Ło tym co niy tak downo i teroz w Polsce

[broneknotgeld]

Afera "Starachowice"

W "starachowickim" kotle were
Kogoś ora z tego biere
Durś afera łeb podnosi
By ukryńcić go sie prosi.

[broneknotgeld]

Konkurs na prezesa TVP

Jo stawiom na Rywina
Bo łon mo tyngo mina.

[broneknotgeld]

Tyn ksionże regynt - imć pan Wierzchowski
Piyrszy we fraszkach ponoć terozki
To już jest jakoś mania u niego
Chce samozwańcym być łod wszyskego.

[broneknotgeld]

Bin Laden nom grozi - tako polityka
Mo problym bo niy zno ministra Janika.

[broneknotgeld]

Nabor na ławnikow teroz sondy majom
Ponoć tyla chyntnych że fest przebiyrajom
Możno dieta kusi bo coby inkszego
Dzisioj to już piniondz wert czasu swojego.

[broneknotgeld]

Słyszołch co w konkursie na TV prezesa
Szans mo tyn Kwiatkowski podobno już myni
Dyć jo chopa tukej na pewno pociesza
Niych sie przed komisjom piyknie zaczerwiyni
Nojlepi tak cołkym - aż po same uszka
Tyn kolor to przeca jego atut wielki
Znojdzie sie we jury jedna dobro wrożka
I niyważne bydom jakeś duperelki.

[broneknotgeld]

Karty w grze
TVP

Pełno talio kandydatow sztartyła do stołka
Kero karta sie łostanie? wysoko czy gołka?
Tuzy krole ołbry dupki no i wiela blotek
Te łostatnie szans niy majom - za wysoki płotek

Możno jednak tuzy krole połomiom se zymby
Porzduchajom se nawzajym - widać to ze gymby
Tyż drobnica zmynczy "jury" - pierońsko skołyje
Stołek chyci jakiś dupek - wiatr w żaglu poczuje.

[broneknotgeld]

Kroji sie nom sztrajk na banie
Czinostego to sie stanie
Inksi tyż sie włonczyć chcom
Tak to jest jak w Polsce krom.

[broneknotgeld]

Czerwone fuzekle

Jakbych teroz posłym był
To bych szwajom mocno wył
We fuzeklach tych "czerwonych"
Łobtyroł bych sejmu "piony".

[broneknotgeld]

Mie tyn Hausner imponuje
Dobry we tym - swoje suje
Rzond terozki - ło cholera
Czimie sie nom skiż Hausnera

Miller Janik - jedna blaga
Im noleży sie już laga.

[broneknotgeld]

Janika tyn sejm niy ściepnoł
Choć łon cosik sie nom hepnoł
Jakoś już sie chop niy radzi
Ale stołek mu niy wadzi.

[broneknotgeld]

Oberpolicmajstry teroz se welujom
Zaś kołocz z zokalcym możno wyrychtujom.

[broneknotgeld]

Janik teroz ponoć "inny"
Piyrwyj jaki był? Dziecinny?

[broneknotgeld]

Narodowy Fundusz Zdrowia jednak wcale niy jest "zdrowy"
Trza nom zmiynić jego nazwa - niych to Fundusz jest "Choroby".

[broneknotgeld]

Komisjo Rywina ksionżki szkryflać bydzie
Potym im reżyser pomoże w tyj biydzie
Znajomy producynt na ekran to ciepnie
I Oscar we kapsi a komuś sie hepnie

Ze Polski nagrody po drodze tyż wlecom
Ale bydzie piyknie - już sie tym podniecom
Kroji sie nom polske arcydzieło świata
Chwała z tego przidzie na dość duge lata.

[broneknotgeld]

Tam tyż stołkami majom welować
Wiek robi swoje - niy trza udować
Czeba biskupom tyj młodszy krwi
To taki borok jak jo tyż wiy.

[broneknotgeld]

To nom pierońsko może zaszkodzić
Ledwo sie cosik zaczyło rodzić
A już to tympiom - podatki sujom
Ślepe niy widzom że państwo psujom.

[broneknotgeld]

Coś sie teroz przipomino
"Grupa czworga" - ale kino
Skośne z tego już mom łoczy
Co im jeszcze tam wyskoczy?

[broneknotgeld]

Ponoć "kurwikami" już sie tam niy mynczom
Ci z "Samoobrony" pewnie teroz jynczom.

[broneknotgeld]

Telewizyjne "czi po czi"

Rada problym wielki mo
Kwiatkowskiego dobrze zno
Z niym na gora czy we doł?
Poł w ta strona w inkszo poł
Kto w konkursie przyńdzie dali?
A kogo sie już wywali?

[broneknotgeld]

W automatach tyż afera???

Jeszcze skorka niydźwiydź nosi
Ło dobicie sie niy prosi
Zymby łostre i pazury
Jak tu dobrać sie do skory?

[broneknotgeld]

Ring wolny teroz: Wagner - Rokita
Jo za "arbitra" dołbych Anita.

[broneknotgeld]

Łoj Anita! Anita!
Dziwno żeś kobiyta
Chocioż chodzisz w pionie
Widza że coś toniesz.

[broneknotgeld]

Janik hasło take ciepnoł
- "Skora w prawie niy jest rowno"
Jedyn gwizdnoł inkszy hepnoł
A bandyta pedzioł - Gówno!

Łon i tak mo wszysko w dupie
Jak już chyto za ta gwera
A pomysły wszyske gupie
Yno wnerwiom. - Ło cholera!

[broneknotgeld]

Widać że grajom w mocnym zespole
Kaj "rynka rynke durś myje"
Państwowych mediow to tyż magole
Choć wiela na to już wyje

Dyć ordynaci durś robiom swoje
Jejich na wiyrchu jest zowdy
Niby ło prowda som wielke boje
A czy my chcymy tyj prowdy?

[broneknotgeld]

Konkursy na szefow lokalnych telewizji TVP

Już na sztarcie "ustawione"
Ponoć dlo tych swojich
Choćby był prezesa koniec
Ło to sie niy boji

Styknie yno w rynkach czimać
Stolec ło tym czasie
I zaś bydzie - "Piekła niy ma"
Dlo tych co w "A"-klasie.

Re "Nojbardzi znany i lubiany"

[broneknotgeld]

Lepper "znany i lubiany"
To ci lyk na polske rany.

[broneknotgeld]

Jaskiernia - Lepper to ci jest "duet"
Razym na lodzie zrobiom piruet.

[broneknotgeld]

Saddama już copli - powiy łon Bushowi:
"Ta wojna niy była przeciw Irakowi"
To teroz trza zwinońć wojynne zabawki
A i nom by stykło iracki ruchawki.

[broneknotgeld]

"Partyzancko wojna" - teroz słysza w mediach
We tym okupancko tyż przeca "tragedia".

[broneknotgeld]

Sejm budżet uchwaloł jeszcze przed Wilijom
Pokozoł nom wszyskim z czego partie żyjom
Choć PO zgłosiyła łobciyńcie dotacji
Inksi powiedzieli - "Niy ma we tym racji".