broneknotgeld
02.08.06, 17:26
Toż polecom taki tekst we dzisiejszych "Wiadomościach Rudzkich".
Jak z niego wyniko - sprawa "basynow Oti" mo sie dobrze - tako przinojmni
uwożo naszo władza i tyn cajtong.
We jedno to jednak jo niy uwieża - ano w to jakoby prawie na nos chciałyby se
wzorować inksze samorzondy.
Gyszeft aquaparkowy jest przinojmni we Polsce richtig ryzykowny - inksi już
to wiedzom.
"Basyny Oti" zaś majom być budowane z kredytu żyrowanego przez miasto.
W dodatku miasto mo być gwarantym zyskow społki na cołke 25 rokow.
No, jakby przi tymu było choćby wiynkszościowym udziałowcym społki
inwestycyjny, to byłby jakiś argumynt - za.
Dyć prowda jest ikszo.
To myńszościowy udziałowiec biere na siebie wszyske zobowionzania finansowe
na cołke 25 rokow (wyłazi na to że możno i moje prawnuki bydom to spłacać).
Ponboczku, toż Ty wiysz, że ło budowie krytego basynu na Halymbie, na miara
ty dzielnicy, godało se już poranoście rokow tymu, jak jeszcze elektrownia
larmowała nom po nocach spuszczanom parom.
Toż i jo z dzielnicowego basynu krytego pierońsko bych sie ucieszoł.
Dyć jak se tak myśla ło tym finansowaniy "basynow Oti", to richtig se boja.
