Galeryjo Rudzian

[broneknotgeld]

Na papieskim placu
Kładziono kachlami
Kogo tam mieć chcecie?
Szkryfnijcie tyż sami.

[lernest]

Uważam,że ludzie kultury powinni tam być w pierwszej kolejności.Fraszkopisarze
również.
A ponieważ jest jeden wielki to już wiemy kto to będzie!
Ja głos oddam bo lubię je czytać.

[broneknotgeld]

Niychej po śmierci mie podeptajom
-Styknie co teroz radocha majom.

[broneknotgeld]

Przeca jo niy skuli łaski
Robia Ruda pympkym fraszki.

[broneknotgeld]

Dyć idom wybory
Tych co Rudzie pszajom
Niych konceptow zocnych
Wiyncy łoni majom.

[broneknotgeld]

Na gyburstag 50-lecio Rudy Ślonski

Co zrychtuje rajcow Rada?
Z galeryjom bydzie zwada?

[von-cymbergaj]

czy ty się dobrze czujesz?

[broneknotgeld]

Skuli tego niy jest haja
Żech wygrywoł w cymbergraja.

Franciszek Karol von Ballestrem

[broneknotgeld]

Franciszek Karol von Ballestrem

Zaczoł w armiji kariera
Loł Austryjoka Francuza
Koń jednak - tako cholera
Porzondny zrobioł mu uraz

Cugle chcioł czimać we rynkach
Habeta podmiynioł pryndko
Reichstag mioł ze nim udrynka
Bo łon przed nikim niy pynkoł.

[broneknotgeld]

Laurka

Ballestrem Francek mo tu laurka
Bo łon bergmonom płacioł "barborka".

[broneknotgeld]

Franciszek II Ballestrem

Graf politycznom był tyż figurom
Parlamynt Rzeszy wzioł za krabikel
Ruda niy była przi niymu dziurom
Trza nom pamiyntać tyn "tortyntikel".

Ks. Ludwik Tunkel

[broneknotgeld]

Ks. Ludwik Tunkel

Farorz z Kochlowic ze kelniom w rynce
Znoloz se miejsce w tyj ślonski mynce
To co zbudowoł dzisioj nos cieszy
A kto go wygnoł pierońsko zgrzeszył
Daleko teroz jego mogiła
Choć w nasze strony dusza mu wyła
Biskupym prawie byłby tu przeca
Dyć niy pasowoł do Polski neca.

[broneknotgeld]

Papa Gorol!!!

Rożnie ło tym dzisioj prawiom
Słowa prowdy dyć se jawiom
Kajś pomiyndzy czornym drukym
Tyn spokopi kto niy tukym

Wojna prawie sie skończyła
A wygrała jom ta siyła
Kero Niymcom była wrogym
Kajzer se powadzioł z Bogym

Mioł być profit a tu strata
Prziszoł czas na ta zapłata
Gorny Ślonzek w Plebiscycie
Ze bajlagom durś na sznicie

Stacjonuje łobce wojsko
Zdo sie richtig myni swojsko
Kościoł tom opokom łostoł
Dyć niy było ze tym prosto

Papiyż godo - Prziszła pora
Mieć tu administratora
Kandydatow jakiś mocie?
Chocioż dwoch mi teroz docie

Wrocek Niymca doł z Kochłowic
No a Krakow? Toż se dowiydz
Wejrzoł na te Katowice
I Poloka wskozoł - wiycie

Toż łostuda sie zaczyła
Jakoś w tym djobelsko siyła
Niymiec ponoć hakatystom
Polok zaś łowieczkom czystom

Krakow swoje Wrocek swoje
Aż Watykan mynczom boje
Co mioł zrobić Łojciec Świynty?
Złojić wszyskim mocno piynty?

Czy posłuchoł Boski mowy?
Koncept mioł Salomonowy
-Ani jedyn ani drugi
Niy dostompi ty zasługi

-Dyć we Polsce mom nuncjusza
Jymu dać ta "fara" musza
Niychej tam administruje
Kto w Warszawie już sługuje!

Gorny Ślonzek zodziwiony
"Chnet biskupym" kogo momy?
Łojciec doł nom tu Gorola
W imie Boga - Jego wola!

Co zaś dali z tym se dzioło?
Nojpiyrw było niywesoło
Papa pomarł - toż konklawe
Drapko sie zebrało prawie

We zamkniyńciu fest radziyli
W końcu bioły dym puściyli
Wieść na Ślonzek prziszła skoro
W imie Boga - Papa Gorol!!!

Karol Godula

[broneknotgeld]

Karlik G i Francik W

Karlik nosz samotnie
Umar we Wrocławiu
A Francik łodwrotnie
Niywiasta łostawioł

Majontek ich wielki
Wszysko co zostało
Erbły mode frelki
Bo Niebo to chciało.

[broneknotgeld]

Karol Godula

Niy przijoł szlachectwa łod krola pruskego
Stykło że robota godała za niego
Niy chcioł grać jakegoś wielmożnego pana
Harować łon prziwyk łod samego rana.

[broneknotgeld]

Karliczek Godula

W Makoszowach sie urodzoł
W przyszowicko szkoła chodzioł
A łokrzciyli go w kościele
Co i dzisioj znaczy wiele
Tyn zabytek z drzewa cały
W Borowyj Wsi cieszy gały.

[broneknotgeld]

Pszoł geldowi

Toż niyjedyn tako powiy
"Rudzki djosek" pszoł geldowi
Co zarobioł dyć łostawioł
Dobrodziejym w tym se jawioł
Dlo siyroty wiela pociech
Tako go po śmierci mocie.

[jozefosmenda]

Że też nie każdy może mieć takiego "ujka"!
"Przidoł by sie" na dzisiejsze czasy.

[broneknotgeld]

"Ujek" jak ujek - lepsze talary
Joanka ze tym zocniejszy miary.

Paweł Cyganek

[broneknotgeld]

Paweł Cyganek

Karlus ze Nowy Wsi - ja w ty naszy Rudzie
Rok przed piyrszom wojnom tukej sie urodzioł
Zawołać go yno - Paulek kopać pódzie
Na tryning do "Wawla" nojlepi by chodzioł

Już we miyndzywojniu robi se kariera
Bez bala łon przeca nawet żyć niy może
Dyć "Wawel" go sprzedoł - ło jasno cholera
Poszoł do Chrzanowa ze słowym: "Szczyńść Boże"

Tuż przed drugom wojnom gwiozda jego blysła
W meczu Polska - Wyngry fuzbaler był piyrszy
Ale zło godzina na to wszysko prziszła
No bo taki jedyn chcioł być ciyngym wyrszy

Nojpiyrw "Wawel"-Wirek, "Fablok"-Chrzanów potym
Z tych klubow go dzisioj możno pamiyntajom
Przeszło łoziymdziesiont lot nosioł galoty
Pomarł w Rudzie Ślonski. Czy w zocy go majom?

Piotr Latoska

[broneknotgeld]

Piotr Latoska

Niy doczkoł Wielkanocy
Pomarł nom we środa
Bog go mo w swyj mocy
Rudzie jednak szkoda

Kształcioł se w Krakowie
Rzeźba upodoboł
Dyć u nos tyn czowiek
Na grubie fedrowoł

A przeca mioł termin u Dunikowskiego
Jak robioł tyn dynkmal Czynu Powstańczego
Świynty Ance łod sia cosik doł Latoska
A i naszy szteli naprowdy niy troszka

We wtorek po świyntach - łod Józefa w Rudzie
Kondukt z niym na cmyntorz pewno wielki pódzie
Wongel był dlo niego richtig darym Boga
Bergmon no i rzeźbiorz stanoł już u proga.

(10.04.2004)

Ks. Paweł Lex

[broneknotgeld]

Ks. Paweł Lex (1869-1937)

Wele Głubczyc w Sułkowicach nasz Paulek se rodzioł
W Baborowie zaś zaliczoł łon szkoła ludowo
Do gimnazjum głubczyckego karlus potym chodzioł
No i w końcu czas roboty - tako mi sie zdowo

Za briftryjgra we Orzeszu ździybko se nałazioł
Pewno go tu tyż niyjedyn pies mocno łobszczekoł
Dyć ksiondz kuzyn religijom ponoć go zarazioł
Możno jednak łon już downo yno na to czekoł

Teologio we Wrocławiu pilnie sztudiyrowoł
Tam tyż zaczoł inkszych budzić do ducha polskego
W gowa wlazło - dyć se z tego sprawa chyba zdowoł
Że pomacoł jakby "krziża" richtig niylekego

Kapelonkym był w Kończycach potym Kochlowicach
Na farorza se zahaczoł w nowy parafiji
Ty halymbski - choć wiedziała ło tym okolica
Że łon bydzie tukej bronioł polski "familiji"

No i tako tyż se stało - fest podpod u Koppa
Z łorganistom był na łostro ło jynzyk niymiecki
Szczimoł kary choć dlo niego była to utropa
Jednak nosioł ksiondz sutanna a niy jakeś kiecki

Przeszła wojna - po somsiedzku juzaś Polska była
A Gornymu Ślonsku tukej plebiscyt fundnyli
Toż farorza Lexa we tym tyż roboty siyła
Że na Polski w końcu stronie parafiany żyli

Przi Grażyńskim mioł sie dobrze - dziekanym był przeca
Nojpiyrw we Krolewski Hucie potym w Kochłowicach
Dyć Ponboczek tyż był łaskaw - wzioł go - tako kleca
Niym zaś stała sie niymiecko cołko okolica.

Ks. Piotr Halymbowicz

[broneknotgeld]

Ks. Piotr Halymbowicz z Kłodnicy

Ksiondz Piotr Halymbowicz we piytnostym wieku
Już w Pszczynie sprawowoł posługa czowieku
Piyrszy stond sie kształcioł w Uniwersytecie
Jagiellońskim - dyć łon zocny przecie
Trza wspomnieć karlusa we tym naszym wontku
Kryć tego niy idzie bo to niy w porzondku.

Jan Bonifacy Wypler

[broneknotgeld]

Jan Bonifacy Wypler

Niy yno mietłami Kochłowice słynom
Przeca poligloty były tyż dziedzinom
Znoł tela jynzykow że ciynżko zrachować
Toż komu terozki przi Wyplerze stować?

[broneknotgeld]

14.V.1890

We dziyń świyntego Bonifacego
Zrodziyła go Wyplerowo
Lot już minyło wiela łod tego
Dyć we pamiyńci niych stowo.

[broneknotgeld]

21.V.1890

Ksiondz Matyszok łokrzcioł wtedy Jana mianym
Bonifacy - tako bydzie mu tyż dany
Przeca patronowoł matce przi porodzie
To se dogodali by było we zgodzie.

[broneknotgeld]

Wyplery

Rod ich podobnoś rycerski miary
We ziymi pszczyński dość znany
Na Gornym Ślonsku richtig prastary
Z tym Kochłowicom był dany

Dyć fater Jana miano mioł Pyjter
I chałupnikym był yno
Biydny - toż przeca już inkszy cwiter
Tego sie niy wypominio.

Muter - Franciszka ze Paintow domu
Zocności wielki kobiyta
Co światu pszoła niy po kryjomu
Wierzyć trza tako - niy pytać.

[broneknotgeld]

Potki

Antek Dolinsky - Cila Kieltyka
Bajtla łod Francki i Antonika
We krześcijaństwie tako chcom wspiyrać
Na droga z wiarom jego zaziyrać.