Zabrzańske rymowanki

[broneknotgeld]

Widelec

W cołkim Zabrzu słychać - PELEC
Czy ktoś wzioł go na widelec?
Choć go ciyngym teroz rzgajom
Pomyślunku w tym niy majom.

[broneknotgeld]

Toż i we Zabrzu

Toż i we Zabrzu magistrat rośnie
Beamtrow wiyncy bestoż radośnie
Paczom na "czasy Gołubowicza"
Choć możno morszczom tyż ździybko lica.

[broneknotgeld]

Na "Makoszowach"

Siedza na grubie - na "Makoszowach"
Tam kaj "szyb szworty" tyż moja gowa
Łon wielki jakby wieża "World Center"
A jo jak klawiyr malutki - "enter".

[broneknotgeld]

Kościoł św. Jadwigi

Kościoł ty Jadwigi na Zaborzu stoji
Ze drzewa go cołkym niydowno stowiali
Toż łod Republiki Weimarski nos stroji
Fikuśnie do tego go wydudowali

Materiał niy dziwi - skiż szkod to gorniczych
Dyć sznit skandynawski se jakby wydowo
Samych wież przi niymu aże sztyry zliczysz
W tym "cudzie zaborskim" poczujesz sie zdrowo.

[broneknotgeld]

Gruba "Amalia"

Baron Wilczek w swyj dziedzinie "gorki kamiyń" szukoł
Chocioż jeszcze Skarbnikowi we pukel niy klupoł
Dyć "Benigna" take pole już mu tu nadali
Wonglo jednak z niego zaroz niy ufedrowali

Potym tyn Hofrichter nastoł - gruba se zrychtowoł
I "Amalii" piykne miano zarozki jyj dowoł
Wiela wonglo niy dowała - z przerwami go brali
Ale dwiesta lot to tymu jak go już kopali

Jakoś wszysko sie kulało w wieku dziewiytnostym
Niy głymboko - pokład gruby - urobek był prosty
W końcu wlazła we "Concordia" - łona jom połknyła
No i potym już godali że "Amalia" była.

[broneknotgeld]

Latoś te rymy szkryfnoł żech w Rudzie
Dyć niychej to tyż na Zabrze pódzie.

[broneknotgeld]

Tatarka z Mikulczyc

W dziewiytnostym wieku stoł tu słup z kamiynia
Ło kerym ciekawie bajała ta ziymia
Cosik we tym było - przeca znojdowali
Broń - jak we tym miejscu ziymia połorali

Podobno Tatary co Krakow zdobyli
W naszych Mikulczycach tyż dość dugo byli
Koczowała tukej mało chańsko horda
Łobrońcow grodziska chcieli wziońć za morda

Z marszu sie to jednak wcale niy udało
A jak łoblynżynie durś sie przeciongało
Słup tyn postawiyli by wojskym kerować
Przed łokym Tatara niy szło sie już schować

Zaczyli na polach gryka potym sadzić
By sie ze prowiantym w prziszłości poradzić
Bo łoni łod downa jom przeca wcinali
A we Polsce tego nic a nic niy znali

Dyć choć pod Legnicom richtig nos pobiyli
Jednak sie ze Ślonska dość pryndko cofnyli
Na południe poszły ichnie czambuliki
Tatarkom do dzisioj zowiom ziorka gryki.

[Gość: zabrzanka]

Czy znasz może cały wiersz o Pawle i Gawle po śląsku ?

[broneknotgeld]

Hehe - z tego co wiym, to jest pora wersji, dyć żodno niy moja, boch niy wzioł
tego "na tapeta".
Pozdrowiom.

[broneknotgeld]

August Borsig

W samym Berlinie ciuchcie budowoł
Przijechoł do nos po glajzach
Ślonskego wonglo łon potrzebowoł
Werciyła mu sie ta rajza

Znoloz go przeca we Biskupicach
Już mioł co w ciuchcie folować
Choć życio zgasła mu potym świyca
Syn zaczoł łostro fedrować

Słynyła w Zabrzu przeca "Jadwiga"
Kedyś tyż "Pstrowskim" nazwano
A zaczło sie to skuli Borsiga
Trza nom pamiyntać to miano.

[broneknotgeld]

Borsig w Biskupicach

Przikuloł sie cugym aże ze Berlina
Spodobała mu sie Biskupic dziedzina
Po prowdzie to jednak wongel go tu ciongnoł
Kery do roboty w swojich ciuchciach wprzongnoł

Szachty jego grubow pryndko tu stanyły
Niy yno "Jadwigi" tyż "Ludwika" były
Świtoł mu we gowie plan pieronym wielki
I tukej postawioł inksze swoje werki

Wielke piece kuźnia stalownia walcownia
Pryndko tyż dołożoł do tego gazownia
Piykny pałac tukej dlo siebie postawioł
Bo we Biskupicach wiyncyj czasy bawioł

Zaś dlo robotnikow stowioł familoki
By blisko tych werkow miyszkali boroki
Z czasym wszysko razym "Borsigwerkym" zwano
Przilgło do Biskupic na amyn to miano.

brawo;]

[Gość: z uznaniem]

brawo brawo;]

[broneknotgeld]

Janosch

Z jego Cholonka słynie Zaborze
Choć kajś żech słyszoł że coś niy może
Szczimać tyj prowdy ze ksionżki kartek
Godali że to niywiela warte

Widać jest tako już polityka
Prowda przez palce ludziom umyka
Niy zawsze blikać sie chcom na siebie
Szkryflo sie piyknie yno ło niebie

A ziymia przeca mo swoje prawa
Nojpiyrw ślintanie potym zabawa
Zawsze sie idzie ździybko zchacharzyć
Czasym tyż za tym trocha pomarzyć

Z tego marzynio bajki Janoscha
Ło nie jo ciyngym dlo dzieci prosza
A zy mnom przeca cołko Europa
Gafto na kartki ze Zabrza chopa

Jak mały bajtel łobrozki widzi
I nad czytaniym chce mu sie biydzić
We tym tyż sztuka wielgo karlusa
W jego łobrozkach ślonsko jest dusza

Bestoż go lubiom dzieci Europy
Z kerych wyrosnom porzondne chopy
I nasze wszyske pszone durś frelki
Powiym że Janosch Ślonzok jest Wielki.