Dynkmal Rotfanow

[broneknotgeld]

"Pomnik Czerwonych Sztandarow" - 1970

Stanoł w Dombrowie ze "woli ludu"
Na postumyncie karlus i frela
Zdo sie - niy bydzie takego cudu
Kery by zmynioł ta naszo sztela

"Wiesłowca" kery z "edkowcym" szoł
We jedno jakby tyn dynkmal spinoł
Kto by to dzisioj słyszeć zaś chcioł?
No i tych fanow łopot wspominoł?

[broneknotgeld]

1990

Kurde - dynkmal szpryngnońć mieli
We Dombrowie co sie stało?
-Ci co go łobronić chcieli
Wachowali tu niymało

Mode frelki i karlusy
Broniom tako dyć "Hendriksa"
Sie tysioncom chciało ruszyć
Toż to cołkym inkszo biksa

Już magistrat w tym przegrany
Pomnik łostoł -"znak młodości"
W inkszych czasach tukej dany
Dzisioj wiela już niy złości.

[broneknotgeld]

"Pamiyńci Jimiego Hendriksa"

Ano - toż dynkmal mioł druge miano
Już w nowych czasach mu przipisano
Dyć wystawiyli go we tym roku
W kerym tyn Jimi wyloz ze ćmoku.

[broneknotgeld]

Czyrwiec 1990

Chcom go szpryngnońć?! - Toż trza bronić!
Po co nom kaj ińdzi gonić?!
Dyć tyn dynkmal nos tyż - modych!
Na to niy dowomy zgody!!!

[broneknotgeld]

"Dombrowske Krzciny" - 12.VI.1990

Niy - to niy yno jest jakiś bajer
Był we tym mieście skiż tego fajer
"Hendrix" w Dombrowie mo wielke świynto
Uciecha niychej kożdy spamiynto.

[broneknotgeld]

Sława

Sławno se Dombrowa skiż tego zrobiyła
Nawet SNNie przeca wtedy była
A dynkmal mioł szansa łostać jeji logo
Toż by to niy było nawet richtig drogo.

[broneknotgeld]

Pucowanie - czyrwiec 1996

Łodnowiony dynkmal - malunki se tracom
A przeca historiom łone go bogacom
Toż i niy dziwota co zaś go sztrajchujom
Swojego "Hendrixa" w tym kamiyniu czujom.

[broneknotgeld]

1 maja 1999

Zdo sie jakby stare wroco
Czy zaś fany zalopocom?
Dynkmal tyż wypucowany
Proletarjat sztiglowany?

[broneknotgeld]

A dzisioj

Możno dzisioj laku szkoda
Dyć co ło tym by niy godać
"Hendrix" ciyngym jeszcze trwo
Dobrze tyż Dombrowa zno
Yno wele niego pusto
Chocioż piyrwyj było "tusto".

[broneknotgeld]

12.VI.2005???

Ajchlowe miast ze "sztandarami"
Toż historyjo - spokopcie sami
Możno zrychtować lokalne świynto?
By już na zowdy czowiek spamiyntoł.

[broneknotgeld]

Łobrona dynkmalu - czyrwiec 1990

Prziszły frelki i karlusy
Stond niy chcieli se już ruszyć
Jak to szpryngnońć?! -Razym z niymi?!
Możno we tym cud na ziymi?!