Utoplec (Utopek, Utopiec)

26.12.06, 11:30
Utoplec (Utopek, Utopiec) - demon wodny według baśni, przypowieści, wierzeń i
anegdot występujących na Górnym Śląsku oraz Śląsku Cieszyńskim tożsamy z
Wodnikiem. Opowieści o Utoplcu są trwałym elementem folkloru śląskiego.
Siedzibą Utoplca miały być mokradła, rzeki, jeziora, stawy.
Najbardziej znanym Utopkiem jest wodzisławski Zeflik o którym powstało wiele
przypowieści.
pl.wikipedia.org/wiki/Utoplec
    • broneknotgeld Re: Utoplec (Utopek, Utopiec) 25.02.07, 23:58
      "Jako było na poczontku"

      Ponboczek w świata poczontku
      Ciźba we tym raju mioł
      Szkryfna - niy poskompia wontku
      Jak sie za aniołow broł:


      Liczba jejich wielko była
      Czyńść sie nawet buntowała
      W hardych zło siedziała siyła
      Dyć w tym miara sie przebrała

      Pedzioł w końcu - "Z raju fora"!
      Tym co mu sie przeciwiali
      Tako prziszła na nich pora
      Bestoż pryndko uciekali

      Nojgorsi do piekła wdepli
      Bo podpadli aż na amynt
      Mieli teroz richtig ciepli
      Dyć sie na nic zdoł ich lamynt

      Inksi poszli se na bory
      Tam ich spotkosz przeca dzisioj
      Duchy złe - tyż jakeś zmory
      Pewnie ło nich żeś usłyszoł

      Wiela tyż nurknyło w morze
      Stawy rzeki i jeziora
      To utopce - broń cie Boże
      Z niymi zowdy ciynżko pora.
    • broneknotgeld Re: Utoplec (Utopek, Utopiec) 25.02.07, 23:58
      Rydułtowski utopek

      Rydułtowski utopek wele drogi miyszkoł
      We przikopie co latym durś zalono była
      Nocom z niyj wychodzioł - na zielono blyszczoł
      A jak szoł łożarciuch - był już w jego siyłach

      Naprane chopisko smyczoł we barzoły
      Nad grobla prowadzioł kaj woda głymboko
      Przestało mu w gowie tompać ze gorzoły
      Stykło sie przerzegnać i dychnońć głymboko

      Dyć stracony czowiek jak wypioł za wiela
      Som włazioł do wody - choćby tego chcioł
      Przeznaczono była już mu inkszo sztela
      A utopek dusza pod garniec se broł.
      • broneknotgeld Re: Utoplec (Utopek, Utopiec) 25.02.07, 23:59
        Przekludzka utopka

        Wele Rydułtow jechoł Sikora
        Naroz habeta samo stanyła
        Choć nocno była już przeca pora
        Droga sie jakby blaskym pokryła

        Czowieczka dojrzoł wele maneli
        Ło przewoz tego łon grzecznie prosi
        Bo sie przekludzo do inkszy szteli
        I przeca sypnie tyż za to "grosik"

        Jako se życzoł tako se stało
        Kajś wele stawu z fury to ściepli
        Sypnoł Sikorze złotkow niymało
        Zaroz ze tego było mu ciepli

        Jak trefioł do dom i przespoł nocka
        Na swoj zarobek furmon se kuknoł
        A tam piniyndzy niy było mocka
        Yno guziole. Utopek - mruknoł.
        • broneknotgeld Re: Utoplec (Utopek, Utopiec) 25.02.07, 23:59
          Chlyb dlo utopka

          Rozmoczony chlyb we wodzie
          Utopkowi fest "smakowoł"
          Starzik prawioł ło przigodzie
          Keryj som sie fest dziwowoł

          Wele stawu szoł we nocy
          Łod piekorza z mitagszychty
          Dojrzoł chopka co mioł łoczy
          W kerych było coś niyrichtig

          Dyć zapaczoł sie w nie jakoś
          Wloz do wody po kolana
          Naroz coś go capło - psiakość!
          To ci była wielko szpana

          Mioł dwa chleby w swojim necu
          Kaj głymboko tam je wciepnoł
          Jak ofiara skiż poczeby
          A na koniec głośno hepnoł

          Cud sie stoł - bo z wody wyloz
          Szułow nawet mokrych niy mioł
          Pryndko do chałupy prziloz
          Choć za serce durś sie czimoł

          Chlyb powszedni miyj we zocy
          Łod utopka łon tyż "broni"
          Łodbiyro to jymu mocy
          Se uciekniesz bo niy goni.
          • broneknotgeld Re: Utoplec (Utopek, Utopiec) 19.09.07, 18:48
            Pierombol, zodyn utopek se tu jednak niy łodezwoł - szkoda.
Pełna wersja