w36
28.04.04, 08:43
Bronek, chopie kajś Ty jest.
Je tako robota, wiysz i niy ma to tamto, trza sie chycić. Forum uroda trza,
chopie, rozkryncić, wiysz jak. Tam chopie, siedzom same baby i klachajom o
takich wiysz szmyrach co to sie potym szmarujom na spanie, jakichś parfinach,
a potym chopie durś ino dowej pijondze. Ciupazka godo że to ogłupiajonce tak
godoć na jedyn tymat i że to je błond merytoryczny. Bestorz tam trza zrobić
porzondek i pokozać co my tysz som mondre i potrefiemy dyszkutować o mondrych
rzeczach, a nie takie ino klachy.
Idymy tam terozki we trzech, chopie, jo, Ty i hepik. Ty włazisz tam i sujesz
fraszkami, a jo ze hepikiem bydymy Cie osłoniać. Ciupazka tukej zostowo i
pilnuje Twoje fraszki, a tam by jom tylko kusiło godać o tych babskich
klamotach. Jak Ty bydziesz suł, to jo ze hepikiem robiymy dyszkurs, wiysz jak,
coby nie było że sie niy godo o innych rzeczach. Bo to som różne ludzie, wiysz
jak.
Ciupazka, wiysz, łona niy je od nos, ale jest gryfno dziołcha, chopie. Łod
niyj jo sie dowiedzioł, co takie łone, wiysz, jak włazisz na forum, takie co
tam pisze łod góry, tytuł możno sie to nazywo. To jo myśloł, co to pisze że ło
tym sie pisze na forum, a ło inkszych rzeczach sie pisze tam kaj to pisze że
sie pisze. No a łona mi pedziała co to tak nie jest, i jak piszysz, to je
napisane tam kaj piszysz, a niy kaj by fto myśloł, bo to je wymiana myśli i
poglondów, jak łona to pedziała, a to sie kożdymu noleży. Widzisz chopie jaki
to czowiek jest czosem gupi, i wierzy co tam adminy godają, a łone przeca som
gorole.
Bo wiysz chopie, tam we tym cajtungu, łone majom taki regulamin, co tam pisze,
że łone Ci mogom ściepnonć to co napiszesz, ino jak byś ścioł coś sprzedować,
abo co byś pisoł coś na kogo co mo narodowośc abo co inksze. A tak chopie to
mogom Ci na pukiel skoczyć. No ale co Ci byda godać, żeś już sie nie roz
poradził.
A te forum uroda co tam trza iść coby im tam pomóc,chopie. To wiysz jak
wleźiesz na cajtung, idziesz na forumy, idziesz przez kobiyta, abo nawet od
razu. Tak godom, coby my sie potracili, chopie.
No i chopie wiysz co tam u nich na liczniku, chopie, dwiestapiytnoscie
tysiyncy. To trocha tak możno dużo, bo niy bydzie tak od razu widać co my tam
wleźli, i ustawiyli te forum we dobrym kierunku. Bronek trza bydzie możno tak
wiyncyj tak, wiysz z tym kopiuj, wklyj, co by licznik klupoł, Ty jusz mosz
grajfka we we tym, co Ci byda godoł.
No a jak by fto mioł wonty, co sie coś niepodobo, to wiysz co mosz godać, a my
ze hepikiem zrobiymy haja na fof, co to jest tam specjolnie na takie haje, jak
sie kogo wyciepuje.
No i jak bydzie trza, przidom tyż te chopy, wiysz co to godajom że Ślonzokom
sie noleży, i do Niemców tyż. Łone majom recht, bo tak sie myśla, co we tych
Niemcach to jusz ino zostali same Ślonzoki i Turki. Bo to łod nos kożdyn jedyn
mo we Niemcach, ujka, cera abo somsiada, to jusz ich tam musi być wiela. A
Niemce to siedzom na Kanarach. I to widzisz , chopie, co jak bydom zaś
wybiyrać bundeskanclerza, to musi na noszego trefić, bo kaj tam Turek by sie
nodowoł. I żech tyż słyszoł że tam we Niymcach, to jusz we sklepach po noszymu
sie towary nozywajom, no przykłod bratheringi, blajsztifty, bombony, knobloch
abo nudle, tak tam ło nos dbajom. A tu chopie, u nos, jak pojedziesz choby do
Warszawy to coroz myniej rozumiejom, co sie do nich wyraźnie godo.
A te we tyj Warszawie to ścieli Cie wyciepać na jakoś bloga. Co by wyglondało
co my tukej som jakieś gorsze, bo hajery. A przi noszym wonglu życie grzejom,
Warszawioki pierońskie.
A chopie, do tyj unii to my tyż muszymy sie pokozać. Trza nojprzód łobejrzeć
we internecie, te ich cajtungi nojlepi niymieckie, bo tam nos powinni
zrozumieć łatwiyj, jak tam od nos som tyż. Jak sie znojdzie takie cos, jak tu
u nos, takie forumy, to tyż trza by im łone rozruszać, i tyż pilnować co by
sie nie ogupiali jednym tymatym, wiysz jak, chopie. I łone bydą widzieli co
dobrze zrobili co nos do tyj unii wziyli. I nowet potym by ścieli te
globalisty przijechać tak jak terozki do Warszawy, to potym na Halymba, co by
sie w Asie spotkać, no ale by trza szperplata na łokna przibijać, to nie wiem
co by sie to nom werciło.
Terozki tela. Trzim sie chopie,i dej znać jak przidziesz, co by my ze
hepikiem byli gotowe.
