Ślonsko polityka

[broneknotgeld]

Łod Gornego Ślonska teroz my som dali
Bo nom opolany mocno bobu dali
Wina w tym je naszo prziznać to tu musza
Bo za fest jest polsko katowicko dusza.

[broneknotgeld]

Zabrakło tukej nom Salomona
Matki zabrakło prowdziwy
I Gorny Ślonzek sie niy dokonoł
Niy wiym czy bydzie zaś żywy

Dzisioj idyja zastompioł stołek
Za kerym idom profity
I głośno tukej pedzieć to chciołech
Bez idyji Ślonsk bydzie bity.

[broneknotgeld]

Pódom do Canossy
Nasze ślonske bossy
W miechu weznom hasie
Suć se bydom na sie

[broneknotgeld]

We "Dziynniku" kedyś ło tym napisali
Że zaś sie czepiajom tych ślonskich dynkmali
Komuś zawodzajom stare ajzynkrojce
Za kere krew loli nasze ołpy łojce
Zaś sie przewrocajom we grobach boroki
Niyważne czy Niymce Ślonzoki Poloki
Kamratami byli we armii Wilusia
Ginyli kaj Bog doł - rzodko leżom u sia
Hulo na kerchowach europejski wiater
Niyjedyn syn niy wiy kaj je jego fater
Niyjedyn wnuk niy wiy kaj som ołpy kości
Ale duch tych przodkow w ajzynkrojcu gości.

[broneknotgeld]

Czy richtig niy ma na to rody?
Niy do sie jakoś urwać tego?
Gorolsko-ślonske skończyć zwody
Bo niy ma we tym nic dobrego

Pniokow już yno ździybko momy
Wiyncy korzyni niż drzew lesie
Z krzokami ciynżko sie kumomy
A wiela złego to nom niesie

Dyć przeca las je wtedy zdrowy
Jak kożde życie we nim kwitnie
Niy trza tam niszczyć nawet trowy
Mie szkoda krzoka co sie wytnie

Pnioki solidne i paradne
Muszom mieć zdrowych astow tela
By ło drobnica dbać przikładnie
Z kery urośnie nowo knieja.

[broneknotgeld]

Ślonsk sie nom łobudzi
Odrom se popłynie
No i w sercach ludzi
Nigdy już niy zginie

Trombić ło tym bydom
We cały Europie
Tu po rozum przidom
Dyć sie raduj chopie

Region nom rozkwitnie
Poleci do przodka
Co złe to sie wytnie
Ło tym tu je godka.

[broneknotgeld]

Opolske ajzynkrojce

Durś tym fest-Polokom ajzynkrojce wadzom
Co ze nimi zrobić - pora lot już radzom
Problym to pieroński - do jasny cholery
Niych sie zapytajom ło to Bundeswehry
Sojuszniczo armio dobrze im poradzi
I może sie w końcu już przestanom wadzić.

[broneknotgeld]

Przestanom wadzić

Przestanom przestanom moja w tym je gowa
Ło tych ajzynkrojcach prowda im tam powia
Przeca nawet Gorol niy chce "zimny wojny"
Krziży sie niy chycom - ło to być spokojny.

[broneknotgeld]

Już na Dolnym Ślonsku pokolynia rosnom
Kerym bardzi blisko je ta ziymia naszo
Tam przeca poleku wonio ślonskom wiosnom
Szkoda że tu żodyn tego niy rozgłaszo.

[broneknotgeld]

Niychby to nawet boł polski konsek
Bele za tymat mioł tyn nosz Ślonsek.

[broneknotgeld]

Jakoś mi smutno trocha terozki
Że Dolny Ślonzek tukej niy gości
Ciynżko tu godać ło tym regionie
Jak sie durś siedzi na jedny stronie
Aż do granicy chciołbych jo bliknońć
Chocia jak na mie to musi styknońć.

[broneknotgeld]

A dyć dotarły do mie sygnały
Że breslauery pisać tu chciały
Niy chcom tu jednak pisać po polsku
Ślonski na żywo mieli we wojsku
A to co słyszom we "Świynty wojnie"
Coś niy nastrojo ich za spokojnie.

[broneknotgeld]

Bydymy jeszcze czekać tu trocha
Bele niy powiy nikt im - wynocha!
Myśla że włonczom sie do "Dni Ślonska"
Do ty imprezy trza tego konska.

[broneknotgeld]

Coż wom powiym baby chopy
"Ślonsk regionym jest Europy"
To jest hasło myj wystawy
Chciołch notgeldom dodać sławy
Ale nawet we tym czasie
Z tom wystawom som myncza sie
Dyć promuja durś Europa
Choć mom ze tym tyż utropa.

[broneknotgeld]

Ślonzek w Europie zablyszczeć może
Choć nom Warszawa w tym niy pomoże
Trza nom sie jednak zebrać do kupy
I zrobić wszysko by "niy dać dupy".

[broneknotgeld]

Ślonsk do Europy czynsto sie śmieje
Bo europejske som jego dzieje
Wiela ze siebie doł zachodowi
Możno ktoś głośno ło tym tyż powiy
Zresztom już ło tym słychać tu cosik
Yno że cichy to jeszcze głosik.

[broneknotgeld]

Wiater

Jo bych na taki wiater sie dziwoł
Kery by euro z Unii nom prziwioł
Gynsto nim sypnoł na Ślonsk nasz cały
Tak by nikerym wylazły gały.

[broneknotgeld]

Wloz żech tu pryndko ze takym konskym
Bo mi sie śniyło euro nad Ślonskym
Piyknie świyciyło na moja glaca
Yno sie rynkom niy dało zmacać.

[broneknotgeld]

West wiater

Niymce lubiom Baleary
Ichni geld tam ciyngym leci
Jakby na tyn Ślonzek stary
Ściongać wszyske jego dzieci
W ziymi ołpy abo fatra
Niych łodpocznom po robocie
Czas poszukać tego wiatra
Co by prziciong nom tu pociech.

[broneknotgeld]

Z KZK GOP

Bytom i Gliwice wrocom do szeregu
Bele by sie Śmiałek wyłonczoł ze biegu
Niych sie lepi zajmie Zwionzkym Gornoślonskim
Bo łon tyż przi niymu stoł sie jakiś wonski.

[broneknotgeld]

Sitkom w Mysłowicach

Szło by w Mysłowicach sitkom chyba kryńcić
Trza by tam do tego już kogoś zachyńcić.

[broneknotgeld]

Co z tom rzeczniczkom we Mysłowicach?
Richtig sie idzie tak niom zochwycać?

[broneknotgeld]

"Zło czaji sie na dole"
Co złego na Ślonsku - zdobywo nagrody
Take to som nasze teroz polske gody.

[broneknotgeld]

"Bombardier" w Katowicach

Pochwoloł sie Wrocek że mo cugi "szwarne"
Dyć zarozki wiymy - glajzy u nos marne
Szkoda go dlo Ślonska - to przegrano sprawa
Na Łódź bydzie jeździć niym pryndko Warszawa.

[broneknotgeld]

DTŚ

Tyn minister Piłat na Ślonsku zagościoł
Sprawa DTŚ-ki podobno nom prościoł
Piyknie dyć sie boja że kajś wele lata
Do umycio rynkow zabraknie Piłata.

[broneknotgeld]

"Edukacjo prziszłościom Katowic"

Konferyncjo. I co dali?
Bydzie teroz coś dobrego?
Możno yno pogodali
I niywiela przidzie z tego.

[broneknotgeld]

Blond BB we Sejmie momy
Prawie już piytnoście lotek
Wszyscy jom tyż tukej znomy
Z niyj jest Ślonska jakby kwiotek.

[broneknotgeld]

No i sie dochrapały te Tarnowske Gory
A jo myśla że zowdy przikład idzie z gory.

[broneknotgeld]

"Orzeł i róża"

"Orzeł i róża" - tako nagroda
Skiż niyj w powiecie teroz niyzgoda?
Niy - problym przeca we ludziach jest
Jak zaczynajom kryńcić za fest.

[broneknotgeld]

Coś nowego w ZG

Zwionzek Gornoślonski zmiynioł se lidera
Możno sie rozruszo przi niymu łon teraz
Dotond mieli w zocy wszysko co propolske
Czas by wreszcie widzieć to co ślonske swojske
Polske i niymiecke na rowno mieć w planie
Niych sie wreszcie Zwionzek richtig ślonskim stanie.

[broneknotgeld]

Gratulacje dlo Stanika
www.wiadomosci24.pl/artykul/slonskie_szpaski_i_limeryki_plebiscyt_na_limeryki_w_gwarze_178467.html
Trza po ślonsku wiela klikać.

[broneknotgeld]

Prezydynta jeszcze majom
Choć niywiela już stowiajom
Że uczimie sie na stołku
Trudno - czasym trza być w dołku
Jak sie prawo lekceważy
Inkszym możno tyż sie zdarzy
Burgymajstrom to nauczka
Że niy zowdy dobro sztuczka.

[broneknotgeld]

Ruch Autonomii Ślonska - całego
Czy sie we Wrocku polom do tego???