makula1
21.10.03, 21:23
Nasze miasto Ruda Śląska jest bardzo wielkim miastym, a czynsto godajom, że
to jest jedna bardzo wielko dziura i majom recht. Może zaroz nikerzy
podniesom larmo, że we własne gniazdo robia, że som wiynksze dziury itd. Ale
lepi jak se powiymy sami prowda we swoji gazecie, niż majom nos smarować insi
Ruda Śląska jest wielkom dziurom niy skiż tego, że niy ma tu co robić po
robocie; ani tyż skuli tego, że jedyn tu pod drugim dołki kopie, bo dołki
kopiom wszyndzie. Ruda dziurom jest przez to, że jest podziurawiono przez
górnikow jak szwajcarski syr i w zasadzie zamiast Ruda Śląska powinna sie
nazywać Ruda Szwajcarska
Niy dość, że jest tu jedna wielko dziura w ziymi, to jeszcze jest kupa dziur
na wiyrchu. Można by nawet pedzieć, że w Rudzie co krok to dziura, dziurka
abo dziureczka.
Ci co kopiom te dziury winni łotać dziury w budżecie miasta, a tak czynsto
niy jest i przez to Ruda jest tako dziurawo. Skuli tych dziur auta łomiom
rysory na drogach, ludzie nogi i rynce na chodnikach, a na urzyndach lecom
głowy.
Rudzkie drogi som jak skrzyżowanie waszbretu z durszlakiym na nudle - niy
dosć, że pofałdowane, to jeszcze pełne dziur i buł. Guliki na drogach nigdy
niy som równe z drogom, ale zawsze stojom niży abo wyży. Na moj chopski rozum
gulik jest po to, żeby spływała do niego woda, wiync powiniyn byc ciut niży.
Ale niy tyla, żeby przy najechaniu na niego ugryźć sie jynzyk w gymbie czy
urwać teleskop w aucie. Nikere guliki som tak wysoko, że jak niy skrzywicie
felgi, to pognieciecie auspuf, abo musicie isc do spowiedzi, po uzyciu
kilku nicynzuralnych slow.
To ze guliki som wyży abo niży drogi mało kedy jest wynikiym szkod
gorniczych, a czynsto efektym zwykłego niychlujstwa i niyróbstwa, brakiym
nadzoru, i źle pojyntom oszczyndnościom.
Logika jest tako: po co podnosić gulik kedy to kosztuje, terminy goniom,
odebrać i tak odbierom,
bo zawsze odbiyrali, a jak kery złomie rysor, to niych baran patrzy kaj
jeździ. Jednym słowym, widziały gały kaj jechały.
Jak już podniesom te guliki to przeważnie za wysoko, żeby za drugim razym niy
trza było ich zaś dźwigać. I tak sie to wszystko kulo, a jo niypotrzebnie
marudza. Taki stan rzeczy mo i swoje plusy: dzięki dziurom i połomanym
zawieszyniom jako tako egzystujom warsztaty samochodowe .
Na Wiyrku momy bardzo oryginalne mini rondo. Łone jest take mini, że aż jest
tyci. Na te tyci maciupynke rondo jak wiedzie przegubowy autobus, abo tzw.
long wehicle, to szofer widzi z przodku zadek swojigo auta i mo problymy z
zachowaniym należyty odległości miyndzy pojazdami. Zaś na Karmańskim, kaj
mogło być porzondne rondo, jest dyskoteka migajoncych, przeważnie czerwonych
świateł. Postawiyli za to McDonalda i słusznie, bo w oczekiwanu na zielone
światło niyjedyn zgłodnieje, a w McDonaldzie może po gibku jakiegoś big maca
czy inszego fast fooda skonsumować. Taki McDonald i ewyntualnie motel i
warsztat samochodowy przydołby sie z jedny i z drugi strony przejazdu
kolejowego na Wiyrku. Pociągi tam jeżdżom czynsto, szlabany spuszczajom z
wyprzedzyniym i stoć trzeba długo. W dodatku przy niyodpowiednim najeżdzie
ciynżkie ciynżarowki podnoszom betonowe płyty, co widzioł kedyś moj synek, a
czego niy widzom ludzie kerzy, powinni ło te przejazdy dbać. Moze jak
skończom autostrada wykopiom tam jeszcze jedna dziura pod torami, i wtedy
żodyn na ta dziura niy bydzie przezywoł
M.Makula
