Ślonsk

[broneknotgeld]

Ślonsk - region historyczno-geograficzny leżoncy w dorzeczu gorny i środkowy
Odry. Tela nauczyli mie w podstawowce i myśla, że do dzisioj sie to niy
zmiyniyło. Prezca dali muszom tak uczyć.

Takego Ślonska nom czeba
Za to bych łoddoł kyns nieba.

[broneknotgeld]

Szkryflać trza ło Ślonsku wiela
Jedna bydzie możno sztela
Dyć idymy do Europy
Region zocny - mniyj utropy.

[broneknotgeld]

Trza region ślonski mieć teroz w zocy
Bo zaś nom lony ciepnom przed łoczy
Choć tak żech szkryfnoł że tu sie dzieli
To przeca pszaja cołki myj szteli.

[broneknotgeld]

Jo tu pisza w gwarze ślonski
Dyć tyn tymat jest niywonski
Możno ktoś sie tyż łodwoży
Swoje rymy tu położy
Byleby ło Ślonsku było
No i piyknie sie kryńciyło
Trza sie przeca tym pochwolić
Coś popieprzyć coś posolić
Idzie tyż posypać cukrym
Jak kto woli - poloć lukrym
Niych tu ślonske miasta goszczom
Inksi tego pozazdroszczom

[broneknotgeld]

Jo tukej niy szkryflom ło państwa granicach
Wiym że piykno cało ślonsko okolica
Jak ktoś wierszyk wlepi ło tym czeskim Ślonsku
To chyntnie zaklaskom i tyż tymu konsku.

[broneknotgeld]

Moja polityka

Mały problym ze niom mom
Szkryflom fraszki prawie som
Inksi cosik łobiycali
Dyć niywiela łod sia dali

Szczyńściym Rudzie to niy szkodzi
Ślonski rym sie dali rodzi
Z czasym sie rudzianie włonczom
Przeca prawie już niy "bronczom"

Tyż z Zakopca i Grudziondza
Som tu bo jo durś tam "błondza"
Przidom inkszych piyknych dziedzin
Kaj te forum ktosik "śledzi"

Sztela naszo przeca blyszczy
Wiela tyż dlo Ślonska zyszczy
Już to dzieje sie poleku
Ciyrpliwości trza czowieku

Godka pódzie w kraj w Europa
Ze niyj ślonsko jest opoka
Dziynki tymu region rośnie
A jo głosza to radośnie.

[broneknotgeld]

Możno urośnie Ślonsk na JEDNOŚCI
Trza nawet wciongać do tego gości.

[broneknotgeld]

Ważne że leci rym ślonski piyknie
Zowdy w tym cosik - dyć czy to styknie?

[broneknotgeld]

Gornego Ślonska miasta tu bydom
Choć możno inksze tyż sprawy przidom

[broneknotgeld]

Agnieszka

Łod huty cynku szło jeji miano
Bo jom tu piyknie "Agnes" nazwano
Konsek a byliby my w Chorzowie
Dyć jom przigarła gmina Wełnowiec
Kto z wos pamiynto te piykne zdjyńcie?
Co biydaszyby przi "Prezydyncie"
W latach kryzysu pokazywało
Z tego słynyła Agnieszka cało
Dzisioj sie wspomnij ta kolanijo
Jak czasym droga Agnieszki mijosz.

[broneknotgeld]

Kostuchna

W Kostuchnie miyszkali na "Murckach" robiyli
No a potym jeszcze na tych "Bożych Darach"
Coby ze grubami tu sie niy pomylić
"Emanuelssegen" - wspomna nazwo stara

Potym to cuzamyn we "Murcki" zebrali
Miano łod bergmonow kere szli z roboty
Ta gruba w Kostuchnie fedruje nom dali
Jak na niyj durś robisz to nosisz galoty.

[broneknotgeld]

Alfred

Tyj gruby "Alfred" już tu niy momy
Ło "Hohenlohe" zapominomy
A na Alfredzie przeca bergmony
We familokach byli sie pony
To tukej po swyj ciynżki robocie
Mieli ze życio choć trocha pociech
W Polsce Alfreda nom podzielyli
Do Siymianowic konsek dopiyli
Reszta z Wełnowcym we Katowice
W tym eku trzech miost momy granice.

[broneknotgeld]

Amanda

Na mapie Katowic jom ciynżko jest znolyść
I niy mosz dyć richtig tam za czym tyż polyść
Choc było tu kedyś dość gwarno i ludno
Skończyła sie gruba zrobiyło sie nudno
Kolonia i gruba jedne miały miano
Przepiyknie je kedyś Amandom nazwano.

[broneknotgeld]

Bagno

Bergmony z "Elfridy" tu kedyś miyszkali
Naprowdy w marasie sie czynsto toplali
Jak huty "Bernhardi" nastały tu czasy
To Roździyń sie chwoloł tutejszym marasym
A dzisioj te "Bagno" to wynzeł drogowy
Jak z Ronda se jedziesz prosto do Mysłowic.

[Gość: sgytyui]

al zech sie uwaloł

[broneknotgeld]

No i piyknie - tak mo być
Dyć ze śmiychym lżyj jest żyć.

[broneknotgeld]

Bederowiec

Bederowiec to był Domb
Józef Beder to był ksiondz
Biydnie sie tu ludziom żyło
Wiela slamsow we tym było
Kto pamiynto te "Maroko"
Kaj niyjedyn choncwot skokoł
Dzisioj to jest niby szpan
"Tysionclecie" prziszło dran
Stojom tu wielgachne bloki
A niy stare familoki
Zaś po drugi stronie skarb
Tyn nasz ślonski lunapark
Kery dzisioj robi klapa
Bo w niygospodarnych łapach
Coś mi jeszcze świto teraz
Niy ma drogi tu Bedera.

[broneknotgeld]

Bogucice

Już w wieku czinostym - łod lot to godajom
Stoła tukej wioska na prawie niymieckim
Dyć nojstarszy papior z kerego jom znajom
Wionże z wojewodom sie tym sandomierskim

Otton ze Pilicy - take jego miano
We cztyrnostym wieku wieś mu ta nadano
Mikołaja była we tym szczyro wola
- Ksiyńcia Raciborza no i tyż Opola

Potym było tukej Ksiynstwo Pszczyńske sławne
Z kerego Salamon wykroł ordynacjo
No i w końcu prziszły czasy niy tak dawne
Jak po Mieroszewskim Tiele-Winckler nastoł

Bo wszyscy my wiymy że te Bogucice
Były ważnom czyńściom "Państwa Mysłowice"
Przipadła im przeca ciekawo kariera
Rosnyły se razym z majontkym Wincklera.

[broneknotgeld]

Kuźnica bogucko

Staro kuźnica przi rzyce Rawie
Stoła tu ponoć w piytnostym wieku
To sie niy mieści we gowie prawie
Ajza dyrś loli - mody człowieku.

[broneknotgeld]

"Ferdynand"

Jako by żyły bogucke strony
Bez "Ferdynanda" kerego znomy
Ta gruba dowo durś przeca życie
Dzisioj jyj miano to "Katowice".

[broneknotgeld]

"Fanny"

"Fanny" to miano jest huty cynku
Kaj ciongło wiela boguckich synkow
Dzisioj już werku tego niy szukej
"Czas cynku" skończoł sie przeca tukej.

[broneknotgeld]

Kościoł bogucki

Matko Bosko Bogucko łaskami tu słynie
Werci sie z pielgrzimkom być i w tyj dziedzinie.

[broneknotgeld]

Bibliotyka

We bibliotyce we Bogucicach
Tyż notgeldami szło sie zachwycać
I chocioż downo to już jest sprawa
Ważne że była tam ta wystawa.

[broneknotgeld]

Borki

Przicupły prawie nad tom Brynicom
W Sosnowiec ciepnoł byś stond kłonicom
Mie gruba "Polska" zaciekawiyła
Co w miyndzywojniu tukej stanyła
Dyć dwóch knajpiorzy jom miało przeca
Co z niyjednego jedli chlyb pieca.

[broneknotgeld]

Boże Dary

Tu gruba "Boer" Hohberg założoł
Do tego kolonio doszła
Za staryj Polski wongel tyn wożoł
Pszczyna stond jeszcze niy poszła

Przed drugom wojnom zmiynili miano
Kawałka tyj ślonski ziymi
Już "Boże Dary" wszysko to zwano
Teroz cieszymy sie nimi.

[broneknotgeld]

Boże Dary

Kedyś we pszczyński gminie Podlesie
Potym w Kostuchna wlepiyli
No a za Gierka - wieść ślonsko niesie
Do tych Katowic je wpiyli.

[broneknotgeld]

Brynów

W historio sie wpisoł we tyn wiek piytnosty
Choć nikt tu niy miyszkoł aż po siedymnosty
Ponoć we włodaniu kedyś był Cieszyna
A za Salamonow przigarła go Pszczyna
Ponow tukej było chyba aż za wiela
W dziewiytnostym wieku we rynkach Wincklera
Pod koniec go jednak Hohenlohe capnoł
No i już za Polski w Katowicach klapnoł.

[broneknotgeld]

W Brynowie

W Brynowie Polokow zawsze było tela
Że nawet z Katowic "wyciepli" ta sztela
Jak zrobiyli ze nich miasto cołkym nowe
Brynow gminom zostoł - co tyż było zdrowe
Potym fest rozkwitło polske życie tukej
A korzyni tego "U Rzychonia" szukej.

[broneknotgeld]

"Oheim" - "Wujek"

Ksionże Hohenlohe gruba ta postawioł
Wielgachno bo łon sie drobnicom niy bawioł
We tych Katowicach do dzisioj fedruje
Bo przeca ze "Wujka" durś sie wongel suje.

[broneknotgeld]

Burowiec

Wedle Dombrowki tyj Mały
Chałpy Burowca se stały
Ziymia se leko łorali
Aże Wincklerow poznali
Ze hut sie tu zakopciyło
Gruba tyż rosła aż miło
Swoje dociepli łod Gischa
Kajsik strociyła sie cisza
Wongel i ajza - ołow i cynk
Bamber ze tego tukej by pynk.

[broneknotgeld]

Domb

Łod średniowieczo już Domb był tukej
U bożogrobcow dowodow szukej
Przeszli jak burza przez Domb Tatary
Zniszczyli nawet tyn Chorzow stary

Dyć miechowitow wioski to były
Lazarytowi ciyngiym służyły
Tymu z Bytomia - Świyntego Ducha
Kaj wiela chorych znodło otucha.

[broneknotgeld]

We Dymbie

Farorz ze Chorzowa srebra tukej szukoł
Pieronym uparcie pod ziymia durś kukoł
Domb kolybkom bergmonow skiż tego sie stoł
Dyć różnistych metali rudy przeca mioł.

[broneknotgeld]

Dymbowe szachty

Ta "Ksiynżno Jadwiga" i "Jadwiga Nowo"
Gruby parafialne - tyż farorz je stowioł
Łone już fedrunkym wonglo sie trudniyły
A te jejich szachty jeszcze płytke były.

[broneknotgeld]

Pudlingarnia

Baildona pudlingarnia tukej
Teroz jom w hucie "Baildon" szukej
Chocioż zmiyniała właścicieli
Miano łostało bo tak chcieli.

[broneknotgeld]

"Waterloo"

"Waterloo" - gruba tako tu była
Dusza Baildona we niyj sie skryła
Czimoł na społa łon jom z klasztorym
Tym co pomogoł Ślonzokom chorym

Potym wyrosła z niyj "Eminyncjo"
Bo w wonglu przeca była potyncjo
Za tyj komuny "Gottwald" jom zwali
Dyć czorne złoto sypało dali

Złonczyli jom tyż ze "Kleofasym"
A jak czerwone przestało straszyć
I nikt niy kłonioł sie tymu po pas
Zrobiyli "Katowice - Kleofas"

Dyć nojważniejsze jest to że w Dombie
Tyn duch Baildona durś w ścianie rombie.

[broneknotgeld]

Dombrowa

Niydowno łona we Katowicach
Durś swojym lasym może zachwycać
Wiedzie do niego ta droba "Saska"
Mor tukej dopod wojsko - do diaska
Byli na służbie Augusta Sasa
Tukej skończyli w Dombrowy lasach.

[broneknotgeld]

Dombrowka Mało

Niy wiym czy idzie godać ze mało
Jak z samyj nazwy by wynikało
Gmina tu przeca dość ludno była
Co koloniami sie łobłożyła
Norma i Pnioki Czekaj Burowiec
Ze niyj wyrosły te sztele nowe
A jak dołożyć gruby i werki
Powiym że konsek Ślonska był wielki.

[broneknotgeld]

Łod Gischego

Spadkobiercy Gischego tu wiela zrobiyli
Bo łoni we huty geld swoj durś topiyli
Tyn ich "Gisches Erben" tu cynk srebro ołów
Wybiyroł garściami ze Dombrowki stołu.

[broneknotgeld]

"Jerzy"
Ta gruba w Dombrowce trza tyż tu wspominać
Bo sie niom asiyła przeca cało gmina
Choć życie bergmona niy było wesołe
Robota we "Jerzym" dowoł Hohenlohe
Za tyj staryj Polski zaczły sie problymy
Pryndko jom zamknyli ło tym tukej wiymy.

[broneknotgeld]

Dobro Myśl

Terozki tu stojom yno same bloki
A kedyś miyszkali z Wełnowca boroki
Roboty dyć łoni w kryzysie niy mieli
Bez to we barakach siedzieć tu musieli
Ło te dobre myśli niy było za leko
No i do roboty durś mieli daleko.

[broneknotgeld]

Fryderyka

Kolanijo Fryderyka kedyś tukej była
Dyć w Wełnowiec sie dość downo cołkym nom wtopiyła
Hohenlohe jom założoł dlo tych z werkow jego
Miano swoje tyż dołożoł no i tela z tego.

[broneknotgeld]

Giszowiec

Ta modo osada Gischewaldym zwano
Łod tych z "Gisches Erben" wziyła swoje miano
Las piyrwyj należoł do Thiele-Wincklera
Osiedle powstało piykne jak cholera

Dzisioj by pedzieli że było wzorcowe
Chałpy przeca tukej tyż cołkym stylowe
Bergmon po robocie w łogrodku sie siedzioł
Za co tak harowoł - ło tym dobrze wiedzioł

Leciało to dalyj za tyj stary Polski
Dyć po drugi wojnie nastoł już czas "swojski"
Łoboczyli my to w "paciorkach rożańca"
Jak komuna wziyła starzykow do tańca

"Łobalić trza stare - postawić se nowe"
Bez to momy tu tyż osiedle klockowe
Stare ze tym nowym dziwnie pomiyszali
Ciekawe co piyrwyj bydzie sie zaś walić.

[broneknotgeld]

Huta Arnold

Huta cynku "Arnold" i jyj kolanijo
Janowa to była kedyś familijo
W Katowicach dzisioj lecom im godziny
Arnolda poszukej wele tyj Boliny.

[broneknotgeld]

Janow

Ta janowsko ziymia kedyś w Mysłowicach
Mieroszewskich cało była okolica
No a polske ponki hulali za wiela
Majontek sprzedali we rynce Wincklera
Jak tu była gmina to ci łod Gischego
Fedrowali wongel richtig na całego

We Polsce w Janowie wiela sie zmiyniyło
Koncek w Mysłowice cołkym sie wtopiyło
Reszta zaś dotrwała do Polski Lydowyj
Dyć pryndko jom wciepli do Szopiynic nowych
A jak w siyła rosły potym Katowice
Połknyły tyn Janow z miastym Szopiynice.

[broneknotgeld]

"Gische"

Kopalń janowskich było bez liku
Zrobiyli z nich jedna - "Gische"
Wiela pokolyń naszych gornikow
W ziymia łod lot tu sie pisze

I chocioż teroz inksze jyj miano
We gymbie "Wieczorek" momy
Fedruje bergmon tukej co rano
Durś wongel stond dobywomy.

[broneknotgeld]

We Janowie

We Janowie malować lubiyli
Z tego downiyj już tu zasłynyli
Piyrszy ze nich Ociepka Teofil
Jo bych pedzioł że łon był "carbofil".

[broneknotgeld]

Jozefowiec

Miano łostało po tym Bederze
Zeflik mu przeca godali
Droga Bedera - naszkryflom szczerze
Tyż Jozefowskom nazwali

Bo jak komuna prziszła po wojnie
A ze niom zaś inkszo nyndza
Farorz we grobie społ niyspokojnie
Niy chcieli patrona ksiyndza

Dyć zamazane to jakoś dzisioj
Jakby historio ktoś sprościoł
Ło tym ksiynżoszku wiyncyj by słyszoł
Kto w Katowicach by gościoł.

[broneknotgeld]

Jozefowiec

Skiż Hohenlohego - pana na Bytkowie
Pryndko sie rozwinoł tyn nasz Jozefowiec
Ci ze werkow jego musieli kajś miyszkać
Po blisku - by piechty zadreptać na szychta
Były jednak tukej tyż przeca i szkoły
Chor i rożne zwionzki co Polsce durś pszoły
Już we polskich czasach pryndko Jozefowiec
Włonczyli na amyn we gmina Wełnowiec
Jak po drugi wojnie rosły Katowice
To sie upomniały ło te okolice
Miano nom łostało - tako zwom osiedle
Droga Jozefowsko co leci tyż wedle
Yno zaginyło nazwisko Bedera
Choć myśla ło ksiyndzu - biere mie cholera.

[broneknotgeld]

Karbowa

Dzisioj to historio - miano zaginyło
Ze Katowicami w jedno sie stopiyło
Była to osada Bogucki Kuźnicy
Folwark piykny leżoł na samy granicy
Huty i cegelnie powstały tyż tukej
Dzisioj jednak lepiyj ich wcale niy szukej
Jak zajrzysz to widzisz teroz blokowisko
Kaj? -"Na Paderewskim" - powiy kto tu miyszko.

[broneknotgeld]

Katowicko Hołda

Kto dzisioj tyj nazwy używo?
Chyba jakiś trocha dziwok
Wyleciała już ze mapy
Choć tam czynsto niesom szłapy
Jak w Kościuszki żeś jest parku
To na Hołdy tyj kawałku
Rondym Mikołowskym karniesz
Zaś ta Hołda cie przigarnie
Nawet konsek autobany
Tukej jest wyrychtowany
No i "Wujek" durś fedruje
Przeca Brynow prawie tu jest.

[broneknotgeld]

Klizmowiec

W Katowicach z Klizmowca nic niy ma
Szłoby tukej łopuścić tyn tymat
Dyć przez pamiyńć zocnego młynorza
Jednak szkryflać sie ło tym łodwoża

Domki kedyś te fińske tu stoły
Teroz w niebo sie dropiom "pachoły"
Beton jakoś niy cieszy mie wiela
Wolołch staro spokojno ta sztela

Tysionclecie tu dzisioj jest Gorne
Chocioż życie wydaje sie chmurne
Jada bankom i blikom ze glajzow
Widza yno tyn kopiec amajzow.

[broneknotgeld]

Kokociniec

Konsek Katowic przi samy Rudzie
Możno Kłodnicom spłynońć tam pódzie
Jest tu osiedle bergmonow "Ślonska"
To tyż ze Rudom nitka niywonska

Piyrwyj tu były jednak dziedziny
Łod tych Hochbergow ksionżont ze Pszczyny
Huta i gruba tu postawiyli
Wonglym już przeca ajza topiyli.

[broneknotgeld]

Kolonio Wysockiego

Na trasie z Giszowca do tego Nikisza
Po drodze kolonio se leży
Terozki niywiela jo ło niyj już słysza
Wysocki jyj patron - uwierzysz?

Dyć był to se karlus co Flawian mioł miano
Łon kedyś harowoł na "Gischu"
Komunie pszoł mocno i bestoż tak zwano
Osada przi sławnym Nikiszu.

[broneknotgeld]

Kopaniny

Prawe i lewe te Kopaniny
Kedyś Hochbergow piykne dziedziny
Dzisioj przigarły je Katowice
Przi Mikołowie te okolice.

[broneknotgeld]

Kostuchna

Staro osada to jest Piotrowic
Kero sie tak rozwinyła
Że nim włonczyli jom do Katowic
Miastym być tyż już zdonżyła.

[broneknotgeld]

Koszutka

Kolanijom Bogucic swego czasu była
Ponoć łod młynorza miano swoje wziyła
Jak te gruby i werki zaczli tukej stowiać
To i chałpow trza wiyncyj było wybudować
Z czasym familoki klocki zastompiyły
We mojyj pamiyńci yno łone były.

[broneknotgeld]

Kuźnica Bogucko

Kuźnica Bogucko tukej piyrwyj była
Łona nad Roździankom sie nom rozwinyła
Dyć ło niyj Walynty Roździeński napisoł
Że Jurga Kleparski kuźnikym tu prziszoł

Bez lata jom zwali durś łod tyj kuźnice
Choć rosła tyż tukej ta wieś Katowice
Po myśli inkszego kuźnika - Andrzeja
By z czasym zastompić jom we dalszych dziejach.

[broneknotgeld]

Huta "Marta"

Dzisioj jom niy ma choć dugo była
Prawie przi rynku miasta nowego
Tam kaj ta sławno kuźnica żyła
Wspomnij kuźnika tu boguckego.

[broneknotgeld]

Ligota

Łod Staryj Ligoty wszysko sie zaczyło
Choć we downych czasach ciynżko tukej było
Rzondziyła tu przeca czynsto tyż zaraza
Po polach sie huloł wiater we tych razach

Jak sam zaś nastały czasy huty "Idy"
Poleku Ligota wylazła ze biydy
Doszła jeszcze gruba kerom "Szadok" zwali
Wongel do tyj huty we niyj dobywali

Dobrze tyż sie stało że cug tu puściyli
Bo małe letnisko z Ligoty zrobiyli
Przi banhofie rosła osada łod nowa
Ta staro przi nowyj zaczyła sie chować

Wszysko to sie dzioło tu za Niymca jeszcze
We powiecie pszczyńskim była wtedy - wierzcie
A już za tyj Polski cołko okolica
Czwortom tajlom była we tych Katowicach

Dyć do dzisioj to jest Katowic dziedzina
Chocioż tak niydowno włodała niom Pszczyna
Jak tam kedyś zajrzysz wspomnij moje słowa
I tyskego piwa chlapnij se dlo zdrowia.

[broneknotgeld]

Muchowiec

Mucha tu miyszkoł chop małorolny
Niy mioł za wiela dyć czuł sie wolny
Lotoł sie czynsto nad łonkom nisko
Bestoż zrobiyli potym lotnisko.

[broneknotgeld]

Murcki

Ponoć tukej właśnie łod lot pany Pszczyny
Dobywali wongel z tyj swojyj dziedziny
Łodrywali chopa ze uprawy roli
Kopać musioł w ziymi wedle jejich woli

Chodzioł umurckany potym do zagrody
Bo mu na tyj grubie żałowali wody
"Emanuelssegen" kopalnia ta zwano
Łod murckow osada pryndko wziyła miano.

[broneknotgeld]

"Emanuelssegen"

To jest richtig staro naszo ślonsko gruba
Chop tukej fedrowoł ściongniynty łod pługa
Tu już sztrajkowali w łoziymnostym wieku
Bo sztajger bergmonom ubliżoł - czowieku

W dziewiytnostym wieku ta gruba durś rosła
I wtedy tyż tukej ajzynbana doszła
Wonglo coroz wiyncy trza było fedrować
Bo Hochberg we Wrocku zaczoł go przedować

Za tyj staryj Polski zaś tu sztrajki były
Kryzysym sie przeca gruby niy karmiyły
Ciyrpieli bergmony wtedy wielgo biyda
Niy było tu leko - godać ło tym byda

Już po drugiyj wojnie "Murckami" jom zwano
Jak piyrwyj osada - łod niyj teroz miano
Ważne że durś tukej wongel nom fedrujom
We Polska łon idzie - niych dalyj go sujom.

[broneknotgeld]

Co to jest?

Dzielnica i gruba jedne majom miano
Skiż wonglo tak piyknie je przeca nazwano
Kedyś było tukej "Wolne Państwo Pszczyna"
Dzisioj to Katowic ciekawo dziedzina.

[broneknotgeld]

Nikiszowiec

Dyć niy było by "Nikisza"
Jakby tu zabrakło "Gischa"
Ze tyj gruby szachty miano
Do osiedlo przipisano

[broneknotgeld]

Nikiszowiec

Dyć niy było by "Nikisza"
Jakby tu zabrakło "Gischa"
Ze tyj gruby szachty miano
Do osiedlo przipisano

Zillmann to zaprojektowoł
Swojo dusza w cegły dowoł
Wyszło piykne mini-miasto
Juz docynić prziszoł czas to

Bo perełka naszo ślonsko
Tyż historio mo niywonsko
To jest jakby jedyn świat
W Ślonsku ślonski richtig brat.

[broneknotgeld]

"Perła"

Ta "Perła w koronie" widziołch pora razy
Tam ze Nikiszowca som piykne łobrazy
Dziynki Kutza sztuce Polska to widziała
Dyć jednak pewnikym pryndko zapomniała
Trza to jakoś zmiynić - Nikisz nom promować
Nowe klocki przi tym powinny sie schować
Chyba niy przipadkym ta "janowsko grupa"
Właśnie tu sie jakoś zebrała we kupa
Pyndzle se chyciyli - malowali piyknie
Było tego tela że dzisioj nom styknie.

[broneknotgeld]

Norma

Piyrwyj tukej huta cynku nosiyła to miano
I szyb gruby "Ferdynanda" tako tyż nazwano
Katowicko kolanijo we Dombrowie Małyj
To ślad kery nom pozostoł po imprezie całyj.

[broneknotgeld]

Nowy Czekaj

W młynie na Brynicy Czekaj mieloł zboże
Dzisioj sie to w gowie pomieścić niy może
Dyć łod niego nazwa osady sie wziyła
Gmina Huta Laura dugo tukej była
Potym to przeciepli w miasto Szopiynice
No a teroz widzisz - som te Katowice.

[broneknotgeld]

Obroki

Obroki w Załynżu przi Chorzowie leżom
Rosły nom skiż gruby - w to tyż świyńcie wierzom
Wszysko sie kryńciyło wele "Kleofasa"
Nic sie niy zmiyniyło - jest tak we tych czasach.

[broneknotgeld]

Ochojec

Nad rzekom Ślepotkom ta wioska leżała
Z czasym sie rozrosła trocha wybujała
No a na łostatku lazaryt tu powstoł
Kaj niyjedyn bergmon koncek zdrowio dostoł.

[broneknotgeld]

Osiedle Belojannisa

Był pieroński pożar na tym "Kleofasie"
Bergmonow uczciyli już we Polski czasie
Kery na osiedlu se tukej zamiyszkoł
Nazwiskym boroka nom czasym zablyskoł
Bo do dzisioj drożki ze osiedlo tego
Noszom miano ofiar - wiela w tym dobrego.

[broneknotgeld]

Osiedle Modych

Na Osiedlu Modych
Szukej swyj przigody
Przijedź do Zadola
Jak mosz tako wola
Schowej sie w malinach
Tam zrzyndnie ci mina
Jak szukosz dobroci
To skryj sie w paproci
Podzimki borowki
Wlezom ci do gowki
Mynczy cie rodzina
Łostow jom w jeżynach.

[broneknotgeld]

Osiedle Paderewskiego

Paderewski możno mynczy sie we grobie
Jak na wielgo płyta tukej gafto sobie
Pryndko by zaś zamknoł jakoś forteklapa
No i przi okazji komuś prziczas łapa.

[broneknotgeld]

Osiedle Roździeńskiego

Nastowiali tukej trocha tych wieżowcow
I dali im miano Katowic "gwiazdowcow"
Dobrze że to niy som cołkym te "gwiazdory"
Jak żech wloz tam na wiyrch toch był ździybko chory.

[broneknotgeld]

Osiedle Francka Rybki

Do Sosnowca stond jest blisko
Bestoż Rybka tukej blysko
Jest w tym jednak wiela racji
Zginoł łon za okupacji

Za komuna dołbych krycha
Krziżyk zrobia z tego grzycha
To mu prziznom za Oświyńcim
Rybka mo być we pamiyńci.

[broneknotgeld]

Osiedle Staszica

Wdepły te klocki nom do Giszowca
Chciałyby dalyj dyć już niy potrza.

[broneknotgeld]

Osiedle Tysionclecia

Tysionclecie poleku rośnie nom tu dali
Nawt kościoł do tego piykny zbudowali
Doszły tukej tyż nowe jakeś "kukurydze"
Mozno kedyś ze tego dobry "popcorn" bydzie.

[broneknotgeld]

Panewniki

Nojpiyrw był tukej jedyn Panewnik
Starym go zowiom do dzisioj
Panwie robiyli tu w dziyń powszedni
Downo to było - joch słyszoł

W cztyrnostym wieku był wele Kłodki
Teroz żech tyż to łoboczoł
Czimie sie jeszcze małyj Ślepotki
I nigdy jom niy przekroczoł

Domb tukej rosnoł wele zajazdu
Co blikoł na Jana wojsko
Pod Wiedyń ciongnoł łon wielkom jazdom
Armia z łodsieczom szła polsko

Dyć niydaleko łod Panewnika
Klasztor zaczyli budować
Wyrosła piykno tyż bazylika
Stary sie zaczoł dziwować

Bo pryndko inksze chałpy tu doszły
Urzyndy knajpy i szkoły
W Nowym już łone piyknie wyrosły
Tyn kont był teroz wesoły

Panewnik zmiynioł sie w Panewniki
I w Polsce już tak go zwano
Czy dzisioj wiedzom to małe smyki
Że jest łod panwi to miano?

[broneknotgeld]

We Piotrowicach

We Piotrowicach "tyske" sie loło
Jak yno je zaczli warzyć
Do "ksionżyncego" łoko sie śmioło
Szło sie tyż przi nim rozmarzyć

Dyć tukej była ta "pszczyńsko ziymia"
A na niyj był browar tyski
Chocioż tych starych czasow już niy ma
Tonknońć trza w kuflu zaś pyski.

[broneknotgeld]

Piotrowice

Wioska Uniszowy i jyj okolice
Podzielyli kedyś - wyszły Piotrowice
Tukej za rektora Karol Miarka robioł
Nim sie w Mikołowie drukarni dorobioł

Kedyś piykno gmina była ze Piotrowic
Yno że traciyła wiela do Katowic
Już za staryj Polski czyńść ziym jyj łodepli
I w somsiednie miasto pryńdziutko se wepli

Dyć jeszcze przed wojnom straciyła je Pszczyna
Stała sie ze tego Katowic dziedzina
Dzisioj byś niy pedzioł że z inkszego ciasta
Bo wprzongły sie mocno już do tego miasta.

[broneknotgeld]

Pnioki

Coingnyły te Pnioki w strona Siymianowic
Choć należom teroz do miasta Katowic
Kolonio to była tyj Dombrowki Mały
Z niom we Szopiynice potym sie dostały
Jak dalyj leciało to już dobrze wiycie
Terozki to wszysko przeca Katowice.

[broneknotgeld]

Podlesie

We pszczyńskim Podlesiu po czeskich husytach
Niy ujrzoł żeś chopa ani tyż kobiyta
Dyć poleku wioska sie zaś zaludniyła
Podlesie urosło - ziymia sie blyszczyła

A tutejszy sołtys pod Wiedniym bioł Turkow
Z pszczyńskimi chopami nasiekoł z nich wiorkow
Kedyś tu kwatery miały wojska Sasa
Chop przi nich zaciskoł richtig swego pasa

Nastoł w koncu tukej tyn wiek dziewiytnosty
Łon tyż dlo Podlesia wcale niy był prosty
Choć durś przeca rosła cołko okolica
Ze klucza wyrskego hrabiego Promnica

Kmiycie już pańszczyzny płacić tu niy chcieli
W końcu i na swojim gospodarzyć mieli
Bo w połowie wieku uwłaszczynie prziszło
Kere niy kożdymu fest na dobre wyszło

Z powietrzym morowym tu sie tyż mynczyli
Chocioż coroz gyńści we tyj gminie żyli
Nowy wiek im przinios same "Boże Dary"
No i tyż sie wynios porzondek tyn stary

Jakoś sie kulało w tyj Polsce do przodu
I durś przibywało we gminie narodu
Za Gierka Kostuchna jednak tu rzońdziyła
Krotko - bo poznała tych Katowic siyła.

[broneknotgeld]

Pod Młynym

Młynorza Kaśka młyn tukej miała
Tyż tu sie kończy Dombrowka Mała
Mielyła zboże po naszyj stronie
Bo przeciyż Ślonska tukej był koniec.

[broneknotgeld]

Downy Roździyń

Łon już nom wyrosł w cztyrnostym wieku
Ponow mioł wiela - niy licz człowieku
Tukej tyż staro kuźnica była
Kero nad Rawom sie rozłożyła

Wtedy jom zresztom Roździankom zwali
Sławny Roździeński tukej był dali
Co pisoł wierszym ło swyj robocie
Z keryj durś wiela mioł przeca pociech

Do wieku pary kuźnica doszła
Z czasym historiom swojom łobrosła
I choć jom potym wcale niy było
Ło jyj kuźnikach durś coś sie śniyło.

[broneknotgeld]

Roździyń

Łod Mieroszewskich Winckler go chycioł
I wiela konskow pod przemysł wycioł
Ta huta "Dietrich" i "Wilhelmina"
"Bernhardi" - wszysko sie przipomina

Ci z "Gisches Erben" tyż sie dociepli
Rosł Roździyń pryndko a łoni krzepli
Lazaryt był tu szkola wiyńziynie
Kościoł i browar na pokuszynie

"Konsum" na Ślonsku piyrszy był tukej
Nawet drukarni w Roździyniu szukej
Tych rzemieślnikow bez liku było
Wszysko dość pryndko sie tu kryńciyło

Dyć był wrośniynty we Szopiynice
Niy było miyndzy nimi granice
Za staryj Polski tyż tak łostało
A i po wojnie dalyj kulało

Zrobiyli z niego przeca dzielnica
Co ciyngiym tkwiyła we Szopiynicach
Choć to za dugo jednak niy trwało
Jest w Katowicach terozki całość.

[broneknotgeld]

Sośnina

Była nad Rawom Sośnina
Terozki jednak jyj niy ma
Ta kolanijo ze Dymba
Wyglondo choby we zymbach
Gyjbis tu Piastow sie leży

[broneknotgeld]

Stawiska

Miano łod stawow wele Boliny
Konsek janowski to jest dziedziny
Łon sie rozwinoł skiż "Uthemanna"
Szopiynic huta tak była zwana
Dzisioj sie kończom tu Katowice
Pryndko przekrokniesz we Mysłowice.

[broneknotgeld]

Szabelnia

Kuźnica Turzonów kedyś tukej była
Kero sie w szabelnia pryndko zamiyniyła
Szabla szopiynicko niy słynyła może
Pamiyńć nom łostała i za to - szczyńść Boże.

[broneknotgeld]

Kedyś w Szopiynicach

Husyty do Szopiynic prziszli ze Zagorza
Ciynżko dlo tyj wioski była ta ich burza
Dyć poleku jednak zaś sie zaludniyła
A przed wiekym pary Mieroszewskich była
Wszysko sie zmiyniyło łod tyj "Wilhelminy"
Cynk we niyj topiyli ze ślonski dziedziny
A do tego doszło pryndko grubow pora
No i cug - przemysłu ślonskego podpora.

[broneknotgeld]

Szopiynice

Roździyń-Szopiynice tako gmina była
Zanim sie tu Polska naprowdy zaczyła
Dyć jeszcze za Niymca sie nom rozłonczyły
Niydugo - a jednak już osobno były

Jak zaś tukej Polska głośno zaklupała
Szopiynicom gminno miejskość sie dostała
Miastym cołkom gymbom by wtedy se były
Yno prziszła wojna i już niy zdonżyły

Stało sie to jednak w piyńdziesiontym roku
Nawet powiat miejski wykroli na boku
Bo tyn Janow Ślonski i Dombrowka Mało
Do powiatu wlazły - tako była całość

Problym jednak we tym że te Katowice
W końcu połaszczyły sie na Szopiynice
I choć jest tyż ze nich osobno dzielnica
To jakoś niy wszyscy chcom sie tym zachwycać.

[broneknotgeld]

Wełnowiec

Bogucice z Bytkowym pasły tukej owce
I możno skiż tego nazwali Wełnowcym
Tako myśl terozki chodzi mi po gowie
Powiym że bajdurza ale we połowie
Tyżłod Wełny było podobno to miano
Yno że młynorza tako tukej zwano.

[broneknotgeld]

Hohenlohe w Wełnowcu

Nic sie tu niy dzioło bez Hohenlohego
Bo była to przeca dziedzina łod niego
Łon założoł kedyś piyrsze gruby tukej
W Wełnowcu tyż jeszcze huty jego szukej
W sawnyj "Hohenlohe" juz koksym polyli
We piecach kaj ruda na ajza topiyli
Dołoż tyż do tego jeszcze huta cynku
Wiela łon roboty mioł dlo ślonskich synkow
W końcu tu zbudowoł gmaszysko te wielke
Kaj dyrekcjo była "Hohenlohe Werke".

[broneknotgeld]

"Hohenlohe"

Jedna gruba i dwie huty
W nie Wełnowiec był łobuty
Wszyske miały take miano
Na cześć ksiyńcia je nadano.

[broneknotgeld]

Wełnowiec

Za Niymca i za Polski staryj
Była tu samodzielno gmina
Losu niy bierom już na bary
Dzisioj Katowic to dziedzina.

[broneknotgeld]

Wilhelmina

Na Wilhelminie już niy te czasy
Kere tu kedyś bywały
W łoczy sie ciepiom yno te sztrasy
A piyrwyj świat tu był mały

Kery sie kryńcioł wele tyj huty
Łod "Spadkobiercow Gischego"
Ze "Wilhelminy" suchali nuty
Żyli do rytmu takego.

[broneknotgeld]

Wymysłow

Piyrwyj jak keryś jechoł z Wrocławia
Tym traktym na Mysłowice
To za Ślepotkom mioł już zabawa
Bo bliske to okolice.

[broneknotgeld]

Zadole

Na Zadolu nad Ślepotkom miyszko sie spokojnie
Możesz nawet tu sie dychnońć jak mosz życie znojne
Trocha jest za dużo blokow ale szczimać idzie
Te Zadole do sie lubić i niych już tak bydzie.

[broneknotgeld]

Załynsko Hołda

Dwie Hołdy były - jedna przi drugi
I tyj Załynski żywot jest dugi
Bergmon z hutnikym tykej miyszkali
Stond do roboty niy mieli dalyj
Bo gruby huty i inksze werki
Wszyske tu rosły - wysyp był wielki.

[broneknotgeld]

Osiedle Witosa

Na Hołdzie Załynski wyrosło osiedle
Jak jedziesz A - 4 to łone jest wedle.

[broneknotgeld]

"Bugla"

Bugla - tak sie chop tyn zwoł
Co gront czimoł bo durś sioł
Ziymia łorać zboże sioć
Niy ma co sie z tego śmioć

Dyć choć mocno tym sie smucioł
Kijym rzeki niy zawrocioł
Jakbyś był tu cołkym blisko
Wlyź na "Bugla" - kompielisko.

[broneknotgeld]

Załynże

Załynże to richtig jest staro już wiocha
Tych kuźnic tu było łod diobła i trocha
Panow tyż zmiyniało choby rynkawiczki
Ważne że istniało nom przeca tu wdycki.

[Gość: Pytek]

Niy casym Zouynrzy?

[broneknotgeld]

Kramsta w Załynżu

We Wrocku handlowoł
W Załynżu fedrowoł

"Charlotte" i "Victor" te dwie kopalynki
"Oheim" potym capnoł - poszło to łod rynki

Dyć Kramście sie jeszcze huta zamarzyła
Nazwoł jom tyż "Victor" - cynk tukej topiyła.

[broneknotgeld]

"Kleofas"

Załynski "Kleofas" Godula rychtowoł
Nojpiyrw ze wspolnikym potym som jom stowioł
Ta Joanna Gryzik gruba dziedziczyła
W końcu tych łod Gischa durś wonglym karmiyła.

[broneknotgeld]

Zaopusta

Ze Podlesio Zaopusta
Jakoś mynczy moje gusta
Skond ta nazwa? -Jo niy powiym
Możno jednak tyż sie dowiym.

[broneknotgeld]

Zarzecki wodnik

Miyndzy Bagnikym a Kaskadnikym
Kożdy sie może poczuć wodnikym
Pełno tu rybow kajbyś niy blikoł
Joch sie tu kedyś łusek nałykoł
Czyje te łuski do dzisioj niy wiym
Jednak z tutejszyj słodki to ryby.

[broneknotgeld]

Zarzecze

Ze Uniczowow wyszło Zarzecze
Było we pszczyńskim kedyś powiecie
Gminno kariera jednak skończyło
Jak ze Podlesiym sie połonczyło
Potym Kostuchna Zarzecze chciała
Z nim w Katowice sie tyż dostała.

[broneknotgeld]

Zawodzie

Dlo Bogucic to było za wodom
Za tom Rawom jo jeszcze tyż dodom
Nastowiali tu werkow aż tela
Że wyliczyć sie ich niy łośmiela

Choć cieszyło sie gminy prawami
Jednak zepli je z Bogucicami

Piykny ratusz tyż miała ta gmina
We Zawodziu go niy trza wspominać
Ekonomia w nim teroz kroluje
No i ważne że nom sie niy suje

Blisko jest stond do cyntrum Katowic
W tyj dzielnicy ci kożdy to powiy.

[broneknotgeld]

Porcelana

Porcelana "Gische" to jest dobro marka
Tako mi pedziała kedyś jedna starka
Łona niy wiedziała że to "Bogucice"
Dyć miejsce podała - teroz Katowice.

[broneknotgeld]

Zuzanna

Gruba "Susanne" tu była
Kolonio Zuzia łod niyj sie wziyła
Kaj to jest dzisioj? Mało kto powie
MIejsca poszukej we tym Janowie.

[broneknotgeld]

Kościoł pw. Niypokalanego Poczyńcia Nojświyntszy Maryji Panny

Kościoł mariacki we Katowicach
Neogotykym moze zochwycać
Wiluś korony cysorza niy mioł
A łon już w kupie sie tukej czimoł

Przi placu ksiyndza świontynia stoji
Bestoż ło los swoj nic sie niy boji
Dyć tyn ksiondz Szramek był tu farorzym
W obozie w Dachau dni swojich dożył

Tukej zaś momy po niym witraże
No i tabula - już sie niy zmaże
Pamiyńć ło niymu na naszym Ślonsku
Cołkym - niy yno malutkim konsku.

[broneknotgeld]

Staro maglownia

Maglownia w Giszowcu do dzisioj magluje
Choć mo sto lot z hokym wcale sie niy suje
W Dreźnie jom zrobiyli - jeszcze za cysorza
Kerego? - Niy cołkym terozki ci wskoża
To przeca we Niymcach był rok czech cysorzy
Dziynki tyj historii wiyncyj magel woży.

Bronek mo zaś być na forum!

[owczarek_niemiecki]

Bronek!
Ruda je za tobą, chopie!
Pyrsk!

[fiodorus]

Bronku!!!
Nie rezygnuj :-)

RUDA kRZICZI: kAJ BRONEK?

[owczarek_niemiecki]

[broneknotgeld]

We Rudzie zowdy żech przeca jest
I swoje szkryflom se richtig fest.

[broneknotgeld]

Katowicke gadżety

We Katowicach spor ło biyrdekle
Czuć we tym jakby stare fuzekle.

[broneknotgeld]

Pomnik Jorga

Postawim mu pomnik wele tego Spodka
By durs pamiyntała go ślonsko czelodka
Przeca z niego karlus co tyż "robioł swoje"
A to niy ma leko - take zdanie moje.

[broneknotgeld]

Na Placu Sejmu Ślonskego

Na Placu Sejmu Ślonskego
Sztynks jakiś czuja. Duch Dzierżyńskiego?

[broneknotgeld]

Co ze biurami po "Centrozapie"?
Podobnoś dużo stoniały
Uszok przi tymu sie niy "zasapie"?
Łodpowiy zaś ktosik "mały"

Szef "na urlopie" jak źle sie dzieje
To przipomino mi cosik
Toż samo życie tako se śmieje
Prowda na stoł ciepie grosik.

[broneknotgeld]

ŁODPUST
We Wawrzyńcu łodpust kedyś bywoł wielki
Ciongnyły tam bajtle karlusy i frelki
Ciongnyły tam łojce matki ołmy ołpy
Chnet połowa Wiyrka wilazła z chałupy
Sztandami łobstawiali cołki stary torg
Chocioż towor na nich niywiela był wort
Bajtle jednak miały z tym wiela radości
I kożdy zabowek kupowoł dwie gorści
Potym myńsze fropy szły na karuzela
Abo na huśtowki kerych było wiela
A fajniste dziołchy z kecioka sie śmioły
Machały nogami aż kecki furgoły
Karlus zawsze frelka broł i pod szizbuda
Z lufbiksy i przeca chcioł ustrzelić cuda
Jak sie potym kero wtulyła we chłopca
Zawsze jakiś najduch rombnoł im z korkowca
I niy yno tela było tam uciychow
Bo przeca trza było zaś nachytać grzychow.

[broneknotgeld]

Moje grzibobranie

Na Laurastrasie żech sie urodzioł
W ty czyńści Wiyrka przi Bykowinie
Na Tale tyż żech z kumplami chodzioł
Tam kaj Kochłowka - dzisioj ściyk - płynie
Trowa durś rosła piykno soczysto
Joch jom krolikom ścinoł do żarcia
Dyszczoki wiosnom rosły tam gynsto
Grziby po kerych niy ma zaparcia
Zbiyrołch je do dom jod na surowo
I bez to chyba chowołch sie zdrowo
No a jak prziszła złocisto jesiyń
Chodzioł żech w strona Fryncity
Bo tam po laskach już tak pod wrzesiyń
Kozoki rosły jak sznity
Siwki czerwone i inszy maści
Czasym bagyniok sie znoloz
Grzibow miołch wtedy tyla we garści
Żech do dom z nimi czynsto loz.

[broneknotgeld]

Dyć jo tu jeszcze niy pisoł ło tym
Żech w laskach zbiyroł tyż surowioty
Ale tych grzibow niy nosiołch do dom
W lesie żech jod je prowda tu godom
Boch z kolegami robioł brandera
Pieczone wcinołch je jak cholera
Trza jednak było je ździebko solić
Ich smak już ciyngym byda sie chwolić.

[broneknotgeld]

Chebzie

Dzielnica Rudy to je mało
Skond by sie uciyc yno chciało
Las rosł tam piyknie i bogato
Dyć niy pozwoloł czowiek na to
Chebzie po stromach pozostały
Jak sie rozwinoł przemysł cały
Gruba tu wielgo tyż urosła
Skond wongla mocka we świat poszła
Banhof zaś stanoł niydaleko
Bo kożdy na tyn wongel czekoł
Łon tu do dzisioj jeszcze stoji
Choć sie ło prziszłość mocno boji
Ledwo nom zipiom polske cugi
PKP yno liczy długi
Jakby go zamkli cołkym tukej
To nawet Chebzia tyż niy szukej.

[broneknotgeld]

Kłodnica

Jo dzisioj sie niy zachwycom
Pierońsko biydnom Kłodnicom
Miyszkom nad tom Rudy rzekom
I lepszych czasow jyj czekom.

[broneknotgeld]

"Ślonske Talynty"

"Ślonske Talynty" już teroz momy
Richtig we wercie to wiela
Frelkom karlusom je rozdowomy
Co w gowie majom za tela

A wszysko zaczło sie łod Goduli
Z niego był majster pieroński
Za to co robioł forsa mu suli
"Krol cynku" to był nasz ślonski

Trza łojcow rudzkij ideji chwolić
Niych ciongnom tukej to piyknie
Nagrodzać czynsto i sie niy smolić
Zaś forsy niych im durś styknie.

[broneknotgeld]

Autobana

Wiym - w tym tymacie Ruda sie chwoli
Dyć mie pierońsko durś przejazd boli
Wele banhowa na naszym Wiyrku
Mieli sie starać a spali w wyrku.

[broneknotgeld]

Big Band KWK "Śląsk"

W Australii pokozoł klasa
Niy jest to zespoł ze lasa
Łon ze naszego jest konska
Zowiom go tu Ruda Ślonska.

[broneknotgeld]

Drukarnia

W MOKu na Fryncicie drukarnia zabytek
Do dzisioj jest w ruchu choć to może zbytek
Jest to jednak Rudy ciekawo atrakcjo
Przidź a sie przekonosz że we tym jest racjo.

[broneknotgeld]

Miszczostwa

Nojpiyrw srebro teroz złoto
Otyliji wszysko to to
Szmaterlokowo durś pływo
Świat tymu se teroz dziwo
To w dodatku frelka z Rudy
Za to trza sie napić wódy.

[broneknotgeld]

A - 4

Austryjok zarobio na ty autostradzie
Dyć podwykonawcow na łopatki kładzie
Polske firmy ze tym majom wiela szkody
A "Strabag" sie śmieje - niy pluje se brody

Czas by go już wcisnońć w jakoś czorno lista
Bo przeca nom tukej zaczyli fest drzistać
Że to jest aroma "warszawce" wmowiajom
Bestoż te przetargi zowdy wygrywajom.

[broneknotgeld]

Halymba

Cieszy sie Halymba
Że mo moja gymba
Jeszcze je szczyńśliwszo
Jak ta gymba cichszo.

[broneknotgeld]

Ruda Ślonska

We Rydzie Ślonski
Problym niywonski
Choć je ryszawo
Idzie na prawo.

[broneknotgeld]

Chebzie

Na Chebziu som same panki
Bo majom bana i banki.

[broneknotgeld]

Bykowina

Bykow tam niy ma i niy ma wina
Jest yno jedna ta Bykowina.

[broneknotgeld]

Godula

Miano mo po bogoczu
Dyć jakbyś tam zahuloł
Pamiyntej cobyś w sroczu
Niy wytar d... koszulom.

[broneknotgeld]

Wiyrek

Łotwarli tukej nom Plaza Center
Jak żech łoboczoł pedzioł żech - enter.

[broneknotgeld]

Bielszowice

Ze bielynio płotna niywiela by było
Bo Kochłowka ściekym - śmierdzi że aż miło
Stowiom dzisioj na ta rycersko legynda
Ło Bielczy co siedzioł tu na swoich grzyndach.

[broneknotgeld]

Fryncita

Fryncita
Jest jak kobiyta
Ło kero chopy sie bijom
Jak jom posiondom - wiedzom że żyjom
Jednak pożycie z niom krotke raczyj
I niychej Bozia to wybaczy
Po sztyrech latach
Łodpłata.

-
forum.gazeta.pl/forum/71,1.html?f=261

[broneknotgeld]

Kochłowice

Teryn by tukej był czysty
Kejby niy separatysty
Łod Rudy chcom sie łoderwać
Smutno "niywola" już przerwać.

[broneknotgeld]

Orzegów

Kedyś tu bajali
Że gowy łorali
A teroz dej pozór
To je łod nawozu
Bo ziymia jałowo
Pognojyli zdrowo.

[broneknotgeld]

Ruda

Niy wiym czy Ruda je ryszawo
Wiym że je staro no i klawo.

[broneknotgeld]

Halymba

Żył tukej Hanslik Halymba
Co wyparzono mioł gymba.

[broneknotgeld]

Ruda Ślonska

W dziesiyńciu konskach
Jest Ruda Ślonska
W tym jyj uroda
Choć trocha szkoda
Że rynku tukej
Na prożno szukej.

[broneknotgeld]

Wiyrek

Za ty sanacji Wiyrka niy było
Bo we Nowo Wieś jakoś go wciyło
Ratusz tam pryndko wybudowali
Yno we gowie Wiyrek był dali.

[broneknotgeld]

Wiyrecki Rondel

Rondel i banka
Tako mijanka
Widzioł żech jeszcze
Chcecie to wierzcie.

[broneknotgeld]

Kuźnica

Konsek Halymby podlegoł Pszczynie
I pamiyńć ło tym tukej niy ginie.

[broneknotgeld]

We Kochłowicach

Trocha żech popioł tam we "Barborce"
Potym mi zaszkodziyło słońce
Niy skiż procyntow a przez ta klara
Czuł żech sie w doma choby na marach.

[broneknotgeld]

Halymbski młyn

Hulo se wiater w halymbskim młynie
Jednak łon stoji nom jeszcze
Jak czysto Kłodka tukej popłynie
Utopek wkludzi sie - wierzcie.

[broneknotgeld]

Rudzke piekarnioki

Rudera widziołch - myślołch że chlyw
A przeca kedyś piykli tam chlyb
Dobrze że ludzie durś pamiyntajom
I piekarokow historio znajom.

[broneknotgeld]

Luftkolejka we Rudzie

Gornoślonske cudo - linowo kolejka
Taszczyła durś wongel - niy to co ta "Elka"
Szkoda że jom tukej zbulyli już downo
Teroz by to była atrakcjo szykowno.

[broneknotgeld]

Rozamunda

Dzisioj jest hołda i familoki
Dyć huta kedyś tu stoła
Cynk wywyndrowoł we świat szyroki
Yno sie nazwa łostoła.

[broneknotgeld]

Niydźwiedziniec

Na Bykowinie jest Niydżwiedziniec
Skiż tego "berenblut" mie niy minie.

[broneknotgeld]

Nasz zamek

Stoł zamek we Rudzie
Pora setek lot
Widzieli go ludzie
Niydowno łon pod

Szkoda że terozki
Zostoł yno ślod
Bo niy było troski
Ło świadectwo lot.

[broneknotgeld]

Rudzki lazaryt

Knapszaft lazaryt postawioł tukej
Wielgachny piykny i modny
Dzisioj go jednak w Rudzie niy szukej
Dołym podebroł go szkodnik

Gruby fedrować pod nim zaczyły
Wongel wybrały dokładnie
Potym po pryndku go wybulyły
Już niy czekały aż padnie.

[broneknotgeld]

Rudzke muzeum

Dzisioj muzeum tukej se momy
Magistrat jednak był wprzody
A za kajzera - to pamiyntomy
Szkolorze szli ze ty budy.

[broneknotgeld]

Poczta

Poczta we Rudzie Ballestrem stowioł
Jak Wiluś na tronie siedzioł
Piykny budynek Polsce łostowioł
Choć wtedy ło tym niy wiedzioł.

[broneknotgeld]

Downe gimnazjum

Pełno tu było tych gimnazistow
Co sie uczyli we Rudzie
Piniondz z biznesym teroz sie wcis tu
Chyba kajś ińdzi niy pódzie.

[broneknotgeld]

Liceum im. A. Mickiewicza

Karlusy ze Rudy beamtrow
Za Niymca uczyli sie sam tu
Ballestrem na szkoła mioł łoko
Rektorow tyż cynioł wysoko

[broneknotgeld]

Liceum im. A. Mickiewicza

Karlusy ze Rudy beamtrow
Za Niymca uczyli sie sam tu
Ballestrem na szkoła mioł łoko
Rektorow tyż cynioł wysoko

We Polsce służyło nom dali
Choć wtedy Staszicym je zwali
Z gimnazjum liceum zrobiyli
I synkow z frelkami złonczyli

Po wojnie zmiynili patrona
Adama wolała komuna
I to już do dzisioj tu momy
Dyć wszyscy liceum te znomy.

[broneknotgeld]

"Gasthaus" we Rudzie

Ballestrem tukej lubioł fajrować
Przepychym budynek blyszczoł
Łostatnim czasym szło sie dziwować
Jak pryndko łon nom tu niszczoł

Jednak ktoś wzioł sie za remont łostro
Zaś żech przeciyroł swe gały
Łostatni momynt - nojwyższy czos to
By cieszoł nos jeszcze cały.

[broneknotgeld]

Kościoł MBR

"Matki Boski Rożańcowy"
Tyn kościoł we Rudzie
Z Ballestrema wyros gowy
By nios pomoc w trudzie
Tym bergmonom i hutnikom
Kere tu robiyli
Jo tam tyż był - za to rzykom
By szczyńśliwi byli
Wszyscy ludzie ze parafii
Tak poczebny tukej
Jakbyś ciynżko mioł tu trafić
Pytej sie - niy szukej.

[broneknotgeld]

Kerhof

Stary kerhof w Rudzie
Grobowiec Pielera
Dynkmal łod Janasa
I ta atmosfera.

[broneknotgeld]

Rudzko Kaplica Piusa X

Kaplica mo przeszło sto czidziści lot
Z huty cynku "Karol" chodzioł do nij kwiot
Jyj licznyj załogi aż do końca wieku
Wtedy piykny kościoł stanoł we tym eku.

[broneknotgeld]

Kościoł św. Józefa

Na wzor bazyliki tu go zbudowano
Ponoć San Lorenzo di Campo Verano
Sto lot bydzie za rok jak tukej nom stanoł
Z Kaplicy Józefa wzioł se swoje miano
Tyn łod Ballestremow Francik go fondowoł
Po śmierci sie tukej we krypcie tyż schowoł
Głośno jest we Rudzie ło tutejszy Piecie
Aniołach Limburga co słynoł we świecie
We tych arcydziełach rynka tyż Pielera
Cosik nom zostawioł - dziynki że aż tela.

[broneknotgeld]

Rudzki park

We Parku Miejskim - dzisioj Kozioła
Niyjedna frelka karlusa pszoła
Tyż nom Ballestrem tu go założoł
Nawet kryngelnia jeszcze dołożoł
Szkoda że dzisioj jom tukej niy ma
Komu by teroz wciepnońć tyn tymat?

[broneknotgeld]

Rudzko Kuźnica

Szajset lot słyszymy już ło tyj Kuźnicy
Kaj ajza topiyli ci piyrwsi hutnicy
Kto jeszcze pamiynto knajpa Karlinera?
Kero podebrała tyż gruba - cholera!
Abo tyn wielgachny Knapszaftu lazaryt
Kedyś ta Kużnica miała wiyncyj zalyt.

[broneknotgeld]

"Karol"

Huta cynku "Karol" - tyn osmy cud świata
Rozsławiała Ruda przez dość duge lata
Dzisioj huty niy ma niy ma "krola cynku"
Pamiyńć sie łostała - na wieki - ło tym tu.

[broneknotgeld]

Cegelnia "Karol Emanuel"

Cegelnia w kolonii ło tym samym mianie
Trzi wieki widziała a przeca durś stoji
I niychej sie jeszcze nom tukej to stanie
Że głośno zawoło - Buduj z cegły moji!

[broneknotgeld]

Szyb "Franciszek"

"Francek" ze "Wawla" w Rudzie nom stoji
Zabytek z niego zrobiyli
-"Cechowni teroz już niy ma moji"
Tak se we nocy łon kwili.

[broneknotgeld]

Szyb "Minerwa"

Przi cmyntorzu w Rudzie
Stoła sie "Minerwa"
We bergmońskim trudzie
Miała wielko przerwa

Jeszcze przez lot wiela
Ludzie tam miyszkali
Dyć w końcu ta sztela
Trza było łobalić.

[broneknotgeld]

Szyb "Klara"

Piykne miano pełne słońca
Bestoż możno niy mo końca
Tyn szyb jeszcze stoji w Rudzie
Niych trwo jak nojdużyj pudzie.

[broneknotgeld]

Nasze szyby

"Francek" "Jan" i tyn "Bartosz" - szyby "Walyncioka"
Kere piyrwyj szachtami "Brandenburga" były
Stoły rzyndym przi glajzach - blikały z wysoka
Na rudzianki co łokna w familokach myły.

[broneknotgeld]

Rudzki "Walenty"

Sto lot stoł "Walenty" piyrwyj "Wolfgang" zwany
Wyglondoł pokracznie - dyć był podziwiany
Jego tukej miano miała tyż koksownia
Teroz wrak jyj straszy ekologow co dnia.

[broneknotgeld]

Szyb "Leon"

Dyć "Leona" już niy ma choć stoł dugo tukej
I zostawioł po siebie durś wyraźne ślady
Jego wieży na prożno we tyj Rudzie szukej
Niy trza już go nom było - na to niy ma rady.

[broneknotgeld]

Halymbiance z Nowego Świata

Na Nowym Świecie zmiany - durś sie tam buduje
No a samym krajym autobana pruje
Co prowda jom teroz ciongnom tam dopiyro
Za dwa lata skończom - tako jest chyńć szczyro
Yno że we Polsce wszysko wolno leci
Ważne że sie jakoś to do przodu kleci.

[broneknotgeld]

Karolinko moja miła
Obyś czynsto tukej była
Łogłoś to ze Rudy inkszym
Niych te forum zrobiom wiynkszym.

[broneknotgeld]

Na Halymbie

Dobre teroz czasy momy na Halymbie
Knajpkow tu niy zliczysz - chmiel jest durś we gymbie
Zowiszcza naprowdy trocha łogrodnikom
We łogrodek piwny bestoż chyntnie zmykom.

[broneknotgeld]

"Chcieć to moc" - ktoś kedyś pedzioł
Dyć ło Rudzie łon niy wiedzioł
Tu by przeca wszyscy chcieli
A niy mogom nic w tyj szteli.

[broneknotgeld]

Na wesoło

Jo Ruda Ślonsko "rzeźbia" terozki
Czytej i wygoń te swoje troski.

[broneknotgeld]

Grand Prix

Brawa śla Kampie, jego muzykom
Oby tak dali - za to jo rzykom
Z Niymiec ze tarczom zaś nom wrociyli
Dyć nojważniejszo nagroda wziyli

Choć Hausner godo - kopalnie wziynte
My posłuchomy orkestry dynte
Paradynmarsza niych nom zagrajom
A na "warszawka" głośno gwizdajom.

[broneknotgeld]

Na Wiyrku

Czamu na Wiyrku we czwortek targ?
Na to łodpowiy tyż Donnerskarck.

[broneknotgeld]

Karmaniol

Karl i Emanuel - dwa szyby w Rudzie
W historio naszo sie piszom
Kedyś w bergmońskim służyły trudzie
Dzisioj we nazwie je słyszom
Rudy kawołka tego jyj konska
Na kery Karmaniol jo godom
Bo tak godali ołpy ze Ślonska
Tak żech to słyszoł za młodu
Jednak łostatnio te stare miano
Polszczom mi tukej pierońsko
Bo je Karmańskim prosto nazwano
Traconc historio ta ślonsko.

[broneknotgeld]

To żech napisoł poł roku tymu
Choć niy po ślonsku to jest do rymu
Dyć polsko-ślonsko jest moja dusza
Beztoż sie wkleić tukej to skusza

Szyb Andrzej

Wirecki "Andrzej" z krymska się nosi
Jednak minęły dni jego chwały
O renowację dzisiaj się prosi
Bo już niedługo może stać cały

Dzisiaj iskierka nadziei błysła
By miasto zdobił w pełnej swej krasie
A zamiast węgla książka tam przyszła
Tak napisano w lokalnej prasie

Czarnym pokładem znów nas obdarzy
Liter z milionów książkowych stronic
Zróbmy to szybko co nam się marzy
Bo czas niemiłosiernie już goni.

Bibliotyka w szybie - piykno to ideja
Klackom tymu mocno - wcale sie niy śmieja.

[broneknotgeld]

Viyrecki "Siwy"

Jo byda z Tobom tu cołkym szczyry
Wiyrek mo kontow niy yno sztyry
Znała "Siwego" Laura chnet cało
I we Walcwerku ło nim huczało
Na dwóch Werdonach był popularny
Choć na Nowy Wsi wiod żywot marny
We Mrowczy Gorce lepi z nim było
Na Ficynusie mu sie szczyńściyło
Ryndorf to jego dziupla dostatnio
We cyntrom Wiyrka miyszkoł łostatnio
Potym żech stracioł z nim jakoś kontakt
Ponoć sie miyszko teroz na Kontach
Na setki "Siwych" jednak liczyli
Ło kogo chodzi? Durś mi sie myli.

[fiodorus]

Pozdrowienia dla Bronka, naszego poety
:-)))

[broneknotgeld]

Jo ło nasze gruby durś sie teroz boja
No bo we gornictwie jo robia i moja
Dyć w Rudzie tu bydom dopiyro problymy
Zamknom tukej gruby - na fecht se pódymy.

[broneknotgeld]

"Brandenburg"

Rudzkich grub to była ołma
Rokow tymu ćwierć tysionca
Bergmon stond sie broł do doma
Tyn zaklynty konsek słońca

Wongel - Ślonska piykny skarb
Kery łogrzoł go we zima
Nikt niy godoł że to garb
Ale ludzi tych już niy ma.

[broneknotgeld]

Czystszo Kłodka

Jakbyś chcioł czekać aż bydzie czystszo
Toczyła woda by coroz gynstszo
Trza świynto rzeki zrobić nom pryndzy
By jom łobronić łod gorszy nyndzy
Niych w niyj zbabrajom sie ponki panie
Mie nic ich niy żol - niych to sie stanie
Chyba sie wtedy znojdom tu środki
Na łoczyszczynie tyj naszyj Kłodki.

[broneknotgeld]

Kłodnica

Jo przi ty rzece miyszkom po blisku
I jyj smrod czuja czynsto we pysku
Durś ło tym myśla co tu napochać
By łona czystszo była choć trocha.

[broneknotgeld]

Dni Kłodki

Sztartnońć z tym szłoby i na Halymbie
Yno że pomysł tym w moji gymbie
Jak rudzkim vipom tyn tymat wtrynić?
By richtig chcieli Kłodnica zmiynić.

[broneknotgeld]

Świynto Kłodki

W Dolinie Kłodnicy na Halymbie stary
Widza ta impreza tukej po roz piyrszy
Jak tego niy bydzie zasłuża na szmary
No a jeszcze bardzi kto łodymie wyrszy.

[broneknotgeld]

Ponoć na Wiyrku we tym "Pulsarze"
Godajom ludzie ciyngym we gwarze
Jakby tu kogoś ze nich prziciongnońć?
W te nasze forum fest mocno wprzongnońć.

[broneknotgeld]

"Kultura plebejsko w mieście przemysłowym"

Lubina w muzeum zwołoł konferyncjo
Ponoć richtig wielko tam była frekfyncjo
A ło zaproszynia ludziska sie biyli
Tako wieść mie doszła ze łostatni chwili

W szczegołach to niy wiym co tam sie godało
Bo mie zaproszynie już sie niy dostało
Jak karlusa spotkom byda sie go pytoł
Czy te rudzke fraszki w Internecie czytoł?

[broneknotgeld]

"Ruda Śląska. Przeszłość i teraź niejszość dla przyszłości"

Łod łońskego roku ta "inicjatywa"
U Lubiny rosnom durś ślonske "aktywa".

"Chcemy promować nowe, oryginalne prace badawcze na temat historii i kultury
Rudy Sląskiej".

Take były jego nojprowdziwsze słowa
Możno jeszcze bydzie te forum promować.

[broneknotgeld]

Antyklerykalno Partia Postympu

Myślołch że trefioł żech do ustympu
Dyc naszkryflali - Partia Postympu
W Rudzie sie wysrać niy idzie darmo
Czy to tyż sprawa jest klerykalno?

[broneknotgeld]

Jo tak naszo Ruda kochom
Że aż tela tukej pochom.

[broneknotgeld]

Telefon

Telefon dzwoni - łode Kłodnicy
Jakoś mi frelka do ucha ryczy
Że już niy szczimie w ty naszy Rudzie!
Że sie na wander pryndko stond pódzie!
Suchom i nogle poli sie świyca
To dzwoni do mie z Kłodki wodnica.

[broneknotgeld]

Za bajtla

Za bajtla jeździołch w halymbske lasy
Jagod żech zbiyroł tam mocka
Jeszcze niy były cołkym złe czasy
Wiela ich rosło na krzoczkach

W Jamnie żech wtedy kompoł sie czynsto
Jednym z dopływow Kłodnicy
Dzisioj i tam je woda za gynsto
Ta rzyczka tyż do nos ryczy.

[broneknotgeld]

Szczyńśliwo "siedymnostka"

Rady ze osiedli i te dzielnicowe
We Zabrzu działajom i to jest tam zdrowe
U nos przi wyborach zowdy obiycujom
Że tyż ze radami coś wykombinujom
W łostatnie wybory fest za tym był Stania
A teroz ucichło - niy słychać już "grania".

[broneknotgeld]

Profilaktyka AA

Ruda mo dobre we tym wyniki
Biydzom sie nad tym durś urzyndniki
Wiela z ty puli uszczknońć dlo siebie
Dyć wszyskim żyje sie tu jak w niebie.

[broneknotgeld]

Przed wyborym

Stania mioł hasło "Rady Dzielnicy"
Czy keryś w Rudzie durś na to liczy?

[broneknotgeld]

Sekretorz

Sekretorza momy aże ze Ostrowa
Ponoć super mondro je ta jego gowa
To dlo naszy Rudy mo być istny skarb
Wygładzi nom tukej zaś niyjedyn garb

Jednak coś mi przi tym na wontrobie leży
Trocha mi sie bez to włos na glacy jeży
Czy u sia niy momy już rozumnych ludzi?
Zaś trza nom tu istnych z Wielkopolski kludzić

Chocia jo ło Pyrach niy powiym nic złego
Zdziwioł mie tyn desant i niy chwola tego
Burgemajster teroz bydzie mocno rzondzić
Oby nom skiż tego niy zaczoł kajś błondzić.

[broneknotgeld]

Jego zdaniym

Niy wiym czy było tak tukej zowdy
Dyć chyba we tym je trocha prowdy
Że marne ludzie siedzom w Urzyńdzie
Czujom sie choby na jakiś grzyńdzie
Bestoż trza z dalsza talynty łowić
By sie nad Rudom chcieli pogłowić
Choć jo bych woloł ich tukej szukać
Yno jak ło to do niego klupać.

[broneknotgeld]

Inszy blik

Terozki blikom ze inszy strony
Urzyndnik przeca je nauczony
Robić co mu pryncypał zleci
Pryndko dokładnie i jak nojlepi
Ale jak niy mo ze gory zlecyń
To czynsto wtedy jest piyrszy kwieciyń
Dyć jak sie gora nic niy wisili
Cołki rok wtedy "prima aprilis".

[broneknotgeld]

Rudzke obligacje?

Krakowsko - rudzke papiory
Dzwignom nom miasto do gory
Już teroz mom taki apel
-Zrobić wysoki z nich sztapel

Dyć kto je kupi terozki?
Jak czowiek pełny je troski
Bo grozi mu bezrobocie
A w doma pora je pociech

Copnom je może bogaci
Jak im sie bydzie łopłacić
Yno że dlo nich tyn zysk
To biydokowi je w pysk

Warszawie tyż to na rynka
Z łodsetek ściongnie procynta
Ktoś szarpnie porzondno marża
Kaj nos zawiedzie ta szarża?

Ło tym to my sie dowiymy
Jak ta pożyczka spłacymy
Do gowy myśl tako leci
-Za tym jo byda i przeciw.

[broneknotgeld]

Ficinus

Wiyrka to pympek mioł być super
Jo w to uwierzoł - alech kuper.

[broneknotgeld]

Wirecke Werdony

Werdon wielki i tyn mały
Kaj sie chałpy wom podziały?

[broneknotgeld]

Autobana na Wiyrku

Na Wiyrku zjazd mo być z autobany
I już je ze tym utropa
Terozki patrzom we jeji plany
Pryndzy niy ciongło to chopa

Trzeba nom było coś zaoszczyńdzić
Z myślom ło prziszłych wydatkach
Niy ma już czasu yno durś glyńdzić
Tyn zjazd to dlo nos tyż gratka

Trza sie poradzić z tym cugym jakoś
Bo przeca ło to je raban
Minyło czasu już tela - psiakość!
A durś nos mynczy tyn szlaban.

[broneknotgeld]

Zjazd z autobany

Ze tym zjazdym wele Zdebla
Trocha bydzie tu łostudy
To zadanie jest dlo hebla
Co wyprości pukle Rudy.

[broneknotgeld]

Problymym je cało ta 1-go Maja
Jak z niom nic niy zrobiom bydzie ło to haja.

[broneknotgeld]

Ze Bielszowic

W Dyrekcji Społki Wynglowy
Zaś bydzie gospodorz nowy
Myśla że jakiś bank
Bo mu spasuje to blank

[broneknotgeld]

Oszczyndności

Ze magistratu słysza - "oszczyndności"
Take by ludzi przi tym niy rozzłościć
Dyć trza to zaczońć trza dobry dać przikład
Niych łograniczy sie nom tyn magistrat

Jak to pokożom - ciepnom nom we łoczy
To i popularność wyraźnie im skoczy
Mniyj grosza we kapsie - w końcu ktoś zawoło
To som dobre drożdże na tyn rudzki kołocz!

[broneknotgeld]

Nysa

Za Prowincji Gornoślonski
Tam szoł durś podatek
Dzisioj problym je niywonski
Geldu brak - łostatek.

[broneknotgeld]

Wrocek

Stolica Ślonska - Wrocek
We wercie tysionce nocek
Pszoć idzie tymu miastu
Szczyńśliwie spyndzać czas tu.

[broneknotgeld]

We Złotoryji

Kaczawa i Bober naniosły tu pioska
Dyć złota wyciongli stond niy yno troszka
Całe wieki tukej za goldym kopali
A i z rzeki przeca wiela wypłokali

Dzisioj dlo zabawa tyż idzie to przeżyć
Złota se popłokać - możecie mi wierzyć
Nawet tu kopocze bractwo swoje majom
Łoni sie na złocie richtig dobrze znajom.

[broneknotgeld]

"Aurelia"

Kopalnia "Aurelia" zwiydzać tukej idzie
Na Świynty Mikołoj łona nos prziwiydzie
Tako sie nazywo złotoryjsko gora
Kerom przewierciyła gwarkow downych dziura

Godali że tukej na starym kerchowie
We złocie jak pomar to lygoł sie czowiek
I możno skiż tego straszy teroz cosik
Chcesz z "Aurelii" wylyźć - za plecy ciep grosik.

[broneknotgeld]

Muzeum Złota

We Złotoryji ciekawo chata
Sztelom se była łod istnych kata
I dzisioj miasto umi rozsławić
Kere turystow chce uczyć bawić

Zrobiyli we niyj Muzeum Złota
Wlyź jak cie yno nojdzie ochota
Wiela ło złocie sie dowiysz tukej
A i kamiyni szlachetnych szukej

Dyć to som wszysko Sudetow dary
Szczyrze nom dane - niy jakeś czary
Choć czasym myśla że Liczyrzepa
Jeszcze niy cołkym w tych gorach przepadł.

[broneknotgeld]

Bibliotyka

Ksionżki na łańcuchu to ciekawy tymat
Dyć tego kaj indzi już terozki niy ma
Kościoł Marii Panny i ta bibliotyka
We niyj dusza Ślonska tyż po cichu tyka

Przez wieki szkolorze te ksionżki czytali
Mondrości w nich przeca naprowdy szukali
I choć wiek dwudziesty niy był im łaskawy
To dlo Złotoryji jest powod do sławy.

[broneknotgeld]

Gimnazjum

Gimnazjum w Złotoryji we szesnostym wieku
Słynyło na Ślonsk cały - wiydz ło tym czowieku
Trozendorfa było w tym zasługi wiela
Łon je tu założoł i dboł ło ta sztela

Zocny to był rektor - pszoł swojim szkolorzom
Jednak dyscypliny pierońsko dołożoł
Pewnikym na dobre wyszło to nikerym
Choć karlusow czasym fest brały cholery

Dyć to przeca było w czasach reformacji
Grzych sie tak tympiyło i wiela w tym racji
Stare ze tym nowym na Ślonsku sie biyło
I dużo niyszczyńścio tu sie przikludziyło

Wallenstein tyż tukej nauki pobiyroł
Z czasym poł Europy bez wojna łobdziyroł
Łon z armiom po Ślonsku kedyś se wojowoł
Choć zocne gimnazjum w pamiyńci zachowoł

Sala Trozendorfa w kościele jest dzisioj
Łobroz jego tukej zowdy bydzie wisioł
Szkoloł we tym miejscu ta swoja czelodka
Jak dżuma zbiyrała - nogami do przodka

Sławno Złotoryja we cołki Europie
Niy yno skiż złota - z nauki tyż chopie
Powiysz że to downiyj yno tak bywało
By do tego wrocić trza zrobić niymało.

[broneknotgeld]

Wilczo Gora

Przi Złotoryji ciekawo gora
Wulkan to ponoć jest stary
Niy łaź ze gowom tukej we chmurach
Bo wlecisz do jakiś pieczary

Jedna nazywo sie Wilczo Jama
Drugo Niydźwiedzio Jaskina
Skalny Wodospad - pamiyntej miana
Trzi - wiyncyj jaskiń tych niy ma

Tyż Wilkołakym ta gora zowiom
I boj sie tu nocnyj pory
Starziki ło tym czasami prowiom
Że som tu dwa take stwory

Byli to braty co w zamku żyli
Na samym wiyrchu tyj gory
Rodzono siostra łoni zabiyli
Łod lot sie miyniom w wilczury.

[broneknotgeld]

Uniejowice

Czas sztopnoł chyba w Uniejowicach
Jak chcesz to możesz sie tym zochwycać
Armio Radziecko muzeum mo tu
Rokossowskiego widać zza płotu

Znojdziesz tu zresztom tyż i Lenina
Jednak skwaszono jest jego mina
Bo choć pamiontek bez liku tukej
"Krasnoarmijcow" daleko szukej.

[broneknotgeld]

Twardocice

W Twardocicach dzisioj stojom dwa kościoły
Tyn łod protestantow w stanie niywesołym
No i katolicki co krzepko sie czimie
Ale jest coś jeszcze w tutejszyj dziedzinie

Szukej tu pomnika Schwenckfelda stronnikow
tyn Ślonzok i z Lutrym niy robioł unikow
Protestanty mocno go przez to gnymbiyli
A i jezuity do piekła goniyli

Jest tako legynda - Jak dioboł już lecioł
Ze nimi do piekła szczyt worek mu przecioł
Dokoła Ostrzycy szwenkfeldow wysypoł
Trzi wieki tu byli - jakbyś sie mie pytoł.

[broneknotgeld]

Grodziec

Grod to był łod Biebrzan nim Polanie prziszli
Dyć i piyrsze Piasty mieli go we myśli
Bestoż łosadziyli tukej kasztelana
By ziymia niy przeszła pod inkszego pana

Zamek w Grodzcu stary - znoł go wiek cztyrnosty
A możno i piyrwyj te mury urosły
Choć z czasym sie wszysko fest tu pomiyniyło
Za tych ślonskich Piastow ciekawie tyż było

Robioł tu turnieje ksionże na Legnicy
Kere głośne były w cołki okolicy
A jak na tym Ślonsku dżuma żniwowała
Dwor sie tukej kludzioł w całości bezmała

Inkszy Piast we Grodźcu groł za raubrittera
Brata czynsto grabioł - tako był cholera
Dwa razy chcioł do sia ucapić tron Polski
W Krakowie go struli bo niy był im swojski

W siedymnostym wieku Wallenstein grod zdoboł
Załoga na zamku podstympym łon pobioł
Wpuściyła ich baba co zwała sie Meta
Mamona - to była jyj zdrady podnieta

Dyć w końcu jak zamek zaś Szwedy zajyli
Wojoki cysorza go krwawo łodbiyli
I pedzioł generał - "Trza mury wysadzić"
Jeronie - już niy szło nic na to poradzić

W dziewiytnostym wieku ta staro ruina
To była Hochbergow ciekawo dziedzina
Łoni zaś tyn zamek se łodbudowali
Potym tyż turystow do niego ściongali

Z czasym Grodziec przeszoł we Dirskena rynce
Dobry to był okres - choby we podziynce
Za te downe lata czynsto niyszczyńśliwe
Teroz zamek blysnoł jasno i prowdziwie

Z końcym drugi wojny prziszła ciynżko dola
Drzwi Rusom sie tukej łotwarły do mola
Wiela dobra we nim pryndko nagrabiyli
Mało brakowało - wszysko by zniszczyli

Terozki poleku zamek nom łodżywo
Zaś sie tu turysta niyjedyn podziwo
Na mury co pedzieć nom umiom durś wiela
Yno trza mieć w zocy ta fajnisto sztela.

[broneknotgeld]

Pałac w Grodzcu

Niy yno ze zamku tyn Grodziec nom słynie
Bo pałac rokoko tyż we tyj dziedzinie
Za Dirskenow Fajnie go tu łodnowiyli
Prawie po krolewsku we nim łoni żyli

Willi - fater piyrszy tukej rezydowoł
A jak syn to erbnoł łod sia wiela dowoł
Yno że pszoł przeca łon tyż tym bronotnym
Bestoż koniec prziszoł na Grodziec sromotny

I zamek i pałac Ruske rozgrabiyli
Szczyńściym że niy cołkym to wszysko zniszczyli
Werci sie tu zajrzeć - historii pomacać
By wiedzieć że niy trza w niyj za wiela gracać.

[broneknotgeld]

"Willmanowsko Pokusa"

Wlyź tam jak bydziesz w Krzeszowie
I podrop sie po swyj gowie
Co tak kusiyło Willmanna?
Kelich - durś pełny łod rana.

[broneknotgeld]

Michael Willmann

Michael Willmann - malyrz baroku
Chcioł Rymbrantowi doczimać kroku
W Holandii talynt swoj wyszlifowoł
I z niego wiela Ślonskowi dowoł

Bo choć w Krolewcu łon sie urodzioł
Osiodł w Libionżu w klosztorze
Po naszyj ziymi przeca durś chodzioł
Wiedzioł że sztukom wspomoże

Wrocław i Nysa Milicz Legnica
Raciborz Strzegom piykno Świdnica
Znajom go wszyńdzie - i we Głogowie
No i chociożby we Otmuchowie

Byś łobroz jednak łoboczoł jego
Radza ci wlyźć do kościoła
Bo świyntych mocka jest pyndzla tego
Z ołtorzy tyż mogom wołać

Łostawioł nom tu piykno swo sztuka
A i nastympcow leko poszukać
Byłby ubogi region bez tego
Łon jest karlusym Ślonska naszego

[broneknotgeld]

Szpas Willmana

Opat szukoł go łod rana
W knajpie - tam znoloz Willmanna
Coroz czyńści tak z nim było
Kiepsko jednak sie skończyło
Bo na klucz go zamykali
By co zaczoł kończył dali
No i fajrant - freski piykne
Trza to łobloć - mynki styknie
A tu opat zaś pieroni
Michaela z kijym goni
Na karczmarza piyrwyj blikoł
Co rodzinie świyntyj fikoł
Że ich niy chcioł przenocować
W stajni sie musieli schować
Stond tyn raban. Wrzeszczy - grzych!
A tu wszyscy inksi w śmiych
Karczmarz - Willmann jako żywy
To szpas jego jest prawdziwy.

[broneknotgeld]

Willmann

Zasłużoł sie na miano Ślonskego Rembrandta
W opactwie krzeszowskim wiela łon malowoł
I tyż dziynki niymu słynie ziymia sam ta
Bo tela talyntu Ślonskowi łoddowoł.

[broneknotgeld]

Piotr Brandl

Ze Czech łon pochodzioł - w Krzeszowie malowoł
Dyć wiela z Willmanna we duszy swyj chowoł
Jak jego poprzednik tyż lubioł popijać
By potym se pyndzlym na płotnie uwijać

Za długi łon piyrwyj we Hradcu se siedzioł
Aż opat cystersow sie ło nim dowiedzioł
Wyciongnoł go z pierdla bo kaucjo zapłacioł
I jego robota w Krzeszowie łopłacioł

Mioł wrocić do Hradca jak fajrant był tukej
Dyć pitnoł i potym na prożno go szukej
To jednak tyż wiymy że pomarł w przitułku
Jo dowom mu miejsce w "Ludzi Ślonska" kółku.

[broneknotgeld]

Krzeszowsko ikona

Matka Bosko Łaskawo ze tego Krzeszowa
Przi niyj "Czorno Madonna" może chylić gowa
Godajom co zrobiyła jom tu rynka Krzesza
Chocioż we tyj sprawie możno teroz grzesza
Inksi ze Bizancjum chcow wiyść jyj rodowod
Z wyprawy krziżowy tu rycerz jom powiod
Pewne że pochodzi z czinostego wieku
Tyż cud bestoż przi niyj porzykej czowieku.

[broneknotgeld]

Kościoł św Jozefa

Kościoł łod Jozefa we piyknym Krzeszowie
Jego polichromie dugo siedzom w gowie
Willmann je malowoł na chwała łod świyntych
Chocioż do gospody polyły go piynty.

[broneknotgeld]

Kaplica Loretańsko w Krzeszowie

W Kaplicy Loretański był łobroz Willmanna
W łoziymnostym wieku jednak przerobiana
Dzisioj ołtorz ciekawy łona yno chowo
Z figurkom Madonny co przikłod nom dowo.

[broneknotgeld]

Krzeszów

Roz Bolko (piyrszy) syn łod Rogatki
W tutejszych lasach polowoł
Chocioż gowiedzi niy zrobioł jatki
Bor cosik srogi sie stowoł

Chcioł już zawrocić ksionże do zamku
Choć droga była daleko
Dyć Jaksa pedzioł - skryncymy sam ty
Pustelnia na nos tam czeko

I przijechali do eremity
Kerego Krzeszym tu zwano
Z bajlagom zjedli u niego sznity
Pokładli spać sie na siano

Wtedy Madonna Bolka zbudziyła
Łon jom wysuchoł w pokorze
Ło chwała swojo ksiyńcia prosiyła
-Zapomnieć ło tym niy może

Pryndko cystersow tukej sprowadzo
Klosztor przesławny buduje
Ze wszyskim jakoś sie potym radzom
Bo im Madonna króluje.

[broneknotgeld]

Kościoł Wniebowziyńcio Nojświyntszyj Maryji Panny

Wlyż se do kościoła we zocnym Krzeszowie
Wniebowziyńcio Maryji - w zochwyt wpodo czowiek
Nojwiynkszo świontynia ślonskego baroku
Pozwoli sie napaś niy jednymu łoku
W niyj sławno Madonna - rzykać ci sie godzi
Wielki Ołtorz tukej we ślypia som wchodzi
Projekt jego zrobioł som Brokoff podobno
Brandl łobroz malowoł na kerym pogodno
Maryja przeświynto już bierom do nieba
I wnuka Willmanna wspomnieć tukej czeba
Łozdobioł Freskami kościoła sklepiynie
Możno ołpa zesłoł na niego natchniynie
Jak wyńdziesz z kościoła blikej se na całość
By ci wszysko razym w pamiyńci łostało

[broneknotgeld]

Mauzoleum

W jednyj trumnie leżom Piasty ze Jawora
W łoziymnostym wieku prziszła tako pora
W krzeszowskim klosztorze mauzoleum piykne
Musisz tukej wdepnońć - czasu niych ci styknie.

[broneknotgeld]

Diobelsko Maczuga

Diobelsko Maczuga wele Gorzeszowa
Czort nios jom na Krzeszow dyć musioł sie schować
Bo rano zapioły za pryndko kokoty
Łostawioł jom tukej i zapomnioł potym

Dwie daty terozki na niyj przoczytomy
Bestoż boj pod Lipskym we pamiyńci momy
Prusy ze niywoli wtedy wychodziyły
Dyć i sto lot potym dumne z tego były.

[broneknotgeld]

Chełmsko Ślonske

"Jedynoście apostołow" w Chełmsku dzisioj stoji
Dwunosty sie downo kornikow niy boji
Bo spoloł sie kedyś - niy szukej terozki
Judoszym go zwali - niy ma po nim troski

Dyć pisza ło chałpach naszych ślonskich tkoczy
Kere durś turystom ciepiom sie we łoczy
Za Austryji płotno geld piykny nosiyło
Ale w czasach pruskich wszysko sie skończyło.

[broneknotgeld]

Bergi i cwergi

Skałki Gorzeszowske cwergi ponoć kryjom
A czasym tyż diobły miyndzy nimi wyjom
Jak bydziesz w Krzeszowie to wdepnij tyż tukej
Takich piyknych skałek kaj ińdzi niy szukej.

[broneknotgeld]

Kochanów

W średniowieczu Kochanów był wioskom klosztornom
Łod krzeszowskich cystersow - dyć wcale niy mornom
Jedyny na Ślonsku stoł syndziowski tukej
Wykuty w kamiyniu - za dworym go szukej
Do kompletu majom jeszcze przeca ławy
Zabytek w Europie doczeko sie sławy.

[broneknotgeld]

We Kochanowie...

We Kochanowie jar tyż ciekawy
Ale niy radza ci tam zabawy
I stare sztolnie znojdziesz tyż tukej
Kalcyt ametyst - jak chcesz to szukej.

[broneknotgeld]

Kochanowske skarby

Jest Staro Plebanio we tym Kochanowie
Hildebrandt jom stowioł - zocny to był czowiek
Łon ewangelikom tukej pastorowoł
Dyć mocno cystersom tyż na drodze stowoł

W końcu stond go jednak te fratry wygnali
I skarbow tu po nim w piwnicy szukali
Konsztownie zdobiony krziż ze złota znodli
Na inksze bogactwo jakosik niy wpodli

Ponoć do terozki cosik tu szukajom
Przi piwie marudzom że szczyńścio niy majom.

[broneknotgeld]

Niedamirów

Ciongnie sie łańcuchym tako synno wioska
Łod larma se idzie łodpoczywać troszka
Promujom tu chyntnie Ślonska trzi kultury
Kerym spodobały sie sudecke gory.

[broneknotgeld]

Zamek Grodztwo w Kamiynny Gorze

Hans Schof ze Chojnika zaczoł go budować
Wiynkszym i piykniejszym z czasym mioł sie stować
Ważny był to zamek jak tu rezydowoł
Prezydynt co Ślonskym w Prusach zawiadowoł
Z tych Wernigerode przeca tyż pochodzioł
Molo - łon we Niymcach Reichstagym przewodzioł
Dyć za republiki było to już gminne
A po drugi wojnie choć niczymu winne
Poszło jakoś wszysko na te zatracynie
W końcu zamek zjadły polske już płomiynie.

[broneknotgeld]

Antonówka

Kryje Antonówka wielko tajymnica
Dyć fabrykom była cołko okolica
Podobno łod groma broni tu robiyli
Wiela z tego potym Ruskie do sia wziyli
Co jest we podziymiach do dzisioj niy wiedzom
Możno teroz tukej na cmyntorzu siedzom
Chocioż som tyż ludzie co skarbow chcom szukać
I we te podziymia zaczynajom klupać.

[broneknotgeld]

Sokołowsko

W Sokołowsku piykno okolica
Tu łod downa lyczyli gruźlica
I to wcale tyż niy jest moj wic
Piyrwszy tukej widzieli prysznic
Bo Priessnitza to przeca wihajster
Łon tu dobry w lyczyniu był majster
Ze Brehmerym - dyż łoba doktory
Wyciongali suchoty ze chorych
Inksi na to z zowiściom blikali
Aż Szwajcary im pomysł zabrali
Sanatoriom we Davos zrobiyli
Z Sokołowska tyn muster sie wziyli.

[broneknotgeld]

Cerkew

Cerkew w Sokołowsku Rusom tu służyła
Bo jejich elita tukej sie lyczyła
Fondli jom z poczontkym wieku dwudziestego
Zachwyco nos dzisioj - wlyź do niyj kolego.

[broneknotgeld]

Sokołowski

U Brehmera lyczoł tu sie Sokołowski
Bo mu te suchoty przisporzały troski
Potym som tu inkszych pacjyntow kurowoł
Dyć sobom nojlepszy łonym przikłod dowoł
Wszyscy go tyż tukej dobrze pamiyntali
Za Polski te miano uzdrowisku dali.

[broneknotgeld]

Wele Sokołowska

Była kedyś skocznia narciarsko na Suchej
Ale dzisioj jeji wcale tu niy szukej
Kadra olimpijsko tukej trynowała
Yno łoni Niymcom skokali na chwała.

[broneknotgeld]

Andrzejówka

Przi Waligorze jest Andrzejówka
Co dlo turystow mo ciepłe łożka
Tu Wilhelmina urlopowała
Na nartach z Julkom sie szusowała
Było to jeszcze przed wojnom przeca
Choć już nazisty polyli w piecach.

[broneknotgeld]

Czamu Andrzejówka?

Miano pigulorz doł jyj z Wałbrzycha
Kery z gorami durś mioł uciycha
Jego storaniym schronisko stoji
I ło turystow yno sie boji.

[broneknotgeld]

Zamek Radosno

Zamek ksiyńcia na Świdnicy
Pilnowoł tyj okolicy
Łon do Ksionża dronioł drogi
Z czasym raubritterske progi
Szellendorfy tu siedzieli
Co rabować wszyskich chcieli
Skończyło sie niyszczyńśliwie
Stryczek łogyń i po piwie
Wejrzyj jednak we ruiny
Niyradosnyj tyj dziedziny.

[broneknotgeld]

Rogowiec

Wylyź na Rogowiec - zamek tukej stoji
Nojwyży we Polsce roztomili moji
Dzisioj to ruina - możno niyciekawy
Dyć kedyś łon bronioł ze Czech tu przeprawy
Jednak go złupiyli pepicke husyty
I niy szło już godać że jest niyzdobyty
Był łon jeszcze potym w Schellendorfow rynkach
Co siedzom do dzisioj we piekle na mynkach
Skiż nich przeca mury te marnie skończyły
By gniozdym łod zbojcow już nigdy niy były.

[broneknotgeld]

Grzmiąca

Z Rogowca do Grzmiącej już cołkym jest blisko
We wiosce tyj kościołek stary
Piyrszo tu świontynia jest ewangelicko
Choć dzisioj katolicki wiary.

[broneknotgeld]

Kedyś

Kedyś ta Grzmiąca szpulkami słynyła
A dzisioj we czym jest jeji siyła?

[broneknotgeld]

Rybnica Leśna

W Rybnicy jest stary kościołek drewniany
Dyć sława tyj wiosce przinoszom Cygany
Na piykne wesela sie tukej zjyżdżajom
Z radości do rana tańcujom śpiywajom.

[broneknotgeld]

Mokrzeszów

Zamek w Mokrzeszowie to richtig koszary
Dyć łon nawet niy jest za wiela tyż stary
Nojpiyrw tu kadetow do armii szkolyli
Zaś bez piyrszo wojna lotnikow lyczyli

Kariera łon zrobioł jednak w III Rzeszy
Farorz by mi pedzioł - Chopie możno grzeszysz
Lebensbornym Niymcy dzisioj sie niy chwolom
Ło tym teroz jakoś zapomnieć już wolom

A ponoć jeździyli tu do Mokrzeszowa
By rasa "nadludzi" Hitlerowi chować
Znomy ta historia - nic z tego niy wyszło
Pryndko potym Niymcom biyda klepać prziszło.

[broneknotgeld]

Pałac

Mioł Hochberg tyż pałac we tym Mokrzeszowie
We dzisiejszy szkole poznowo go czowiek
Tunel kolejowy do niego prowadzioł
Ale jo niy byda ło to sie tu wadzioł.

[broneknotgeld]

Zamek Książ

Wiela uciyrpioł tyn zamek - cholera!
Jak szykowali kwatera Hitlera
Za to by szło im w galoty kopać
Dyć szkoda mynczyć starego chopa

Tych co niszczyli prawie już niy ma
Terozki z zamkym durś tyn som tymat
Czy tak jak kedyś łon nom zablyśnie?
Take pytanie w gowa sie ciśnie.

[broneknotgeld]

Banhof w Książu

Pod zamkym w podziymiach banhof sie zrobiyli
Chcieli coby cugym aż tukej jeździyli
Tuneli do niego i dzisioj szukajom
Bo durś jakeś skarby we gowie tu majom.

[broneknotgeld]

W Lubiechowie

Ponioć w Lubiechowie była tyż bocznica
Ło keryj duś szymro cołko okolica
Cugym szło podjechać - towor przeładować
A potym to wszysko kajś pod Ksionżym schować.

[broneknotgeld]

Sztolnie w Ksionżu

Po zamkowych sztolniach szło po wojnie chodzić
Wyńście szpryngli Ruskie jak mieli łodchodzić
Dzisioj zwiydzać idzie konsek tych podziymi
Kto wiy jednak ło tym co wiyncyj we ziymi?

[broneknotgeld]

Ksionż - bolkowo warownia

Łod Bolka sie zaczło - łon zamek zrychtowoł
By spokoju ziymi tyj richtig pilnowoł
Ksionż, Cisy, Świybodziec drog ksiynstwa broniyły
Dyć w czinostym wieku już tu łone były.

[broneknotgeld]

Hochbergowie w Ksionżu

Czimali sie Ksionża dość dugo i krzepko
We Pszczynie im było jednak bardzi ciepło
Bo wiyncyj piniyndzy suł im Gorny Ślonzek
Choć i na tym Dolnym łakomy był konsek

Ksionż był jednak wtedy richtig perłom naszom
To niy to co teroz - jak te mury straszom
Hochbergi we zamku fortuna topiyli
Cysorzy i krolow przeca tu gościyli

Jednak jak se Hitler łapa nań położył
Zamek tyn już jakoś naprowdy niy ożył
I choć dzisioj przeca tyż go podziwiomy
Do ksionżyncych czasow w tych ścianach wzdychomy.

[broneknotgeld]

Daisy off Pless

Stokrotkom jom zwała we Anglii rodzina
Gyńsipympka witała radośnie zaś Pszczyna
Choć ślubno Hochberga - modo frelka przeca
Jak jom przigruchali do ślonskego neca

Wszyskich łona tukej sobom zochwyciyła
Godali co Daisy nojgryfniejszo była
Wiela sie we Niymcach na nia dziwowali
Dyć jeji uroda słynyła tyż dali

Sercym litościwym wspiyrała Ślonzokow
Znała ciynżki żywot przeca tych borokow
Co we grubach werkach musieli harować
A łona im łod sia chciała coś darować

Po prowdzie niy cołkym tyż była szczyńśliwo
Na pruske zwyczaje blikała coś krziwo
Niyszczyńścia rodzinne w nia mocno piznyły
Bo w dwudziestym wieku ciynżke czasy były

Jak we drugi wojnie eksmisjo dostała
Z Ksionża do Wałbrzycha przeniyść sie musiała
Pryndko tam pomarła - grob jeji ukryty
Pamiyńć trza zachować tyj zocny kobiyty.

[broneknotgeld]

Legynda ze Ksionża

We jarze Pełcznicy olbrzim mioł lyże
Kery był wielki choby te wiyże
Łon na dodatek był miynsożerny
Nawet na ludzi pieron pazerny

Boli sie bestoż wszyscy go tukej
Kto go pokono? - Ze świycom szukej
Dyć uradziyli razu jednego
Prosić ło pomoc Bolka ślonskego

Zwołoł wojokow Bolko Wysoki
Zaczli budować pod jego łokym
Wele Pełcznicy wielko strażnica
Kero wyrosła nad okolica

W końcu sie olbrzim tym wnerwioł srogo
Berga se dzwignoł - postompioł nogom
A w tym momyńcie coś jego siyły
Pieronym drapko go łopuściyły

Berga mu spadła na samo gowa
I pod już martwy - tako niyboga
Zloł sie ze skałom - dyć glaca jego
Jest czubkym Skały Olbrzima - tego.

[broneknotgeld]

Ogiery ze Ksionża

We ksionżyncych stajniach dzisioj ujyżdżajom
Ogiery - bo przeca warunki tam majom
Jak widać tradycjo durś jest tukej żywo
Piyknym koniom zowdy cołki Ksionż sie dziwoł.

[broneknotgeld]

Zamkowe tarasy

Tarasy we Ksionżu i dzisioj som piykne
Już tego widoku naprowdy nom styknie
Jo przi tych fontannach wpodom w zochwyt wielki
Chyntnie bych tam gonioł jakeś gryfne frelki.

[broneknotgeld]

Stary Ksionż

W łoziymnostym wieku już ta moda była
Na ruiny zamkow w kerych jakoś siyła
Zło - dobro - niyważne bele tajymniczo
W czowieku uczucie niypokoju wzniyco

Stało sie - Jan Hochberg zbudowoł ruina
Bo chcioł mieć ciekawszo ta swoja dziedzina
Po prowdzie fundamynt był tukej prastary
W kerym sie już piyrwyj dzioły jakeś czary

Gront że już stanyły "stare mury nowe"
Dziwowoł sie nimi tyż niyjedyn czowiek
Goście łod Hochbergow we nich "balowali"
Turnieje pamiontki - wszysko podziwiali

Dyć downo minyły dni jejich świytności
Stary Ksionż niy dowo dzisioj tyj radości
Możno jednak kryje niyjedna zagadka
Bo przeca choć "nowy" mo już swoje latka.

[broneknotgeld]

Palmiarnia Hochbergow

Cieszoł sie Jan Hynryk swojom gryfnom frelkom
Kerom przeca darzoł miyłościom tyż wielkom
Chcioł coby codziynnie tonyła we kwiotkach
Ze niyj zresztom była przepiykno "stokrotka"

Bestoż ta palmiarnio w Lubiechowie zrobioł
Kwiotkami z niyj nawet i Ksionż swoj łozdobioł
Co ze jego pszonio do dzisioj łostało?
Wejrzyj na to wszysko - dyć tego niymało.

[broneknotgeld]

Jeziorko Daisy

Kedyś to był kamiyniołom - zaloli go wodom
We pamiyńci Daisy czimie - widziało jom modom.

[broneknotgeld]

Zamek Cisy

Dzisioj to jest yno ciekawo ruina
A kedyś bolkowo warowno dziedzina
Kero pilnowała ksiynstwa świdnickego
By wrog tu niy prziszoł i niy podbioł jego

Dyć czeskim husytom już sie niy łoparła
A w nastympnych wojnach tyż ciyngi fest garła
Bestoż już łod downa stojom resztki murow
W kerych wiater hulo i niy łoto dziurow

Ponoć we tym zamku romantyzmu wiela
Wybrały go parki se za swoja sztela
Czasym tu widujom wodnica we nocy
I ducha rycerza co wlypio w nia łoczy.

[broneknotgeld]

Liszka z Cisow

We stawie przi zamku miyszkała wodnica
Nojpiyrw niy wiedziała ło tym okolica
Karlusy ślypiami za niom durś kryńciyli
Dobrze że sie w stawie skiż niyj niy topiyli

Rycerz jom uwidzioł ło piykny postawie
Zakochoł sie we niyj bez pamiyńci prawie
Dyć tym razym Liszka dała serce swoje
Szczyńśliwie żyć mieli przi stawie oboje

Pech że jom podglondnoł sagato we wodzie
No i sie skończyło na miłosnyj szkodzie
Zniknyła wodnica - łon zginoł na wojnie
Przi zamku zaś dzisioj w nocy niyspokojnie.

[broneknotgeld]

Zamek Nowy Dwor

Jest żeś we Wałbrzychu - na Nowy Dwor wdepnij
Ciekawo ruina - łokym na nia ciepnij
W jedynostym wieku stoł tu grod warowny
A som zmek przeca tyż naprowdy downy

Jak Jorg z Podiebradu Ślonzek do sia zgarnoł
Tyn zamek był zocny choć prziszłość mioł marnom
Bo po wojnie przeca - tyj czidziestoletni
Dzieje tego zamku jakosik już przetli

Ponoć tu we lochach - jak legynda głosi
Skarb łod raubritterow łodkrycio sie prosi
Wiela w tym jest prowdy? Możno sie łokoże
Bo cosik szukajom w starym Nowym Dworze.

[broneknotgeld]

Lisio Sztolnia

We przesławny tyj "Fuchs" grubie Lisio Sztolnia była
Kero nawet i krolewsko para łodwiydziyła
Dziynki sztolni Wałbrzych przeca był u możnych w zocy
Bo chcieli te ślonske cudo łobejrzeć na łoczy

Pomysł to był łod Redena by wongel suć w łodki
Potym spławiać je do ujścio we czasie dość krotkim
To sie dzioło durś bez tydziyń dyć czynsto w niydziela
Turystom tu fondowali uciechy za tela

Kto chcioł płynoł przeca łodkom do sali Schuckmana
Wielki i ze kolumnami - loli tam szampana
Fajer piykny we niyj mieli - wiela sie bawiyli
No a potym zaś na łodkami na cyku wrociyli

Pewnie dugo flisok tukej by se powiosłowoł
Dyć czas na tym naszym Ślonsku w miejscu niy przistowoł
Woda znikła a na spongu glajzy położyli
Teroz po nich yno wozki koniami ciongnyli

Jak czas pary sie rozkryńcioł na pełne łobroty
Szachtow ludzie namnożyli no i bestoż potym
Zapomnieli ło tyj sztolni ło wodzie ło torze
Możno teroz coś z tym zrobiom - Szczyńść im Panie Boże.

[broneknotgeld]

Pod Dobromierzym

Szubiyniczno Gora Fryca se poznała
Jak pod Dobromierzym ta bitwa nastała
Stond łon słoł rozkazy wojskami kerowoł
No i łostre lyjty Austryjokom dowoł

Wygroł wielko bitwa czym sie fest ucieszoł
Na noclyg zaś potym do Roztoki śpieszoł
Tam "Hymn Dobromierza" blysnoł mu we gowie
Tako nom pamiontka łostawioł tyn czowiek.

[broneknotgeld]

Wieża w Dobromierzu

Sto lot łod wielki bitwy mijało
Wieży sie władzom tukej zachciało
Na "Szubiyniczny" jom postawiyli
Wielkego Fryca tyż tym uczciyli

No a jak latka leciały dali
Jeszcze jom przeca rozbudowali
Sławno sie wieża we Niymcach stoła
Bo prusko władza fest jeji pszoła

Dyć na stulecie tyj zocny wieży
I dwustulecie "świynta żołnierzy"
Krach był i koniec ze takom chwałom
Bez cufal dzisioj jom momy całom.

[broneknotgeld]

Wieża na Wielki Sowie

Na Wielki Sowie ta wieża staro
Sto lot już prawie tu stoji
Sypie sie teroz - niy jest już jaro
Ło swojo prziszłość sie boji

Piyrwyj tu była cołkym drewniano
Lotek szczimała niywiela
Bestoż z betonu wybudowano
Piykno - jak jakosik frela

Za Niymca miano miała Bismarcka
Ze ajzy ponoć kanclerza
Ło nim mi kedyś godała starka
A dzisioj szymro ta wieża

Werci sie wylyź tukej na gora
Na te Sudety poblikać
Mieć zaś ta gowa choby we chmurach
I za to wszysko porzykać.

[broneknotgeld]

Wielko Sowa

Som stare sztolnie we Wielki Sowie
Kedyś tu srebra szukali
Dyć niych tam lepi niy wlazi czowiek
Bo już to wszysko sie wali.

[broneknotgeld]

Gory Sowie

Łostatnio wojna i Gory Sowie
Tymu niyjedyn dziwi sie czowiek
Zrobiyli Niymcy syr ze tych gor
Tela tu przeca terozki dziur

"Riese"- podziymno wielko fabryka
Cosik sprzed łoczy nom sie wymyka
Co dzisioj wiymy? - Naprowdy mało
Choć to niydowno przeca sie działo

Rożne teorie po gowie chodzom
Kere już może trocha tyż szkodzom
- Że Niymcy UFO tu budowali
To wersjo jako poszła nojdali

Jo bych już wierzoł że możno atom
Do V-2 marzoł sie tym "wariatom"
I choć w tym jeszcze daleko byli
Gruba z uranym tyż rozkryńciyli.

[broneknotgeld]

Dyć czasym bywo

Pechowo wszysko "Riese" nazwali
Legynda z Ksionża tym wspominali
Już kamiyń dzwignoł już blisko był
Dyć sie przeliczoł - łopod ze siył.

[broneknotgeld]

Podziymia
Walimia

Czi sztolnie i hala
Choby jako sala
Zwiydzać już to idzie
Dyć co dali bydzie?

Ponoć wiyncyj tego
Czasu wojynnego
Wiyńźnie tu przebiyli
No i niy przeżyli

Tajymnica dzisioj
Tukej ktosik słyszoł
Nawet ło tych spodkach
Prowdziwo to godka?

[broneknotgeld]

Przełyncz Walimsko

Z Dzierżoniowa do Wałbrzycha karnij se przez Walim
Droga piykno - dyć jom skuli głodu budowali
Wielki głod był na tyj ziymi w wieku dziewiytnostym
Kajsik była "wiosna ludow" a tu ciyngym "posty".

[broneknotgeld]

Osowka

Osowka - nastympne ze wojny podziymie
Wiynksze łod Walimia a co we niym drzymie?
Wspominajom ludzie wodospad we dole
Że dzisioj go niy ma - niyjednego kole
Kolejnych chodnikow szukajom dyć jeszcze
Możno je tu znojdom - a i we to wierzcie
-Pora lot po wojnie Niymce zlondowali
Szpryngli te podziymia i poszli kajś dali.

[broneknotgeld]

"Duch" z Grodna

W zamku Grodno straszy Gośka
Jo żech tyż jom boł sie troszka
Aż mi to wyklarowali
Szkelet naskwol tukej dali

Dlo turystow to jest bajka
Miała prziniyść "złote jajka"
Co mi szkodzi - kożdy prowi
- Wciepnie grosz kościotrupowi

Potym jeszcze roz tu wdepnie
Nici z zamkym już niy przetnie
Coś w tym "duchu" jest takego
Że sie wroco durś do niego.

[broneknotgeld]

Zamek Grodno

Wele Zagorza jest zamek Grodno
Dzisioj turystow sztela to modno
Piyrwyj warownia na gorze Chojnie
By tukej ludzie żyli spokojnie

Bolko Wysoki jom wybudowoł
Bolko Surowy z niyj se polowoł
Jejich burgrabia na zamku siedzioł
Co tu sie dzioło łon wszysko wiedzioł

Z czasym - jak władza ksiyńcia łosłabła
To raubritterom warownia wpadła
Puczek Czetryce - miana niysławne
Czasy to były tyż niyzabawne

W końcu Hochbergi zamek objyli
Potym von Logau ze kamaryli
Tego von Salza - biskupa Wrocka
Zresztom tych panow była tu mocka

Werci sie jeszcze Ebenow wspomnieć
Chocioż ktoś powiy - Lepiyj zapomnieć
Bo chopow łoni gnymbiyli tela
Że bunt przeżyła ta ślonsko sztela

Złe czasy zamku nastały dali
Możno by nawet go łozebrali
Jednak sie znoloz ciekawy kupiec
Profesor Busching - niy jakiś gupiec

Łon wszysko piyknie wyremontowoł
I turystykom sie tu zajmowoł
Było to - dej se pozor czowieku
Z poczontkym dziewiytnostego wieku

Co erbli inksi po śmierci jego
Sprzedali w rynce jednak hrabiego
Tego von Burgaus a po nim przeca
Grodno Zedlitze wziyli do neca

Łoni sie chcieli tym zamkym chwolić
Wiela zrobiyli - widać mu pszoli
Atrakcjo była to ślonski ziymi
We tym jo zgodzom sie tyż ze niymi

Tu dzisioj przeca werci sie wdepnońć
Z zochwytym łokym na wszysko ciepnońć
By coś łostało głymboko w duszy
Nim trza zaś bydzie dalyj wyruszyć.

[broneknotgeld]

Na zamku Grodno

Za drugi wojny tu tysz szukali
Skrziniow co Niymcy ponoć schowali
Jednak niczego niy znojdli tukej
Podziwiej zamek - skarbow niy szukej.

[broneknotgeld]

Jezioro Bystrzycke

Schlesierhtal - wioska tako tu była
Przed piyrszom wojnom sie utopiyła
Przi Grodnie zalyw przeca zrobiyli
Rzeka zaporom se łogrodziyli.

[broneknotgeld]

Podlesie

Wpod Fryderyk Wielki do Podlesio tego
I raban sie zrobioł zaroz wele niego
Do poltowy lipy konia prziwionzali
Lipom Fryderyka jom potym tu zwali

Pieron we nia szczeloł - drzewo łobalyli
Dyć na jeji miejsce żeliwne wstawiyli
Stoji teroz tukej taki dziwny pniok

[broneknotgeld]

Pałac w Bożkowie

Perłom Ziymi Kłodzki tyn pałac i dzisioj
Downiyj było lepiyj - kożdy ło nim słyszoł
Hrabiego Magnisa we tym była gowa
By gościyła tukej tyż prusko krolowa
Na Grodziszcze wstawioł wieża widokowo
Z niyj widok na pałac wiela wszyskim dowo
Dziqwejcie se jednak tyż na park ciekawy
A kedyś tu cuda była dlo zabawy
I dzisioj sie jednak idzie pozochwycać
Pałac park i cołko piykno okolica.

[broneknotgeld]

W Ludwikowicach Kłodzkich

Za Niymca tu wongel bergmony kopali
Dyć po katastrofie niy szło im to dali
Werk na miejscu gruby pryndko postawiyli
Amunicjo tukej bez wojna robiyli
Ło wojnie tu słychać i jyj tajymnicach
Pewnikym ciekawo to jest okolica.

[broneknotgeld]

Wongel

We Nowy Rudzie pastuch na łonce
Ciepnoł w brandera czorne kamiynie
Dyć rozgorzały choby te słońce
Piyrsze to było wonglo polynie

Łod tego czasu som tyż gorniki
- Bo w gorach czorny wongel kopali
Dronżyli we nich dugo chodniki

[broneknotgeld]

Muzeum

We kopalni "Nowo Ruda" muzeum se majom
Te gornictwo "zobytkowe" tu se wspominajom
Trza pamiyntać ciyngym ło tym we tyj Nowy Rudzie
Bo fedrunek to już tukej naprowdy niy pódzie.

[broneknotgeld]

Matka Bosko Bardzko

Jakby we legyndy wierzyć sie nom chciało
Tyj figurce latek doszło by niymało
Ponoć we poczontkach wieku dwunostego
Maryjo tu naszła karlusa jednego
Ło cześć dlo niyj tukej piyknie poprosiyła
No i stond sie pryndko ta rzeźba skondś wziyła
Z bukowego drzewa piyknie wystrugano
Keryj moc niyziymsko richtig jest tu dano
Bo przeca tyloma cudami słynyła
Że na cołkym Ślonsku w zocy wiernych była.

[broneknotgeld]

Bardzko Madonna

Legyndami łobrosł tukej jyj poczontek
Prawdziwy jest pewnie tyn cysterski wontek
Z romańskich rzeźb Ślonska łona richtig piyrszo
Śmiało idzie pedzieć że tyż jest nojwyrszo

Piyrwyj we niywielki kapliczce tu była
Aż sie do kościoła czeskego wkludziyła
Z czasym "kirch" niymiecki stanoł wele niego
Z nacji tych na Ślonsku wiela jest dobrego

Po latach sie piyknie barok tu rozgościoł
Nawiedzynio Marii momy teroz kościoł
Willmann go łozdobioł - tyn nasz ślonski "flamand"
Chocioż był tronkowy - sztuki wielki amant

Madonna sie śmieje - radośnie tronuje
Ze ołtorza szczyńściym na cołki Ślonsk suje
Jak bydziesz we Bardzie do kościoła wdepnij
Porzykej i cosik na ofiara wciepnij.

[broneknotgeld]

Madonna i husyty

Husyty do Barda wdepli
Na czeski kościoł sie ciepli
Potym w niymieckim szukali
Niy było - bestoż sklinali

Łoba kościoły spolyli
Madonny dyć niy zniszczyli
Bo łona we Kłodzku była

[broneknotgeld]

Ciynżke czasy

Jorguś z Podiebradow Bardo tyż nachodzioł
Wtedy Czech z Madziarym ło tyn Ślonsk sie wadzioł
Madonna do Kłodzka zaś se pojechała
Kaj te ciynżke czasy jakoś przeczekała.

[broneknotgeld]

Ślonsko Salamandra

Ślonskom Salamandrom tyż jom nazywali
Przetrwała pożary i była tu dali
Roz jedyn zakonnik chcioł jom wyniyść z łognia
Niy zdonżoł - spoloł sie jako ta pochodnia
We pogorzelisku Madonna leżała
Niyspolono rynka mnicha jom czimała
Wszysko było yno mocno łokopcone
Cud w tym jednak wielki że nic niy spolone
W łoziymnostym wieku zaś braciszek inkszy
Wyciongnoł jom z łognia - u Boga był wiynkszy

Dyć sie przed niyszczyńściym tukej durś chroniyła
By Bardo jyj miało opieka i siyła.

[broneknotgeld]

Pechowy tron

Tron Bardzki Madonny złotnik se rachowoł
Na kupa piyniyndzy - opat ich niy dowoł
Możno łon był jednak we wercie tyż tela
Ze srebra był cołki łozdobiyń mioł wiela

W końcu ło tyn mebel do łostudy doszło
Klasztor niy zapłacioł - do sondu to poszło
Złotnik tron swoj zabroł - kupioł go ktoś inkszy
Bestoż wstyd opata był w tym nawet wiynkszy.

[broneknotgeld]

Sekularyzacjo

Skiż Napoleona Bardo uciyrpiało
Dyć to gorsze było co ze niym sie stało
Jak krol Prus powiedzioł - Sekularyzować
I wszyske zakony pod upadłość stowiać

Utropa z tym wielko przeca tukej była
Majontek cystersow krolowa kupiyła
Aże z Holandyji - richtig dość daleki
Gorzyj że pielgrzymow szło mniyj do ty eki.

[broneknotgeld]

Pontniki

Ci co ta Madonna Bardzko łodwiydzali
Przez caluśke wieki durś jom całowali
Że łona kusiole te wszyske szczimała
Tyż se idzie pedzieć - Cud to jest bezmała
Bestoż sto lot tymu relikwiorz jyj dali
Co by go pontniki teroz całowali.

[broneknotgeld]

Za komuny w Bardzie

Choć z wiarom we Boga ofyn sie pogryźli
To jednak czasami tyż sie w klota piźli
W sześdziesiontym szostym ta figurka świynto
Ukoronowali - wiela to pamiynto
Bo tyż mocka ludzi na to sie zebrało
Chocioż tyj komunie to niy sztimowało.

[broneknotgeld]

Kościoł bardzki

Prziklosztorny kościoł Bardo fest łozdobio
Barok we niym blyszczy - wszyskim sie podobo
Czista lot już we niym Madonna przebywo
Tukej teroz na nia pontnik se podziwo
Łorgany świontyni tyż som richtig zocne
Tony ze nich słychać przepiykne i mocne
Legynda głosiyła że Fryc je fondowoł
Choć dowodu niy ma coby piniondz dowoł.

[broneknotgeld]

Muzeum Sztuki Sakralnej

We tym zocnym Bardzie muzeum tyż majom
Łobrozy monstrancje tukej podziwiajom
Rzeźby i ornaty wyszyte przepiyknie
Tukej se podziwosz - czasu niych ci styknie.

[broneknotgeld]

Cud na Bardzki Gorze

Matka Bosko Płaczonco pastyrza zbudziyła
Niyszczyńścia i szczyńścia tu prorokowała
Ślady stop w kamiyniu łod sia łostawiyła
A potym do nieba sie nazod zabrała

Jak sie inksze ło tym ludzie dowiedzieli
Zaczli tu zaglondać na ślady dziwować
Pamiontka po cudzie wszyscy mieć tyż chcieli
Niy dało sie tego jakoś upilnować

Arcybiskup fondnoł kapliczka ze czasym
Ołtorz stanoł w miejscu kaj były te stopy
Kalwariom sie stała ta gora ze lasym
Ciongnyły tu teroz baby no i chopy

[broneknotgeld]

Osuwisko

Sztyrysta lot tymu we Bardzie sie dzioło
Bez lato tu richtig pieronym fest loło
Woda Gora Bardzko jakosik podmyła
Skały poszły na doł - tako we niyj siyła

Wiela sie tych bergow do Nysy wkulało
I rzeka we biegu to przitamowało
Z miasta już sie ludzie myśleli wynosić
Dyć dzieci Madonna zdołały uprosić

Łona łod powodzi Bardo łobroniyła
I rzeki koryto ździybko przełożyła
Pamiontkom jest po tym wielke osuwisko
Nojwiynksze w Sudetach - łodwiydź jak żeś blisko.

[broneknotgeld]

Słyszoł żech...

Śłyszoł żech to tukej - Jak gora ruszyła
To sie w Zombkowicach wieża pochylyła.

[broneknotgeld]

Zamek

Ta Gora Bardzko zamek tyż miała
Dyć sie historio z niym niy cackała
Czeske husyty go zrujnowali
Żodyn niy miyszkoł w niym potym dali
Chnetko po zamku zniknołby ?lod
Ale archeolog z łopatom wpod.

[broneknotgeld]

Kalwario

Na Kalwario w Bardzie trzi drogi prowadzom
Polok Pepik Niymiec tukej sie niy wadzom
Ta droga niymiecko to Droga Krziżowo
Przi kożdy kapliczce pontnik zowdy stowo
Zajrzy tyż na pewno do Źrodła Maryji
Woda stond pomogo choryj familiji
Kuruje fest gowa no i słabe łoczy
Wszyscy w okolicy majom jom we zocy.

[broneknotgeld]

Rożańcowo

Z Kalwarii blikom na Rożańcowo
Jeji sie teroz byda dziwowoł
Austrioki forty tu budowali
No a Prusoki ciongli to dali

Wtedy jom Łyso Gorom tu zwali
Dyć już historio leci se dali
Teryn kupiyli redymptorysty
Jak wiek dwudziesty był mody czysty

Pryndko stanyły tukej kaplice
Choby rożańca te tajymnice
Zajrzyj do kożdy bo przeca czeba
Poczujesz wtedy sie bliżyj nieba.

[broneknotgeld]

Kłodzke podziymia

To co na wiyrchu - w Kłodzku podziwiali
Dyć wgłomb do piwnic tu niy zoglondali
A tam przez wieki rosło miasto druge
Studnie głymboke i chodniki duge
Wiyncyj dziur miała niż kyjza ta skała
Cud że przez lata to wszysko szczimała
Z czasym zwietrzała - wloła sie tyż woda
Już w Polsce widać było wielko szkoda
Walić zaczyły sie te chałpy piykne
Jako to retnońć? Czy czasu wystyknie?
Szpec łod gornictwa jednak sie poradził
Kaj yno umioł trzi grosze swe wsadzioł
Zaloł betonym wzmocnioł fundamynty
We tych podziymiach ujawnioł talynty
Kere w bergmonach durś przeca drzymały
No i sie łostoł tyn grod prawie cały
Zaś na pamiontka po ciynżki robocie
I by turystom dodać trocha pociech
Momy terozki tu podziymno trasa
Kaj medytujesz ło tych downych czasach
I wojnach co przez Ślonzek sie kulały

[broneknotgeld]

Twierdza Kłodzko

Grod był we Kłodzku słowiański prastary
Jeszcze niym Polska ziymie te podbiyła
Tyndy do Rzymu szły przeca jantary
A okolica durś rosła we siyła

Za Piastow zamek stanoł tu na gorze
Kery pilnowoł durś ważnego szlaku
Załoga liczno stoła w jego murze
Kłodzko to trocha taki ślonski Krakow

Twierdza zrobiyli z niego Austryjoki
Fryc Wielki dalyj jom budowoł
Coby tu mocno stanyli Prusoki
Wielgachny donjon we środku niyj stowioł

Chwolom sie Niymcy - W Prusach yno łona
Łoparła wojskom sie Napoleona
Dyć jo tam niy wiym coby sie z niom stało
Jakby sie ze Tylży "pokoju" niy miało

Z czasym ze twierdzy zrobiyli wiyńziynie
Kere rygorym we Niymcach tyż słynie
Dzisioj zabytek to na polski stronie
Bawi turystow - twierdzy jest już koniec.

[broneknotgeld]

Pruski romans

Groźnych bańdziorow w Kłodzku wyńziyli
Jednak niy łoni sławni tu byli
Terozki wspomnieć chyba jo musza
Zakochanego dość fest karlusa

Fryderyk von Trenck - piykny i mody
Tu łod miyłości zażył ochłody
Smoloł cholywki do siostry krola
Ale niy wygroł ze Frycym fula

Chocioż Amalia nic sie niy broni
Krol sie niy godzi - do twierdzy goni
Niy chce we hrabim szwagra swojego
Widzi w tym gańba dlo tronu swego

Hareszt nakłado pryndko na szaca
Wojsko go wiezie do tego Glatza
Miało być pszonie a jest wiyńziynie
Jak kamiyń Fryca twarde sumiynie

Po prowdzie w twierdzy go niy mynczyli
Na wiela przeca mu pozwolyli
A łon durś myśloł ło lipście swoji
I ło ucieczce z wiyńziynio roji

Bestoż do skutku pitać probowoł
Aż sztyry razy rady niy dowoł
Jednak za piontym gładko mu wyszło
Choć ło Amalii marzynie prysło

We cołkich Niymcach szukali zbiega
Dyć wystraszyli jednak jak czeba
Zaocznie wyrok śmierci mu dali
I na szafocie gymba wiyszali

Wielkymu uciyk Fryderyk mały
Z miyłości nici - choć karlus cały
Taki był koniec historii cołki
Pszajesz - uwożej jednak na stołki.

[broneknotgeld]

Minerske chodniki

Minerske chodniki atrakcjom som kłodzkom
Światła tukej było choćby ciymnom nockom
A przeca wojoki musieli w niych chodzić
Jak oblegajoncym chcieli fest zaszkodzić
Żodyn niy śmioł myśleć ło świyczce pochodni
W luft by wylecieli pryndzyj niż ktoś łod nich

Po prowdzie to z tego pożytku niy było
Rzodko oblygali - czynsto sie ćwiczyło.

[broneknotgeld]

Arcybiskup Arnost

Syn kasztelana na kłodzkim zamku
Wele Pardubic rodzony
Fater mu pedzioł - Ty mody panku
Dobrze mosz być wykształcony

U joannitow w tutejszy szkole
Leciała nojpiyrw nauka
Dyć przeca jeszcze jako pachole
Do Boga chcioł drogi szukać

Bo jak roz rzykoł w kłodzkim kościele
Wejrzoł na Marii figura
To medytować dała mu wiele
Łoczy wlepiyła do mura

Studiowoł prawo w Padwie Bolonii
Zostoł biskupym we Pradze
Myśl ło Maryji kajsik go goni
Jom zowdy mo na uwadze

Przez cołke życie Kłodzko mioł w zocy
Tu augustianow sprowadzioł
Arcybiskupym - z całyj swyj mocy
Co dobre w ziymia ta wsadzioł

Dyć prawie już go Watykan wołoł
By siednoł na jego tronie
Do sia go jednak som Bog prziwołoł
Życio wyznaczoł mu koniec

Łostatnio wola spełniyli jego
W Kłodzku go pochowoli
Zaś tu Maryja paczy na niego
Czy zocny żywot pochwoli?

Som Arnost wiedzioł jak ze tym bydzie
Że za swo pycha zapłaci
Figura jego skruszonom bydzie
A gymba rysy zatraci

To co jest boske i co czowieka
Chyba sie tu powadziyło
A jednak zgoda wlazła w ta eka
Bo dali już lepiyj było

Jak ze okładym sto lot minyło
Z grobu Arnosta naszego
Cudnym balsamym mocno gichnyło
Koniec pokuty był jego

Dzisioj już szło by do świyntych grona
Arcybiskupa postawić
Maryja - możno sprawi to Łona
My sie mogymy tyż wstawić.

[broneknotgeld]

Hrabianka Orsini

Hrabianka? - po prowdzie ze niyj mieszczka była
Z goroncego pszonio na Ślonsku słynyła
Tych liplingow swojich ponoć struła wiela
Jak już niy wydoloł to mioł z tego tela

Godajom tyż ło tym - co robiyła łona
Jak armio tu prziszła łod Napoleona
Ponoć w twierdzy kłodzki podtruła załoga
Coby sie poddali wojskom tego "boga"

Dyć za to co złego naprowdy zrobiyła
W końcu do tyj twierdzy za wiyńźnia trefiyła
Łodsiedziała tukej aż dwadziścia lotek

[broneknotgeld]

Baron Wacław Kinski

Za tych Austryjokow Kinski w Kłodzku siedzioł
Spiskowoł i jontrzoł - Habsburg sie dowiedzioł
Wysłoł pod eskortom do zamku kłodzkiego
Dyć Kinski durś myśloł jak uciyc ze niego

No i musza pedzieć że mu sie udało
Jak wino we gowie strażnikom szumiało
Dziura pryndzyj wykuł zrobioł tyż drabina
Wszyscy tukej potym mieli kwaśno mina.

[broneknotgeld]

Andreas Faulhaber w Kłodzku

Ksiondz Faulhaber - twierdzy wiyńziyń richtig zocny
Coż - kej mioł paragraf na siebie dość mocny
Kusioł do dezercji - to mu zarzucali
Tego w wojsku Fryca niy tolerowali

Godali co było niywiela w tym prowdy
Na zimne dmuchali - to robiyli zowdy
Jego przeznaczyniym kara śmierci była
Dyć na tym historio sie niy zakończyła

Cuda z ciałym dugo sie tu potym działy
Zwłoki przeca wcale sie niy rozkłodały
W końcu pochowali je w kłodzkim kościele
Tako ta historio ciekawie sie ściele.

[broneknotgeld]

Wielko i mało.

Wielko i mało twierdza Nysa Kłodzko dzielyła
Forteczno Gora wiynkszo - Owczo myńszo zajyła
Z Czech do Ślonzka te twierdze droga fest zamknyły
Łone już prusko ziymia przed Austryjom broniyły

Bajajom ludzie - Kedyś podziymie je łonczyło
Kto szuko - możno tam trefi - oby sie spełniyło
Plany fortecy niypełne - jak chcesz licz na wiela
Dyć niyjedyn durś godo - Blyśnie jeszcze ta sztela

[broneknotgeld]

Finowie w Kłodzku

Przez drugo wojna wiyńziyli tukej
Finow - dyć dzisioj prożno ich szukej
Co do jednego wymordowali
I niy wiadomo kaj pochowali

Niy yno jyńcow ta śmierć spotkała
Bo ich cywili tyż se zabrała
Kajś ich wywiyźli w kierunku Piły
Wele Szydłowca ślady zginyły.

[broneknotgeld]

Most na Młynowce

Siedymset lot już we Kłodzku stoji
Czasu sie jakoś wiela niy boji
I choć tak dugo Młynowka spino
Przeca sie jeszcze nom niy ugino
Podobny ponoć jest yno w Pradze
Miyjcie to ludzie tyż na uwadze.

[broneknotgeld]

Pałac w Kamiyńcu Zombkowickim

Pałac we Kamiyńcu tyż Ślonska był cudym
Schinkel go budowoł pod koniec żywota
Siedym lot dzwigali ta budowla z trudym
Kosztowoł łon yno ze trzi tony złota

Marianna Orańsko to finansowała
Za syna łod krola piyrwyj sie wydała
A jak na pałacu postawiyli wiecha
Cołke Prusy miały pierońsko uciecha

Bo znojdła sie szaca w swoji stajni blisko
Ze Hohenzollernym szajdong pryndko wziyła
Z liplingym w pałacu łona sie zamiyszko
Bo we jeji pszoniu była tako siyła

Choć mury eks-chopa czynsto tyż widziały
Dyć przeca Kamiyniec był richtig niymały
Niy to co dzisiejsze małe nasze budy
Jak sie niy widzieli niy było łostudy.

[broneknotgeld]

To ci jazda

Marianny Orański żywot był burzliwy
Dyć nawet po śmierci czekały jom dziwy
Jak ruske soldaty Kamiyniec zajyli
To i jeji zwłokom tyż niy łodpuściyli

Wyciongli jom z truły - wietrzyli na dworze
No i łobwoziyli nawet na motorze
Ciekawe co potym ze niom tu sie dzioło
Pewnie jyj z Ruskimi niy było wesoło.

[broneknotgeld]

Pałac Kultury i Nauki

Uczyli mie w szkole że Pałac Kultury
Jest darym Sowietow dlo tyj naszy dziury
Ze Kamiyńca jednak poszły tam marmury
Powiydz czym durś blyszczom te warszawske mury

Bestoż tukej godom że ślonsko to sprawa
Jako i ta cegła z keryj jest Warszawa.

[broneknotgeld]

Zombkowice Ślonske

Zombkowice - to miano łod rycerza Zombka
Tako trombi tukej yno polsko trombka
Inksi tyż godajom że tu gyjbis złoty
Znodli we ruinach a możno pod płotym.

[broneknotgeld]

Frankenstein

Frankońsko berga - ciekawe miano
Ze downych wiekow ta sztela znano
Pewnie tu ściongło tych kolonistow
Za lepszym życiym chcieli se prziś tu.

[broneknotgeld]

Krziwo Wieża

Niy trza ciś do Pizy na ta wieża krzowo
Jak we Zombkowicach tyż jest take dziwo
Ponoć piyrwyj prosto łona tukej była
Dodali jyj metrow to sie pochylyła.

[broneknotgeld]

We Zombkowicach Ślonskich

We Zombkowicach morym powioło
Niy było wtedy w mieście wesoło
Śmiertka tom kosom fest wywijała
Ćwierć miasta w końcu sie tu zabrała

Winnych szukali we takim czasie
Fest sie toplali wtedy w marasie
Na kopidołow ciepli złe łoko
I łotrombiyli zbrodnia szyroko

"Przoszkym ze trupow ludzi potruli
Serca ze piersi bajtlow wypruli
By na surowo potym je zjodać"
- Wiela by jeszcze tu ło tym godać

Do win sie inkszych tyż prziznowali
Przeca ich mocno torturowali
Karom śmierć była - tyjater krwawy
Take to wtedy mieli "zabawy"

Tli rynce nogi nawet puloki
Piykli im kloty dupy i boki
Stos konczoł jejich na ziymi piekło
Mor jednak łostoł - to niy uciekło

Możno Pon Boczek tych mieszczan koroł
Dalyj trwoł tukej kostuchy horror
Frankenstein - miasto sie wtedy zwało
Dyć we legyndy sie tyż dostało

Dżuma potworym sie potym stała
Co Zombkowice zniszczoł bez mała
Choć rynka bosko go tyż dosiyngła
Jakoś legynda w powieść sie wprzyngła.

[broneknotgeld]

Stolecko ruina

Wele Zombkowic we wiosce Stolec
Pałac stoł piykny choby pachole
Z łoziymnostego był wieku ino
Terozki to sie nom przipomino

Jak drugo wojna w świecie nastała
To SA dlo sia połac zabrała
Potym zaś Ruski wiela pokradli
No i Cygany jeszcze tu wpadli

Dzisioj niywiela z niego łostało
Ło piykne mury nic sie niy dbało
Mogby tu blyszczeć - łoczy nom cieszyć
Dbać trzeba było - a niy durś grzeszyć.

[broneknotgeld]

Skałki Stolecke

We Skałkach Stoleckich skarbow tyż szukali
Co we drugo wojna Niymce pochowali
Piyrwyj srebra tukej była gruba mało
Ło jyj tajymnicach godajom niyśmiało
Pewne że przed Rusym cosik tu pokryli
Co? - Możno ze sobom już do grobu wziyli
I chocioż to kedyś tyż łodkopywali
To jednak sie w końcu ze tym spokoj dali
I łod tego czasu chodzi tako plotka
Że gazy bojowe idzie tam napotkać.

[broneknotgeld]

Zamek w Zombkowicach Śl.

Dzisioj we ruinie zamek zombkowicki
Dyć przeca niy było tak ze niym tu wdycki
Pepikow to kedyś solidno forteca
Potym piykny zamek z renesansu neca

Problym we tym jednak że durś zdobywany
W końcu przestoł lyczyć swoje wielke rany
Łostatnio łod Szwedow uciyrpioł pieronym
Potym jeszcze landrat trocha chodzioł po niym

W koncu łopuszczony w łoziymnostym wieku
We ruina pryndko miynioł sie czowieku
Pożar strowioł dachy fosa zasypali
No i jak niszczoł niszczy sie nom dali.

[broneknotgeld]

Kapliczka Maryjno

Stoła kapliczka wele Bożkowa
Na muster Marii z Loreto Domku
Zowdy pustelnik chowoł tam gowa
I niy trza było tyż wcale zomkow

Bender to zocny był eremita
Rzeźbioł se świontki i je przedowoł
Pszoł mu tu kożdy chop i kobiyta
Łon im nabożne ksionżki rozdowoł

Jednak jak Ruski stanyli w progu
To ich pierońsko gardło suszyło
Niy mioł gorzoły - dali go Bogu
Tako sie życie jego skończyło

Dzisioj już piykny kapliczki niy ma
Pustelnik leży se na smyntorzu
Pewnie z dziedzicym faflo na tymat
Naszego Ślonska - co oby ożoł.

[broneknotgeld]

Rod Magnisow

Ze Szwecji przez Austrio Magnisy tu prziszli
Hrabia Aleksander wzioł se frela z Kłodzka
Nakupioł tu ziymi by po jego myśli
Na Ślonsku familio znaczyła tyż mocka

Bożkow piyrwyj wybroł - dyć to było mało
Pryndko jego były te Ołdrzychowice
Wolborza Ścinawki tyż mu sie zachciało
Nowo Ruda no i jeji okolice

Majontek ich richtig znaczoł tukej wiela
Ślonsk gniozdym Magnisow aż po wojna drugo
Dyć potym musieli łopuścić ta sztela
Los im wtedy przeca złowrogo zamrugoł.

[broneknotgeld]

W Ołdrzychowicach

Graf Aleksander w Ołdrzychowicach
krola z krolowom ugośćioł szumnie
Blyszczała w łoczach ich okolica
A łon "na rynkach" ich nosioł dumnie

Dyć we tych latach prusko krolowa
Luiza - wiycie ło kero idzie
To nojpiykniejszo w koronie gowa
A Prusy jeszcze niy były w biydzie

Po tym byzuchu na naszym Ślonsku
Ciekawo tukej pamiontka była
Kolumna z ajzy we jednym konsku
Komuna jednak jom przetopiyła.

[broneknotgeld]

Kolumna

By radość nom głosić przi drodze stanyła
Że na Ziymia Kłodzko Luiza przibyła
Trzi dwadziścia metrow zloli w jedyn konsek
Już wtedy we szwongu był nasz zocny Ślonzek
Choć wiek dziewiytnosty dopiyro raczkowoł
Przemysł tukej twardo już na szłapach stowoł
Co zaś do kolumny - łodsłonioł jom Redyn
Tuz ślonski choć przeca niy yno łon jedyn.

[broneknotgeld]

Orchideje

Niy yno tyn pałac blyszczoł nom w Bożkowie
Kwiotkami sie tukej zochwycoł tyż czowiek
Wiela było takich co blikać jeździyli
Na te orchideje kere tu sadziyli.

[broneknotgeld]

"Zameczek" w Bożkowie

Ta sztuczno ruina we parku durś jest
Grafini von Gotzen miała taki gest
Dwiesta lot już idzie łoglondać to tukej
Moda tako była - w tym prziczyny szukej
Dyć w Europie wtedy romantyzm był w zocy
Stowiali "ruiny" by cieszyć tym łoczy
Tukej tyż dynkmale stare sie ściongnyli
Bestoż miano "zamek" dubeltowo myli.

[broneknotgeld]

Zamek w Gorzanowie

Wele Bystrzycy we Gorzanowie
Na wielki zamek dziwo se czowiek
W szesnistym wieku go zbudowali
Chocioż rosł przeca łon tukej dali

Jak Herbersteiny se go kupiyli
Za rozbudowa pryndko se wziyli
Izbow mioł w koncu aż sto dwadziścia
Wloz żeś - dyć ciynżko trefić do wyńścia

Park wele zamku dobytku tela
Dziw broł jak wejrzoł żeś na ta sztela
Browar spichlerze stajnie kurniki
Stawy łogrody w klotkach kroliki

Oranżeryje groty altany
Sad nawet kościoł jak malowany
Szkołka i tory do rajtowanio
Osobno sala do tańcowanio

Szło by tu jeszcze wiela tyż dodać
Dyć po prożnicy terozki godać
Po drugi wojnie wszysko sie chyli
Bestoż na zamku duch jakiś kwili.

[broneknotgeld]

"Złoto Kaczka"

Mineralki miano
Słynoł niom Gorzanow
W Hrabstwie Kłodzkim znano
Cieszyła tu panow.

[broneknotgeld]

Gorzanowsko brama

Brama do przeszłości w Gorzanowie stoji
Ło downiejszych wiekach godać sie niy boji
Graf chcioł coby antyk mu przipominała
Chop tu jednak wiedzioł że to jakoś chała

Bo serce mioł zimne jak dyjamynt w nocy
Pańszczyzny dołożoł - niy stykło już mocy
Ze jego majontkow chopy uciykali
Było że i zbrojnie tyż sie buntowali

W łoziymnostym wieku krew sie loła tukej
Szczyńścio na tyj ziymi niy za wiela szukej
Brama ło tym godo choc niy kożdy słucho
Bo niyjedna dusza na krziwda jest gucho.

[broneknotgeld]

Tyjater w Gorzanowie

Tyjater w zamku - dyć dlo odmiany
Bawiyli tukej sie możne pany
Śmietonka kłodzko miała go w zocy
Paśli tu uszy i paśli łoczy

Herberstein na to durś suł markami
Asioł sławnymi sie aktorami
Kerych z Europy już ściongoł prawie
Bo ło tyjatrze łon śnioł na jawie.

[broneknotgeld]

Misterja Pasyjne

Za zocne te pasje - tu do Gorzanowa
Niyjedna gaftała przeca yno gowa
Zjyżdżały sie wiernych aż tysionce tukej
Sławniejszych misterjow w Europie niy szukej

Kożdy chcioł je widzieć - walyły tu tłumy
Szkoda że tych pasji łod downa niy momy
Skończyło sie wszysko z wyborym Hitlera
Pryndko zakozali - a niych ich cholera!

[broneknotgeld]

Na Gromniku
Wały na Gromniku? Łużycke grodzisko?
Zajrzyj ze Strzelina bo przeca to blisko
Na Ślynży Raduni miejsca kultu znane
Dyć i te gromnicke mo być podziwiane.

[broneknotgeld]

Pod Strzelinym

Pod Strzelinym na Wzgorzu Wiatracznym
Stoła kedyś pogańsko gontyna
Może pomysł to bydzie pokraczny
Dyć se myśla - trza ło tym wspominać.

[Gość: inksze na drzewo]

Kebyście Nóm przepedzieli,
bydymy Go w Uni mjeli?
Szczekajóm pó Niym, jargajóm,
same lepszygo niy majóm!

[broneknotgeld]

Ślonzek we Unii już przeca jest
Wiym - umynczony pierońsko fest
Dyć przeca zowdy w duszach nom był
Ze nich se dźwignie nabiere siył.

[broneknotgeld]

[broneknotgeld]

Wiadukt

Sto szejśdziesiont lot tymu - szkryfna to ze gowy
Stanoł w Bolesławcu wiadukt kolejowy
Ganzel tako piyknie go zaprojektowoł
Że sie cołki jakby w ta ziymia wpasowoł
Nojdugszy do dzisioj łon ponoć na Ślonsku
Piyńćset metrow prawie - tela w jednym konsku

[broneknotgeld]

Sudety

Klaudiusz Ptolemeusz "Germanio" łopisoł
Tam już ło Sudetach tyż cosik namiyszoł.

[broneknotgeld]

Miyndzy bramami

Z zachdu Łużycko - Morawsko na wschodzie
Środek Sudetami niebo ździybko bodzie.

[broneknotgeld]

We Gorach Stołowych

We Gorach Stołowych Liczyrzepa siedzioł
Downiyj cołki Ślonzek dobrze ło tym wiedzioł.

[broneknotgeld]

Sudecke muflony

Skond te muflony w Sudetach som?
Dyć ze Korsyki - jak jo sie znom
Dwa wieki nazod ściongli je tukej
We historyji ło tym poszukej

[broneknotgeld]

Jelynio Gora 1817

Przewodniki karkonoske do kupy se wziyli
I swoj "Verein" piyrszy w świecie podobnoś zrobiyli
Sztaut mieli i legitki - nawet tyż odznaki
Bo przewodnik zowdy karlus tu niybelejaki.

[broneknotgeld]

Chopin w Dusznikach

Nastoletni Chopin tukej se kurowoł
I publice piyrszy tyż koncert tu dowoł
Podobnoś skiż pszonio do tutejszy frelki
Pokozoł w Dusznikach że talynt mo wielki.

[Gość: pasikoonik]

Lepi bys'cie rzykli, fto boou Rehtoor Jygo?
Cyj Go - Kunsztu i Wjydza, prziwjooduy do tygo!?

[broneknotgeld]

Mie idzie tyż ło to by inksi kszryflali
Prozom abo rymym w klawiyra klupali.

[broneknotgeld]

Szklarsko Porymba 1900

Klub narciarzy we tym roku tukej założyli
Toż na cołkym naszym Ślonsku łoni piyrsi byli

[fiodorus]

Witaj Broneknodgeld"!
Jesteś, moim zdaniem jednym z niewielu (obok Owerola i paru innych), którzy na
tym forum posługują się autentyczna slonska godkom.
I jeszcze z talentem
Pozdrawiam :-)))

[broneknotgeld]

Hehe - dziynki za uznanie
Dlo mnie to jak przikozanie
Jedynoste - SZKRYFLEJ WIELA
Ślonsk urośnie - godom tela.

[Gość: kiyks]

Bronku pozdrowiynia ze Mysłowic. Łodezwia sie za niydugo.

Kiyks

[broneknotgeld]

Tyż cie pozdrowiom.

Za pozdrowiynie serdeczne dziynki
Włoncz sie w tyn tymat - niy żałuj rynki.

[Gość: ruk-cuk]

Na wjyrh! Coby niy s'leciou.

Ajnyn ruk!

[broneknotgeld]

Hehe - dziynkuja
Tyż tako suja.

[Gość: pasikoonik]

A Jo ino tukej gibko szuru-buru,
bo Mi couki bydzie zimny gornek rzuru!

[amoremio]

A kaj KrolHuta ?
Czekom ungeduldig.

Brawo i dziynki!

Kyjnigs Hitty

[Gość: pasikoonik]

Zaniym uo Kyjnigs Hitty powjym Woom suowoow pora,
trza spoomniec' folwark jedyn i pola z jego dwora!

Bo przeca zaniym Gruba, a potym Werk z tym Mjanym
powstauy, na tym mjejscu kouysou wjater uanym.

To Uogewnikoow Ziymja, co woongel w sia skrowaua,
prziboouym zewszoond Ludzioom gos'cina swo dowaua!

I bez to zaniym shwoulac' tu dzieua inksze byma,
to uszanujma szczyn's'ciy spotkanio wtynczos s Niyma!

Bo cy by potym moguy, Bergmoonoow i Hutnikoow
rados'cie spotkac' jaky bez Wjoona Uogewnikoow?

[broneknotgeld]

Ło Krolewski Hucie tam cosik se znojdzie
forum.gazeta.pl/forum/72,2.html?f=261&w=8164888&a=8903681
Ze czasym tyż tukej ta sztela nom dojdzie.

[Gość: pasokoonik]

A podwjel co, hyba wsadza tukej "wait" - y,
coby casym woontek niy spod ze ty zajty !

[broneknotgeld]

Wejrzyjcie tam tyż - se piyknie leci
forum.gazeta.pl/forum/72,2.html?f=72&w=6507989&s=0
We Wrocku wiela idzie naklecić.