Zabrzańske rymowanki

[broneknotgeld]

Dzieciontko wczoraj tako pedziało
Co tukej rymu ło Zabrzu mało
Toż trza tyn feler gibko naprawić
Byście sie godkom tyż mogli bawić.

[broneknotgeld]

Grzibowicko legynda

Grzib tukej miyszkoł kedyś przed laty
Ponoć był piernik richtig bogaty
I do swojego durś prziwionzany
Że ze tym wszyskim chcioł być chowany

We ziymi leży przeca już downo
A z nim tyż ślubno - kedyś szykowno
Kota dociepli i psa starego
Tyż wor piniyndzy co był łod niego

Jak już mioł wszysko poszoł do Piotra
By wrota nieba przed Grzibym łotwar
A świynty Pioter yno zamrugoł
W czyśću pokuta zadoł mu dugo

Pedzioł mi kedyś tyż jedyn ołpa
Że z tych piniyndzy co wzioł sie kupa
Mo w Grzibowicach być coś dobrego
Wtedy sie skończy kara łod niego

Szukali forsy już lot za wiela
Znojść niy umieli i majom tela
Co dlo sia yno ciynżko zarobiom
Ło skarb zapytej - w gowa sie szkrobiom.

[broneknotgeld]

Mikulczycko legynda

We Mikulczycach kedyś godali
Że tukej Zobrze siyngo nojdali
W historio wiekow naprowdy starych
Choć dzisioj ciynżko dać tymu wiary

Ponoć by miały już tysionc lot
Z czego tyż byłbych naprowdy rod
Taki gyburstag - radości wiela
Blysła by przeca wiyncyj ta sztela

Drewniany kościoł kedyś tu stoł
Łon downe daty na belce mioł
We łoziymnostym wieku je znodli
Na ślad historii tyj wtedy wpodli

Jednak ze czasym niszczoł zabytek
Remont - za wielki był dlo nich zbytek
I Bytomiowi go łodsprzedali
Kery mu pisoł historio dali

We parku miejskim go postawiyli
Świynto galerio tam sie zrobiyli
Z czasym zaś pomnik łod ofiar wojny
Tu drugo wojna przetrwoł spokojny

Dalyj tyż Bytom mioł go we zocy
Cieszoł łon kożde tukej nom łoczy
W końcu sie spoloł choć był niywinny
Jak nastoł w Polsce tyn "stan wojynny"

Bestoż tam dzisioj tych dat niy szukej
Choć szłoby zadbać ło sprawa tukej
Czy som papiory? Wiela w tym prowdy?
Historio swojo znać trzeba zowdy.

[broneknotgeld]

Tatarka z Mikulczyc

W dziewiytnostym wieku stoł tu słup z kamiynia
Ło kerym ciekawie bajała ta ziymia
Cosik we tym było - przeca znojdowali
Broń - jak we tym miejscu ziymia połorali

Podobno Tatary co Krakow zdobyli
W naszych Mikulczycach tyż dość dugo byli
Koczowała tukej mało chańsko horda
Łobrońcow grodziska chcieli wziońć za morda

Z marszu sie to jednak wcale niy udało
A jak łoblynżynie durś sie przeciongało
Słup tyn postawiyli by wojskym kerować
Przed łokym Tatara niy szło sie już schować

Zaczyli na polach gryka potym sadzić
By sie ze prowiantym w prziszłości poradzić
Bo łoni łod downa jom przeca wcinali
A we Polsce tego nic a nic niy znali

Dyć choć pod Legnicom richtig nos pobiyli
Jednak sie ze Ślonska dość pryndko cofnyli
Na południe poszły ichnie czambuliki
Tatarkom do dzisioj zowiom ziorka gryki.

[broneknotgeld]

Zabrze

Serca tu szyjom piyknie
Ale to im niy styknie
Przemysłym chcieliby słynońć
Co jakby mioł już przeminońć.

[broneknotgeld]

Kończyce

Dzisioj w Kończycach Zabrze sie kończy
A kedyś Polska kończyła
Tyn skrowek ziymi jednak tyż łonczy
Plastyka tu sie wkludziyła
Z całego Zabrza a i ze Rudy
Uczom sie mode artysty
I chocia wszyńdzie durś jeszcze brudy
W sztuce Ślonsk bardzi nom blyszczy.

[broneknotgeld]

Pawłów

Paulka we godle tam majom
I durś do niego rzykajom
Pobożnie w Pawłowie żyjom
Podobno niywiela pijom

Jednak w to niy chce sie wierzyć!
Jak w Zabrzu bez picio przeżyć?!

[broneknotgeld]

Ze Zabrzo

Zabrze

Ze Szczurołapa słynyło Zobrze
Wspomino sie go tukej zaś dobrze
Teroz nostały nom take czasy
Że w mieście szczury mogby postraszyć.

[broneknotgeld]

Zabrze

Kedyś nojwiynkszo Europy wiocha
I dzisioj z tego mo tyż coś trocha.

[broneknotgeld]

Biskupice

Biskup ze Wrocławia mioł te Biskupice
Już w czinostym wieku - chyba mi wierzycie
A jak niy wierzycie pytejcie ta Viola
No i Władysława - ksiyńcia ze Opola
We piytnostym wieku tu Husyty wpodli
Pokradli zniszczyli co cynnego znodli
Po czeskich honcwotach prziszli te Tatary
Niy było tu szczyńścio yno same mary
Możno tyż skiż tego we wieku nastympnym
Biskup je chcioł sprzedać i znoloz sie chyntny
Dyć nazwa łostała - do dzisioj jom znomy
Przeca to dzielnica kero w Zabrzu momy.

[broneknotgeld]

Dziedzice Biskupic

Jak trza było forsy z Wrocka biskupowi
Bierawskymu przedoł je Mikołajowi
Ze Rudom je czimoł tyż Jan Gierałtowski
Syn zaś po nim erbnoł dyć dopustym boskim
Pomarł dosyć pryndko a po nim ta wdowa
Coś drapko za Prażmy była wyjść gotowa
Zastawiyła nawet swoje Biskupice
Bestoż tu Koniccy stali sie dziedzice
W siedymnostym wieku - we jego połowie
Zwolski na tyj ziymi był nojpiyrszy czowiek
Potym je ucapioł baron Jerzy Welczek
Jak pomarł to wdowa rzońdziyła tu wielce
Dyć po jeji śmierci zaś erbli to Prażmy
Potym hrabia Dunin był tu richtig ważny
Stechowowi przedoł wioska za guldyny
Łon majorat zrobioł ze swojyj dziedziny
Jak syn jego pomar dostała to cera
Ballestrema ślubno i łon mioł to teraz
Ze ślubnom te piykne Biskupice dostoł
Majorat we rynkach Ballestremow łostoł
Czimali to wszysko jak mogli nojduży
Aż po wiek dwudziesty by Ślonskowi służyć.

[broneknotgeld]

Biskupicko parafio św Jana Krzciciela

We "Rejestr Ujazdu" łoka jo niy wroża
Dyć wiym że pisali ło łanach farorza
Kery w Biskupicach na parafii siedzioł
Siedymset lot tymu - szmat czasu - bych pedzioł

Kościoł tu być musioł malutki drewniany
We tych downych czasach czynsto łokrodany
Bo tu buszowali husyty tatary
Pewnie tyż sie spoloł kościołek tyn stary

Nowy kościoł z drewna potym postawiyli
Jak sie wiek piytnosty już cołkym pochylił
Osobno dzwonnica jymu zbudowali
I Jana Krzciciela miano świynte dali

Za reformacyji żle sie tukej dzioło
Przeca katolikom niy było wesoło
Z czasym jednak wszysko wrociyło do normy
A farorz z Biskupic nabroł wiynkszy formy

Dyć za Ballestremow w dziewiytnostym wieku
Niy wyczimoł burzy tyn kościoł - czowieku
Nowy pryndko stanoł staraniym hrabiego
Do dzisioj łon blyszczy - przyńdź sie wele niego

Jest neogotycki wyglondo se piyknie
Wszyskim parafianom jednak krotko styknie
Przeca jak tu przemysł zaczyli budować
To pryndko za ciasny poczoł sie zaś stować

W downych czasach na mszo Ruda tu chodziyła
A i dlo Zaborzo parafio ta była
Odpadła ta Ruda to samo Zaborze
W końcu inkszy kościoł stanońć sie tyż może

Jednak parafiany wszyske ło tym wiedzom
Że Jan Krzciciel zaczoł co stoji za miedzom
Siedym wiekow wiara ciyngym kwitnie tukej
Jak u ciebie słabo - w tym kościele szukej.

[broneknotgeld]

Mikulczyce

Ziymi Bytomski te Mikulczyce
Tarnowske Gory tyż miały
Dzisioj - dyć wszyscy dobrze to wiycie
W Zobrzu tyn konsek niymały

W ślonskim kodeksie tyż ło nich wzmianka
Dobiesław czimoł je wtedy
We tyj historii jest trocha manka
Wiela? Dowiymy sie kedyś

Na razie ważny jest wiek cztyrnosty
Z garcow nom łone słynyły
Dyć chopy wiela tu miały troski
Choć Pon Bog dodowoł siyły

Panow Mikulczyc tyż było wiela
Niy byda ich tukej liczoł
Poleku jednak rosła ta sztela
Ślonzok sie nigdy niy byczoł

Mog coś dorobić w kamiyniołomie
Bo złoże wapnia tu było
I chocioż w końcu z tym prziszoł koniec
Jakoś sie dalyj kryńciyło

Za Donnersmacka już wszysko rosło
Torg cug agyncjo pocztowo
I nawet gruba - do tego doszło
Buduje sie tukej nowo

Ronk do roboty trza było wiyncyj
Rosła ta gmina we siyła
Czas robioł swoje i lecioł pryndzyj
W końcu sie w Zobrze wtopiyła.

[broneknotgeld]

Biskupice - Zaborze

Legły sie Biskupice przi borze
A za niym było Zaborze.

[broneknotgeld]

Po łostatniyj wojnie...

Po łostatniyj wojnie w tutejszym ratuszu
Piyrszy Urzond Gminy Opolszczyzny ruszoł
Dzisioj sie dziwiymy bo opolske dalyj
Granica sprzed wojny wtedy uwożali

We Ziymi Bytomski Mikulczyce były
Choć za pora lotek z Zobrzym sie złonczyły
W piyńdziesiontym piyrszym roku to sie stało
Dyć po dziyń dzisiejszy już tako łostało.

[broneknotgeld]

"Gazeta Mikulczycka"

Dyć dziwowała sie okolica
Piyrszom gazetom we Mikulczycach
Kero wydali pryndko po wojnie
Chocioż niy było jeszcze spokojnie

We gminie rzońdzioł Gawlik Wincynty
Co go dość mocno polyły piynty
W sztyrdziestym piontym w miesioncu maju
Już ta gazeta tu wydowajom

I niy dość tego bo na zadatek
Wychodzioł do niyj jeszcze dodatek
Kery tutejszo dziatwa radowoł
Dlo nich go przeca Gawlik szykowoł

Downo już tukej gazety niy ma
Ale pamiyntać mo ło niyj ziymia
I chocioż ciynżke czasy to były
Trza ło nich wspomnieć by nabrać siyły

Do tego co przed nami terozki
Bo przeca momy zaś inksze troski
We Mikulczycach som jednak ludzie
Co wiedzom umiom i pedzom - "Pódzie".

[Gość: Ona]

Jejku, skończ juz, bo czytac się tego nie da.

[broneknotgeld]

Czytać ło Zabrzu wcale niy musisz
Dyć ślonskich rymow ło niym niy zdusisz.

[broneknotgeld]

Upadłość browaru?

W Zabrzu jednak tonie browar
Nic że piwo durś sie leje
I chwolony jest piwowar
Rynek sie do niego śmieje

Durś ratować nikt go niy chce
Chocioż było ło tym słychać
Gołubowicz cosik pichce
A durś ciynżko jest im dychać

Przidzie czas - pod młotek wleci
Z warzyniym sie skończy wszysko
W Zabrzu tako sie już kleci
Bydzie ze tym dziwowisko.

[broneknotgeld]

Ordynacke Zabrze

"Ordynacko" Zabrzym rzońdzi
Ordynat tukej niy błońdzi
Chce to do muzeum wdepnie
Yno ktosik cosik szepnie

Ordynacko dyć dziedzina
Cołkym kraso to rodzina
Zabrze kryńci sie szczyńśliwie
Gymba łotwar żech w podziwie.

[broneknotgeld]

Zabrzańske platany

Zabrze platanami słynie
Jest i "Platan" - sklepik w tyj zocny dziedzinie.

[broneknotgeld]

"Wasserturm" w Zabrzu

Na "Donnersmarckhucie" wież jeszcze stoji
Godajom że łona nojstarszo jest tukej
Dyć już we ruinie i nikt sie niy boji
Że zaroz na darmo ci powiym - poszukej.

[broneknotgeld]

Relikwie św. Ojca Pio

Relikwie przezocne w parafii kończycki
Krew łod stygmatyka kapucyny dali
We kościele bydom już tukej nom wdycki
Relikwiorz Woźnice piykny fundowali.

[broneknotgeld]

Szwedzko kapliczka w Zabrzu

Szwedy we wojnie czidziestoletni
Zabrze pierońsko złupiyli
No i przi tymu życie im przetli
Co nojzocniejsze straciyli

Kapliczka yno łostała tako
Kaj leżom zboje-wojoki
Po wiekach przeca jakby jednako
Ze nich tyż byli boroki.

[broneknotgeld]

W łogrodku piwnym

Wele Pstrowskiego coś droge piwo
Choć żech se napioł dyć tymu dziwoł
Czy po to karlus tela harowoł
By ktosik pedzioł - Pstrowski mo drogo.

[broneknotgeld]

Pstrowski w Zabrzu

Zaś helmisko mo łosrane
I tako tyż rynka
Możno bydzie pucowane
Toż dlo niego mynka.

[broneknotgeld]

Kawiarnia "Pod Gronem"

W Zabrzu jakby koniec świata
Zawiyrajom co trwo lata
Kończy jakoś se epoka
Do zadku fest zaczli skokać.

[broneknotgeld]

Winiarnio Sedlaczkow 1899

Sedlaczek winiarnio we Zabrzu postawioł
Po latach joch tukej przeca czasym bawioł
Terozki kawiarnio "Pod Gronem" se traci
Widać że sie miasto wcale niy bogaci.