Niyfraszka

[broneknotgeld]

"I łodpuść nom nasze winy"

A czy jo łodpuszczom winowajcom swojim?
Moja dusza przeca gniywu sie niy boji
I czynsto - choć w myślach - trocha tym pogrzesza
Jak sie to porzykom - zaś Bogym sie ciesza.

[broneknotgeld]

Fraszka to jest blysk
Czasym choby w pysk.

[broneknotgeld]

We tym iskra tyż jest Boga
Bestoż diobła szczimać moga.

[broneknotgeld]

By cie niy dopadła "kryska"
Śmiyj sie ze całego pyska.

[broneknotgeld]

Jo "piekło-niebo" w siebie durś mom
Jeszcze sie jakoś rada z tym dom
Bo przeca bardzi niebo mie kusi
Choć i tyn dioboł narzyńdzia brusi.

[broneknotgeld]

Jo niy cygania jak pisza - "śleper"
Bestoż w te fraszki skokom na keper.

[broneknotgeld]

Stoć - to prawie jakby niy być
Życie zowdy chce sie wybić.

[broneknotgeld]

Nasz smrod

Niyjedyn tukej na Ślonsku twierdzi
Że przeca piniondz nigdy niy śmierdzi
Dyć to we stary Romie prawiyli
Hajźle podatkym tam łobłożyli

Niy czuć jak śmierdzi samo mamona
Choć czowiek cuchnie że idzie skonać
Wiynkszość jak może tyn piniondz kradnie
Chocia niy myśli że to szkaradnie

A jak katolik godo ze niy wiy
To som Pon Boczek sie tymu dziwi
I na te swoje tabule bliko
Jak złodziyj czynsto do niego rzyko

Zaś trzeba zerknońć do stary Romy
Bo ze tych czasow Tymida momy
Łopaska nosi ślepo na łoczy
Dyć smrod złodzieja bez nos mo wskoczyć

Yno że u niyj w tym smrodzie całym
Dziurki w kocholu sie zatykały
Trza by nom tego coby zawyła
Jak łapa w todze łapowa skryła.

[broneknotgeld]

Spokoj już cołkym miołbych tyn złoty
Yno że chodzić trza do roboty
Mie sie już teroz pyndzyjo marzy
I te leżynie na naszyj plaży.

[broneknotgeld]

Zbudzioł żech sie rano - a piniondze kaj?
Myśloł żech że bydzie terozki moj raj
Stropiony sie dropia we zmorszczone czoło
Pacza we potmanyj - tam tyż geld wywioło!

[broneknotgeld]

Nowe czasy

We tych nowych czasach nojgorsze co momy
To te bezrobocie. Jak mu rada domy?!

[broneknotgeld]

Ciyngym mi jednak coś brak piniondza
Choć wiym że we tym jo jakoś błondza
Miołbych mamona kupioł bych czas
Jak niy mom czasu pyndza w tyn las
Kaj drzewa w uszy mi yno szumiom
Że "czas to piniondz" pedzieć mi umiom.

[broneknotgeld]

Fraszka jest jak ziorko piosku
Bydzie ciongła cie po troszku
Ciynżko potym cosik zmiynić
Jak jużeś jest na pustyni.

[broneknotgeld]

Diobłanioł

Anioł czy dioboł? Już mie to niy mynczy
Bo przecza durś wy mie wolno dusza brzynczy
Wdycki trza to yno mocno mieć we zocy
I tymu co teroz twordo blikać w łoczy.

[broneknotgeld]

Śmiych

Kożdy ci powie
Że śmiych to zdrowie
A jakbyś wieczność chcioł spyndzić w niebie
Śmiyj sie już teroz z samego siebie.

[broneknotgeld]

Plaża

Już mi sie plaża złocisto marzy
Klara co grzeje chocia niy parzy
Ło lecie myśla - tym nad Bałtykym
Kaj sie co roku jeżdża ze smykym
Taszcza ze sobom tyż familijo
Urlop tam przeca szczyńśliwie mijo
Bajtle ze ołmom wakacje majom
Przed rokym szkolnym łodpoczywajom.
Potym je koniec jak ucioł nożym
W zima zaś myśli mom nad tym morzym.

[broneknotgeld]

Łoni...

Łoni łonych łonaczom
I do tego krziwo paczom
A już cołke we tym dziwo
Że na sia paczymy krziwo

Idzie szczimać jakeś heksy
Bardzi mynczom nos kompleksy
Trza z minusa zrobić plus
No i ryknońć głośno - szlus!

[broneknotgeld]

Czamu jo tukej te fraszki ciepia?
Dyć tym sie trocha tak jakby krzepia
Jo w to sie chowom czymu som pszaja
A na dodatek robia tyż jaja
I chocioż w koło coś groźnie warczy
Myśla żech jeszcze niy jest na tarczy.

[broneknotgeld]

Polityka

Łod downa mortwi mie polityka
Lepi by było wrogow unikać
Bo we robocie mynczy niyzgoda
Pryndko ci wpieprzom pod nogi kłoda
We tym trza przeca grać Salomona
Grajfka cynniejszo je niż mamona
Rożniste zdania połonczyć w jedno
Tela powiedzieć by trefić w sedno
A cołki problym yno we tym tu
Jak prowdy czimać sie do imyntu?

[broneknotgeld]

Państwo

Państwo to przeca jo ty łon my
Ponoć tu kożdy dobrze to wiy

A jak sie w łoczy ciepnie draństwo
Kto w pierś sie piźnie powiy - państwo?

Kto przizno sie do tego złego?
Wskoże na siebie - niy inszego

Łod lot to niszczy nasze państwo
Zowiść złodziejstwo i cygaństwo

Głymboko to we dusza wlazło
Choćbyś chcioł dobrze - robi na złość

Dyć zanim zlygniesz człeku w grobie
Sproboj zbudować coś we sobie

Wypol choć jedna zdrowo cegła
Z prowdy co w głymbi duszy zległa

I zaniyś jom na plac budowy
Kaj kościoł trza postawić nowy.

[broneknotgeld]

To ci lokator

Za miyszkanie łon niy płaci
Coby autym mog piracić.

[broneknotgeld]

Moj Idol

Kogo jo moga mieć za idola?
Dyć Sztaudyngera łod inkszych wola
Z żyjoncych dzisioj yno papiyża
Ale sie jymu z tego niy zwiyrza
Bo gwoźdź do truły miołby zaś wiyncy
Niy chca przikłodać do tego ryncy

[broneknotgeld]

Czynsto we fraszkach jo pisza - łon
Zowdy sie boja że wklepia - lon
I niy som wcale to yno żarty
Durś mom problymy ze prawym "altym".

[broneknotgeld]

Jake jajco tako kura
Godo zowdy nom natura.

[broneknotgeld]

A dyć dlo jajec rymnyło mi sie
Bo niy utonie co musi wisieć.