Samorzond "dezinformuje"

[broneknotgeld]

Hehe, zapowiadali we "Wiadomościach Rudzkich" że cosik szkryfnom ło rocznicy
naszego miasta.
forum.gazeta.pl/forum/72,2.html?f=261&w=13713968&v=2&s=0
No i stało sie. Świynty pamiyńci Jan Dworak pewnikym sie terozki przewroco we
grobie.

[broneknotgeld]

Zafundowoł nom Samorzond ja łamach gazety tekst "Krótki kurs historii".
Szczyńściym że krotki, bo we dugszym jeszcze bardzi by namiyszali. Wyłazi na to
że Samorzond niy za dobrze zno historyjo miasta, a co gorsza, nawet niy umi
rachować.
Jeronie, dyć prawie Bytom cołki rok fajruje 750 lecie swoji miejskości, choć
grod na "Małgorzatce" stoł już za Chrobrego.

Już na samym wstympie tego tekstu musieli pomiyszać staro osada Ruda ze miastym
Ruda Ślonsko, choć ze samego tekstu wyniko, że to jednak jest cosik inkszego.
Skłodanie dzielnic na ta naszo Ruda Ślonsko wyglondało inaczy niż to szkryfnyli.
Przed 1922 były tu same gminy i wydzielony konsek miasta Bytom. Gminy właziyły
do czech powiatow: Hindenburg (Zabrze), Bytom i Katowice. No ja, idzie tu
jeszcze wspomnieć ło konsku Halymby kery podlegoł pod Pszczyna.
Miasto Ruda z 1951 to dzisiejsze dzielnice: Ruda, Orzegów i Godula, a niy yno
samo Ruda.
Trza by sie jeszcze wrocić ło dwa lata, do 1949 roku, do miasta Wirek. Piyrwyj
była to gmina Nowo Wieś.
Zaś miasto Nowy Bytom z 1951 roku to dzielnice: Chebzie, Nowy Bytom, Wirek,
Bielszowice, Halemba, Kochłowice i Bykowina. Jak widać te miasto prziłonczyło
Wirek.
Ło połonczynie Rudy z Nowym Bytomiym w 1959 niy trza sie wadzić. Stało sie tako
i trza to przijońć. Powstało nowe miasto Ruda Śląska.
Na pytanie czy było MIASTO RUDA ŚLASKA przed 1959 rokym łodpowiydż może być yno
jedna.
No chyba że ktoś udowodni mi że taki rachunek jest prawdziwy:
2004 - 1889 = 205

Niy polecom nikomu tego "krotkego kursu historii"

[broneknotgeld]

Wciepna wom tukej jo na to link
wrudzkie.slmedia.pl/miasto.php?subaction=showfull&id=1088678496&archive=&start_from=&ucat=1&
Ze śmiychu możno ktosik już pynk.

[broneknotgeld]

Po prowdzie to zastanowiom sie terozki czamu Ruda Ślonsko jest "nojbardzi"
ślonsko. Przeca momy Piekary Ślonske, Wodzisław Ślonski, Siymianowice Ślonske,
Środa Ślonsko.
No ale moga to tako łod sia pedzieć - jest nojbardzi ślonsko bo przeca tako
musi być stolica ślonski fraszki.
No i w tym autor tekstu mo recht.

[broneknotgeld]

No, zaczoł żech łod psioczynio, ale kolejny tekst mi sie spodoboł. Tyn
zatytułowany jest "Nasze miasto". Możno niy wszysko wyjaśnio, ale niczego niy
przeinaczo. To napisoł ktoś, kto richtig historio naszego miasta zno. Jasno tyż
jest tu napisane, że prawa miejske Ruda i Nowy Bytom miały dostać z dniym 1
stycznia 1940 roku, a że prziszła wojna to nic ze tego niy wyszło. Na mocy
ustawy z 1939 te miasta niy powstały.
Gratuluja autorowi. Tak czimać.

[broneknotgeld]

Terozki kolejny tekst zatytułowany "Ruda Śląska".
Wydaje mi sie że to jest yno jakoś spekulacjo historyczno i po prowdzie niy
wiym ło co tu richtig idzie.
Niy ma tu łodpowiedzi na pitanie ło prawa miejskie miejscowości Ruda Śląska.
W miyndzywojniu nazwa Ruda Ślonsko była w użyciu, ale miejscowość to niy zowdy
miasto.
Możno werci se wejrzeć na somsiednie Zabrze. Prawa miejskie uzyskało w 1922
roku i nikt na tym niypoczebnie niy szpekuluje. Nic to że Zabrze do 1922 było
nojludniejszom gminom w Europie. Nic, że było gminom stołecznom cołkego
powiatu. Historii niy trza przeinaczć, bo to prowadzi w ślepo uliczka.
Poszpekulować szłoby na przikłod tak.
Zabrze w 1922 nosiyło miano Hindenburg i miało inksze terytorium niż dzisioj -
no to możno Zabrze jako tako niy mo praw miejskich, bo przeca dostoł je
Hindenburg.
No, abo tyż inaczy. Prawa miejskie dostoł Hindenburg, a tako Zabrze sie
nazywało oficjalnie łod 1915 roku. Hehe - możno za rok bydom łobchodzić
dziewiyńdziesiyńciolecie miasta, a niy yno 83-lecie. Łokrongło rocznica zowdy
jest lepszo.
No ja, jo to szkryflom ino dlo szpasu.
Wola jednak czimać sie ziymi. MIASTO RUDA ŚLĄSKA mo już w tym roku 45 lot i
tego byda tyż sie czimoł. Trza sie ze tego cieszyć i już zaczońć myśleć ło
szumnych łobchodach 50-lecio. Jo żech zostoł poczynty w mieście Nowy Bytom, a
urodzony już w Rudzie Ślonski i bestoż ty prowdziwy rocznicy MIASTA RUDA ŚlĄSKA
zowdy byda bronioł.

[broneknotgeld]

Jeronie ludzie. Prawie czytom wywiad ze naszym pryncypałym ło tych czynszach w
MPGM. To se werci richtig przeczytać. Nojlepszy jest wstymp. Jak tyn Nasz
prezydynt przejechol sie łostro po komunie i po nos, czyli "homo sowieticusach".
Jo sie tego niy spodziywoł po karlusie kerego wyedukowała przeca komuna, kerymu
dała robota, a nawet stanowisko na socjalistyczny kopalni. No cosik jest w tym
niyrichtig. Coś mi sie nawet zdowo że łon trocha cygani. Jo jest łod niego
młodszy, ale przeca karlus ze familoka. Pamiyntom lata sześćdziesionte, a nawet
poczontki siedymdzisiontych na familokach. Pamiyntom jak lokatory dbali ło te
swoje chałupy. Sami malowali łokna w siyni, schody, wyciyrali to wszysko na
zmiana. Goniyli dzieciokow (ja mie tyż) jak tam trocha rojbrowali. A szczaskano
szyba zowdy winny musioł wstawić. Cosik mi sie widzi, że jo miyszkoł w inkszy
Rudzie niż nasz prezydynt, ale dlo mie ta moja familokowo była tom prawdziwom.
Mie tyn wstymp Stani już jakby styknoł za cały tekst. Gratuluja.

[broneknotgeld]

No ja, przi okazji mogymy se połoglondać dwie strony wykresow i tabelek.
Wyglondo to piyknie ale niy wszysko tam jest. Zachowia se ta gazeta, bo możno w
nastympny bydzie ciong dalszy.
Przi wzroście czynszow z lot 1999-2003 werciyłoby sie tyż podać oficjany
wskaźnik inflacji. Byłoby to wtedy ciekawsze.
No i cołkym brakło wykazow z tymi zasobami miyszkaniowymi. Trza podać
całościowy metraż i ilość miyszkań kerymi sie administruje i to tak żeby
wykozać tyż co dzieje sie we wspolnotach. Jednak te wykupione yno wykozać. Przi
jakiś szczegółowych wskaźnikach lepi ich niy uwzglyndniać. Bydzie to wtedy
wszysko jaśniejsze (liczyć idzie różnie, a niy zowdy sie wykazuje jako), no i
prawo własności trza uszanować.
Koszty administracji wykozali, ale chyba ciekawe by było jeszcze zestawiynie
stanu pracownikow MPGM i podanie ogólnego funduszu płac z rozbciym na te lata.
To przeca niy jakoś tajymnica. Właścicielym MPGM jest miasto czyli my, a
właściciel take sprawy powiniyn znać.

[broneknotgeld]

Tukej tyż bych se terozki musioł zapytać, czamu tego niy ma w numerze
internetowym "Wiadomości". Jo wiym że wakacje, ale niy wszyscy som na urlopach.
Zresztom nikierzy majom dostymp do kafejek internetowych i możno chcieliby sie
ło tym cosik poczytać. Czy tyn nasz tygodnik jest taki "bezduszny". Jak mo
swoja strona to trza ło nia dbać. Gorke tymaty winny być na piyrszy stronie.
No ja, możno sie z czasym poprawiom, ale trza im to ciepać łopatom przed łoczy,
coby cosik ze tego było. Przeca my rudziane muszymy tego wymagać łod gazety
kero jest naszom własnośćiom. Trza im to ciyngym przipominać, a jak ktosik tego
niy umi richtig zrozumieć, to nojlepi zwolnić. Trudno, jak inaczy niy idzie to
trza. Take jest przeca świynte prawo właściciela, nasze prawo.

[broneknotgeld]

Tu tyż dali "cisza"
Yno tela "słysza"
Co "gorke" trza "schłodzić"
Uspać a niy budzić.

[broneknotgeld]

Jutro "Wiadomości" se poczytom nowe
Pewno dadzom teksty zaś "samorzondowe".