nich niy wiedzom.

[broneknotgeld]

Wice

Jakby zaś wciongnońć w to Masztalskego
Tego wielkego łod wicow szpeca
Raj by to chyba był tyż dlo niego
Bo śmiychu wiela nom potrza przeca.