Katowicom na gyburstag

[broneknotgeld]

Sto sztyrdziści lot mo miasto
Dzwigom toast - wypić czas to

Niych nom Katowice rosnom
Niych im zowdy wonio wiosnom
Tako chcieli łojce miasta
Niychej żyjom - no i basta.

[broneknotgeld]

Za Katowice!

Na drugo noga wypić trza chopu
Nikt niy dołonczy? Czym se tu tropiom?

[broneknotgeld]

"Osady i osiedla Katowic"

Lecha Szarańca czytoł żech ksionżka
I wyszły rymy do tego konska.

[broneknotgeld]

Agnieszka

Łod huty cynku szło jeji miano
Bo jom tu piyknie "Agnes" nazwano
Konsek a byliby my w Chorzowie
Dyć jom przigarła gmina Wełnowiec
Kto z wos pamiynto te piykne zdjyńcie?
Co biydaszyby przi "Prezydyncie"
W latach kryzysu pokazywało
Z tego słynyła Agnieszka cało
Dzisioj sie wspomnij ta kolanijo
Jak czasym droga Agnieszki mijosz.

[broneknotgeld]

Alfred

Tyj gruby "Alfred" już tu niy momy
Ło "Hohenlohe" zapominomy
A na Alfredzie przeca bergmony
We familokach byli sie pony
To tukej po swyj ciynżki robocie
Mieli ze życio choć trocha pociech
W Polsce Alfreda nom podzielyli
Do Siymianowic konsek dopiyli
Reszta z Wełnowcym we Katowice
W tym eku trzech miost momy granice.

[broneknotgeld]

Amanda

Na mapie Katowic jom ciynżko jest znolyść
I niy mosz dyć richtig tam za czym tyż polyść
Choc było tu kedyś dość gwarno i ludno
Skończyła sie gruba zrobiyło sie nudno
Kolonia i gruba jedne miały miano
Przepiyknie je kedyś Amandom nazwano.

[broneknotgeld]

Bagno

Bergmony z "Elfridy" tu kedyś miyszkali
Naprowdy w marasie sie czynsto toplali
Jak huty "Bernhardi" nastały tu czasy
To Roździyń sie chwoloł tutejszym marasym
A dzisioj te "Bagno" to wynzeł drogowy
Jak z Ronda se jedziesz prosto do Mysłowic.

[broneknotgeld]

Bederowiec

Bederowiec to był Domb
Józef Beder to był ksiondz
Biydnie sie tu ludziom żyło
Wiela slamsow we tym było
Kto pamiynto te "Maroko"
Kaj niyjedyn choncwot skokoł
Dzisioj to jest niby szpan
"Tysionclecie" prziszło dran
Stojom tu wielgachne bloki
A niy stare familoki
Zaś po drugi stronie skarb
Tyn nasz ślonski lunapark
Kery dzisioj robi klapa
Bo w niygospodarnych łapach
Coś mi jeszcze świto teraz
Niy ma drogi tu Bedera.

[broneknotgeld]

Bogucice

Już w wieku czinostym - łod lot to godajom
Stoła tukej wioska na prawie niymieckim
Dyć nojstarszy papior z kerego jom znajom
Wionże z wojewodom sie tym sandomierskim

Otton ze Pilicy - take jego miano
We cztyrnostym wieku wieś mu ta nadano
Mikołaja była we tym szczyro wola
- Ksiyńcia Raciborza no i tyż Opola

Potym było tukej Ksiynstwo Pszczyńske sławne
Z kerego Salamon wykroł ordynacjo
No i w końcu prziszły czasy niy tak dawne
Jak po Mieroszewskim Tiele-Winckler nastoł

Bo wszyscy my wiymy że te Bogucice
Były ważnom czyńściom "Państwa Mysłowice"
Przipadła im przeca ciekawo kariera
Rosnyły se razym z majontkym Wincklera.

[broneknotgeld]

Kuźnica bogucko

Staro kuźnica przi rzyce Rawie
Stoła tu ponoć w piytnostym wieku
To sie niy mieści we gowie prawie
Ajza dyrś loli - mody człowieku.

[broneknotgeld]

"Ferdynand"

Jako by żyły bogucke strony
Bez "Ferdynanda" kerego znomy
Ta gruba dowo durś przeca życie
Dzisioj jyj miano to "Katowice".

[broneknotgeld]

"Fanny"

"Fanny" to miano jest huty cynku
Kaj ciongło wiela boguckich synkow
Dzisioj już werku tego niy szukej
"Czas cynku" skończoł sie przeca tukej.

[broneknotgeld]

Kościoł bogucki

Matko Bosko Bogucko łaskami tu słynie
Werci sie z pielgrzimkom być i w tyj dziedzinie.

[broneknotgeld]

Borki

Przicupły prawie nad tom Brynicom
W Sosnowiec ciepnoł byś stond kłonicom
Mie gruba "Polska" zaciekawiyła
Co w miyndzywojniu tukej stanyła
Dyć dwóch knajpiorzy jom miało przeca
Co z niyjednego jedli chlyb pieca.

[broneknotgeld]

Boże Dary

Tu gruba "Boer" Hohberg założoł
Do tego kolonio doszła
Za staryj Polski wongel tyn wożoł
Pszczyna stond jeszcze niy poszła

Przed drugom wojnom zmiynili miano
Kawałka tyj ślonski ziymi
Już "Boże Dary" wszysko to zwano
Teroz cieszymy sie nimi.

[broneknotgeld]

Boże Dary

Kedyś we pszczyński gminie Podlesie
Potym w Kostuchna wlepiyli
No a za Gierka - wieść ślonsko niesie
Do tych Katowic je wpiyli.

[broneknotgeld]

Brynów

W historio sie wpisoł we tyn wiek piytnosty
Choć nikt tu niy miyszkoł aż po siedymnosty
Ponoć we włodaniu kedyś był Cieszyna
A za Salamonow przigarła go Pszczyna
Ponow tukej było chyba aż za wiela
W dziewiytnostym wieku we rynkach Wincklera
Pod koniec go jednak Hohenlohe capnoł
No i już za Polski w Katowicach klapnoł.

[broneknotgeld]

W Brynowie

W Brynowie Polokow zawsze było tela
Że nawet z Katowic "wyciepli" ta sztela
Jak zrobiyli ze nich miasto cołkym nowe
Brynow gminom zostoł - co tyż było zdrowe
Potym fest rozkwitło polske życie tukej
A korzyni tego "U Rzychonia" szukej.

[broneknotgeld]

"Oheim" - "Wujek"

Ksionże Hohenlohe gruba ta postawioł
Wielgachno bo łon sie drobnicom niy bawioł
We tych Katowicach do dzisioj fedruje
Bo przeca ze "Wujka" durś sie wongel suje.

[broneknotgeld]

Burowiec

Wedle Dombrowki tyj Mały
Chałpy Burowca se stały
Ziymia se leko łorali
Aże Wincklerow poznali
Ze hut sie tu zakopciyło
Gruba tyż rosła aż miło
Swoje dociepli łod Gischa
Kajsik strociyła sie cisza
Wongel i ajza - ołow i cynk
Bamber ze tego tukej by pynk.

[broneknotgeld]

Domb

Łod średniowieczo już Domb był tukej
U bożogrobcow dowodow szukej
Przeszli jak burza przez Domb Tatary
Zniszczyli nawet tyn Chorzow stary

Dyć miechowitow wioski to były
Lazarytowi ciyngiym służyły
Tymu z Bytomia - Świyntego Ducha
Kaj wiela chorych znodło otucha.

[broneknotgeld]

We Dymbie

Farorz ze Chorzowa srebra tukej szukoł
Pieronym uparcie pod ziymia durś kukoł
Domb kolybkom bergmonow skiż tego sie stoł
Dyć różnistych metali rudy przeca mioł.

[broneknotgeld]

Dymbowe szachty

Ta "Ksiynżno Jadwiga" i "Jadwiga Nowo"
Gruby parafialne - tyż farorz je stowioł
Łone już fedrunkym wonglo sie trudniyły
A te jejich szachty jeszcze płytke były.

[broneknotgeld]

Pudlingarnia

Baildona pudlingarnia tukej
Teroz jom w hucie "Baildon" szukej
Chocioż zmiyniała właścicieli
Miano łostało bo tak chcieli.

[broneknotgeld]

"Waterloo"

"Waterloo" - gruba tako tu była
Dusza Baildona we niyj sie skryła
Czimoł na społa łon jom z klasztorym
Tym co pomogoł Ślonzokom chorym

Potym wyrosła z niyj "Eminyncjo"
Bo w wonglu przeca była potyncjo
Za tyj komuny "Gottwald" jom zwali
Dyć czorne złoto sypało dali

Złonczyli jom tyż ze "Kleofasym"
A jak czerwone przestało straszyć
I nikt niy kłonioł sie tymu po pas
Zrobiyli "Katowice - Kleofas"

Dyć nojważniejsze jest to że w Dombie
Tyn duch Baildona durś w ścianie rombie.

[broneknotgeld]

Dombrowa

Niydowno łona we Katowicach
Durś swojym lasym może zachwycać
Wiedzie do niego ta droba "Saska"
Mor tukej dopod wojsko - do diaska
Byli na służbie Augusta Sasa
Tukej skończyli w Dombrowy lasach.

[broneknotgeld]

Dombrowka Mało

Niy wiym czy idzie godać ze mało
Jak z samyj nazwy by wynikało
Gmina tu przeca dość ludno była
Co koloniami sie łobłożyła
Norma i Pnioki Czekaj Burowiec
Ze niyj wyrosły te sztele nowe
A jak dołożyć gruby i werki
Powiym że konsek Ślonska był wielki.

[broneknotgeld]

Łod Gischego

Spadkobiercy Gischego tu wiela zrobiyli
Bo łoni we huty geld swoj durś topiyli
Tyn ich "Gisches Erben" tu cynk srebro ołów
Wybiyroł garściami ze Dombrowki stołu.

[broneknotgeld]

"Jerzy"
Ta gruba w Dombrowce trza tyż tu wspominać
Bo sie niom asiyła przeca cało gmina
Choć życie bergmona niy było wesołe
Robota we "Jerzym" dowoł Hohenlohe
Za tyj staryj Polski zaczły sie problymy
Pryndko jom zamknyli ło tym tukej wiymy.

[broneknotgeld]

Dobro Myśl

Terozki tu stojom yno same bloki
A kedyś miyszkali z Wełnowca boroki
Roboty dyć łoni w kryzysie niy mieli
Bez to we barakach siedzieć tu musieli
Ło te dobre myśli niy było za leko
No i do roboty durś mieli daleko.

[broneknotgeld]

Fryderyka

Kolanijo Fryderyka kedyś tukej była
Dyć w Wełnowiec sie dość downo cołkym nom wtopiyła
Hohenlohe jom założoł dlo tych z werkow jego
Miano swoje tyż dołożoł no i tela z tego.

[broneknotgeld]

Giszowiec

Ta modo osada Gischewaldym zwano
Łod tych z "Gisches Erben" wziyła swoje miano
Las piyrwyj należoł do Thiele-Wincklera
Osiedle powstało piykne jak cholera

Dzisioj by pedzieli że było wzorcowe
Chałpy przeca tukej tyż cołkym stylowe
Bergmon po robocie w łogrodku sie siedzioł
Za co tak harowoł - ło tym dobrze wiedzioł

Leciało to dalyj za tyj stary Polski
Dyć po drugi wojnie nastoł już czas "swojski"
Łoboczyli my to w "paciorkach rożańca"
Jak komuna wziyła starzykow do tańca

"Łobalić trza stare - postawić se nowe"
Bez to momy tu tyż osiedle klockowe
Stare ze tym nowym dziwnie pomiyszali
Ciekawe co piyrwyj bydzie sie zaś walić.

[broneknotgeld]

Huta Arnold

Huta cynku "Arnold" i jyj kolanijo
Janowa to była kedyś familijo
W Katowicach dzisioj lecom im godziny
Arnolda poszukej wele tyj Boliny.

[broneknotgeld]

Janow

Ta janowsko ziymia kedyś w Mysłowicach
Mieroszewskich cało była okolica
No a polske ponki hulali za wiela
Majontek sprzedali we rynce Wincklera
Jak tu była gmina to ci łod Gischego
Fedrowali wongel richtig na całego

We Polsce w Janowie wiela sie zmiyniyło
Koncek w Mysłowice cołkym sie wtopiyło
Reszta zaś dotrwała do Polski Lydowyj
Dyć pryndko jom wciepli do Szopiynic nowych
A jak w siyła rosły potym Katowice
Połknyły tyn Janow z miastym Szopiynice.

[broneknotgeld]

"Gische"

Kopalń janowskich było bez liku
Zrobiyli z nich jedna - "Gische"
Wiela pokolyń naszych gornikow
W ziymia łod lot tu sie pisze

I chocioż teroz inksze jyj miano
We gymbie "Wieczorek" momy
Fedruje bergmon tukej co rano
Durś wongel stond dobywomy.

[broneknotgeld]

We Janowie

We Janowie malować lubiyli
Z tego downiyj już tu zasłynyli
Piyrszy ze nich Ociepka Teofil
Jo bych pedzioł że łon był "carbofil".

[broneknotgeld]

Jozefowiec

Miano łostało po tym Bederze
Zeflik mu przeca godali
Droga Bedera - naszkryflom szczerze
Tyż Jozefowskom nazwali

Bo jak komuna prziszła po wojnie
A ze niom zaś inkszo nyndza
Farorz we grobie społ niyspokojnie
Niy chcieli patrona ksiyndza

Dyć zamazane to jakoś dzisioj
Jakby historio ktoś sprościoł
Ło tym ksiynżoszku wiyncyj by słyszoł
Kto w Katowicach by gościoł.

[broneknotgeld]

Jozefowiec

Skiż Hohenlohego - pana na Bytkowie
Pryndko sie rozwinoł tyn nasz Jozefowiec
Ci ze werkow jego musieli kajś miyszkać
Po blisku - by piechty zadreptać na szychta
Były jednak tukej tyż przeca i szkoły
Chor i rożne zwionzki co Polsce durś pszoły
Już we polskich czasach pryndko Jozefowiec
Włonczyli na amyn we gmina Wełnowiec
Jak po drugi wojnie rosły Katowice
To sie upomniały ło te okolice
Miano nom łostało - tako zwom osiedle
Droga Jozefowsko co leci tyż wedle
Yno zaginyło nazwisko Bedera
Choć myśla ło ksiyndzu - biere mie cholera.

[broneknotgeld]

Karbowa

Dzisioj to historio - miano zaginyło
Ze Katowicami w jedno sie stopiyło
Była to osada Bogucki Kuźnicy
Folwark piykny leżoł na samy granicy
Huty i cegelnie powstały tyż tukej
Dzisioj jednak lepiyj ich wcale niy szukej
Jak zajrzysz to widzisz teroz blokowisko
Kaj? -"Na Paderewskim" - powiy kto tu miyszko.

[broneknotgeld]

Katowicko Hołda

Kto dzisioj tyj nazwy używo?
Chyba jakiś trocha dziwok
Wyleciała już ze mapy
Choć tam czynsto niesom szłapy
Jak w Kościuszki żeś jest parku
To na Hołdy tyj kawałku
Rondym Mikołowskym karniesz
Zaś ta Hołda cie przigarnie
Nawet konsek autobany
Tukej jest wyrychtowany
No i "Wujek" durś fedruje
Przeca Brynow prawie tu jest.

[broneknotgeld]

Klizmowiec

W Katowicach z Klizmowca nic niy ma
Szłoby tukej łopuścić tyn tymat
Dyć przez pamiyńć zocnego młynorza
Jednak szkryflać sie ło tym łodwoża

Domki kedyś te fińske tu stoły
Teroz w niebo sie dropiom "pachoły"
Beton jakoś niy cieszy mie wiela
Wolołch staro spokojno ta sztela

Tysionclecie tu dzisioj jest Gorne
Chocioż życie wydaje sie chmurne
Jada bankom i blikom ze glajzow
Widza yno tyn kopiec amajzow.

[broneknotgeld]

Kokociniec

Konsek Katowic przi samy Rudzie
Możno Kłodnicom spłynońć tam pódzie
Jest tu osiedle bergmonow "Ślonska"
To tyż ze Rudom nitka niywonska

Piyrwyj tu były jednak dziedziny
Łod tych Hochbergow ksionżont ze Pszczyny
Huta i gruba tu postawiyli
Wonglym już przeca ajza topiyli.

[broneknotgeld]

Kolonio Wysockiego

Na trasie z Giszowca do tego Nikisza
Po drodze kolonio se leży
Terozki niywiela jo ło niyj już słysza
Wysocki jyj patron - uwierzysz?

Dyć był to se karlus co Flawian mioł miano
Łon kedyś harowoł na "Gischu"
Komunie pszoł mocno i bestoż tak zwano
Osada przi sławnym Nikiszu.

[broneknotgeld]

Kopaniny

Prawe i lewe te Kopaniny
Kedyś Hochbergow piykne dziedziny
Dzisioj przigarły je Katowice
Przi Mikołowie te okolice.

[broneknotgeld]

Kostuchna

Staro osada to jest Piotrowic
Kero sie tak rozwinyła
Że nim włonczyli jom do Katowic
Miastym być tyż już zdonżyła.

[broneknotgeld]

Koszutka

Kolanijom Bogucic swego czasu była
Ponoć łod młynorza miano swoje wziyła
Jak te gruby i werki zaczli tukej stowiać
To i chałpow trza wiyncyj było wybudować
Z czasym familoki klocki zastompiyły
We mojyj pamiyńci yno łone były.

[broneknotgeld]

Kuźnica Bogucko

Kuźnica Bogucko tukej piyrwyj była
Łona nad Roździankom sie nom rozwinyła
Dyć ło niyj Walynty Roździeński napisoł
Że Jurga Kleparski kuźnikym tu prziszoł

Bez lata jom zwali durś łod tyj kuźnice
Choć rosła tyż tukej ta wieś Katowice
Po myśli inkszego kuźnika - Andrzeja
By z czasym zastompić jom we dalszych dziejach.

[broneknotgeld]

Huta "Marta"

Dzisioj jom niy ma choć dugo była
Prawie przi rynku miasta nowego
Tam kaj ta sławno kuźnica żyła
Wspomnij kuźnika tu boguckego.

[broneknotgeld]

Ligota

Łod Staryj Ligoty wszysko sie zaczyło
Choć we downych czasach ciynżko tukej było
Rzondziyła tu przeca czynsto tyż zaraza
Po polach sie huloł wiater we tych razach

Jak sam zaś nastały czasy huty "Idy"
Poleku Ligota wylazła ze biydy
Doszła jeszcze gruba kerom "Szadok" zwali
Wongel do tyj huty we niyj dobywali

Dobrze tyż sie stało że cug tu puściyli
Bo małe letnisko z Ligoty zrobiyli
Przi banhofie rosła osada łod nowa
Ta staro przi nowyj zaczyła sie chować

Wszysko to sie dzioło tu za Niymca jeszcze
We powiecie pszczyńskim była wtedy - wierzcie
A już za tyj Polski cołko okolica
Czwortom tajlom była we tych Katowicach

Dyć do dzisioj to jest Katowic dziedzina
Chocioż tak niydowno włodała niom Pszczyna
Jak tam kedyś zajrzysz wspomnij moje słowa
I tyskego piwa chlapnij se dlo zdrowia.

[broneknotgeld]

Muchowiec

Mucha tu miyszkoł chop małorolny
Niy mioł za wiela dyć czuł sie wolny
Lotoł sie czynsto nad łonkom nisko
Bestoż zrobiyli potym lotnisko.

[broneknotgeld]

Murcki

Ponoć tukej właśnie łod lot pany Pszczyny
Dobywali wongel z tyj swojyj dziedziny
Łodrywali chopa ze uprawy roli
Kopać musioł w ziymi wedle jejich woli

Chodzioł umurckany potym do zagrody
Bo mu na tyj grubie żałowali wody
"Emanuelssegen" kopalnia ta zwano
Łod murckow osada pryndko wziyła miano.

[broneknotgeld]

"Emanuelssegen"

To jest richtig staro naszo ślonsko gruba
Chop tukej fedrowoł ściongniynty łod pługa
Tu już sztrajkowali w łoziymnostym wieku
Bo sztajger bergmonom ubliżoł - czowieku

W dziewiytnostym wieku ta gruba durś rosła
I wtedy tyż tukej ajzynbana doszła
Wonglo coroz wiyncy trza było fedrować
Bo Hochberg we Wrocku zaczoł go przedować

Za tyj staryj Polski zaś tu sztrajki były
Kryzysym sie przeca gruby niy karmiyły
Ciyrpieli bergmony wtedy wielgo biyda
Niy było tu leko - godać ło tym byda

Już po drugiyj wojnie "Murckami" jom zwano
Jak piyrwyj osada - łod niyj teroz miano
Ważne że durś tukej wongel nom fedrujom
We Polska łon idzie - niych dalyj go sujom.

[broneknotgeld]

Co to jest?

Dzielnica i gruba jedne majom miano
Skiż wonglo tak piyknie je przeca nazwano
Kedyś było tukej "Wolne Państwo Pszczyna"
Dzisioj to Katowic ciekawo dziedzina.

[broneknotgeld]

Nikiszowiec

Dyć niy było by "Nikisza"
Jakby tu zabrakło "Gischa"
Ze tyj gruby szachty miano
Do osiedlo przipisano

Zillmann to zaprojektowoł
Swojo dusza w cegły dowoł
Wyszło piykne mini-miasto
Juz docynić prziszoł czas to

Bo perełka naszo ślonsko
Tyż historio mo niywonsko
To jest jakby jedyn świat
W Ślonsku ślonski richtig brat.

[broneknotgeld]

"Perła"

Ta "Perła w koronie" widziołch pora razy
Tam ze Nikiszowca som piykne łobrazy
Dziynki Kutza sztuce Polska to widziała
Dyć jednak pewnikym pryndko zapomniała
Trza to jakoś zmiynić - Nikisz nom promować
Nowe klocki przi tym powinny sie schować
Chyba niy przipadkym ta "janowsko grupa"
Właśnie tu sie jakoś zebrała we kupa
Pyndzle se chyciyli - malowali piyknie
Było tego tela że dzisioj nom styknie.

[broneknotgeld]

Norma

Piyrwyj tukej huta cynku nosiyła to miano
I szyb gruby "Ferdynanda" tako tyż nazwano
Katowicko kolanijo we Dombrowie Małyj
To ślad kery nom pozostoł po imprezie całyj.

[broneknotgeld]

Nowy Czekaj

W młynie na Brynicy Czekaj mieloł zboże
Dzisioj sie to w gowie pomieścić niy może
Dyć łod niego nazwa osady sie wziyła
Gmina Huta Laura dugo tukej była
Potym to przeciepli w miasto Szopiynice
No a teroz widzisz - som te Katowice.

[broneknotgeld]

Obroki

Obroki w Załynżu przi Chorzowie leżom
Rosły nom skiż gruby - w to tyż świyńcie wierzom
Wszysko sie kryńciyło wele "Kleofasa"
Nic sie niy zmiyniyło - jest tak we tych czasach.

[broneknotgeld]

Ochojec

Nad rzekom Ślepotkom ta wioska leżała
Z czasym sie rozrosła trocha wybujała
No a na łostatku lazaryt tu powstoł
Kaj niyjedyn bergmon koncek zdrowio dostoł.

[broneknotgeld]

Osiedle Belojannisa

Był pieroński pożar na tym "Kleofasie"
Bergmonow uczciyli już we Polski czasie
Kery na osiedlu se tukej zamiyszkoł
Nazwiskym boroka nom czasym zablyskoł
Bo do dzisioj drożki ze osiedlo tego
Noszom miano ofiar - wiela w tym dobrego.

[broneknotgeld]

Osiedle Modych

Na Osiedlu Modych
Szukej swyj przigody
Przijedź do Zadola
Jak mosz tako wola
Schowej sie w malinach
Tam zrzyndnie ci mina
Jak szukosz dobroci
To skryj sie w paproci
Podzimki borowki
Wlezom ci do gowki
Mynczy cie rodzina
Łostow jom w jeżynach.

[broneknotgeld]

Osiedle Paderewskiego

Paderewski możno mynczy sie we grobie
Jak na wielgo płyta tukej gafto sobie
Pryndko by zaś zamknoł jakoś forteklapa
No i przi okazji komuś prziczas łapa.

[broneknotgeld]

Osiedle Roździeńskiego

Nastowiali tukej trocha tych wieżowcow
I dali im miano Katowic "gwiazdowcow"
Dobrze że to niy som cołkym te "gwiazdory"
Jak żech wloz tam na wiyrch toch był ździybko chory.

[broneknotgeld]

Osiedle Francka Rybki

Do Sosnowca stond jest blisko
Bestoż Rybka tukej blysko
Jest w tym jednak wiela racji
Zginoł łon za okupacji

Za komuna dołbych krycha
Krziżyk zrobia z tego grzycha
To mu prziznom za Oświyńcim
Rybka mo być we pamiyńci.

[broneknotgeld]

Osiedle Staszica

Wdepły te klocki nom do Giszowca
Chciałyby dalyj dyć już niy potrza.

[broneknotgeld]

Osiedle Tysionclecia

Tysionclecie poleku rośnie nom tu dali
Nawt kościoł do tego piykny zbudowali
Doszły tukej tyż nowe jakeś "kukurydze"
Mozno kedyś ze tego dobry "popcorn" bydzie.

[broneknotgeld]

Panewniki

Nojpiyrw był tukej jedyn Panewnik
Starym go zowiom do dzisioj
Panwie robiyli tu w dziyń powszedni
Downo to było - joch słyszoł

W cztyrnostym wieku był wele Kłodki
Teroz żech tyż to łoboczoł
Czimie sie jeszcze małyj Ślepotki
I nigdy jom niy przekroczoł

Domb tukej rosnoł wele zajazdu
Co blikoł na Jana wojsko
Pod Wiedyń ciongnoł łon wielkom jazdom
Armia z łodsieczom szła polsko

Dyć niydaleko łod Panewnika
Klasztor zaczyli budować
Wyrosła piykno tyż bazylika
Stary sie zaczoł dziwować

Bo pryndko inksze chałpy tu doszły
Urzyndy knajpy i szkoły
W Nowym już łone piyknie wyrosły
Tyn kont był teroz wesoły

Panewnik zmiynioł sie w Panewniki
I w Polsce już tak go zwano
Czy dzisioj wiedzom to małe smyki
Że jest łod panwi to miano?

[broneknotgeld]

We Piotrowicach

We Piotrowicach "tyske" sie loło
Jak yno je zaczli warzyć
Do "ksionżyncego" łoko sie śmioło
Szło sie tyż przi nim rozmarzyć

Dyć tukej była ta "pszczyńsko ziymia"
A na niyj był browar tyski
Chocioż tych starych czasow już niy ma
Tonknońć trza w kuflu zaś pyski.

[broneknotgeld]

Piotrowice

Wioska Uniszowy i jyj okolice
Podzielyli kedyś - wyszły Piotrowice
Tukej za rektora Karol Miarka robioł
Nim sie w Mikołowie drukarni dorobioł

Kedyś piykno gmina była ze Piotrowic
Yno że traciyła wiela do Katowic
Już za staryj Polski czyńść ziym jyj łodepli
I w somsiednie miasto pryńdziutko se wepli

Dyć jeszcze przed wojnom straciyła je Pszczyna
Stała sie ze tego Katowic dziedzina
Dzisioj byś niy pedzioł że z inkszego ciasta
Bo wprzongły sie mocno już do tego miasta.

[broneknotgeld]

Pnioki

Coingnyły te Pnioki w strona Siymianowic
Choć należom teroz do miasta Katowic
Kolonio to była tyj Dombrowki Mały
Z niom we Szopiynice potym sie dostały
Jak dalyj leciało to już dobrze wiycie
Terozki to wszysko przeca Katowice.

[broneknotgeld]

Podlesie

We pszczyńskim Podlesiu po czeskich husytach
Niy ujrzoł żeś chopa ani tyż kobiyta
Dyć poleku wioska sie zaś zaludniyła
Podlesie urosło - ziymia sie blyszczyła

A tutejszy sołtys pod Wiedniym bioł Turkow
Z pszczyńskimi chopami nasiekoł z nich wiorkow
Kedyś tu kwatery miały wojska Sasa
Chop przi nich zaciskoł richtig swego pasa

Nastoł w koncu tukej tyn wiek dziewiytnosty
Łon tyż dlo Podlesia wcale niy był prosty
Choć durś przeca rosła cołko okolica
Ze klucza wyrskego hrabiego Promnica

Kmiycie już pańszczyzny płacić tu niy chcieli
W końcu i na swojim gospodarzyć mieli
Bo w połowie wieku uwłaszczynie prziszło
Kere niy kożdymu fest na dobre wyszło

Z powietrzym morowym tu sie tyż mynczyli
Chocioż coroz gyńści we tyj gminie żyli
Nowy wiek im przinios same "Boże Dary"
No i tyż sie wynios porzondek tyn stary

Jakoś sie kulało w tyj Polsce do przodu
I durś przibywało we gminie narodu
Za Gierka Kostuchna jednak tu rzońdziyła
Krotko - bo poznała tych Katowic siyła.

[broneknotgeld]

Pod Młynym

Młynorza Kaśka młyn tukej miała
Tyż tu sie kończy Dombrowka Mała
Mielyła zboże po naszyj stronie
Bo przeciyż Ślonska tukej był koniec.

[broneknotgeld]

Downy Roździyń

Łon już nom wyrosł w cztyrnostym wieku
Ponow mioł wiela - niy licz człowieku
Tukej tyż staro kuźnica była
Kero nad Rawom sie rozłożyła

Wtedy jom zresztom Roździankom zwali
Sławny Roździeński tukej był dali
Co pisoł wierszym ło swyj robocie
Z keryj durś wiela mioł przeca pociech

Do wieku pary kuźnica doszła
Z czasym historiom swojom łobrosła
I choć jom potym wcale niy było
Ło jyj kuźnikach durś coś sie śniyło.

[broneknotgeld]

Roździyń

Łod Mieroszewskich Winckler go chycioł
I wiela konskow pod przemysł wycioł
Ta huta "Dietrich" i "Wilhelmina"
"Bernhardi" - wszysko sie przipomina

Ci z "Gisches Erben" tyż sie dociepli
Rosł Roździyń pryndko a łoni krzepli
Lazaryt był tu szkola wiyńziynie
Kościoł i browar na pokuszynie

"Konsum" na Ślonsku piyrszy był tukej
Nawet drukarni w Roździyniu szukej
Tych rzemieślnikow bez liku było
Wszysko dość pryndko sie tu kryńciyło

Dyć był wrośniynty we Szopiynice
Niy było miyndzy nimi granice
Za staryj Polski tyż tak łostało
A i po wojnie dalyj kulało

Zrobiyli z niego przeca dzielnica
Co ciyngiym tkwiyła we Szopiynicach
Choć to za dugo jednak niy trwało
Jest w Katowicach terozki całość.

[broneknotgeld]

Sośnina

Była nad Rawom Sośnina
Terozki jednak jyj niy ma
Ta kolanijo ze Dymba
Wyglondo choby we zymbach
Gyjbis tu Piastow sie leży

[broneknotgeld]

Stawiska

Miano łod stawow wele Boliny
Konsek janowski to jest dziedziny
Łon sie rozwinoł skiż "Uthemanna"
Szopiynic huta tak była zwana
Dzisioj sie kończom tu Katowice
Pryndko przekrokniesz we Mysłowice.

[broneknotgeld]

Szabelnia

Kuźnica Turzonów kedyś tukej była
Kero sie w szabelnia pryndko zamiyniyła
Szabla szopiynicko niy słynyła może
Pamiyńć nom łostała i za to - szczyńść Boże.

[broneknotgeld]

Kedyś w Szopiynicach

Husyty do Szopiynic prziszli ze Zagorza
Ciynżko dlo tyj wioski była ta ich burza
Dyć poleku jednak zaś sie zaludniyła
A przed wiekym pary Mieroszewskich była
Wszysko sie zmiyniyło łod tyj "Wilhelminy"
Cynk we niyj topiyli ze ślonski dziedziny
A do tego doszło pryndko grubow pora
No i cug - przemysłu ślonskego podpora.

[broneknotgeld]

Szopiynice

Roździyń-Szopiynice tako gmina była
Zanim sie tu Polska naprowdy zaczyła
Dyć jeszcze za Niymca sie nom rozłonczyły
Niydugo - a jednak już osobno były

Jak zaś tukej Polska głośno zaklupała
Szopiynicom gminno miejskość sie dostała
Miastym cołkom gymbom by wtedy se były
Yno prziszła wojna i już niy zdonżyły

Stało sie to jednak w piyńdziesiontym roku
Nawet powiat miejski wykroli na boku
Bo tyn Janow Ślonski i Dombrowka Mało
Do powiatu wlazły - tako była całość

Problym jednak we tym że te Katowice
W końcu połaszczyły sie na Szopiynice
I choć jest tyż ze nich osobno dzielnica
To jakoś niy wszyscy chcom sie tym zachwycać.

[broneknotgeld]

Wełnowiec

Bogucice z Bytkowym pasły tukej owce
I możno skiż tego nazwali Wełnowcym
Tako myśl terozki chodzi mi po gowie
Powiym że bajdurza ale we połowie
Tyżłod Wełny było podobno to miano
Yno że młynorza tako tukej zwano.

[broneknotgeld]

Hohenlohe w Wełnowcu

Nic sie tu niy dzioło bez Hohenlohego
Bo była to przeca dziedzina łod niego
Łon założoł kedyś piyrsze gruby tukej
W Wełnowcu tyż jeszcze huty jego szukej
W sawnyj "Hohenlohe" juz koksym polyli
We piecach kaj ruda na ajza topiyli
Dołoż tyż do tego jeszcze huta cynku
Wiela łon roboty mioł dlo ślonskich synkow
W końcu tu zbudowoł gmaszysko te wielke
Kaj dyrekcjo była "Hohenlohe Werke".

[broneknotgeld]

"Hohenlohe"

Jedna gruba i dwie huty
W nie Wełnowiec był łobuty
Wszyske miały take miano
Na cześć ksiyńcia je nadano.

[broneknotgeld]

Wełnowiec

Za Niymca i za Polski staryj
Była tu samodzielno gmina
Losu niy bierom już na bary
Dzisioj Katowic to dziedzina.

[broneknotgeld]

Wilhelmina

Na Wilhelminie już niy te czasy
Kere tu kedyś bywały
W łoczy sie ciepiom yno te sztrasy
A piyrwyj świat tu był mały

Kery sie kryńcioł wele tyj huty
Łod "Spadkobiercow Gischego"
Ze "Wilhelminy" suchali nuty
Żyli do rytmu takego.

[broneknotgeld]

Wymysłow

Piyrwyj jak keryś jechoł z Wrocławia
Tym traktym na Mysłowice
To za Ślepotkom mioł już zabawa
Bo bliske to okolice.

[broneknotgeld]

Zadole

Na Zadolu nad Ślepotkom miyszko sie spokojnie
Możesz nawet tu sie dychnońć jak mosz życie znojne
Trocha jest za dużo blokow ale szczimać idzie
Te Zadole do sie lubić i niych już tak bydzie.

[broneknotgeld]

ałynsko Hołda

Dwie Hołdy były - jedna przi drugi
I tyj Załynski żywot jest dugi
Bergmon z hutnikym tykej miyszkali
Stond do roboty niy mieli dalyj
Bo gruby huty i inksze werki
Wszyske tu rosły - wysyp był wielki.

[broneknotgeld]

Osiedle Witosa

Na Hołdzie Załynski wyrosło osiedle
Jak jedziesz A - 4 to łone jest wedle.

[broneknotgeld]

"Bugla"

Bugla - tak sie chop tyn zwoł
Co gront czimoł bo durś sioł
Ziymia łorać zboże sioć
Niy ma co sie z tego śmioć

Dyć choć mocno tym sie smucioł
Kijym rzeki niy zawrocioł
Jakbyś był tu cołkym blisko
Wlyź na "Bugla" - kompielisko.

[broneknotgeld]

Załynże

Załynże to richtig jest staro już wiocha
Tych kuźnic tu było łod diobła i trocha
Panow tyż zmiyniało choby rynkawiczki
Ważne że istniało nom przeca tu wdycki.

[broneknotgeld]

Kramsta w Załynżu

We Wrocku handlowoł
W Załynżu fedrowoł

"Charlotte" i "Victor" te dwie kopalynki
"Oheim" potym capnoł - poszło to łod rynki

Dyć Kramście sie jeszcze huta zamarzyła
Nazwoł jom tyż "Victor" - cynk tukej topiyła.

[broneknotgeld]

"Kleofas"

Załynski "Kleofas" Godula rychtowoł
Nojpiyrw ze wspolnikym potym som jom stowioł
Ta Joanna Gryzik gruba dziedziczyła
W końcu tych łod Gischa durś wonglym karmiyła.

[broneknotgeld]

Zaopusta

Ze Podlesio Zaopusta
Jakoś mynczy moje gusta
Skond ta nazwa? -Jo niy powiym
Możno jednak tyż sie dowiym.

[broneknotgeld]

Zarzecki wodnik

Miyndzy Bagnikym a Kaskadnikym
Kożdy sie może poczuć wodnikym
Pełno tu rybow kajbyś niy blikoł
Joch sie tu kedyś łusek nałykoł
Czyje te łuski do dzisioj niy wiym
Jednak z tutejszyj słodki to ryby.

[broneknotgeld]

Zarzecze

Ze Uniczowow wyszło Zarzecze
Było we pszczyńskim kedyś powiecie
Gminno kariera jednak skończyło
Jak ze Podlesiym sie połonczyło
Potym Kostuchna Zarzecze chciała
Z nim w Katowice sie tyż dostała.

[broneknotgeld]

Zawodzie

Dlo Bogucic to było za wodom
Za tom Rawom jo jeszcze tyż dodom
Nastowiali tu werkow aż tela
Że wyliczyć sie ich niy łośmiela

Choć cieszyło sie gminy prawami
Jednak zepli je z Bogucicami

Piykny ratusz tyż miała ta gmina
We Zawodziu go niy trza wspominać
Ekonomia w nim teroz kroluje
No i ważne że nom sie niy suje

Blisko jest stond do cyntrum Katowic
W tyj dzielnicy ci kożdy to powiy.

[broneknotgeld]

Porcelana

Porcelana "Gische" to jest dobro marka
Tako mi pedziała kedyś jedna starka
Łona niy wiedziała że to "Bogucice"
Dyć miejsce podała - teroz Katowice.

[broneknotgeld]

Zuzanna

Gruba "Susanne" tu była
Kolonio Zuzia łod niyj sie wziyła
Kaj to jest dzisioj? Mało kto powie
MIejsca poszukej we tym Janowie.

[broneknotgeld]

Kościoł pw. Niypokalanego Poczyńcia Nojświyntszy Maryji Panny

Kościoł mariacki we Katowicach
Neogotykym moze zochwycać
Wiluś korony cysorza niy mioł
A łon już w kupie sie tukej czimoł

Przi placu ksiyndza świontynia stoji
Bestoż ło los swoj nic sie niy boji
Dyć tyn ksiondz Szramek był tu farorzym
W obozie w Dachau dni swojich dożył

Tukej zaś momy po niym witraże
No i tabula - już sie niy zmaże
Pamiyńć ło niymu na naszym Ślonsku
Cołkym - niy yno malutkim konsku.

[broneknotgeld]

Katowice? -Tako wiocha
Co wyrosła jakby trocha
Na tym wonglu ajzie cynku
Tela powiym jo ci synku.

[broneknotgeld]

Staro maglownia

Maglownia w Giszowcu do dzisioj magluje
Choć mo sto lot z hokym wcale sie niy suje
W Dreźnie jom zrobiyli - jeszcze za cysorza
Kerego? - Niy cołkym terozki ci wskoża
To przeca we Niymcach był rok czech cysorzy
Dziynki tyj historii wiyncyj magel woży.

[broneknotgeld]

Wykopali "Marta"

Wele Ronda ciongnom Średnicowka dali
No i sie do "Marty" teroz dokopali
Joch już skiż ty huty szkryfnoł tukej cosik
Teroz ło wspominki zaś sie jakby prosi.

Konstanty Wolny

[broneknotgeld]

Kurde, dyć przi takim gyburstagu werci se cosik wspomnieć ło ludziach, kerzy
cosik w tych Katowicach znaczyli.
Na poczontek wkleja tu cosik ło marszału Konstanym Wolnym - werci se go terozki
wspomnieć.

[broneknotgeld]

Marszałka Ślonska możno niy znocie
-No toż se ło niym tu poczytocie.


"Konstanty"

Ksiondz Słota dzwon taki parafii fundowoł
Dokładnie połtora wieku ponoć tymu
Serce "Konstantego" - toch sie forsztelowoł
Ciyngym telepało we duszy istnymu

Dyć Wolny se przeca rodzioł w Bujakowie
Miano jakby ze tym wzioł łod tego dzwona
Ponboczek tyż pedzioł - "To jest ślonski czowiek"
No toż teroz wszyscy my som jakby w doma.

[broneknotgeld]

W Gimnazjum

W Gimnazjum se Wolny z Korfantym kamracioł
Dyć roz tref chcioł tako że tyż na tym stracioł
Bo jak z polskim orłym knefle zaczli nosić
Piyńć marek na sztrofa - niy szło już uprosić
Rechtor był surowy - ło niymieckość dboł
A fater łod Kostka zaś utropa mioł
Bo łon przeca łożoł na edukacyjo
Piyńć marek to dużo - zaś była mecyjo.

[broneknotgeld]

Ponoć

Ponoć we młodości
Fara se zamarzoł
Dyć skuli miłości
Kerom Polska darzoł
Sztudiyrowoł prawo
Blikoł w polityka
I niy żył niymrawo
Choć musioł tyż rzykać.

[broneknotgeld]

Komisjo Samorzondowo

Niom nasz adwokat tyż reskiyrowoł
W niyj autonomii zaczontek
Bestoż jyj łojcym sie nom wydowo
Ciekawy życio to wontek

Tu sie ze Buzkym czynsto spotykoł
Kerego Zeflym tyż zwali
Łon do Warszawy czynsto pomykoł
Co uradziyli słoł dali.

[broneknotgeld]

Piyrszy welunek Sejmu Ślonskego
24.IX.1922

Chocioż utropy było z tym wiela
Wywelowali posłow i tela
Ze czach łokryngow - łoziym sztyrdziści
Autonomijo cołkym se ziści

Wolny wzioł mandat ze "Zjednoczynio"
W niym mioł kamratow i głos sumiynio
Ferajna dała posłow nojwiyncy
Trza było teroz fest sie umynczyć
Deliberować do gorki gowy
By rosnoł w Polsce Ślonzek już nowy.

[broneknotgeld]

Drugi Sejm Ślonski 1930

Sztyry miesionce dlo sia łon mioł
Czas taki prziszoł i tref to chcioł.

[broneknotgeld]

Wrzesiyń 1939

Kostek wojynno tułaczka zaczoł
Ku Zaleszczykom jednak niy skryńcioł
We Lwowie osiod - na zachod paczoł
Tukej z utropom se swojom mynczoł

Zdowało mu sie że Francjo ruszy
Dyć cierń skiż tego urosnoł w duszy
Ło familijo wiela se tropioł
Ło Ślonsk i Polska co ktosik topioł.

[broneknotgeld]

11.XI.2005 Bujaków

Kaj Kostek sie rodzioł
Tam tabula bydzie
Zdo sie jakby ze tym
Zaś na Ślonzek przidzie
Możno prochy z grobu
Trefiom do ty szteli
Historyjo tako
Ciekawie sie ścieli.

[broneknotgeld]

Jak Korfanty z Piłsudskim

Przed tym Sejmym Ślonskim na parkingu stoji
Bliko na marszałka i trocha sie boji
Bo łon z ty habety srogo nań tam łypie
Myśli chyba ło tym jak Wojtkowi sypie.

[broneknotgeld]

Dyć Korfanty...

Dyć Korfanty na nos z nieba
Patrzy coroz bardzi chmurny
Złoić skora by nom trzeba
Bo straciyli my Ślonsk Gorny.

[broneknotgeld]

Możno ta fraszka tu niy sztimuje
Dyć rym se ło tym som jakby suje


Marszałek na Ślonsku

We Katowicach marszałek stoji
Koniym chce wjechać do Sejmu
Łon sie nikogo tukej niy boji
Co dobre to wszysko dej mu.

[broneknotgeld]

Polityk ze Siymianowic

We Siymianowicach rodzioł sie Korfanty
Bestoż tyż go majom tukej mocno w zocy
Czy znojdziesz tu kogoś kto by mog być anty?
A możno sie bojom powiedzieć to w łoczy.

[broneknotgeld]

Fryderyk Wilhelm Grundmann

Stoła nom po wojnie jeszcze jego chałpa
Kozała jom kipnońć jakoś naszo małpa
Wiater we tym miejscu szumi durś po cichu
By pamiyntać ło tym katowickim grzychu

Dyć łostatnio ło nim głośniyj tukej słychać
Do jego pomnika zaczynomy wzdychać
Na rynku nojlepi trza go nom postawić
Coby roz na zawsze pamiyńć sie poprawić.

[broneknotgeld]

F.W. Grundmann

Dwiesta lot tymu w Saksonii sie rodzioł
Tukej Katowicom wiela tyż dogodzioł
W końcu możno bydzie mioł teroz ulica
Winno mu to przeca naszo okolica.

(fraszka zeszłoroczno)

[broneknotgeld]

Maria Goppert-Mayer

Katowicko frelka w atomie grzebała
Dyć nawet do bombki sie w Stanach zabrała
Bo wdycki nojbardzi jom ciongło te jondro
I Nobel jyj przipod za cołko ta mondrość

[broneknotgeld]

Richard Holtze

Przewodzioł łon Radzie we tych Katowicach
I łaźniom skiż niego szło sie tu zachwycać
Łodcisnoł tyż tukej swoj sztympel dość fest
Czas by to docynić - stoć nos na tyn gest.

[broneknotgeld]

09.03.2005

Przi badyhauzie zaś Holtze stanie
Niy jymu w gowie teroz kompanie
Dyć skuli niego gyburstag miasta
Kaj był mo wrocić - szkryfna i basta.

[broneknotgeld]

Holtze do Katowic wrocioł
serwisy.gazeta.pl/kraj/1,34309,2593810.html
Choć se ktosik ło to kłocioł.

[broneknotgeld]

Z "badyhauzu" na nos bliko
Ło ubezpieczynie rzyko?

[hruby]

Ruda Slaska - nie za bardzo promujesz to sztucznie stworzone miasto

[broneknotgeld]

Toż promocji nigdy za dość
Jak z tym idzie ślonsko radość.

[broneknotgeld]

Pomnik Jorga

Na gyburstag Jorg tyż stanie
Łoj - z tym bydzie używanie.

[broneknotgeld]

Kaj jest Ligoń?

Fufcig lot minyło
jak pomarł nom Stanik
Możno to niy było?
Czas yno cygani

Duch pewnikym łostoł
na ty ziymi ślonski
Za pokuta dostoł
wyzbiyrać jyj konski?

[broneknotgeld]

Henryk Sławik (1894-1944)

Powstaniec ślonski - niy pszoł komunie
Dyć i nazistom doł sie we znaki
Jeszcze niy prziszoł pokoju koniec
Łon chcioł ich wysłać kaj zimom raki

W wojna Madziary som jego sztelom
Szmuglowoł Żydow - "życie im dowoł"
W Mauthausen śmiertka już jego frelom
Dyć aż do końca mioł dusza zdrowo.

[broneknotgeld]

Fryderyk Wilhelm Gische

Za jego żywota zmiyniyła sie władza
Dyć pedzioł - "Z Prusokym tyż sie tu poradza"

Bo pruske fabryki tyn galman durś brały
I ciynżke talary sie dali sypały

Potomka łon niy mioł i bestoż po śmierci
To wszysko capnyli jego "spadkobiercy".

[broneknotgeld]

Jerzy Gische

Galman we Bobrku mu dobywali
Do Gdańska go wywoziyli
Ze kukfrym potym razym stopiali
I mesing z tego robiyli

Na tym majontek swoj wybudowoł
Szlachecki tyż dostoł tytuł
Choć i we Wrocku suknym handlowoł
Swojo historio tu wykuł.

[broneknotgeld]

Fater Józef Nieborowski

Łon sie urodzioł we Bogucicach
Choć zapomniała go ta dzielnica
Placyk malutki mo niby tukej
Ale w pamiyńci ludzi niy szukej

Wiela podziałoł łon na tych misjach
Tam jego gwiozdka richtig zablysła
We Ekwadorze i Hondurasie
Mocka dokonoł na życio trasie

Nikaragua - tam durś mu pszajom
Jego zasługi tyż pamiyntajom
Z Boaco zrobioł prowdziwe miasto
Ze niego tyż było ślonske ciasto.

[broneknotgeld]

X Wystawa Psow Rasowych 18-20.III.2005

Cołki rok tyn Spodek czekoł
By sie w końcu fest rozszczekoł
Rasow wiela bydzie tukej
Niy zrachujesz - dyć pokukej.

[broneknotgeld]

21.III.2005

W Katowicach na Sokolski budziki zadzwoniom
Jak se zima kajsik skryła pewno jom przegoniom.

[broneknotgeld]

"Dziyń Wagarowicza"

Szkoda żech szkolorzym niy ma
Miołbych laba - to ci tymat
Wziołbych budzik na Sokolsko
I niym zaterkotoł swojsko.

[broneknotgeld]

Jako? Larmo wielke było?
Wiosna w końcu se zbudziyło?

[broneknotgeld]

Wiosna idzie - możno żaby
Ściongnońć na Stawowo trza by
Przeca tam boroka sama
A podobnoś łona - dama.

[broneknotgeld]

Galeryjo Mebli w "Kleofasie"

Tako galeryjo momy w "Kleofasie"
Zdo sie że teroz to jest na czasie
Tam kaj bergmony ciuchy wiyszali
Meblom bydymy se dziwowali.

[broneknotgeld]

GLOB 2005 Katowice 1-3.IV.

To niyjednego ściongnie wandrusa
Możno zoglondna - szkryfnońć tu musza.

[broneknotgeld]

Korez na gyburstag "Cholonka" se gro
Radochy z tym wiela Ślonzok przeca mo.

[broneknotgeld]

Katowice - Miasto Muzyki 31.03.05 - godz.17.oo

Koncert na gyburstag
W MDK "Koszutka"
Krzipce z fortypianym
Kunszt Danczewskich dany.

[broneknotgeld]

Jutro przidzie zaś fajrować
Dyć na razie w wiyrch trza dować.

[broneknotgeld]

Som w Katowicach

Som w Katowicach ponoć dinusie
Podziwać bez to im mogom tu sie
Aże do czyrwca "zaparkowały"
Zdo sie "jurajski park" jakby mały.

[broneknotgeld]

Sto sztyrdziści rymowanek
na gyburstag miasta
Czy z tym jest dopiyro ranek?
Czy już fertig - basta.

[broneknotgeld]

Cosik mało to fajrujom
Możno z czasym se łodkujom
Trza balangi przi welunku
No i możno wiela trunku.

[Gość: zenus]

Kto na gyburstag nie wypije,
tyn pod stoł niych sie skryje

[broneknotgeld]

Słepać przidzie po wakacjach
By nom blysła dymokracja.

[broneknotgeld]

Jorgowe krzidło?

Wele "krzideł" Jorg se stanie
Czy na szworte to "powstanie"?
"Sosnowice" wyńdom możno?
forum.gazeta.pl/forum/72,2.html?f=59&w=26374674&v=2&s=0
Toż ideja dość łodwożno.

[broneknotgeld]

10.IX.2005 Katowice

Na gyburstag zaproszajom
Możno coś we wontek dajom
Przeca downo tukej leci
Rym go ślonski ciyngym kleci.

[broneknotgeld]

Na gyburstag dali
W Gazecie dodatek
Jedno co łosrali
To rymow dostatek.

[hepik1]

Skandal.Ja bym tego tak nie zostawił.Zostaje ci ,Bronku, tylko Strasburgu sie
poskarżyć.

[broneknotgeld]

Hehe - z "Gazetom" gyburstag robiom
Czy ślonskim rymym tako łozdobiom?
Możno inaczy - wytnom tyn wontek
Czasym niyślonski zdo sie to kontek

[broneknotgeld]

Już stoji

Już Jorg ze krykom przi rondzie stoji
Czy sie ło Ślonzek i dusza boji?
-Ze kartki cosik terozki czyto
Co tam szkryfnione? -Ktosik zapyto?

[Gość: pasikoonik]

Zas' cudzo "Prowda"?! Joom niy wykrztusi!
Bez to szkryfli Mu? Bo ... jurz niy MUSI!

I niy wypowjy jak kejsik Gustaw,
co potym mynki ciyrpjou skirz Ustaw.

Uostanie dynkmal jedyn cy drugi,
przidajny kej TU nadyn'doom ... rugi?

Manki niy banoom sprouwjane Ludzioom!
Yno poomniki z Szloonzka wykludzoom.

To po co stouwjac' ciyngjym za rajoom,
kej Szloonzoukowi mynka sprouwjajoom?

Niy lepi sznita grubi uomas'cic'?
Szloonzkymu Dziyjciu do gors'ci wsadzic'?

Tela co nigda TU niy soom w zocy
Poloukoom! Uoone, stracoom sie z uocy?

[broneknotgeld]

Jorg bez kryki

Już utropa tako momy
Kryka zdo sie zocnym złomym
Toż jom utli - ano niy ma
Niy mynczyła ich z tym tryma.

[broneknotgeld]

Na nowo kryka

Mog krykom grozić
Niy niom podpiytać
Teroz trza bydzie
Na nowo zbiyrać.